Naogaonre Ạdibạsi Rạnḍi Maejiuaḱ Oṛaḱre Bo̠lo̠akan koṛako Saṕkedea Onḍenko Ho̠ṛ

Naogaon Mohadebpurre mit́ rạnḍi maejiuaḱ oṛaḱre bo̠lo̠akan mit́ṭen koṛako saṕkedaea ato hoṛko. Tayomte uni do̠ polis ṭhenko jimakedea. Sombar ńindạ 8 baja okte upạjilạ reaḱ Sophapur union reaḱ Lukhipur atore noa ghoṭna do̠ ghoṭao akana. Ato hoṛko ṭhen khon baḍae ńam akana, rạnḍi maejiuaḱ oṛaḱe bo̠lo̠lena aḍepase  Basbaria ṭolaren goćakan Moslem Ali ren koṛa Azadul Islam Jaddes (40).  Uni maejiu konace lạgit́ baṅ do goje lạgit́ uniaḱ oṛaḱe bo̠lo̠lena ona do bale baḍaea, menkhan ńindạ 11 baja okte uni koṛa do̠ thanate polis ko saṕ idikedea.

 Noa ghoṭna babot́re uni maejiue me̠nkeda, Iń do cando hạsur tayom ńatańera takoaḱ oṛaḱreń tahẽkana. Un oktege uni do̠ ińaḱ oṛaḱe bo̠lo̠akana. Inạ laha hõ uni iń konac reaḱe kurumuṭuleda. Noa babotre iń do Adalotre maejiu ar gidrạ ko khed ocoḱkan reaḱiń mamla akada. Noa mamla do̠ lekman hoṛkoaḱ nehõrte uni soṅge rạji namatele chinḍạukeda. Paseć lahatenaḱ ghoṭna reaḱ raṅgaote badla hatao khạtir teheń uni do̠ iń konac se gojeń lạgit́ ińaḱ oṛaḱe bo̠lo̠yena. Iń do uniaḱ sạjạiń khoj kana. Noa babotre onḍenić Union Porisod (UP)  sodosso (member) Ziaul Hoqe do̠e me̠nkeda, ińaḱ baḍae lekate uni do̠ lahate hõ nui maejiu são ạḍi bạṛiće beohar akada. Inạ tayom arhõ oku okute uni maejiuaḱ oṛaḱre bo̠lo̠kate ạt hatao lạgit́ tạṅgi tãṛãḱreye tahẽkana. Nitoḱ do̠ ạn lekate uniaḱ bebosthako hataoa.

Noa ghoṭna reaḱ sạriaḱtet́ pusṭaukate  Mohadebpur thana ren Inspector Kamal Azad do̠e me̠nkeda, iń do̠ kho̠bo̠r ńamtorage ghoṭna hoeakan ṭhạ̃ire se̠nkate Asami saṕkate do̠n ạguakedea. Noa ghoṭna babot thanare mit́ṭen mamla reaḱ kạmihora calaḱ kana me̠nte uni do̠e lại so̠do̠rkeda.

Source: Punakhabor