Kãṛã Ar Gujạ Reaṅ

Sedae jugre kathae, Hãsdaḱ khũṭren bar boehakin tahẽkana , unkin do̠ Kãṛã ar Guja tạkina. Unkin do̠ khub dhinkiạ ho̠ṛkin tahẽkana. Ona jo̠khe̠n, kathae, disạmre kuṛit́ reaḱ ạḍi bagahi holena, baṅma, mit́ṭen darere kuṛit́kin ho̠po̠nlet́ko tahẽkkana, ar unkin kuṛit́ do̠ ho̠ṛ gidrạ ạḍi bạṛićkin ạt́kiret́ko tahẽkana, disạm sudhạkin khaṅkaret́  tahẽkana. Ado̠ unre disạm ho̠ṛko me̠nket́a, Bhala nukin kuṛit́ do̠ cekatebon go̠ćkina? Ado̠ disạm sudhạ ho̠ṛ riạuente raj ṭhenko calaoena, ado̠ rajko rajko metadea, De̠ bhala unkin kuṛit́ do̠ cekatebo go̠ćkina? Disạm sudhạkin khaṅkarket́ do̠. Ma noa reaḱ cet́̃em me̠net́tabona? Ar baṅkhan ale do̠ noa disạmre o̠ho̠le tahẽ daṛelena; jo̠to̠ ho̠ṛ mit́ mit́te noa disạm khonle dạṛa. Ado̠ khange raje me̠nket́a, Hape, alope dạṛa, ado̠bo go̠ć legakina; judi babon go̠ć daṛeakin khan, ado̠pe dạṛa. Ado̠ raje me̠nket́a, Mase̠ bhala, unkin kuṛit́ jãhãegepe go̠ć daṛeakin khan do̠, mit́ nakha disạm iń emapea.

Ado̠ sạri raj onkae hukumket́ khan, unkin kuṛit́ go̠ćkin lạgit́ ho̠ṛko dhurạuena. Ar kathae, unkin kuṛit́ do̠ ho̠ṛaḱ ãṛgo̠m ar nahe̠lkokin tukạ akat́ tahẽkana, onate tuńkinre hõ, unkin do̠ bako tuń ńam daṛeakin kan tahẽkana. Ado̠ kathae, sanam ho̠ṛko tuń bhagaoen khan, se̠sre kãṛã ar Gujạkin me̠nket́a, Bhala sanam ho̠ṛpe tuń bhagaoen khan, ạliń aṛaḱạlińpe. Ado̠ unre, kathae, Kãṛã ar Gujạko aṛaḱat́kina. Ado̠ unkin do̠ aṭakin bạisạuket́a; ado̠ unkin kuṛit́ do̠ ho̠po̠nkin ajo̠ako jo̠khe̠n tukạ ṭhenkin he̠ćena. Un jo̠khe̠n, kathae, ãṛgo̠m bhugạḱ khonkin tuńlet́kina,- sạri banar kuṛit́kin tuń ńũr go̠t́ket́kina. Ado̠ unkin kuṛit́ do̠ Gạṅgi jạmin jharnarekin ńurhạyena, ar onakin ńurhạlen ṭhen do̠ ạḍi maraṅ ṭhạ̃ikin paska gaḍaket́a. Ado̠kin go̠ćen khan do̠ raj ṭhenkin go̠ḱ ạguket́kina. Ado̠ uni raj do̠ disạm ho̠ṛe maṅgaoket́koa, ado̠ unre mit́ nakha se̠n disạme emat́kina. Ar o̠ne  kuṛit́kin paska gaḍalet́ ṭhen do̠ maraṅ utạr mit́ṭen ḍhabko benaoket́a. Ar ona ḍhab do̠ unkinge mạnko emat́kina. Ado̠ unkin Kãṛã Gujạ do̠ onakokin ńawan khan do̠, ạḍikin rạskayena. Ado̠ unkin Kãṛã Gujạ do̠ ona birkoregekin tahẽna, emateaḱ bir reaḱ paṛahuṛikokin dukhmạ baṛajoṅa. Ar mit́ṭen dhiri danderrekin jaegaḱ kan tahẽkana, ar ạyuṕ jo̠khe̠n do̠ o̠nḍegekin daka mạnḍijoṅa, ar at aser hõ o̠nḍegekin rapaḱ baṛajoṅa. Ado̠ tahẽn tahẽnte, kathae, kul do̠e ciạket́kina. Ado̠ mit́ din do̠ at aserkin rapaḱ kan jo̠khe̠nge  uni kul do̠e calao go̠t́ena, ado̠e metakin kana, Henda ya, cet́ben raḱpaḱ kana? Den iń hõ emańben, ar baṅkhan iń jo̠mbena.

