Pe̠a Phul Ar Bidhi Bidhạnta

By Santals Times Desk Last updated Mar 25, 2025

Mit́ṭaṅ naṅgrahare pe̠ ho̠ṛko tahẽ̠kana, ado̠ onko pe̠ne̠ ho̠ṛ mit́ dinko kumiṭiket́a, baṅma, Abo do̠ mit́ muṭhạngeabon, ado̠ mabon phuloḱa. Ado̠ onko mit́ jạt do̠ bako tahẽ̠kana, mit́ do̠ sodago̠rren ho̠po̠n, mit́ do̠ rajren ho̠po̠n, ar mit́ do̠ madhaeren ho̠po̠n. Ado̠ phulko pataoket́a; ado̠ tahe̠n tahe̠nte mit́ dinko bundisket́a. Delabon calaḱa bideste, ar disombon ńe̠l ạguia. Ado̠ tabe̠n, khạjạṛiko sajaoket́a ho̠rte jo̠m lạgit́; ado̠ pe̠ne̠ ho̠ṛge sado̠mre de̠ćkate bidesko oḍokena. Calaḱ calaḱte mit́ṭe̠ć uirni birko ńamket́a, ado̠ ạyuboḱ kan iạteko me̠nket́a, Ma phul, noa birregebon gitić aṅgaḱa; e̠nte nit do̠ bela hõ̠ bạnugića, okatebon calaḱa? Ado̠ onako niṭante sado̠m khon phe̠ḍente sado̠m do̠ akoaḱ jaṅgareko to̠lket́koa, arko gitićena. Jạpit́ket́akin bar ho̠ṛ̠ do̠, me̠nkhan sodago̠rren ho̠po̠n do̠ bae jạpit́ akat́a, thir akanae, bae ro̠ṛ baṛayet́a. Ado̠ oka khon co̠ṅ Bidhi ar Bidhạnta o̠nḍe̠kin he̠ćena, arkin teṅgoyena. Ado̠ Bidhạntae me̠nket́a, Bidhiye metae kana, Henda Bidhi, Noko do̠ bhala okaren ho̠ṛ kanako? Unre Bidhiye me̠nket́a, Noko do disom ńe̠lko oḍok akana. Ado̠ Bidhi arhõ̠e me̠nket́a, Noko mo̠to̠ren mit́ ho̠ṛ menaea, uni madhae ho̠po̠n do̠ nãhãḱ ạḍi utạr mũhĩn menaḱtaea. Ado̠ Bidhạntae me̠nket́a, Acha Bidhi, mase̠ lạiạńme, cet́ cet́ mũhĩn menaḱtaea?

Unre Bidhi lạlạiye po̠rto̠nket́a, madhae ho̠po̠n reaṅ, Nui sado̠m jaṅgareye to̠l akadea; nui sado̠m jãhã lekae dạṛle khan do̠e ạtkirea nãhãḱ, ado̠ okare jo̠l panko jo̠ma, unre nãhãḱ nạnḍrire suiteye pạṭiḱa, ado̠e gujuḱa. Ado̠ unre Bidhạntae kulikedea, Acha Bidhi, cet́e cekale khan ona mũhĩn khon do̠e bańcaokoḱa? Ado̠ Bidhiye me̠nket́a, Uniaṅ jo̠l pan dosra ho̠ṛkin jo̠mle khan e̠nḍe̠ khan do̠e bańcaoḱgea. Ar mit́ mũhĩn do̠ noa kana, calaḱ calaḱte mit́ jaegare nãhãḱ mit́ṭaṅ maraṅ utạr pulko ńama, ona latarteko paromoḱa nãhãḱ, ado̠ ona pul do̠ dhasao go̠do̠ḱa; ado̠e go̠ć utạroḱa. Ona hõ̠ Bidhạntae kuli ruạṛkedea, Acha Bidhi, cet́e cekale khan ona mũhĩn khon do̠e bańcaokoḱa? Ado̠ Bidhiye me̠nket́a, Judi ać laha sado̠me kamsaole khan khub ãṭ, to̠be̠ khan do̠e bańcaokoḱgea; ado̠ inạ mit́ mũhĩn calaoena. Ar mit́ mũhĩn do̠ noa kana. Mit́ṭaṅ urni birre nãhãḱko ńir apat́a, ado̠ unre rakas nãhãḱe jo̠mea.

