Joto rajako modre Ahabge bạṛiće tahẽkana. Uni do Sidon rajren hoponera uni bạṛić Isebele baplakedea, ar Baḱal boṅga lạgit́ mit́ṭeć mundile benaoket́a. Eliạ nạbi doe jạhiradea, ḍanḍom ńutumte 3 serma khaṅgoṭ hoyoḱa mente, onate joto gaḍa soḍoḱ ańjet́ente disom hoṛko reaḱ ạḍi dorloe hoyentakoa. Ona jokheć Eliạ do Sarephat naṅgrahare mit́ṭaṅ rạnḍi maejiu ṭhene tahẽyena, ar uni maejiu reaḱ holoṅ kanḍa do baṅ khạlilena, ar sunum cukạḱ do baṅ ạjạuṛilena, ar uniren hopone goćen khan, Eliạ do Probhui koe kedete gidrạ reaḱ jivi ontorre ruạṛentaea, are jivet́ena.
Ona 3 serma paromen khan, Eliạ do Isor hukumte Ahab ṭhen senkate Karmel burure Baḱalren nạbikoe jarwaket́koa. Baḱalren nạbiko do mit́ṭaṅ damkom boṅgakate siń sạṭuṕ akoren boṅgako dạhnạukedea enrehõ uni bae goṅlaḱa. Eliạ do siṛogkateye metat́koa, Ma arhõ ãṭ nõḱte hohoape tho, aparen boṅga paset́e bundis baṛajoṅ kan, se paset́e jạpit́ akat́! Ạyuṕ ber jokheć Eliạ do Probhu ńutumte mit́ṭen damkom teṅgenkateye koeket́a, E Probhu, nitoḱ do ma udugme, am eskarge Isrạyelren Isor ar iń amren guti kanań mente! Khange Probhu reaḱ seṅgel nũrente jeredoḱ samaṅoḱiće jomkedea. Ona ńelkate disom hoṛ do Baḱalren nạbiko saṕkateko goćket́koa, ar serma ńũrente jhomor jhomor daḱket́a.
Khange Isebel Eliạ reaḱ jivi ạguitae lạgit́e sendraket́te Eliạ do hãhãkarte dạṛtege hoyentaya, ar Isrạyelko Probhu reaḱ bondobosko giḍi akat́taete dhikte gujuḱe menwana. Menkhan Probhui metadea, Do ruạṛme, Baḱal boṅga ńutumte bako ikṛum akan 7,000 hoṛ coko sareć akantiń.
Nabot reaḱ mit́ṭeć darkha bagwan tahẽkantaea, ar ona do Ahab kiḱriń sanakedea, raj dolan pheḍre tahẽkante. Ar Nabot do bapoti ạidạri ạkriń bae rebenlente, Mose ạn reaḱ mana iạte; Ahab do mon khaṭoyente daḱ daka bạgiket́te oṛaḱreye gitić baeyena. Isebele metadea, Ma beret́kate jom nũite rạskạḱme tho ińge ona darkha bagwaniń dokholama. Khange Isebele do murubikoe hukumat́koa, hoṛko ńamkoa mente eṛe goha em lạgit́, baṅma, Nabot do Isor ar raje sarap nindạu akawat́kina. Nabot do ere gohako reaḱ kathateye tiń goć ocoyena, ar Ahab do uniaḱ darkha bagwan doḱkhole calaoena. Khange Probhu do Eliạ uni ṭhen bagwanreye kolkadea metae lạgit́, baṅma, setako Nabot reaḱ mãyãmko jalket́ ṭhen amaḱ hõko jaltama, ar Isebel do setako ciro jomea. Ona tayom Ahab do mit́ṭeć lạṛhạireye gurena, ar uniaḱ mãyãm do lạṛhại gạḍire joroyena, ar Samariạre gạḍiko maḱńjao ạruṕ saphae jokhećre, setako hećkate mãyãmko jalket́a, Isebel do khiṛki duạr khon ḍheka ńur ocoyente uniaḱ mạ̃ṛĩ do setako ciro jomket́a. (1 Raj.16-22; 2 Raj. 9, 30-37)
Eliạ do mit́ṭeć birbãore seṅgel sadom gạḍite jivet́ge sermateye rakaṕ ocoyena, ar teṅgo akan Elisạ do onae ńelket́a, ar Eliạ reaḱ oyon aṅgrope ńawana ar uni tayomte nạbiyena. (2 Raj.2.)



Comments are closed.