Ado̠ at aser do̠ rapaḱkate ạkingekin jo̠ma ar ona kuilạko do̠ uni kulkin capat́ oḍoḱ go̠t́aea, khange ado̠ khạyur khạyure jo̠m go̠da. Arhõ oka do̠ besaḱkin capat́ to̠t́ go̠t́aea. Ado̠ uni hõe jo̠m pạrkạuen khan do̠, uṭhạuge bae uṭhạuḱ kana. Khange ado̠kin me̠nket́a, Durre! bae calaḱ kan do̠, pase̠ye jo̠mlaṅ. Cekate nui do̠laṅ lagayea? Khange Gujạ do̠e chuṭạu go̠t́enteye ńir calao go̠t́ente canḍsbolreye saṕ go̠t́kedete cure mareye pe̠ṭe̠rket́taea. Khange bhạiye pe̠ṭe̠r topaḱet́tae khange uni kul do̠e aḍrao go̠t́ket́teye dạṛket́a.

Khange unkin Kãṛã Gujạ do̠ ona canḍbol do̠ rakaṕkatekin jo̠mket́a; ado̠ cet́ baṅ se̠, ạḍi bạṛić sebelket́kina. Ado̠kin me̠nket́a, Durre! ạḍi sebel kana; delalaṅ sendra go̠jea. Khange, bhại, bana ho̠ṛkin jhũkente sesendrakin po̠rto̠nket́a. Khangekin sendra ńamkedete lagakin lagakedea se̠, ḍiglạ ḍigkin khudạukedea, ado̠kin go̠ćkedea. Ado̠ se̠ṅge̠l jolkatekin ro̠kedea, ado̠ o̠nḍegekin rapaḱ jo̠mkedea. Ado̠ inạ jelkotegekin jo̠m biyen khan, laćte̠t́ do̠ bakin jo̠mlet́a. Kãṛã do̠e me̠net́a, Laćte̠t́ hõlaṅ jo̠ma, ar Gujạ do̠e me̠net́a, Baṅ. Khange tho̠ Kãṛã do̠e go̠ḱket́tạkina; ado̠ o̠nḍe khonkin calaoena. Ado̠ ho̠r aṛere mit́ṭen baṛe dare umulrekin duṛuṕ akan tahẽkana. Ado̠ ona se̠ntege okaren raj bạriạtko co̠ko calaḱ kan. Ado̠ onkokin ńe̠lket́ko khan, ona baṛe daretekin de̠cena, ar ona kul lać hõkin rakaṕ toraket́a. Khange onko bạriạtko hõ ona are dare buṭaregeko duṛuṕ jarwayena, ar ado̠mko do̠ko gitićena. Ado̠ raj hõ khuṛkhuṛi khon oḍokente uni hõ ona dare umulregeye gitićena. Ado̠ uni kãṛã do̠e me̠net́a, Henda ye, Gujạ, laćte̠t́ do̠ń ńũr go̠t́kaḱ se̠? Ado̠ Gujại me̠net́a, Alo ya, baṅkhan nãhãḱko saṕlaṅa.

