Gel Mit́ (11) Kelas Re Bhurtiḱ Lạgit́te Dosar Dhap Reaḱ Ardas Ehoṕena

Gel mit́ (11) aḱ kelas re bhurtiḱ lạgit́te dosar dhap reaḱ ardas teheń Sombar (09 January) khonaḱ ehoṕena. Setaḱ khonaḱ ehoṕ akante gapa Moṅgolbar (10 January) ńindạ 12 baja dhạbić calaḱa. Darakan 12 January noa ardas reaḱ jo sodoroḱa mente Dhaka sikhnạt board doe lại laha akada.

Sikhnạt board são jopoṛao menaḱko kạmiạko baḍae ocoakada, jo sodor tayom noa reaḱ khạṭitet́ se paka pạkitet́ do 13-14 January hạbić calao idiḱa. Ar onka leka tesar dhap ardas reaḱ tạrik do darakan 16 January ar jo sodoroḱ tạrik do 18 January niṭ akana. Noa ardas ar jo sodoroḱ reaḱ paka pạkitet́ hõ 19-20 January hạbić calao idiḱa.Tinạḱ do bhurti lạgit́ko bachao ocoḱ onko ko do 22-26 January bhitrite bhurtiḱ hoyoḱtakoa. Ente darakan mahna February khonaḱge kelas do ehoṕ lạgidoḱ kana.

Nawa Puthi Em Hạṭiń 2023

Koyoḱ hor koyoḱ horte 2022 serma do parom calao akana. Onka leka Aṭhwar hiloḱ khonaḱ 2023 serma hõ paṛao akana. 2023 serma reaḱ pạhilaḱ din metaḱme (01.01.2023) re Tabitha Kinder Garten School re gidrạ ko nawa puthi ko ńamkeda.

Mahasoe ko do pạṭhuạ gidrạko talare puthi ko em hạṭińat́koa. Pạṭhuạ Gidrạko ạḍi rạska monante nawa puthi ko ataṅkeda. Cedaḱ je gidrạko mit́ kelas khon ar mit́ kelas metaḱme cetan kelas ko rakaṕena. Noa do sạrige gidrạko selet́ sanam ko ṭhen rạskạwanaḱ sombat kana. Nonkate gidrạko bại bạite hara rakaṕ são sãote oloḱ paṛhao sećte hõko hara buruḱ kana. Nawa puthi ńamkate gidrạko rạskạteko heseć sekrećena. Ar onko talare oloḱ paṛhaoḱ lạgit́ udgạu mon do sirjạuentakoa.

Mahasoe ko menet́ kana, As menaḱa cet́leka calao paromen goṭa serma mońj oloḱ paṛhaoen khạtir cetan kelas ko rakaṕena onkage niạ goṭa serma hõ sanam pạṭhuạ gidrạko napaeko tahẽnte mońj ar jhũk monte oloḱ paṛhaoko cet́joṅa.

Primary School Re Mahasoe Hataoko Reaḱ Jo Sodorena

Baḍaeabon je, calaoen 2020 sermare Sarkari Primary School re Mahasoe hatao ko reaḱ ḍhạrwạḱ sodorlena. Ar onka leka mahasoe hatao reaḱ joto lekan biḍạu ar kạmihora do hoe purạu akan tahẽkana.Menkhan unạḱ din tayom Teheń Budhbar (14 Ḍecember) Disom reaḱ Sarkari Primary School re Mahasoe hataoko reaḱ jo sodorena. Niạ dhao do pe gel eae (37) hajar mõṛẽ sae eae gel pon (574) goṭen hoṛko mahasoe hudạko ńamkeda.Mahasoe hudạre bachao oco akan ko do mobile re sms talatege akoaḱ biḍạu reaḱ jo ko ńam daṛeaḱa. Inạ chaḍa hõ Prathomik ar Gonosikha Montronaloy reaḱ website (www.mopme.gov.bd) ar Prathomik Sikha Odhidaptor reaḱ website (www.dpe.gov.bd) re jo do sodorakana.

