Sạri Ghoṭna umul pańja kate̠ go̠lpo̠ Dulạṛ re̠aḱ Haṛhat́tẹt́

Dhaka EPZ (Export Processing Zone) re̠aḱ mit́ṭaṅ ńutumanaḱ garme̠nts factory kana Diamond Group do̠. Surujmoni ar Sonaton do̠ no̠a garments rege mit́te̠kin kạmia, calaḱ-hijuḱ ar tahẽn hõ ato gão̠tare̠n sãote̠ sor sorge. Tho̠ṛa din tayo̠m bana hoṛge ạkinaḱ dulạṛkin so̠do̠r ke̠da, gulạp bahage tahẽ kana so̠do̠raḱ do̠. Nalha kạmi le̠ka ko calao̠ akan diso̠m re̠aḱ ae̠ma jilạ khon jo̠to̠ koge nonkan rạskạ re̠aḱ so̠mbat ańjo̠mte̠ suluk ko ạikạu le̠t́a. Ḍhe̠rkin rạskạle̠na kuṛi Surujmoni re̠n go-babage.

Bapla do̠ oṛaḱ khonge hoe̠ purạule̠na me̠nkhan jo̠m-ńu do̠ bar do̠m bar jae̠ga re̠kin purạle̠da. Dhaka EPZ aṛe santal ho̠po̠n ko tãhe̠n ạto sećre̠ moṛẽ ṭhạire̠n hoṛko do̠ tumdaḱ-ṭamak re̠aḱ raṛaṅ saḍe̠ ar rạskạ re̠aḱ gaḍare̠ko buhe̠l bo̠lo̠le̠na. Hae̠re̠ santal ho̠po̠n naco̠niạ, hae̠re̠ santal ho̠po̠n mạndạṛiạ, tumdaḱ saḍe̠ te̠ko bul akana. Santal ato baṅkan re̠hõ lucut́ duṅgut́ hoṛ ho̠po̠nko ko̠le̠r so̠nawante̠ ko kạmi kana lạṭu-kaṭić. Se̠dae̠ goṛom babatako ko me̠n baṛaḱ moṛẽ siń moṛẽ ńindạ akhṛa rege ko aṅgale̠da. EPZ ṭehãṭre̠n de̠ko pusi sanam koge ko baḍae̠ le̠t́a santal ko do̠ e̠ne̠ć sereń re̠ do̠ ko sorosgea. Surujmoni ar Sonatonaḱ bapla re̠ So̠mre̠sh do̠ bogete̠ye̠ don le̠da, e̠nte̠ bapla to̠no̠l joṛao̠ re̠ so̠mresh do̠ raibariće tahẽkana.

Thoṛa din tayo̠m baḍae̠na baṅma mit́ sae̠ moṛẽge̠l le̠ka hoṛ eṭaḱ diso̠mte̠ kạmi calaḱ re̠aḱ ạtko ńama. So̠mresh ge Sonaton do̠ noa kho̠bo̠re̠ seṭer ade tahẽkana. Surujmoni ar sonatonaḱ gharońj do̠ e̠ke̠n turui cando hoe̠ akana, moṛẽ din laha ge sonaton doe̠ aṭkar akat́a pase̠ć surujmoni do̠ concept akada. Do̠sar hiloḱ se̠taḱre̠ clinic te̠kin dukạna, ṭesṭre̠ baḍae̠na surujmoni do̠ gogo hoyoḱ lạgit́e̠ sapṛaoḱ kana, noa ańjo̠mte̠ rạskạte̠ sonatonaḱ mẽt́daḱ do̠ sokoć onḍokle̠na. Ce̠daḱ bae̠ rạskạḱa e̠nte̠ to̠a dare e̠ṅgatte̠t́ do̠ e̠nan khongeye̠ khoj akada, dhạrti bạgiaḱ lahare̠ do̠ je̠mo̠n sonatone he̠o̠ ho̠bo̠rjoṅ. So̠nato̠n ar somresh do̠ Mit́ jilạre̠n kin tahẽ kante me̠pe̠n e̠nakin, pạhil do̠ Sonatonge Qatar diso̠mte̠ calaḱ lạgit́e̠ kurumuṭu ke̠da. Kukmule̠t́ae̠ gidrạ hara buruḱ lahare̠ge tinạḱ iń kạmi daṛe̠aḱ doń kạmia, ar Somresh doe̠ taṅgia tayo̠m ńoḱ calaḱ lạgit́te̠. Sạṅgiń diso̠m kante̠ banar gate te̠ge ḍhe̠r kạuḍi kin jo̠gaṛ jo̠to̠n ke̠da. Mo̠lo̠ṅ re̠aḱ jo̠ste̠t́ do̠ noageko me̠taḱa, So̠naton do̠ pạhil do̠pha re̠geye̠ goṭa ocoe̠na. Ṭaka-paisa upjạu re̠aḱ ạt ar surujmoniaḱ kukhire̠ gaṛhaoḱ kan gidrạ, o̠ka se̠će̠ laha calaḱa! Surujmoni soṅge, aćre̠n go-baba ar sonaton soṅge hõ riti riti ye̠ po̠ramo̠s ke̠t́a, laha tayo̠m, ãt-beạt e̠mante̠aḱ khondroṅ kate̠ge Qatar diso̠m calaḱ lạgit́ uḍạuḱ jahaj re̠aḱ ṭickeṭe kiriń ke̠t́a.

