Pạrsi Ạri- cạli Jạtiạri Reaḱ Oporom

-Prodip Hembrom

image_pdfPDFimage_printPrint

Gaḍa daḱ ạtuḱkan leka okte hõ oṭaṅ calaḱ kana. Ona são são abo manwa jion hõ siń cando leka rakaboḱkana ar adomkoaḱ do hạsuroḱ kana. Niạ okte bhitri rege okoe do maraṅ hoṛ arhõ okoe do huḍiń napṛaḱ. Gaṅga reaḱ ạtuḱkan daḱleka ge abo manwa jion ar aboaḱ kạmi ko heraferiḱ kantabona.

Din paromoḱ kan, okte paromoḱkan ar abo sanam santal ko bo pheraoḱ kana jug reaḱ pheraote. Abo sanam santal ko do nit jug reaḱ pherao re ạḍigebo ạulạoakana. Abo do aboaḱ bhạlạe lạgit́ nunạḱ ge kạmi korebo unumakana je apnaraḱ apnartet́ bo hiṛińeda. Ạḍi thoṛa hoṛge apnar jạt ko lạgit́ ar apnar phạrsi lạgit́ ko gagocoḱ kana. Abo do niạ disomre eṭaḱ jạt ko do baṅlateko ropoṛjoṅa. Ar onko baṅla ropoṛ ko khon do bo thoṛagea. Ar ona iạte aboaḱ oloḱ – paṛhaoḱre, hiri – hipiri re baṅla ge bon laṛcaṛeda. Oṛaḱ khon oḍoṅkate ạuri bhitri re boloḱ hạbić onkoaḱ phạrsi ge bo roṛeda. Ar niạ hewa do abo re tahẽnkana. Onate oṛaḱre ruạṛ hećkate hõ baṅla tege ḍher bo ropoṛa ( adom adomko). Menkhan ńelogoḱ kana je din din okte salat́ jug pherao selet́ abo hõ bo bodoloḱ kana.

Abo ar aboren gidrạ ko din din apnar pạrsi Santali bo hiṛińeda se Santali pạrsi bo neṅghaoeda. Eṭaḱ jạt ko ṭhen apnar lạṭu udogoḱ lạgit́. Menkhan niạ noṅkakate cet́ hoyoḱ kana? Apnar cet́ bo lạṭu daṛeaḱ kana? Se tin okte ko baḍaeyet́bon kana je santal kanabo ar apnar pạrsi babo baḍaea un okte onko ṭhen bo kạṭićjoḱ kana. Hẽ onate hõ cet́ aboaḱ cet́ baṅ cekaḱ? Jos katha do hoyoḱ kana mit́ṭen pạrsi adoḱ do eken pạrsi adogoḱ ona eskar do baṅ bickom mit́ṭen jạt ge at́ utạroḱkana.

Akelan ko ko menakada jahaeaḱ pạrsi at́len khan do aćtet́geye at́ena. Ar mit́ṭen jạt tin okte apnar pạrsi bạgikate eṭaḱ jạt koaḱ pạrsiye hataoa uni do din dinte ona pạrsi ren jạt ko ṭhen geye len ocoḱa. Ar apnar jạt bạgi kate bạibạite oka pạrsi hatao akat́ se oka pạrsi ko laṛcaṛet́ ona pạrsiren jạt mentege ko opromoḱa. Ar noka nokate mit́ din hiloḱ mit́ piṛhire niạ jạt do cabaḱa. Nonkage abo santal jạt okoe do niạ disom re menaḱbon onko do thoṛa sikhnạt seć lekate ar kạmi hudạko sećtebo lahaḱ kan khange aboaḱ Santali pạrsi bo neṅhaoeda, aboaḱ Santali pạrsite baṅbon roṛeda ar hõ aboren gidrạko baṅbon roṛ ocoyet́koa.

Ar niạ karontege darakan dinre aboaḱ pạrsi adoḱa. Ente nitgema aema nebetar jugren nawa gidrạko akoaḱ Santali pạrsi ar ạri – cạli bako baḍaea. Onko do bạibạite akoaḱ santal sãota khon hõ ko irchi giḍiḱ kana. Noa reaṅ jo do darakan din kore ạḍi usạrage abobo ńelńama, ar paseć ona do abo lạgit́ ạḍi suluk ar rạskaanaḱ do baṅ hoyoḱa. Mit́ṭen Rạsiạ Santal jạt niạ disom khon bạibạite mohor meṭaoḱ kanabo ạḍige bhabna. Mit́ṭen jạt aćaḱ oporom do aćaḱ pạrsi  ar ạricạli – lakcar koteye sodora. Ar maraṅ gorob reaḱ jaiga do hoyoḱkana pạrsi.

Niạ Baṅladisom ren baṅali kodo 1952 sermare akoaḱ niạ go pạrsi baṅla khạtir maraṅ lạṛhại ko janamleda. Onko do noa baṅla pạrsi lạgit́ aema hoṛge jiwi ko alaekeda ar ona tayom aema din paromen khan noko do akoaḱ niạ go pạrsi baṅla ge disom reaḱ ar ako katha roṛ reaḱ hukum ko ńam keda. Ar onkate niạ baṅla pạrsi khạtir noko do mit́ṭen baṅali jạt menteko lekhayena noa dhạrti re.

image_pdfPDFimage_printPrint

Comments are closed.