Bachao oco akan ko do 31 Ḍecember bhitrite akoaḱ joto sikhnạt certificate reaḱ asolaḱ kopi , NID card reaḱ phoṭo kopi pe goṭen, police verification form, sivil surgeon aḱ medical fitness certificate ko soṅge kateć jila Prathomik Sikha Office te senoḱ hoyoḱtakoa.

Primary Reaḱ Briti Biḍạu Reaḱ Tạrik Bodolena

Primary Sikhnạt ṭhaõnaren mõṛẽ kelas ren gidrạkoaḱ Briti biḍạu reaḱ tạrik bodolena. Nawate niṭ akan khobor lekate, Darakan 30 Ḍecember noa biḍạu do hoyogoḱa. Cedaḱ je, Prathomik Sikha Odhidapter ren são goṛoić (General Administration) Mohammad Nazrul Islam Sombar (12 Ḍecember) noa khobor babotre sapha sạphi lại sodor akada. Arhõe baḍae ocokeda je, Darakan 29 Ḍecember noa briti biḍạu hoyoḱ reaḱ katha tahẽkana. Menkhan enhiloḱ adom adom jilạre do sthanio sarkar bachao reaḱ bhoṭ menaḱa. Ona iạtege biḍạu reaḱ tạriḱ do bodol hoyena.

Lahatenaḱ khobor lekate mimit́ sikhnạt ṭhãonaren 10% pạṭhuạ gidrạ noa biḍạureko selet́ dareaḱa. Menkhan nawanaḱ goṭawaḱ lekate mimit́ sikhnạt ṭhãona khonaḱ 20% pạṭhuạ gidrạ noa biḍạu emoḱ reko selet́ daṛeaḱa. Biḍạure seledoḱ lạgit́te fee hisạbte mõṛẽ gel (50) kateć kạuḍi emoḱ hoyoḱa. Enhiloḱ setaḱ 10:00 baja jokhen biḍạu ehoboḱa ar 12:00 baja do mucạdoḱa.Eken bar ghonṭa bhitrite biḍạu do hoe purạuḱa.

SSC Biḍạu Reaḱ Form Purun Ehoboḱ Kana 18 Ḍecember

Darakan bochor 2023 reaḱ Secondary School Certificate (SSC) biḍạu reaḱ form purun do ehoboḱ kana. Ar ona do niạ mạhnạ reaḱ 18 Ḍecember khonaḱ ehoṕkate 04 January dhạbić calao idiḱa. Onka leka Online hotete fee emoḱ reaḱ okto do 5 January hạbić. Menkhan thoṛa bilom ńõḱlen rehõ bilom reaḱ são Online hotete 10 January hạbić SSC biḍạu emoḱ pạṭhuạ ko do form ko purun daṛeaḱa. Aṭhwar hiloḱ (11 Ḍecember) Dhaka sikhnạt board ren biḍạu tạṅkhi ar ńel jujut́ić Professor Abul Basar aḱ suhiat́ ḍhạrwạḱ talate lại lahayena.

Registration Fee-

Biggan bibhạg ren pạṭhuạ kodo form purun lạgit́te bar hajar mit́ sae pongel (2140) ṭaka emoḱ hoyoḱtakoa. Onka leka Manobik ar Business/Commerce bibhạgre paṛhaoḱ kan pạṭhuạko hõ (2020) bar hajar bargel ṭaka kateć emoḱ hoyoḱtakoa.

