JULI

“Ke̠nsar ?” Juli ạḍi hahaṛawatẹy kuli ruạṛ kedea. “Hẽ Ke̠nsar.” Juliaḱ mo̠n ke̠nsar ańjo̠m tayo̠m bhitri bhitrite̠ bo̠to̠rte̠ thar tharao̠e̠ntae̠a. Ke̠nsarre̠n ae̠ma rugi o̠na khon laha hõ H. C. M Nursing Homete̠ hijuḱe̠ disạye̠t́koa, me̠nkhan o̠nḍe̠ khon ruạṛo̠ḱ do̠ mit́ṭe̠n hõ bae̠ disạle̠t́koa.

“Do idie̠pe̠ ward 14, Bed 4.”

Uni ko̠ṛa onḍe̠ khone̠ saye̠na. Samaṅre̠ Nursing Home re̠aḱ le̠nje̠r ḍaharre̠ mit́ṭe̠ć ṭe̠ksi khon aṅgro̠p pajama ho̠ro̠ḱić mit́ṭe̠ć ko̠ṛa tharam thurum phe̠ḍo̠ḱ Julie̠ ńe̠l kedea. Ar bar ho̠ṛ uni ko̠ṛa so̠po̠re̠ saṕ kate̠ Juli samaṅ samaṅte̠ 14 No. ward te̠kin idi kedea. Juli samaṅre̠ paro̠moḱte̠ uni ko̠ṛa Sule̠man mit́ do̠m atre̠-atre̠ Juli se̠će̠ be̠ṅge̠t́ rakaṕ ke̠da Juli hõ Sulemane̠ be̠ṅge̠t́ adea, ar ać duṛuṕ akan ṭe̠nḍar mạcire̠ ce̠ṭe̠r ńure̠n le̠kae̠ ạikạu ke̠da……. Uni kan ge̠ae̠ ……. uni kan ge̠ae̠ ……. uni kan ge̠ae̠ …… khạṭige. Juliaḱ sãhe̠t́ bharḍo̠ hoe̠ le̠ka gurlạu kate̠ hud hud inbo̠ro̠ o̠ṛe̠joḱ le̠kae̠ ạikạu ke̠da. Ghane̠ ghane̠ mit́ṭe̠ć ko̠ṛawaḱ muṭhạn Juliaḱ mẽt́ pipni latarre̠ malkaoḱ e̠ho̠ṕe̠na.

Sule̠man – Rup – Rup narayan – Sule̠man – Pre̠m – Sule̠man – Pre̠m – Rup tinạḱ ńutum baṅ uniaḱ mo̠ne̠ arsire̠ jhalkaoḱ e̠ho̠ṕe̠na. Sule̠man ar Rup –

Juli ar Rup;

Rup ar Juli,

Juliaḱ mo̠nre̠ po̠n bo̠cho̠r laha re̠aḱ dinko tiryạue̠na. Ạḍi sạńgiń, ạḍi jhal, ạḍi je̠le̠ń… Uni do̠ Julie̠ṭ Nursing re̠aḱ training (ṭerniṅ) lạgit́ nonḍey bhạrtile̠na. Nãwã nãwã. E̠kkalte̠ Damin e̠le̠ka khone̠ he̠ć akan iyạte̠ bajar sohor re̠aḱ ce̠t́ hõ bae̠ baḍae̠kan tahẽna. Re̠l gạḍi sudhạ bae̠ ńe̠l akat́ tahe̠na. Mẽṛhẽt́ ḍaharre̠ gạḍi calaḱ me̠nte̠ko lạiae̠re̠ nase hõ bae̠ pạtiạuḱ kan tahẽna.

Ar nit…….

Aćaḱ o̠bo̠sta disạ kate̠ mo̠ne̠ mo̠ne̠te̠ muluć me̠nte̠ye̠ landa ke̠da Juli. Ako ato, ako o̠ṛaḱ ar ako tolhat disạ são̠ete̠ nana hunạr bir cẽṛẽaḱ raḱ ar he̠nde̠ hạriạṛ buru lọdamre̠ e̠skar tiryo̠ re̠aḱ rãha ar buru jharna daḱ re̠aḱ tirir-rir-rir, tirir-rir-rir-saḍe̠ Juliaḱ luturre̠ bajao̠e̠na ar ạḍi hae̠nisas kate̠ aćaḱ jeleń le̠ńje̠r uṕ ko̠ṛam se̠ć or ạgu kate̠ pãpãke̠ e̠ho̠ṕe̠na.

Shikạrpur atore̠n Julie̠ṭ Murmu Patnare̠ he̠ćkate̠ Julie̠ be̠nao̠e̠na; ‘Jolli’e̠ be̠naoe̠na. Ać disại bhor Julie̠ disạya je̠mo̠n uni do̠ bare̠a dhạrti, bare̠a so̠ṅsarre̠ye̠ tahẽ akana. Mit́ do̠ ako gãota re̠aḱ so̠ṅsar, pe̠ṛa pạrbhạ ar go-baba bo̠e̠hawaḱ so̠ṅsar ar Shikạrpur re̠aḱ so̠ṅsar; ar do̠saraḱ do̠ Paṭna re̠aḱ so̠ṅsar, aćaḱ e̠skaraḱ so̠ṅsar, saj-bajao̠ḱ re̠aḱ so̠ṅsar, kho̠bo̠r kagoc ko̠re̠ chapa so̠do̠ro̠ḱ se̠ kạhni e̠manre̠ ńe̠lo̠go̠ḱ kukmu le̠kanaḱ so̠ṅsar. Juli be̠ste̠ bae̠ bujhạu ńama o̠kaṭaḱ sạriaḱ kana ar o̠kaṭaḱ do̠ ạnḍuṅ; se̠ ać le̠ka ar tinạḱ hoṛko hudise̠da; tinạḱ kuṛiko hudise̠da –ce̠t́ hõ bae̠ hudis ńama Juli.

Ar inạ tayo̠m do̠ Rupaḱ so̠ṅsar.

Rup ar Juliaḱ ńapam do̠ onkage hoe̠ le̠na je̠le̠ka daḱ din ṭanḍi-ghuṭu-be̠dakore̠ le̠ge̠m-lo̠go̠t́ ghãs o̠mo̠no̠ḱ ar se̠to̠ṅ din se̠ṭe̠rle̠n khan mo̠so̠t́-rańjao̠-ro̠ṅgo̠ gujuḱ. Mit́ṭe̠n dhe̠o̠ daḱte̠ unkin banar mit́ ghạṛi lạgit́ mit́ṭe̠ć ḍhipre̠kin he̠o̠la rakaṕ le̠na ar tho̠ṛa ghạṛi tayo̠m e̠ṭagaḱ dhe̠o̠ he̠ćle̠nre̠ banar ho̠ṛkin be̠gare̠na.

Mõṛe So̠ro̠s Kạhni puthi khon tumạl akana; ol toṅgeḱa.