Unre hõ̠ Bidhạntae me̠nket́a, Ado̠ Bidhi, acha, ona mũhĩn khon do̠ cet́ lekateye bańcaokoḱa, mase̠ bhala lạiạńme. Ado̠ arhõ̠ Bidhi lạlạiye po̠rto̠nket́a, baṅma, uni rakasren ho̠po̠nera menaea; uni sãoteye gatelen khan unigeye okokea. Saname lại mucạt́ket́a, arkin calaoena. Khange sodago̠rren ho̠po̠n do̠ unkin Bidhi ar Bidhạnta reaṅ sanam kathae ańjo̠mket́a, ar unkin ma gitićge menaḱkina, baṅkin disạyet́a; ado̠ aṅga marsalena, ado̠ko mohnḍayena. Khange thoṛa sạṅgińko se̠nen khange ạḍi ãṭ belayena; ado̠ jo̠l pan jo̠m lạgit́ apan ạpin tabe̠nko, khạjạṛikoko raṛaket́a. Ado̠ sodago̠r ren ho̠po̠n Bidhiaḱ katha lekateye me̠nket́a, E̠ phul, de̠n amaḱ tabe̠n ar khạjạṛi do̠ ińiń jo̠ma, ar ińaḱ tabe̠n ar khạjạṛi do̠ am jo̠m talaṅme. Ado̠ onako onkaket́a, ado̠ sạrige inạ mũhĩn khon do̠e paro̠mena. Ado̠ arhõ̠ jo̠m baṛa kateko calaoena, ado̠ mit́ ṭhen maraṅ utạr sakho̠ko ńamket́a; ado̠ unre hõ̠ sodago̠rren ho̠po̠ne me̠nket́a, E̠ phul, ma am do̠ ạḍi ãṭ jo̠rkate sado̠m kamsaoem, ar ma lahaḱme.

Ado̠ kathae onkage sado̠me lahakedea; ado̠ ạḍi jo̠rkate sado̠me kamsaokedea, ado̠ko paro̠mena. Inạ mũhĩn khon do̠e bańcaoena. Ado̠ arhõ̠ko calao idiyena; ado̠ mit́ṭaṅ maraṅ utạr urni birko ńamket́a, ado̠ko ńir apat́ena. Ado̠ madhae ho̠po̠n do̠e me̠noana, O̠ko̠e tora ato se̠niń calaḱa, ar jo̠maḱkoń ko̠e baṛakoa. Ado̠ calaḱ calaḱte ona urni birrege rakas ren rạni mundil ṭhengeye calaoena. Ado̠ rakas ar rakas ren rạni do̠ baṅkin tahẽ̠kana, sendrakin se̠nlena; ado̠ ona takrege uni hõ̠e se̠n se̠ṭe̠rena. Ado̠ rakasren ho̠po̠nera do̠e oḍokena, madhae ho̠po̠n do̠e me̠nket́a, De̠n go̠ ayo, ko̠e imạńme. Ado̠ uni rakas ho̠po̠nera do̠e me̠nket́a, ko̠e do̠ bạń emam kana; ma duṛuṕlenme. Ado̠ madhae ho̠po̠ne me̠nket́a, Baṅ, bạń duṛuṕ kana ạḍi ghạṛi do̠, baṅkhan rakas nãhãḱ he̠ćkateye jo̠meńa. Ado̠e me̠nket́a, Baṅ rakas ṭhen do̠ o̠ho̠ń jo̠m ocomea; e̠nte iń do̠ am ghạrdi jãwãe do̠ho̠meń me̠net́a. Ado̠ ona katha ańjo̠m kate madhae ho̠po̠n ạḍiye landaket́a; e̠nte uni kuṛi ạḍi mõ̠ńj kuṛigeye tahẽ̠kana, ar madhaeren ho̠po̠n hõ̠ dusạn do̠ bae tahẽ̠kana, uni hõ̠ bes mõ̠ńjgeye tahẽ̠kana.

Ol toṅgeḱa-

Tumạl:Santal Folk Tales

PDF

Sun	Mon	Tue	Wed	Thu	Fri	Sat
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30	31