ḌAṄGRA SAGAṚ

Simraḱ khon Raṭraṭ paṭpaṭ kãć kõć haṭ haṭ jahan saḍe ańjom len khan mit́ okte do bujhạuḱ kan tahẽkana nit do ḍaṅgra se kaḍa sagaṛ noa ḍaharte calaḱ kana seko idieda, mit́ okte do jahan jinis eman se hoṛo-caole, sahan sakam se hasa se emanteaḱ jahanaḱge asen  idie lạgit́ asol utạr jinis do tahẽkana Sagaṛ.

Mit́ oktere utạr Baṅgla disomren hoṛkoaḱ sạṅgiń daṛan reaḱ asol bahon do tahẽkana Ḍaṅgra Sagaṛ. Hoṛo get́ oktere goṭa atoren hoṛaḱ khet reaḱ hoṛo phosolko oṛaḱte rakaṕ jarwae lạgit́ do noa ḍaṅgra sagaṛge tahẽkana asol bahon.

Ona okte rege bapla kore hõ noa ḍaṅgra sagaṛ reaḱ aḍi jạruṛ do tahẽkana thoṛa lahanti akan gharoń ren hoṛ kodo sadher hoponaḱ bạriạtoḱ hõ sagaṛre deć katege ko calaḱ tahẽkana, Inạ chaḍa hõ adom adom jaega se ṭhạ̃i kore do pus sakrat re noa ḍaṅgra sagaṛ reaḱ haparao hõko hoe ocoet́ tahẽ kana.

Menkhan nia reaḱ nãhãḱ do ar cet́ hõ bạnuḱa, ato oṛaḱ kore mit́ bar kisạ̃ṛ hoṛko do sokte sedae reaḱ jinis ko saṕ dohoe lạgit́ ko kurumuṭueda. Okte reaḱ jạruṛte nit do sanam hoṛko jontro se machine rebon bhorsaḱ kana, ar ona tege jãhã seć calaḱ, daṛan, se jạruṛoḱ jinis emanko asen se idie lạgit́ do bạṛti ge Bus, Auto Bhuṭbhuṭi geko kusiaḱ kana.

Noa dhạrtire nãhãḱ jug ren sanam jạt jạtko jaoge gạḍa daḱ leka apan ạpin kạmi kạsni re ạujhạṛ ko tahen kana ar dhạrtiren eṭaḱ ko leka mimit́ ạtuḱ daḱ lekage jion ḍahar reko dạdạṛ kana, hoe daṛeaḱa noa ḍaṅgra sagaṛ cet leka abo khon nit do adoḱ kana onkage ar aema lekan ạri cạli se beohar jinis k omit́ abo ṭhen do eken kisạ kạhni lekage tahena, ona katha do aema hoṛ nit hõ babon hudis/ ganḍon tioḱ akada. Mit́ din nonkan sanamaḱ jinis kodo eken uihạr rege tahena.