Ado̠ kãṛãe me̠net́a, E̠ ya, ho̠bo̠rteń laṅgayen do̠. Arhõe metae kana, Alo ya, sapkelaṅako. Ado̠e ho̠bo̠r laṅgayen khan do̠, kathaeye ńũr go̠t́kat́a; ado̠ ona kul lać do̠ e̠kkalte uni rajaḱ laćrege ńurhạ go̠t́ena. Ado̠ jo̠to̠ bạriạtkoko bo̠to̠rente ạḍi garteko kikiạuket́a, Rajar pe̠ṭ bhoskaelo̠ re̠, rajar pe̠ṭ bhoskaelo̠ re! Onka me̠nkate jo̠to̠ bạriạtko ar Ḍo̠m kahaṛko mit́ mit́teko dạṛket́a; jo̠to̠ asbabko ńir bạgiat́a. Arhõ thoṛa sạṅgiń se̠n ńõ̠ḱkate do̠ko me̠nket́a, Durre! jo̠to̠ asbabbon ńir bạgiat́ do̠; nonkate do̠ cekate bạriạt do̠bon cakaḱa? Delabon ruạṛgea; bhalabon ńe̠lea, cekate lać do̠ oḍokentaea se̠ celeye nonkaket́bona. Delabon ruạṛkatebon ńe̠llege. Onka mo̠ne̠teko hudiset́a arko galmarao kana. Ar nuking Kãṛã Gujạ do̠ dare khon ãṛgoyente kićrićko se̠ bhale bhale jinis do̠ jo̠to̠kin hame̠ṭana, ar daretekin rakaṕket́a. Ar uni Kãṛã do̠ ona ḍho̠l hõ̠e rakaṕket́a, ar ona ḍho̠l do̠ mit́ se̠ne bhugạḱket́a ho̠po̠n ho̠po̠n. Ar ona darerege, kathae, ńe̠le̠ko tahẽkana; ado̠ onko ńe̠le̠ do̠ mit́ mit́te jo̠to̠ ona ḍho̠lreye bhoraoket́koa. Ado̠ onko bạriạtko phạdko he̠ćena, ado̠ko ńe̠lket́kin do̠kin ho̠ṛ kan. Ado̠ unkinko metakin kana, Aleren raj cedaḱben be̠mano̠tkedea? Aben do̠le go̠ćbena. Ado̠kin me̠nketa, Ma e̠ntepe go̠ć daṛealiń khan; e̠k do̠ ạlińpe go̠ćliń, e̠k do̠ apeliń go̠ćpe.

Ado̠ onkakin me̠nket́ khan, lạṛhạiko e̠ho̠pket́a. Khange bạndukteko ṭhuyet́kina, me̠nkhan baṅgeko ṭhu ńam daṛeakin kana. Ado̠ ṭhu ṭhuteko laṅgayena, baṅgeko ṭhu jo̠s daṛeakin kana; sanam guli dạru cabayentakoa. Ado̠ khange unkin kin me̠nket́a, Cele nitoḱ do̠ ạliń bape aṛaḱalińa? Ado̠ko be̠ṅge̠t́ baṛawakin kan do̠, mit́ṭen ḍho̠l chaḍa cet́ hõ bạnuḱtakin. Khangeko me̠nket́a, Male aṛaḱaben kana. Khange ado̠ ḍho̠lkin ru go̠t́ket́a arkin me̠net́a, Laṛo bacha, laṛo bacha. Ado̠ khange onko ńe̠le̠ do̠ ona ḍho̠l khonko uḍạu tot́ go̠t́ente onko bạriạtko do̠ toṛko toṛket́koa se̠. Khange tho̠ onko bạriạtko do̠ko dạṛ tapket́a. Khange cet́ baṅ se̠, laga lagateko toṛket́koa, ado̠ ghuriạ̃ onko bạriạtko do̠ bako ruạṛlena. Ado̠ je̠ kichu asbab tahẽkantako, onako do̠ nukinaḱge hoeyentakina. Ado̠ onako asbabkin ńawan khan, maraṅ rajko ńutumket́kina, ado̠ ạkin oṛaḱrekin tahẽyena.  

Tumạl-Santal folk tales