Rajshai re bhul Cikitsa emte santal gidrạ goćen reaḱ nạlis

10 September 2020, Rajshahi Lokkhipur ṭoṭha reaḱ Popular Diagnostic Cenṭer re 3 bochor tala umerren mit́ santal gidrạ goćen reaḱ so̠mbat ńam akana. Menkhan Popular Diagnostic Cenṭerren ạyurko do akoaḱ bhul cikistsa em reaḱ katha bako sikạr akada.

Goćen gidrạ aḱ ńutum do Mikhayel Soren, apat ńutum Kornelius Soren, eṅgat Sabina Mardy.  Rajshahi naṅgraha reaḱ  Purub Hoṛogram Isạe atore onkoaḱ oṛaḱ do. Pneumonia rog ńamte uni gidrạ do Guru bar Popular Diagnostic Center re gidrạ rog maraṅ doctor Belal Hossain ṭhen ko idiledea.

Gidrạren gharońjren hoṛ ko baḍae ocoḱ kana je Dr. Belal Hossain aḱ serial do onko ńuhumber 7 baja seć ko ńameda. Uni doctor do apanar oṛaḱ khonge aćren goṛoić  hotete online te rogekoe ńeleḱko tahekana. Uni gidrạ ńelkate uni do gidrạ nebulizer se oxygen te sãhet́ emoḱe metat́koa ar ona em tayom khon ge gidrạaḱ muskil do ḍher idiyentaya. Ona tayom hakopako onko Rajshahi Medical College Hospital ko kolket́ koa. Menkhan atra dahar rege hopon gidrạ do goćena.

Ona tayom uni goć gidrạwante uni ren go-baba do Popular Diagnostic Center gidrạ bhul cikitsa em reaḱ katha ko nạliskeda ar onḍe tahekate ona reaṅ bicạrko dạbikeda.  Tayomte ńindạ seć police hećente onko metaḱ koa jodi ape thanare ạn reaḱ bebostha hatao lạgit́ pe nạlis tobe khạtige niạ reaḱ bebostha do hataoḱa. Tayom te ńindạ 11 baja seć thana re begor nạlis kate goć gidrạ niạ onko santal hoṛko do oṛaḱ ko ruaṛena.

Niạ bisạite Dr. Bellal Hossian aḱ katha do pneumonia rog karonte uni gidrạaḱ do sãhẽt́ koṣto hoyoḱ kantaete nebolizer se oxygen le emade tahekana noa do jahan bhul cikitsa do baṅ kana.