Sonaton do̠ Qatar diso̠mte̠ se̠ṭe̠r katege Surujmoniye̠ phone adea, lại adeae̠ mońj te̠ge noa diso̠mte̠ń seṭer akana ar kạmi rehõń bhiṛạu akana. Sonatonaḱ nonkan mońj so̠mbad ańjomte̠ gatekoṛa Somresh, go-baba ar atore̠n peṛa ko hõko rạskạle̠na. Tho̠ṛa din tayo̠mge surujmoni do̠ mit́^ṭaṅ koṛa gidrại janam kedea. Sạṅgiń diso̠mre̠ye̠ tahẽnkante̠ apatte̠t́ do̠ video tege ho̠po̠nte̠t́aḱ mẽt́hãye̠ ńe̠lan tahẽkana ar jiwire̠ juḍạsiye̠ ạikạu le̠t́a. Sonaton do̠ aćre̠n pạhlạuṭha koṛa Surju geye̠ bahna ledea. Pase̠ć re̠coe̠ asle̠n Surju do̠ siń cando le̠ka ge so̠maj re̠ marsale bambe̠ra. Sonaton do̠ arhõ mo̠ne̠ lagao̠kate̠ jhũk salaḱge kạmire̠ye̠ dhurạue̠na. Tisre̠ pe̠ se̠rma paro̠me̠na bae̠ disạle̠t́a e̠nte̠ uniaḱ mondo̠ diso̠mte̠ ruạṛ ar sadhe̠r ho̠po̠n ńe̠le̠ lạgit́ khadbadaoḱ kan tae̠ tahẽkana. Ae̠ma kurumuṭu kate̠ company khon chuṭiye̠ jo̠gaṛ ke̠t́te̠ diso̠m te̠ye̠ so̠ho̠r seṭere̠na. Kusie̠nae̠ surujmoni, kusie̠nakin go-baba, hońhar-hanharte̠t́ ar somresh hõ e̠nte̠ uniaḱ hõ calaḱ re̠aḱ jo̠to̠ do̠ ṭhik akana.

Sonaton do̠ mit́ din bardin khe̠mao̠ khe̠mao̠ tege turui candoe̠ paro̠mke̠t́a. Huḍiń gidrạ surju do̠ apate̠t́ ṭhe̠n bae̠ soṛok soṛok tegẹyẹ gate̠ le̠na, me̠nkhan jiwi re̠ jiwi do̠ baṅ tolle̠n tạkina. Somresh do̠ gatekoṛae̠ riạu uskur le̠dere̠ sonaton hõ do̠sar do̠m calaḱ lạgit́e̠ mon muruk ke̠da. Gate̠ gatekin calaoe̠na Qatar re̠aḱ kạmi naṅgrahate̠. Ar Surujmoni nitoḱ do̠ gidrạwante̠ arhõ Dhaka so̠ho̠r se̠ćge̠ye̠ laha he̠ć ena, juritae̠ sonaton do̠ gidrạ oloḱ paṛhaoḱ lạgit́ bhage school re̠ bhurtiye̠ me̠nle̠t́a. Surujmoni do̠ arhõe̠ bujhạu ke̠da, sonatonaḱ ḍanḍa re̠aḱ jo̠ doe̠ hijuḱ kana. Ạḍi so̠nto̠r surju school idi-ạgue̠ horte̠ taṛame̠t́a. Nonkan rạskạ so̠mbat Sonaton go-baba do̠ baṅkin ańjo̠m oṭole̠t́a. Sonaton do̠ Qatar diso̠m te̠ seṭer thoṛa din tayom geye̠ baḍaeke̠t́a janam gogo doe̠ bạgiadea; duk ce̠tan duk pe̠ cando tayo̠mge apatte̠t́ hõe̠ boṅga talaye̠na. Sonaton do̠ kạhis ńoḱe̠nte̠ye̠ me̠nke̠t́a, ce̠t́ ar iń calaḱa diso̠mte̠, ińre̠n gidrạkin lạgit́ge ora-sorań kạmia, kạuḍiń sõćjoṅa je̠mo̠n diso̠mte̠ń ruạṛle̠nre̠ suluk re̠ jionle̠ khe̠mao̠ daṛe̠aḱ.

