Dãsãe

Dãsãe reaḱ ṭhik-ṭhak bhoṅ/beakha do̠ menaḱa. dãsãi babotre gapalmarao lekhać pạhilrege hijuḱ kana nakron reaḱ bisoe. Dãsãi ńutum do̠ oka khon upel akana ar noa reaḱ mane do̠ cet́ kana? Aema guni hoṛkoaḱ mo̠t lekate lugu buru dãsna ńutuman jaega khon noa eneć reaḱ cạlit́ do̠ ehoṕ lente noa do̠ko ńutum keda dãsãi.

Kathare menaḱa, kheṛwaṛ gosṭi ren hoṛ koge jo̠to̠ khon pạhil Bharot borso reaḱ hasare jaṅga ko do̠holeda. Bharot borso reaḱ hasare unko aema dhao ko lạṛhại akana. Menkhan bharot borso reaḱ hasare pạhil utạr oka lạṛhại hoelen, ona do̠ hoyoḱ kana jahãe mit́ Arjo jạti são. Ona oktere Arjo koren mukhiạ do̠ dagabaj Indro ar Kheṛwạṛ ko ren mukhia do̠e tahẽkana “Huduṛ Durgạ”. Noa lạṛhạire Indro do ekalteye hirạu ocoena ar sareć palṭon ko ante lạrhại ṭandi khone dạṛ keda. Ona tayom noa lạṛhại reaḱ lo̠lo̠ hoe ṛeaṛen tayom Indro do̠ buddi kate midogoḱ reaḱ katha dut hoteteye kolkeda Huduṛ Durgạ ṭhen. Ona midogoḱ reaḱ katha do tahẽkana lạṛhại khon sahaṛakae tahẽkate bapla hotete sompok tear kate midogoḱ reaḱ. Noa kathare Huduṛ Durgạe rebenen khan Indro do̠ Arjokoren jo̠to̠ khon mońj husnak kuṛi sandes lekate Huduṛ Durgạ ko emade tahẽkana. Uni kuṛiaḱ ńutum do̠ tahẽkana “Debi”. Noa midogoḱ tear tayom Arjoko do̠ jãhãtin oktorege begor chaṛtege Kheṛwaṛ gar bhitri calaḱ hijuḱ reaḱ ạt ko ńamkeda. Note Debi do̠ Indroe hukũm adi tãhẽ kana Kheṛwaṛ gaṛ bhitri reaḱ khobor metaḱme Huduṛ Durgạ  do̠ tinreye joma, tinreye  jạpida, oka okto do̠e rạskạjoṅa, oka okte do̠e ńu-buluḱa ar oka lekae tahẽna emanteaḱ din hiloḱ reaḱ jaoge soṅbad ko kulgot́ kaḱ. Indroaḱ hokũm lekage Debi do̠e onkaet́ tahẽkana. Debi do̠ ać jãwãe ṭhen dagabaj hoyoḱtaya ona do̠ Debi khaṭigeye baḍae kan tahẽkana. Jạtiaṛ cetanre behũṭ khạtirte ar mit́ do̠ Indroaḱ hõ hukũm tãhẽkana. Nonkate aema din reaḱ kho̠bo̠r kote Indro do̠e nichinena je̠ ṭhik noa oktege din hiloḱ ńindạ noa okteye jirạu kan tahẽkana. Ạt́ bujhạu kate Indro do̠ bar-pe goṭen bir joddha ko peṛa lekateye kolket́ koa kheṛwaṛ gaṛ reaḱ bhitri mahalte. Debi selet́ Huduṛ Durgạ phenkaoe lạgit́ kuḍạm seaḱ duạrte. Debi ar Huduṛ Durgạ bana hoṛ phenkao tayom, sanam palṭonko ante ona ńindạge arhõ Indro do̠ kheṛwaṛ gaṛe jhapṭao keda. Khan kheṛwaṛ gaṛren barhere horho ko palṭon do lạṛhại ko ehopleda ar unko modren okoe ko do bhitri mahalte ńir sen kate Huduṛ Durgạ khobor ko emae kan tahẽkana. Menkhan unko sen kate ko ńelkeda bhitri mahal ma phãkage, Debi ar Huduṛ Durgạ okoe hõ baṅ ko ńel ńam let́ kin khan unko do̠ko akbakao ena. Kheṛwaṛ palṭon kodo̠ ko lạrhạilen rehõ dilate do̠ baṅko lạṛhại dareada. Khan unko do̠ ạyurko ṭonṭate ekalteko harao ocoena. Oraḱ duạr jeret́ salaḱ maejiu koko bemanot ocoena ar maejiu-herel, gidạr-pidạr sanamko ge dạṛ kate buru gajarre asrae ko hatao keda. Debi doe dagabaj akadae ar Huduṛ Durgạ do̠ko goć kedeya!

