Ko̠ro̠na mahamạ̃ri kabja re do̠hoe lạgit́ nãwãte Sikhnạt gãota ko reaḱ chuṭi ḍheroḱ kana se̠ 6 February tayo̠m kelas ehoboḱa ona baḍae joṅ lạgit́ dhãoṛa dhạuṛi re menaḱkoa pạṭhuạ gidrạ ar baba-gogo ko. Cedaḱ je̠, niạ lahare hõ mit́ lagamte mit́ serma tala sanam skul-College ko bond tahẽkana. Skul- College bond menaḱ khạtir noa babotre aema lekan gapalmarao ko calaḱ kana. Noa gapalmarao talatege cinhạ ńamakana, calaḱkan noa chuṭi do̠ arhõ mit́-bar hapta ḍher daṛeaḱa. Ar Pạṭhuạ gidrạko ko̠ro̠na ṭikạ ạḍi usạra emako lạgit́ Sarkar do̠ ṭikạ hapta do̠hoe reaḱe guni-bhạbiḱ kana. 

Co̠lo̠nti (bisesoggo) ko meneda, Noa rog do̠ arhõ bar hapta ḍher chạplạu daṛeaḱa. Noa babotre Montronaloy ar Madhomik ar Uccho sikkha Odhidaptor (Mausi) kho̠n baḍae ńamoḱ kana, ko̠ro̠na reaḱ ne̠betar reaḱ hal se̠ dosa Sarkar do̠e ńel jut́et́ kana. Ko̠ro̠na ajar baṅ ko̠m ńõḱlen khan calaoen serma leka nẽs hõ dhap dhapte ḍher idiḱa Sikhạt gãotako reaḱ chuṭi hõ.

Madhomik ar Uccho sikkha Odhidaptor ren ạḱyurić (Madhomik Biddaloy) Oddhapok Belal Hosen do̠e menkeda, Nonkan muskil dosa metaḱme ko̠ro̠na baṅ ko̠m ńõḱlen khan Skul-College do̠ o̠ho̠ jhićlena. Onate Online te kelas ehoṕ akana. Hoṛmo hạṭiń reaḱ sanamaḱ ạn-ạriko manao ganao selet́ Assignment kạmi hora arhõ ehoṕ lạgido̠ḱ kana. 2022 serma ren SSC ar HSC pạṭhuạ gidrạ koaḱ assignment ehoṕ lạgit́ maṭh porjạire batlao kol hoeakana.   

2021-2022 sikhnạt serma reaḱ ge̠l mit́ (Eleven) kelas re Online hotete bhotri reaḱ jo̠ (result) do̠ so̠do̠rakana. Hola Sunibar ńindạ 8 baja okte Online re ge̠l mit́ kelas re bhorti website  (xiclassadmission.gov.bd)- re result do̠ so̠do̠r hoeakana. Mobile re SMS se̠ bhorti website kho̠nge result do̠ ńamogo̠ḱa.

Bachao ocoakan  pạṭhuạ gidrạko darakan 30 January kho̠n 6 February ńindạ 8 baja bhitrire Mobile banking charge bad kate registration fee 228 taka jo̠ma talate bhorti reaḱ nisṭạn baḍaejoṅ hoyoḱ takoa.

Sikhnạt ṭhãonako re bhorti reaḱ tạrik do̠ 19 kho̠n 24 February dhạbić. Kelas ehoṕ reaḱ tạrik do̠ 2 March. High School re bhorti lạgit́ 8 January Online ar SMS re ardas hatao ehoṕ kate 23 January mucạt́ akana. Darakan 2 March kho̠n nãwã sikhnạt serma ren gidrạkoaḱ kelas ehoṕ reaḱ katha menaḱa.

Dhaka Sikhnạt Board ren College visitor (poridorsok) Abu Taleb Moazem Hosen do̠e baḍae oco akada, bhorti reaḱ jo̠to̠ lekanaḱ kho̠bo̠r ko website hotete ńamogo̠ḱa.

Ko̠ro̠na mahamạ̃ri ḍher pasnao akante daraekan 6 February hạbić disạm reaḱ mitmit́ ṭhoṭha kore menaḱ Skul –  College bond reaḱ ko lại jạhir akat́a. Ar noa ko dinre Online te kelas do̠ calao idiḱa.

Eṭaḱ seć bon ńelle khan, Medical college jhić tahẽna se̠ bondoḱa ona reaḱ jãhãn goṭa baṅ hoeakana. Menkhan teheń Robibar (23 February) ona babotre mit́ dupuṛuṕ talate goṭa katha do̠ko hataoa.

Tayom daram hukum ạuri ńam dhạbić Sarkari – Besarkari hukum lekate jatiyo Biswabidaloy reaḱ jo̠to̠ bidạu ko bond do̠ho̠e reaḱ ko jạhir akada.

