GISIĆ/SCABIES

PDFPrint

Gisić do mit́ṭen pasnaoḱ rog kana mit́ hoṛaḱ hoelen khan gharońjre gidrạko se eṭaḱ hoṛko hõ ńamkoa. Kạṭić kạṭić mit́ lekan tejo hoṛmo harta bhugạḱkate hoṛmo bhitriko boloḱa ar harta latarreko belea. Bele khonko hoponoḱa ar goṭa hoṛmo babata. Noko tejo do tinreko laṛaoḱa unre hoṛmore hoṛo baha leka kạṭić ponḍge rakaboḱa. Ḍherkaete do ti talka lạbit́ hartare, ti moka, ar bạṛtikaete dhaṛare ḍher ńańama. Oka do gạdur gạdurte ghaoḱa rama se aṭet́ ko mạilạge khan noa ghao do bạṛić seć monhḍaḱa.

GISIĆ DO CEKATE PASNAOḰA?

1. Eṅgataḱ gisić tahẽlen khan gidrạ hõ ńamkoa. Gidrạ nunuako okte eṅgataḱ ti khon gidrạ ṭhen ucạṛoḱa , gidrạwaḱ harta do lạbit́gete ạḍi usạra onko tejo do goṭa hoṛmoreko pasnaoḱa.
2. Tejo do rugiaḱ kicrić se aṭet́reko tahẽn daṛeaḱa, khan rugiaḱ kicrić joṭet́le khan tejo hartareko bolo daṛeaḱa. Aema hoṛ mit́ ṭhen riḍet́ cirit́ko gitićlen khan un okte tejo do mit́ hoṛ khon eṭaḱ hoṛreko ucạṛoḱa onate gharońjren mit́ hoṛ khon eṭaḱ hoṛ gisić ńamleko khan eṭaḱko hõ ńamkoa.
3. Gạdur gạdurte tejo do jaṅga khon titeko ucạṛoḱa.

Gisić ńam reaḱ cinhạ

1. Rugi do goṭa hoṛmo babatea, asokaete ńindạ okte.
2. Harta cetanre kạṭić pusri leka ńeloḱa. Asokaete kạṭuṕ cirit́re, mokare, jaṅgare ar dhaṛare ńeloḱa.
3. Gạdur gạdurte ghao utạroḱka. Mạilạ tahẽn khan ghao do beleḱa judi aṭet́ mạilạge khan noa ghao do bạṛić seć mohnḍaḱa.

Gisić Ran

1. Pạhilre rugi do sạbun daḱte ḍạbrạ saphaye hoyoḱa.
2. Nim sakam daḱre heḍeć hoyoḱa. Heḍeć heḍećte araḱlen khan nim daḱ hoyena. Ona daḱte bogete iskire hoyoḱa. Rit́ nim sakamte iskirle khan ḍher boge hoekoḱa. Nonkage pe din nim daḱte ḍạbrạye hoyoḱa.
3.   Gharońjre jãhãe gisić ńamle khan usạrate ran ocoye hoyoḱa.

Ran Chaḍa Noako Jạruṛa

• Rugiaḱ joto kicrić bodolkate sapha kicrić horog hoyoḱtaea.
• Rugiaḱ joto kicrić lolo daḱ ar sạbunte sapha hoyoḱa.
• Aṭet́ kicrićko sapha doho hoyoḱa.
• Rama do kạṭić ar sapha doho hoyoḱa. Jemon gạdurle khan alo ghaoḱ.
• Jãhãe ghao ńamle khan buluṅ daḱte saphae hoyoḱa. Ar ran beohar hoyoḱa.

Ran beoharle khan gisić tejo doko gujuḱa bako laṛaoḱa ar bako belea. Menkhan goć hoṛmotako arhõ bar hapta gan rugiaḱ hartare tahẽna, babat do tahẽ daṛeaḱa ar bar hapta bhitrire besge ạikạuḱa. Ado ran beoharte judi rugi bae beslen khan ḍaktaraḱ solha hatao hoyoḱa.

Disạ dohoe jạruṛa

1. Sapha sạphi gharońrenko do gisić usạra baṅ ńamkoa.
2. Gharońjren mit́ hoṛ gisić ńamle khan ạḍi usạra ran ocoye hoyoḱa, baṅkhan oṛaḱre joto hoṛ ńamkoa.
3. Ato reaḱ ran do kiriń ran lekage mońje kạmia, ar ṭaka hõ baṅ lagaoḱa.

PDFPrint