Kạmi ar kạmite̠ din do̠ gujrạue̠na, bo̠cho̠r paro̠me̠na ge̠lbar bo̠cho̠r hõ taṕe̠na. Nito̠ḱ sonaton do̠ diso̠m te̠ ruạṛoḱe̠ lại lahake̠t́a. Phone re̠ galmarao̠ re̠ge surujmoni do̠ sonatone so̠do̠radea, ale ṭhe̠n do̠ alo̠m rakaṕa e̠nte̠ ale̠ do̠ bale̠ do̠ho̠mea. O̠nka le̠kage surju ar kạṭić koṛa sujoy hõ e̠ṅgataḱ katha regekin toṅge ada. Me̠tadea kin janam le̠ko khange gidrạre̠n baba do̠ baṅko hoe̠ daṛe̠aḱa! Am do̠ ale̠aḱ ce̠t́ kạmire̠hõ bam lagao̠ akana, e̠ke̠n ṭaka-paisa e̠m kate̠ do̠ dạyik baṅ purạuḱa! Juri ar gidrạkinaḱ katha te̠ koṛam oṛejo̠ḱ le̠kae̠ ạikạu ke̠da. Ce̠tan se̠će̠ ko̠yo̠ḱ ke̠t́ ma se̠rma ńalaḱ ńalaḱ ar dhạrtima dhiri ke̠ṭe̠ć barag. Ce̠kate̠ nonka do̠ hoe ena! Pase̠ć moloṅ re̠aḱ dagge mõhõr mẽṭao̠ akana! Company re̠ye̠ lại saphawaḱ ko̠re̠ mon do̠ oṭaṅ baṛae̠ miru le̠ka ge o̠ka dạr re̠ye̠ aboḱa bae̠ baḍae̠a.

Sonaton do̠ diso̠m re̠aḱ airport re̠ye̠ pheḍe̠nre̠ o̠kate̠ye̠ calaḱa, go-baba ṭhe̠n, banahoṛ gekin gur akan e̠nan hilo̠ḱre̠. Ańjo̠m akat́ae̠ oṛaḱ duạr do̠ dhaṅdase̠r akana, e̠ṭaḱ hoṛaḱ jae̠ga kante̠ nito̠ḱ onko ho̕ tahẽn lạgit́ bako aṛaga! Arjao̠ akat́ sanam ṭaka-paisa ma bạhuaḱ bank account regeye̠ ko̠l cabaakat́! Teṅgo hape̠yenae̠, o̠kate̠ye̠ calaḱa! E̠ke̠n tite̠ aćre̠n pe̠ṛa ko hõ bako ataṅe̠de̠ kana. Hae̠re̠ dulạṛ, hae̠re̠ bhalo̠basa; heṛe̠m gea se̠ haṛhat́gea jiṅgi re̠aḱ mucạt́ umer re̠ho̕ bae̠ aṭkar daṛe̠ada? Polisaḱ goṛote̠ mit́ṭaṅ NGO do̠ akoaḱ safe home te̠ko idikedea. Diso̠m re̠aḱ kho̠bo̠r kago̠j re̠ chapae̠na sonaton do̠ kạmiye̠ baṛaya, kạmiye̠ khojoḱ kana.