Ko̠ro̠na mahamạ̃ri ḍher kho̠n thoṛa ko̠m ńõḱlen khange noa bidạu ko reaḱ okto (somoysuci) tayom daram arhõ nãwãte baḍae ńamoḱa.

Sikhnạt ṭhãona ko bond tahẽnre hõ pạṭhuạ gidrạ je̠no oloḱ – paṛhao re jopoṛao ko tahẽ daṛeaḱ ona iạte Online se̠ assignment hotete gidrạkoaḱ oloḱ – paṛhao do̠ calao idiḱa. Sikhnạt Montri Dipu Moni hola Sokolbar (21 January) Jatiyo sikhnạt board re nãwã curriculum iạte mit́ dupuṛuṕ mucạt́re kho̠bo̠riạ ko noa kathae baḍae ocoket́koa.

Inạ chaḍa hõ arhõe baḍae ocokeda, Daraekan 6 February hạbić sikhnạt ṭhaõna ko são sãote disạm reaḱ jo̠to̠ coaching centre ko hõ bond tahẽna. Ar ko̠ro̠na virus thoṛa ńõḱlen khange ạḍi usạra  Skul – College  kodo arhõ jhijoḱa.

Disạmre ko̠ro̠na japṛao arhõ ḍherente daraekan 6 February dhạbić disạm reaḱ jo̠to̠ Skul – College ar Bissobiddaloy bond do̠ho̠e reaḱ ko lại jạhirkeda.

Hola Sokolbar (21 January) Montri Porisod bibhag ren Socib Md. Sabirul Islam me suhi akat́ mit́ ḍhạrwạḱ re men akana, 21 January kho̠n 6 February dhạbić jo̠to̠ sikhnạt ṭhãona kodo bond tahẽna.

Darae kan June candorege Calaḱ kan serma reaḱ Secondary School Certificate (SSC) biḍạu hatao lạgit́e sapṛaoḱ kana sikhnạt board.

Ar ona sãote 2023 serma khon niṭ akan oktere bidạu hatao reaḱ hõko hudis baṛaet́kana. Me̠nkhan jo̠to̠ bisoi se̠ subject cetanre bidạu hoyoḱa se baṅ, ona do nit hõ ạuri ko goṭaea.

Ko̠ro̠na virus bại bạite ḍher idiḱ kante ạḍi usạra jo̠to̠ sikhnạt gãota ko pe gel (30) din bond do̠ho̠e lạgit́ Lawyer Yunus Ali Akondo do̠ High court rey ardas akat́a.

Uni do̠ arhõe menakada, Bicạr phanḍaoić (jo̠j) Farah Mahbub ar Jo̠j S M Moniruzaman aḱ dupuṛuṕte noa reaḱ sunạn hoe daṛeaḱa .

Ko̠ro̠na Mahamạ̃ri ḍherlen khan Sarkar do̠ arhõ sikhnạt gãotako bond reaḱe goṭaea. Sikhnạt Montronaloy do̠ nit́ hạbić Sikhnạt gãota bond reaḱ jãhãn goṭa katha ạuriye hataoa se̠ bae hudis baṛa akada, Sikhnạt Montri Dipu Moni nonkanaḱe baḍae oco akada. Hola Moṅgolbar (18 January) Osmani Sriti Milonayoton re DC sonmelon mit́ṭen dupuṛuṕ mucạt́re noa kathae baḍae oco akada.

Arhõe menkeda, Sikhnạt gãota bond lenkhan hõ je̠mo̠n virtual hotete kelas ko hatao daṛeaḱ noa khạtir saprao tahẽn lạgit́ DC ko solha kathae emat́koa. Ar okare virtual kelas hatao reaḱ ạt bạnuḱ, onḍe do̠ je̠mo̠n Assignment dharate cecet́joṅ kạmi ko calao idi nonkanaḱ katha hõe lại so̠do̠r akada.

12 khon latar umer ren pạṭhuạ gidrạko nit́ kho̠n ko̠ro̠na ṭikạ bako emakoa, Menkhan onkoaḱ cecet́joṅ kạmi hora do̠ calao idiḱa men̠te Sikhnạt Montri Dipu moni do̠e baḍae oco akada.

Ona sãote arhõe baḍae oco akada, Sarkari – Besarkari tinạḱ Skul – College menaḱ Ar onare tinaḱ oloḱ – paṛhaoḱ kan gidrạ menaḱko, onko do̠ akoaḱ  porichoipotro (ID card) beohar kate ko̠ro̠na reaḱ ṭikạ ko hatao daṛeaḱa. Tịka centre kore pạthuạ gidrạko ṭikạ emako reaḱ kạmi do̠ calao idiḱa.