Santali Sereń Akhṛa Talate Gidrạ Umer re Baṅ Bapla ar Ńu Bubulaḱ Babotre Cehaona Sabha

Sokolbar (01.09.2023) ńuhum 7:00 baja jokhen Godagari upozila reaḱ Babudang Alor Pathsala iskul maṭh re Santali pạrsite sereń akhṛa talate Gidrạ Umer re baṅ Bapla ar Ńu Bubulaḱ Babotre Cehaona Sabha hoyena. Noa Santali sereń akhṛa doe bondobosleda NAGR (National Agency for Green Revoluton) ar akhṛa ạyur re tahẽkana NAGR ren Program Officer Prodip Hembrom. Sereń akhṛare selet́ko tahẽkana Baṅgladisom ren Santali pạrsiren sereń dol Seṅgel band. Sereń akhṛare media partner lekate sorre tahẽkana Santali Online Newa Portal ‘The Santals Times.com’.

Kolhe ar Santal jạtko talare gidrạ umer re baṅ bapla ar ńu bubulaḱ babotre sereń akhṛa talate hoṛko aodhan ar sontorko lạgit́ge noa Santali sereń akhṛa bondobos akana. Santali pạrsi reaḱ Band ‘Seṅgel’ disom ar disom bahrere hoṛko ṭhen ạḍi namḍak akana. Onko do metaḱme ‘Seṅgel’ band do jao sermage nawa nawa sereń talate hoṛko udgạuet́koa. Eken sereń eskar do baṅ noa sereń talate akoaḱ dhorom jaega khon hoṛko ṭhen cehaona kathako pasnaoeda. Babudang Alor Pathsala maṭhre sereń akhṛare tahẽkana Seṅgel Band ren Maraṅić -John Hembrom, Vocal Rinku Mardi, tumdaḱ ru re tahẽkana Shimul Mardi, ṭamaḱ ru Daniel Sukmal Hasda, tirio oroṅre tahẽkana Kamiel Mardi, Octopad re doe tahẽkana Polash Mardi, ar Giṭar re tahẽkana Christoline Niloy Hembrom.

NAGR (National Agency for Green Revolution ren kạmiạić (kormokorta) doe baḍae ocokeda, noa songstha do aema jila re sikhnạt, niropon hoṛmo sãota cehaona (social awareness) babotre kạmi kana. Noa ṭoṭharen hoṛko sereń talate gidrạ umerre baṅ bapla ar ńu bubulaḱ ar dengue birud teṅgo daram lạgit́ge nonkan akhṛa bondobos akana. Darakan dinkore arhõ nonkan kạmihora se akhṛa hoyoḱ reaḱle kurumuṭuia. inạ chaḍa hõ Sereń akhṛa re hoṛko aodhaon ko selet́ kathae roṛkeda Prothom Alo Chapainawabgonj ren protinidhi’, Anwar Hossain Dilu. Akhṛare Babudang selet́ aḍepase khon amdaj  bar sae khon hõ ḍher hoṛko jarwalena.