Bepari ar Tạruṕ

Mit́ṭeć hor do bir aṛe aṛete sen akana. Ona hor aṛere mit́ṭeć kũi menaḱa. Ona do iṭạte do baṅ tola. Daḱ hõ thoṛage tahẽkana. Mit́ṭaṅ tạruṕ do ona kũi aṛete paromoḱ jokheć ona kũireye ńũrena. Mit́ṭen bepari do ona kũi ṭhen daḱ ńũi lạgit́e sen sorena; Daḱe loe jokheć, kũi bhitrire uni tạruṕe ńelkedea. Ar botorte ạḍi garteye kikiạuket́a, are pạc got́ena.

  Tạruṕ do uni bepariye metadea, “E hõ, alom botoroḱa, ma dayakate or rakabińme” Bepariye menket́a, “Cekateń rakaṕmea?” Tạruṕe menket́a, “One tarenrem lade akat́ bosta noteạńme, ar am do saṕ ṭarhaome.” Uni bepari do barahite bosta mucạt́ seće tolket́a. Ar moca seć do baṅ, are ãṛgoadea. Uni tạruṕ do ona bostareye sunḍućena are kapṭao urićena. Khange bepari doe or rakaṕkedea.

Tạruṕ do rakaṕen torage, uni bepari jome sanakedea.Bepari do tạruṕe metadea, “Cet́ kana noa do? Amaḱ jiviń bańcaoket́tama, ar am dom jomeń lạgit́ ?” Ado mit́ṭaṅ ḍaṅgra ṭhenkin calaoena, jemone bicạrtạkin. Uni ḍaṅgra do mone monereye menket́a, noko hoṛ do ạḍiko haronińạ, ar ạḍi hamal bostako ladeańa, ar haṭteko idi ocońa. Ona iạte uni tạruṕe  metadea, “Ma jom got́kaeme to”. Menkhan bepari doe menket́a, “Ẽhẽḱ, baṅ jutlena”. Ado loa dare ṭhenkin senena arkin lạliskeda.

 Loa dare doe menket́a “Nui hoṛ do ińaḱ joe got́et́a are joma, tạruṕe jomle khan boge napoṛkoḱa”. Ona iạte tạruṕe metadea, “Hẽ ma jomme”. Ado mit́ṭaṅ toyo ṭhenkin senena. Uni toyo do banar hoṛaḱ lạlise ańjomket́a, ar tạruṕe kulikedea, “Cekate ona bostare dom boloyena, mase dayakate mit́ dom uduḱańme”.

  Tạruṕ do usạra ona bosta bitri seće sunḍuć boloyena, Uni toyo do bepariye metadea, usạra usạra ma tol esedem. Khange bepari do ạḍi usạrae tol eset́kedea. Bepari do maraṛte uni tạruṕ bhageteye domaokedea. Domao admạruạkateye bạgi oṭowadea.