Hạnḍi ńu re̠aḱ bhạlạite̠t́-1

Television se̠ kho̠bo̠r kagojkore̠ diso̠m re̠aḱ dinạmhilo̠ḱ kho̠bo̠r ko̠bon ńe̠l le̠khan so̠ho̠r-bajar ar ato pahṭa kore̠ juạn ko̠ṛako do̠ ńu bulo̠ḱte̠ko laṅga ar ulbuliạ caba akana. Nito̠ḱaḱ dhạrtire̠ jo̠to̠ khon lạṭu ar bo̠to̠ranaḱ e̠ṭke̠ṭõṛe̠ kangea ńu bulo̠ḱ se̠ madokasakti se̠ nisạ do̠. Ńu bulo̠ḱ so̠mpo̠kte̠ Bilạt diso̠mre̠n mare maraṅ go̠ṅke̠ Gladstone doe̠ me̠nle̠t́a, ‘Lạṛhại, Mãhãmạri ar Akal’ niạ pe̠a re̠aḱ tinạḱ bạṛić ho̠yo̠ko̠ḱa, no̠ako mit́kate̠ hõ ńu bulo̠ḱ se̠ mado̠k re̠aḱ bo̠to̠ranaḱ do̠ ḍhe̠rgea. Ạkilankoko uduḱ akada, cuṭi ńu, ńu bulo̠ḱ, kạmi be̠go̠r jiṅgi khe̠mao̠ ar jo̠m-ńu re̠aḱ khạntitẹt́ te̠ manwa jion re̠aḱ 12 (gel bar) se̠rma do̠ tho̠ṛaḱ kantabona. Se̠dae̠ khonge manwa so̠maj re̠ ńu bulo̠ḱ do̠ me̠naḱa ar no̠a do̠ baṅ ṭhikaḱ me̠nte̠ko me̠taḱ kana. Ńu bulo̠ḱ se̠ nisạ re̠aḱ sana gujuḱ umul se̠ć geye ạyur idibona, re̠ṅge̠ć o̠re̠ćko, be̠go̠r kạmiko se̠ kisã̠ṛ ho̠ṛko hõ boge̠ t̠eko ńir bo̠lo̠ḱ kana. Santal so̠majre̠n guruko hõko laṅga cabae̠ya, ce̠kate̠ santal ho̠po̠nko no̠a khonko rukhiyạ koa!

O̠na atore̠n mạńjhi haṛamaḱ do̠ tho̠ṛa mẽt́ marsal me̠naḱ taya, uni hõ jao̠ge ce̠kate̠ ńu bulo̠ḱ khon bo̠e̠ha-mise̠rakoe̠ ruạṛ ko̠a; o̠na re̠aḱ doe̠ guni bhạbiḱ kan tahẽkana. Ackage mit́din kulhi duṛuṕe̠ ho̠ho̠ ke̠da, go̠ḍete̠ me̠tadea jo̠to̠ko lại akome̠ te̠he̠ń do̠ je̠mo̠n atore̠n jo̠to̠ ho̠ṛko se̠ṭe̠r tahen. Jo̠to̠ko he̠ć se̠ṭe̠re̠n tayo̠m mạńjhi haṛam do̠ ato gão̠tare̠n ko ṭhe̠n aćaḱ katha lạ lạiye̠ e̠ho̠ṕe̠na. Ape̠ do̠ ae̠ma dhao̠pe̠ ańjo̠m akada ńu bulo̠ḱ do̠ bạṛić gea me̠nkhan te̠he̠ń iń apekoń me̠tape̠ kana ńui pe̠ ḍhe̠r  ḍhe̠r tạṛi-hạnḍi-pạurạ ko ńueipe̠; tinạḱ khusi unạḱge ńuipe̠, ape̠aḱ mon moṅgo̠no̠ḱ hạbić kusi-rạskạte̠ ńuipe̠. E̠nte̠ tạṛi-hạnḍi- pạurạ ńu le̠khan do̠ ae̠ma bhạlạitẹt́ me̠naḱa. Bhạlại te̠t́ko do̠ no̠age

