Ṭhạkur jiuaḱ (Isor Babawaḱ) Hukumko

Dhạrti sirjạu tayom serma Baba do Pilcu haṛam (Adam) Pilcu buḍhiye (Hawa) sirjạulet́ kinạ. Doholet́ kinae ạḍi mońj ar napae jaegare, okaredo jan janwar, cẽrẽ ciprut́ko talare heseć-sekreć rekin tahekana. Isor Babaaḱ hukum bebatao serma dut ge serma parades khon laga ocoente Soetane bikạuena. Ṭhạkur jiu do mit́ dare reaḱ jo jome manalet́ kina, menkhan soetanaḱ gobol rekin paṛaoente Ṭhạkur jiuaḱ hukumkin bebasutada. Ṭhạkur jiu do laga o̠ḍok ket́kinạ ona mońj jaega Eden bagwan khon.

Manwa ko saṅgeyen khan Ṭhạkur jiu do bako disạledea, onate mit́ okteye mohor meṭao ket́koa. Aema din tayom Ṭhạkur jiu do Mose nạbiye kusiadea ar maraṅ burure hohoadete 10 (gel) goṭen hukume calade tahekana. Barea dhirire 10 goṭen hukum do abo manwa lạgit́e emat́bona.

1. Iń samaṅre eṭaḱ Isorko aloko tahentam ma.
2. Goṛhon muṭhạn se jahan ḍhob alom benaojoṅa, baṅ do coṭ sermarenko reaḱ, baṅ do latar otrenko reaḱ, baṅ do o̠t latar daḱrenko reaḱ. Onako alom ḍoboḱaḱa ar alom sewawaḱa.
3. Probhu amren Isoraḱ ńutum ạuri pạthạuṛi do alom ńumtaea; ente Probhuaḱ ńutum ạuṛi pạthạuṛiye ńumtae hoṛ do bae bin dosea.
4. Jirạuḱ mãhã disạime, jemon onam so̠no̠t; turui mãhãm khaṭaoḱa ar amaḱ jotom kạmia; menkhan eaeaḱ mãhã do Probhu amren Isor ńutumte mit́ṭeć jirạuḱ dinge.
5. Eṅgam ạpum ganaokinme, jemon Probhu amren Isore emam disomre amaḱ dinkoge ḍher hoyoḱtam.
6. Alom khuna.
7. Alom laṭghaṭa.
8. Alom kombṛoea
9. Am aḍepaseren hoṛ reaṅ eṛe goha alom ema.
10. Am aḍepaseren hoṛaḱ oṛaḱ duạr alom lalocaḱa; am aḍepaseren hoṛren maejiu se guti, se kạmṛi se ḍaṅgra, se gadha se am aḍepaseren hoṛaḱ jahanaḱge alom lalocaḱ́a.

Sonot utạrić Ṭhạkur jiu cetan reaḱ hukumko aćaḱ titeye ol akat́a. Mit́ṭeć dhirire do aćaḱ sonotoḱ reaḱ rukhiạ ar dosaraḱ redo manwa tala reaḱ goṛo gopoṛo, dulạṛ ar dạyik reaḱe hukum akat́a. Amren go Babakin manaokin lagaoḱa, ar alom khuna; noakin do jiwi lạgit́te sonotaḱ kana. Alom laṭghaṭa, noa do bapla ar gharońj rukhiạ reaḱ tonol kana.  Alom kombṛoea, noa do sompotti rạkhi jogao reaḱ hukume em akat́a. Eṛe goha alom ema, noa redo eṛe khon sạriaḱ seć taṛam reaḱ uskur kana.  Alom laloca, noatedo ontor saphae reaḱ sạbun kana.

Delabon abo sanam Santal boeha miserako, Ṭhakur jiuaḱ hukum bon manao ganaote bhorbon hameṭjoṅma.