Briti Biḍạu Reaḱ Tạrik Sodorena

Primary reaḱ Briti biḍạu do darakan 29 Ḍecember hoyoḱa. Enhiloḱ goṭa disomre mit́ sãote tikin ber 11:00 baja jokhen upạijlạ porjaire noa biḍạu do hoyogoḱa. Sokol hiloḱ (09 Ḍecember) Prathomik sikha odhidapter reaḱ mit́ ḍhạrwạḱ hotete noa sombat baḍae ocoakana. Ḍharwạḱre menakana, bar ghonṭa reaḱ biḍạure Baṅgla, English, Biggan ar Mathematics bisoe ko cetanre 25 nomber kateć moṭre mit́ sae (100) nombor reaḱ biḍạu do hoyoḱa. Mõṛẽ aḱ kelas ren moṭ pạṭhuạ gidrạ ko modre 10% noa biḍạureko selet́ daṛeaḱa. Onate noa biḍạure seledoḱ lạgit́te apan ạpin sikhnạt ṭhaõna khonaḱ 27 Ḍecember bhitrite admit card do seledoḱ gidrạko talare em hạṭińoḱa.

Baḍaeabon je, calaoen 2009 serma khon somaponi biḍạu do ehoṕlena. Khan un khonaḱge noa briti biḍạu bond utạrlena. Ar onkan jahan briti bidạu hoyoḱ reaḱ jahan horage baṅ tahẽkana. Menkhan nit unạḱ din tayom arhõ noa briti biḍạu hatao reaḱ goṭa se niṭakana. Calaoen 28 November Prathomik ar Gonosikha Montronaloy reaḱ mit́ dupuṛuṕ talate noa biḍạu hatao reaḱ ko mon muruḱ akada. Noa biḍạu talate disomre laser hataṅ pạṭhuạ gidrạko bacaho ńamoḱte, onko gidrạko talare sikhnạt goṛoko em hạṭińakoa.

Biḍạu Ehoṕena Tabitha Kindergarten School Re

Chapainawabgonj jilạ, Amnura Mission reaḱ Tabitha Kindergarten School re teheń Robibar (04 Disember) setaḱ 9:30 baja khonaḱ bochor mucạt́ reaḱ (Annual Examination-2022) biḍạu do ehoṕena. Play khon Mõṛẽ kelas re paṛhaoḱkan sanam gidrạge biḍạureko selet́ akana. Bochor mucạt́ reaḱ noa bidạure mimit́ pạṭhuạ gidrạko ạḍi rạskạ salaḱ bidạuko emeda. Cedaḱ je, ar thoṛa din tayom khange ńel nelte noa 2022 serma do caba heć akana. Ar noa mucạt́ bidạu talatege pạṭhuạ gidrạko arhõ nawa metaḱme cetan kelas ko rakaṕ calaḱa.

Sạrige ạḍi rạskạ reaḱ katha kangea. Ona iạte gidrạko ạḍi jhũk ar kurumuṭu monte biḍạuko emet́ kana. As menaḱa sanam gidrạge biḍạu mucạt́re mońj jo̠ ko ńama mente. Mahasoe ko hõ sanam gidrạko mońjteko ńel arko tạṅkhiyet́kote napaete biḍạu hoyoḱ kana. As menaḱa teheń khon mucạt́ din dhạbić napaete biḍạu hoe purạuḱa.

SSC Biḍạure A+ Nombore Ńamkeda Shikha

Dinạjpur jilạ reaḱ Hạkimpur thana Arjipaṛa atoren Shikha Jeklin Soren. Apat́tet́aḱ ńutum do̠ Swapon Soren. Aćren kuṛi gidrạ ne̠s serma reaḱ SSC biḍạure Boguṛa YMCA Pablik iskul eṇḍ kolej kho̠n jo̠to̠ biso̠yre A+ nombore ńamakada.

Hahaṛa lekan katha do̠ arhõ̠ menaḱa, jo̠to̠ biso̠yre goṭaṛte 1300 no̠mbo̠r tahẽ̠kana. 1300 no̠mbo̠r modhre 1245 nombore arjaoakada. Nowa rạskạ reaḱ kho̠bo̠r do̠ sạrige ạḍi go̠ro̠b reaḱ katha kana. O̠lo̠ḱ-paṛhaore uniaḱ nowa tạpis rejalṭ abo santal gidrạko lạgit́̕ udgạuanaḱkangea. Daraekan dinko re noṅkage o̠lo̠ḱ-paṛhao sãote eṭaḱ eṭaḱ kạmi-kạsnikore hõ̠ aboren ho̠ṛko rejalṭ lekhan, aboaḱ uthnạu ạḍi kajak lahaḱa.

