Amnura Lutheren Mission Haspatalre Maejiu Ar Gidrạkoaḱ Ward Uḍhạu Akhṛa

Chapainawabgonj so̠do̠r upạjilạ reaḱ Amnura Lutheren Mission Haspatal re Maejiu ar gidrạkoaḱ nãwã ward ar ona sãote cikitsạ reaḱ hạtiạrko uḍhạu keda.

Budhbar (23 February) be̠r 11 baja okte Chapainawabgonj jilạ civil surgeon office ren Medical Officer Dr: Rakibul hotete noa uḍhạu akhṛa do̠ hoe purạuena.

Noa uḍhạu akhṛare Manotan peṛa hisạbte seṭerko tahẽkana 3 no Jhilim Union Porisod ren Chairman Lutfar Hasan (Lutfar), Maejiu Member Johra Begum, Pervez Ali, Hapatal ren ạḱyurić Stephen Soren, Manager Markus Murmu, Rotary Community Core ren sabha mukhiạ Prodip Hembrom, sompadok Promila Hasda.

Uḍhạu akhṛare manotan maraṅ peṛa Dr: Rakibul Islam do̠e menkeda, Rotary International ar Amnura Mission Haspatal do̠ sạrige mońj sebae e̠moḱ kana, arhõ as ar biswạs menaḱa noa nãwã ward aḍepase ṭoṭhakore maraṅ onoṛe do̠ho daṛeaḱa.

Haspatal ạḱyurić Stephen soren do̠e menkeda, Amnura Lutheren Mission Haspatal do̠ bises bhãoar (bisesoggo) ḍaktar hotete ạdepase reṅgeć-nacar rogiko jo̠gao jo̠to̠nre mit́te khulạsatey kạmikana. Nonḍe do̠ e̠ken 50/- kạuḍitege ńutum ol caṛhao kate rogiko mońj sebako ńamet́kana.

Arhõe menkeda, Amnura Lutheren Mission Haspatal reaḱ noa maejiu ar gidrạkoaḱ ward lạgit́ Amnura Rotary Community Core hotete 6 goṭen bed ar mit́ṭen Refregerator selet́ eṭaḱ cikitsa hitiạrko sandese emena Rotarian Dr: Graham Arthus, Barea bed do̠e emena Mis: Nazma Sultana ona sãote arhõ barea bed ar eṭaḱ hạtiạrko do̠e emena Tabitha Foundation.