1. Ae̠ma gate̠ko ńamo̠ḱa;
2. Amaḱ laṅga cabaḱ tama;
3. Mo̠ńj ar napae̠ jạpit́ ho̠yo̠ḱ tama;
4. Dhuṛi dhạrtire̠ nana hunạr hudis cintạ ar duk bhabna caba utạro̠ḱ tama;
5. O̠kte̠ bo̠do̠lo̠ḱ são̠te̠ amaḱ taṛam laha se̠ aḍe̠pase̠ ho̠ṛko le̠ka calaḱ re̠̣aḱ jạruṛ bạnuḱa;
6. Ho̠ṛko são̠te̠ e̠m-e̠pe̠m re̠aḱ jạruṛ baṅ tahe̠na;
7. Calao̠ laha akan ạgil hapṛamko são̠te̠ mit́ pante̠re̠m duṛuṕ daṛe̠aḱa;
8. Amre̠n o̠ṛaḱ ho̠ṛ, gidạr-pidạrko ar bako ạṛis me̠a, mo̠n jiwi hõ mo̠ńjgem aukạua;
9. Ruạ haso, re̠ṅge̠ć te̠taṅ bam ạukạua;
10. Mo̠ńj ho̠ro̠ḱ bande re̠aḱ hõ jạruṛ bam bujhạua;
11. Amre̠n gate pe̠ṛa usạrte̠ dhạrti khon bidạ jo̠har ko e̠mgo̠t́ama, joe̠ hoe̠ko̠ḱ ma nisạ re̠aḱ, joe̠ hoe̠koḱ ma ńu re̠aḱ.

Duṛuṕ akan ko atore̠n ho̠ṛkodo̠ katha ańjo̠m kate̠ bo̠gete̠ko ko̠yo̠ḱ ńapamana. Mit́ ghạṛi tayo̠m lusur phusur ańjo̠mo̠ḱ kana, ko̠ṛa-kuṛi, haṛam ar gharo̠ńj mukhiạko ṭhe̠n khon hõ. Mạńjhi haṛam do̠ katha mucạt́ kate̠ge o̠ṛaḱ te̠ye̠ bo̠lo̠ hape̠ye̠na. Bại bạite̠ katha do̠ ḍhe̠r calao̠e̠na. Me̠pe̠ne̠nako, ce̠kate̠ te̠he̠ń mạńjhi haṛam do̠ no̠nkan kathae̠ me̠n ke̠da! Ce̠t́ ho̠e̠ akan taya? Ae̠ma le̠kan kukli mo̠nre̠ he̠ḍe̠jo̠ḱ kante̠ tho̠ṛa ho̠ṛ do̠ bako sahao̠le̠t́te̠ mạńjhi bakho̠l te̠ko bo̠lo̠e̠na. Mạńjhi haṛam ko kuli ke̠de̠a, ce̠daḱ nonkan galmarao̠ do̠m ho̠ho̠ke̠t́a ar no̠nkan katha do̠m me̠taḱle̠a. Ale̠kore̠n bạhu koaḱ do̠ ce̠t́ ho̠yo̠ḱa! Ale̠re̠n gidrạ kodo̠ ce̠t́ halot re̠ko paṛao̠ḱa! O̠ṛaḱ duạr do̠ ce̠kaḱa! Ko̠ṛa-kuṛi koaḱ tayo̠m halo̠t ce̠t́ ho̠yo̠ḱa! Mạńjhi haṛam do̠e̠ thir hape̠akana, jahan ro̠ṛ ruạṛ bae̠ e̠mat́koa. Ạḍite̠t́ko kạjiạu ke̠de̠te̠ye̠ me̠nke̠da, iń do̠ e̠ke̠n ape̠ko ńu bulo̠ḱ re̠aḱ bhạlạite̠t́ iń lại akat́pe̠a. Mit́ ho̠ṛ do̠ ạḍi ãṭ kastao̠ḱ ar ne̠ho̠re̠n te̠ye̠ me̠tadea ce̠t́ ce̠ka jạruṛ tale̠a? Mạńhi haṛam do̠ onkoe̠ me̠taḱ koa, te̠he̠ń do̠ ar jahanaḱ bạń galmarao̠ ape̠a, do̠ nito̠ḱ do̠ calaḱ pe̠ ar ganḍo̠no̠ḱ pe̠, tho̠ṛa din tayo̠m ińgeń kulipe̠a. Mạńjhi haṛamaḱ no̠nkan katha ańjo̠m kate̠ tumbut́ kate̠ mạńjhi bakho̠l khon ko onḍok he̠će̠na ar ạpan ạpin o̠ṛaḱ se̠ćko calao̠e̠na.