SSC Biḍạu Reaḱ Jo̠ Sodorena

Secondary School Certificate (SSC) biḍạu reaḱ jo̠ so̠do̠rena. Teheń Sombar (28 November) tikin ber 12:00 baja Maraṅ Montri do biḍạu jo̠ so̠do̠roḱ kạmi uḍhạukeda .

Niạ dhao are (9) goṭen sadharon sikhnạt board, Madrasa ar Karigori sikhnạt board milạukate jotokore moṭre bargel (20) lakh khon hõ ḍher gidrạ SSC bidạu ko emleda. Baḍaeabon je, calaoen 15 September SSC ar ona man reaḱ biḍạu do̠ ehoṕlena. Korona mahamạri, banbạsi- ḍubạdaḱ ar jahan karonaḱte ạḍi bilomte SSC biḍạu hoe purạuena. Ar bilomte hoeakante biḍạu hatao tayom turui gel (60) din badre biḍạu reaḱ jo̠ do̠ so̠do̠rena.

Delabon baḍaelege nes bochor oka board re tinạḱgan gidrạko pass akada-

Sikhnạt Board- Pass reaḱ har

Dhaka- 90.03%

Rajshahi- 85.87%

Comilla- 91.28%

Jessore- 95.03%

Chottogram- 87.53%

Borisal – 89.61%

Sylhet- 78.82%

Dinajpur- 81.14%

Mymensingh- 86.07%

Gapa SSC Biḍạu Reaḱ Jo̠ So̠do̠ro̠ḱa, Baḍae Ńamoḱa Cet́ Lekate;

Secondary School Certificate (SSC) ar ona man reaḱ biḍạu jo̠ do̠ gapa (28.11.2022) so̠do̠ro̠ḱa. Maraṅ montri Sheikh Hasina hotete uḍhạu talate biḍạu reaḱ jo̠ do̠ so̠do̠ro̠ḱa. Dhaka Madhomik ar Ucho sikha board ren bidạu ńel jujutić Md:Abul Basar aḱ suhiat́ mit́ ḍhạrwạḱ talate lại laha akana je, gapa tikin ber 12:00 baja khonaḱge bidạu reaḱ jo̠ do̠ nij nij sikhnạt ṭhaõna se Online hotete mit́ sãote sodoroḱa.

Cet́ lekate jo do baḍae ńamoḱa:

Bidạu reaḱ jo̠ so̠do̠r tayom SSC pạṭhuạ ko do̠ sikhnạt board reaḱ website ar sms hotete hõ jo̠ ko baḍae daṛeaḱa.

Noa Website re Roll no, Registration no, biḍạu reaḱ ńutum, bochor metaḱme biḍạu emakat́ serma se sal ar sikhnạt board select kateć submit baṭon re click lekhange jo̠ baḍae ńamoḱa.

Inạ chaḍa hõ mobile re hõ jo baḍae ńamoḱa. Ona lạgit́ Message option re bo̠lo̠ kateć SSC ol hoyoḱa ar space emkate board reaḱ ńutum pạhil pea akhor ol kateć arhõ space emkate roll no ol hoyoḱa arhõ space emkate pass reaḱ serma ol kateć 16222 nombor re kol hoyoḱa.

Jemon, udharon lekate-SSC DHA 123456 2022 ol kateć 16222 nombor re kol. Enḍekhan nonkate hõ ạḍi algate biḍạu emoḱko do̠ akoaḱ apan ạpin result se jo ko baḍae daṛeaḱa.