Kuḱmu Ko Adogoḱ Kana Oka Seć Coň
-Subodh M Baskey
Nahaḱ okte sanamaḱ ge bujuroḱ kana ạḍi usạrate
Ḍạňguạ kuṛiaḱ pag̣ra, jaňga reaḱ lipur
Hara goduḱ kuṛiaḱ koṛam, paseć mạnmi tet́ ho, Sanamaḱge
Hoe daṛeaḱa hotot́ nạṛige cet́ coń hoṛmo seć te
Latar te liwạt pheḍoḱ kana.
Gaḍa aṛe re kạsi baha bir ar hoṛo geleko,
Jạput́ din reaḱ serma daḱte ạtu hećakan
Gitil kote gitil reaḱ buru benawakana
Baňgem hudis keya, jãhãtis nonḍe sorot candore
Kạsi baha bhuṭạḱlena, hoṛo gele ko belena.
Bạrsa reaḱ hende rimil jhar daḱ em men begor
Pagla hoete bharot reaḱ cerapuńjire seṭerena
Rohoṛ keṭeć dhạrti ṭunḍạňre bańcao tãhen baň dãṛe kana
Abad begor kạiko ḍher idiḱkana.
Ale atoren hara godoḱ chaṭpaṭić gidrạ koṛa
Akil begor sãṛoḱte, juạn okte reaḱ hoṛmo reňgećte
Din ge bạrić ṭolatei monḍ-haḱ kana
Somaj reaḱ muṭhạn samaňre kạli dulwate
Ạḍi rạskạ tegei jiňgei khemaoyet́ taya
Tayom daram beňget́ bạgi kateć.
Santal somaj reaḱ apnartet́ banadhao
Mạńj-hi, Pargana, Desh Mạńj-hi ar
Lo Bir Bạisi kodo, din ke din rạpudoḱ kana
Goć hoṛ rapaḱ ko ghaṭre
Ńit́ ge paseć rapaḱ roňgoḱa sạri kuḱmu kodo
Onḍe ko ruạṛ hijuḱa Saitanren peṛako.
Ạḍi duḱ kosṭo te benaowakan kuḱmu reaḱ diuhạ̃
Hoe bharḍo chaḍa ge iṛĩjoḱkana dinamge
Marsal begor ńut́gei sandes ale kana
Baḱ junuwaḱ marsal cerceṭećaḱ
Moca rege mucạdoḱ kana jaijug lạgit́.
Ato khon nagraha tei monḍ-hawakan
Nahaḱ jugren juạn koṛa, maraň ạkil hãmẽṭ begor
Din dine bạrić idiḱ kana
Santal ạricạli bhenḍao lạgit́ baňma bole
Serma coṭ khon dãṛei ńamakada,
Eṛe phạsiara hudis bolo toraḱ kana
Sirjon khon teyarakan Santal Atore.
Sona jugren juạn kuṛiaḱ sapha mon do
Mạila hoe são tapam kateć
Nagraha renaḱ mạila tuluć pantewakana,
Gate ko mudre kạhu, haena (khĩḱṛi lekan) ar eken ayaň biń ko
Sebel peṛa metaḱme diku koṛa, naeke baba
Ar joto khon lạṭkuṭạ bulakan koṛa.
Aema utạr Santal juạn koṛa ko
Somajre ạulạhan ạgu begor, Jug reaḱ
Ulṭạu khon patal puri seć ko monḍ-hawakan
Je leka asoḱ ṭayok bako oṭaň len khan
Paseć lạṛhại re do bako jitạoḱa,
Juạn reaḱ jostet́ baňkhan acka ge paseć
Ạḍi usạrate bodoloḱ renaḱ cinhạ baň ńelogoḱ kana.
Jiňgi renaḱ oṛhẽ sereń ko se lạṛhại kore
Jitạu bakhra ganḍon; teheń
Eken banar bạiri leka ge kin hạjirakana,
Bul akan juạn koṛa koaḱ joha ko do cowagoḱ kana,
Bhạṭạmin ṭonṭate dhaṛako eken coeta cabaḱ kan takowa
Ṭhiḱ Romio sṭail lekage,
Belṭ begor jaha okte rege penṭe bhuṛujoḱa.
Gel mit́ sai sermaren nãwã juri pạri
Cirgal gidrạ sodor bakhra kin goṭawakat
Somaj reaḱ niạm bạgi kateć gharońj kin sajaoket́.
Menkha gidrạ benao ńindạ hiloḱ ḍoboḱ johar
Jokhen baḍae ńamen, Jamai doe nacar geya
Bilạmtei urgumoḱa ar maraň katha
Uni do AIDS ruạren ruạić kanai
Eratet́aḱ buru jharna ho rohoṛ geya,
Dulạṛ bhumbuḱ ḍạḍi daḱ ho baň siṭińoḱ kana
Buru lodam kore ho eṭaḱ disomren dãṛan ko ko
Ạcur baṛalena, paseć ńit́ ge lạndupoḱa
Buru lodam; ṭhik paseć oka hiloḱ coń
Noňka te birbão se bharḍo oṭaň calaolena
Erawaḱ begor baḍaite.
Noňka leka ge napai kuḱmu ko do adogoḱkan
Mạnmitet́ ho danaňoḱkana Saitan ko ṭhen,
Dhạrti ṭunḍaň sajao bad kateć
Serma rajosṭi boloḱ lạgit́ haparao ehoṕakada
Manwa ruṕan phạsiara ko
Ar dhạrti purige noroḱ ko benaowakada.
Ar ale okoe serma calaḱ lạgit́ bale ãs chuṭạoḱkan
Jạruṛ khan goć giḍi kateć ho serma purite
Seṭer ocko sạbut akada dhorom bạnij ko;
Sạrige ale do dhạrti puri ạḍi nacar ar riṭhạ
Cele ge bako koyoḱ eda ale seć.
