Baḍaejoṅ- 5 Hasa re̠n putul

PDFPrint

Ne̠be̠tar abo ko o̠ka le̠kan putul bon ńe̠le̠t́ ko onko kodo̠ ko taṛam daṛe̠aḱ kana. Ro̠ṛ daṛe̠aḱ kana, raḱ daṛe̠aḱ kana, jạpit́ daṛe̠aḱ kana. Me̠ne̠k jiwe̠t́ hoṛ le̠kage ko be̠bo̠har daṛe̠aḱ kana, o̠nkan ko ko be̠nao̠e̠t́ koa. O̠koe̠ gidrạ re̠n go babako re̠ṅgeć ge, onko do̠ ṭaka-paisate̠ daman putul ko do̠ baṅko kiriń daṛe̠ako kana. Un o̠kte̠re̠ mit́ṭeć kaḍe̠ć re̠ ge̠ndre̠ć be̠dhao̠ katege putul bon be̠nao̠ ako kana ar bon bujhạu ako kana, nuige amre̠n gate lạgit́ putul do̠. Hoe̠ daṛe̠aḱa no̠ako lạgit́ge tis khon putul re̠aḱ be̠bo̠har e̠ho̠ṕ akana, baṅ baḍae̠o̠ḱ kana. Ạkilan koko me̠ne̠da, Itihãs o̠lo̠ḱ laha khonge putul re̠aḱ katha do̠ ańjo̠mo̠ḱ kana. Inḍia se̠ Bharot diso̠mre̠n gidrạ kodo̠ kaṭte̠ be̠nao̠ akat́ duạr re̠aḱ kulup bo̠l (so̠ho̠r bajar re̠aḱ duạr re̠ be̠bo̠haro̠ḱ kan) le̠ka bo̠ho̠ḱan putul te̠ko gateḱ kan tahẽkana. Iran diso̠mre̠n gidrạko do̠ kicrić te̠ be̠nao̠ putul te̠ko gateḱ kan tahẽkana. Bhãj kate̠ be̠nao̠ akat́ kicrić re̠n putul re̠ mẽt́, mũ, mo̠ca ko be̠nao̠e̠t́ tahẽkana. Se̠dae̠re̠ boṅgatala akan gidrạ koaḱ to̠pare̠ hasa ar jaṅte̠ be̠nao̠ akan putul ko ńam akana. Ae̠ma hoṛge ko so̠do̠r akada, dho̠ro̠m re̠aḱ kạmire̠ hõ putul ko be̠bo̠haro̠ḱ kan tahẽkana. Un o̠kte̠ do̠ gidạr-pidạr ko putul se̠ murti ko hõ bako saṕ oco ako kan tahẽkana. Ar o̠nko salaḱ e̠ne̠ć lạgit́ hõ bako laṛcaṛ oco ako kan tahẽkana.

Ạd hilo̠ḱ re̠n putul koaḱ katha me̠n le̠khan ge pạhil re̠ hudis hijuḱa Misor (Egypt) diso̠m re̠aḱ. Misor diso̠m re̠n hoṛ ko bạṛtige putul ko kusi ako kan tahẽkana. Ar onko putul do̠ kaṭ te̠ko be̠nao̠e̠t́ ko tahẽkana. Puti re̠aḱ mala hõ ko ho̠ro̠ḱako kan tahẽkana. Noa diso̠m re̠ko ńam akan putul koaḱ umạr do̠ amdaj 3 (pe) hajar se̠rma khon hõ bạṛtige.

Greece diso̠mre̠ hõ napae̠ napae̠ putul ko be̠nao̠e̠t́ ar bo̠ho̠ḱ do̠ ạḍi jo̠to̠n kate̠ ko te̠yare̠t́ tahẽkana. Be̠nao̠ putul koaḱ ti-jaṅga do̠ sutạm te̠ to̠no̠l tahẽn kante̠, sutạm tege ko laṛao̠ ocoe̠t́ tahẽkana. O̠kte̠ bo̠do̠le̠nte̠ nito̠ḱre̠n gidrạ ko do̠ mo̠ńj mo̠ńj ko ko kusiako kana. Bo̠ro̠ph diso̠mre̠n gidrạ ko do̠ timi hako re̠aḱ jaṅre̠ khudni kate̠ putul ko e̠mako kan tahẽkana. Mexico diso̠mre̠n gidrạ ko lạgit́ do̠ hasa ḍhumbaḱ rapaḱ kate̠ putul ko be̠nao̠e̠t́ ko tahẽkana. Ar niạ o̠kte̠re̠ do̠ mo̠m, kicrić, uń babe̠r ar e̠mante̠aḱ te̠ hõ. Ḍhe̠r kạuḍire̠n putulaḱ muṭhạn do̠ e̠kal lạbit́ ti tege ko be̠nao̠ purạua.

PDFPrint