Ona tayom setaḱen khan kheṛwaṛ palṭonko do̠ galmarao lagit́ ko hohokeda. Unko do̠ galmaraore noako goṭa keda je̠, Debi-Durgạkin jahãlekatege sendra oḍuk kate uddharkin hoyoḱa. Unkoaḱ diṛho biswas Debi-Durgạ jahãregekin calao ocoge okoe hõ unkin baṅko goć daṛeakina. Menkhan unko do̠ baṅko badae kan tahẽkana je̠ Debi do̠ dagabaj akada ar Durgạ do̠ko goćgiḍi akadia.

Dasãi palṭonko maejiu sajaoḱ reaḱ motlob:

Palṭonko galmarao kate noako goṭakeda, unko do̠ Debi ar Durgạ sendra ko calaḱa ekalte eṭaḱ chinante, hatiạrko ukukate sãore tahẽna. Unko do̠ tear kateko calaḱa, jahãrege unko do̠ unkinko sendra ńamkina, onḍege lạṛhại kate unkinko uddhạr kina. Onate sanam juddhako ekkalte maejiu lekako sajaoena. Unko do̠ akoaḱ Aḱ-ạpãṛĩko ko uku dohokeda buạṅ bhitrire metaḱme jeliń ho̠to̠t́ reaḱ ṭhoṅga bhitrire ar ona jeliń ho̠to̠t́ reaḱ ṭhoṅga do̠ Aḱ reko to̠l do̠hokeda. Okoeaḱ Aḱ-ạpãrĩ baṅ tãhẽkan tako unko do̠ akoaḱ taṛwaṛi sạṛi reaḱ gochareko uku do̠hokeda ar ḍhal do̠ tire saṕkate kạṭhite buạṅ reaḱ saḍe são milạu kate ruruko lagaoena.

Dãsãi eneć-sereń reaḱ dhạt/chond/nạmuna:

Ekkal nãwã hudisante kheṛwaṛ palṭonko do̠ Debi-Durgạ tạkin sendra ńamkate uddhạr kin lạgit́. Ona oktere kheṛwaṛ sãotare eyae (7) jona mukhiạ guruko tahẽkana. Sanam palṭonko do̠ eyae(7) do̠l reko haṭińena ar mimit́ do̠l mimit́ guru latarre tãhẽkate guruaḱ hukũm leka mimit́ seć ko uḍukena. Eneć-sereń reaḱ rạskạ do̠ baṅ noa do̠ unko ṭhen ạḍi bhabna reaḱ.

Hae! Hae! Okare Huduṛ Durgạ Do?

Kheṛwaṛ palṭonko do̠ bhabna dinre hae hae kate eneć-sereń uduḱ kate kokoe bahana kate jo̠to̠ oraḱ oraḱ calaḱ ko lagaoena. Unkoaḱ noa eneć-sereń reaḱ aso̠l motlob do̠ tahẽkana phenkao akat́kin Debi-Durgạ takin sendra ńam kate uddhạr kin. Menkhan unko do̠ unkin okare hõ baṅko sendra ńamlet́ kina. Nithõ santal jạtiạrren hoṛko do̠ akoren maraṅ mukhiạ Huduṛ Durgạ ar bạhutae ńamkin lagit hae hae kate ko sendra baṛaet́kina.

Muhisasur do̠ jãhãn baṛić daṛe reaḱ cinhạ do̠ baṅ kana. Uni do̠e goćgia. Arjo tamadi/sobhota reaḱ Aggrason birudre tiṅgu daram tear khatir KHŨN enae “Huduṛ Durgạ” ńutuman onarjo bir.

Sedae do̠ ona naṅgraha reaḱ ńutum do̠ tãhẽkana “Boṅgadisom” ar onaren maraṅ Raj do̠e tahẽkana nui Boṅgasur se̠ Mohisasur. Huduṛ (bijli reaḱ saḍe do̠ Huḍuṛ se̠ Huduṛ ko metaḱa) bijli leka uniaḱ daṛe ar elaṅ do̠ tahẽ kantaea. Onate uniaḱ ar mit́ṭen ńutum do̠ Huduṛ Durgạ. Rạskạ ạtuḱ reaḱ ulṭạure hirdạni. Serma ar hoe ko talare tinre sarodia reaḱ rạskạ, unre noa Bharot reaḱ naksa se̠ mancitro rege mit́ seć palonoḱkana dãsãi one oka do̠ bhabna reaḱ porob. Muhisạsur do̠ belek lekateko khũn lidia, nonkage keṭeć pạtiạu ạdibạsi hoṛkoaḱ. Onate duṛgạ pujạ din kore mit́ hạṭiń adibạsi koaḱ oraḱre marsalge baṅ joloḱa.