Medical College Jhić Tahẽna Se̠ Baṅ Ona Reaḱ Goṭa Katha Teheń Baḍae Ńamoḱa

Ko̠ro̠na mahamạ̃ri ḍher pasnao akante daraekan 6 February hạbić disạm reaḱ mitmit́ ṭhoṭha kore menaḱ Skul – College bond reaḱ ko lại jạhir akat́a. Ar noa ko dinre Online te kelas do̠ calao idiḱa.

Eṭaḱ seć bon ńelle khan, Medical college jhić tahẽna se̠ bondoḱa ona reaḱ jãhãn goṭa baṅ hoeakana. Menkhan teheń Robibar (23 February) ona babotre mit́ dupuṛuṕ talate goṭa katha do̠ko hataoa.

Jatiyo Biswabidaloy reaḱ Jo̠to̠ Bidạu Ko Bondena

Tayom daram hukum ạuri ńam dhạbić Sarkari – Besarkari hukum lekate jatiyo Biswabidaloy reaḱ jo̠to̠ bidạu ko bond do̠ho̠e reaḱ ko jạhir akada.

Ko̠ro̠na mahamạ̃ri ḍher kho̠n thoṛa ko̠m ńõḱlen khange noa bidạu ko reaḱ okto (somoysuci) tayom daram arhõ nãwãte baḍae ńamoḱa.

Sikhnạt Ṭhãona Ko Bond Tahẽnre Hõ Online te Cecet́joṅ Kạmi Ko Calao Idiḱa

Sikhnạt ṭhãona ko bond tahẽnre hõ pạṭhuạ gidrạ je̠no oloḱ – paṛhao re jopoṛao ko tahẽ daṛeaḱ ona iạte Online se̠ assignment hotete gidrạkoaḱ oloḱ – paṛhao do̠ calao idiḱa. Sikhnạt Montri Dipu Moni hola Sokolbar (21 January) Jatiyo sikhnạt board re nãwã curriculum iạte mit́ dupuṛuṕ mucạt́re kho̠bo̠riạ ko noa kathae baḍae ocoket́koa.

Inạ chaḍa hõ arhõe baḍae ocokeda, Daraekan 6 February hạbić sikhnạt ṭhaõna ko são sãote disạm reaḱ jo̠to̠ coaching centre ko hõ bond tahẽna. Ar ko̠ro̠na virus thoṛa ńõḱlen khange ạḍi usạra Skul – College kodo arhõ jhijoḱa.

Daraekan Bar Hapta Lạgit́ Disạm Reaḱ Jo̠to̠ Sikhnạt Ṭhãona Ko Bond Tahẽn Kana

Disạmre ko̠ro̠na japṛao arhõ ḍherente daraekan 6 February dhạbić disạm reaḱ jo̠to̠ Skul – College ar Bissobiddaloy bond do̠ho̠e reaḱ ko lại jạhirkeda.

Hola Sokolbar (21 January) Montri Porisod bibhag ren Socib Md. Sabirul Islam me suhi akat́ mit́ ḍhạrwạḱ re men akana, 21 January kho̠n 6 February dhạbić jo̠to̠ sikhnạt ṭhãona kodo bond tahẽna.

2023 Sermare Niṭ Akan Oktere SSC Bidạu Hatao Reaḱ Hudis – Bhabna Calaḱ Kana

Darae kan June candorege Calaḱ kan serma reaḱ Secondary School Certificate (SSC) biḍạu hatao lạgit́e sapṛaoḱ kana sikhnạt board.

Ar ona sãote 2023 serma khon niṭ akan oktere bidạu hatao reaḱ hõko hudis baṛaet́kana. Me̠nkhan jo̠to̠ bisoi se̠ subject cetanre bidạu hoyoḱa se baṅ, ona do nit hõ ạuri ko goṭaea.

Sikhnạt Gãotako 30 Din Bond Do̠ho̠e Lạgit́ High Court Re Ardas

Ko̠ro̠na virus bại bạite ḍher idiḱ kante ạḍi usạra jo̠to̠ sikhnạt gãota ko pe gel (30) din bond do̠ho̠e lạgit́ Lawyer Yunus Ali Akondo do̠ High court rey ardas akat́a.

Uni do̠ arhõe menakada, Bicạr phanḍaoić (jo̠j) Farah Mahbub ar Jo̠j S M Moniruzaman aḱ dupuṛuṕte noa reaḱ sunạn hoe daṛeaḱa .

Ko̠ro̠na Ḍher lenkhan Sikhnạt Gãota Ko Arhõ Bondoḱa: Sikhnạt Montri

Ko̠ro̠na Mahamạ̃ri ḍherlen khan Sarkar do̠ arhõ sikhnạt gãotako bond reaḱe goṭaea. Sikhnạt Montronaloy do̠ nit́ hạbić Sikhnạt gãota bond reaḱ jãhãn goṭa katha ạuriye hataoa se̠ bae hudis baṛa akada, Sikhnạt Montri Dipu Moni nonkanaḱe baḍae oco akada. Hola Moṅgolbar (18 January) Osmani Sriti Milonayoton re DC sonmelon mit́ṭen dupuṛuṕ mucạt́re noa kathae baḍae oco akada.

Arhõe menkeda, Sikhnạt gãota bond lenkhan hõ je̠mo̠n virtual hotete kelas ko hatao daṛeaḱ noa khạtir saprao tahẽn lạgit́ DC ko solha kathae emat́koa. Ar okare virtual kelas hatao reaḱ ạt bạnuḱ, onḍe do̠ je̠mo̠n Assignment dharate cecet́joṅ kạmi ko calao idi nonkanaḱ katha hõe lại so̠do̠r akada.

12 Kho̠n Latar Umer Ren Pạṭhuạ Gidrạ Ko Nit́ Kho̠n Ko̠ro̠na Ṭikạ Bako Ńama

12 khon latar umer ren pạṭhuạ gidrạko nit́ kho̠n ko̠ro̠na ṭikạ bako emakoa, Menkhan onkoaḱ cecet́joṅ kạmi hora do̠ calao idiḱa men̠te Sikhnạt Montri Dipu moni do̠e baḍae oco akada.

Ona sãote arhõe baḍae oco akada, Sarkari – Besarkari tinạḱ Skul – College menaḱ Ar onare tinaḱ oloḱ – paṛhaoḱ kan gidrạ menaḱko, onko do̠ akoaḱ porichoipotro (ID card) beohar kate ko̠ro̠na reaḱ ṭikạ ko hatao daṛeaḱa. Tịka centre kore pạthuạ gidrạko ṭikạ emako reaḱ kạmi do̠ calao idiḱa.

Sikhnạt Gãota Ko Bond Do̠ho̠e Reaḱ Kho̠bo̠r Gapa (Sombar) Heć Daṛeaḱa

Disom re ko̠ro̠na rog bại bạite bạṛti chạplạu se̠ pasnao idiḱ kana. Noa khạtir sikhnạt gãotako bond do̠ho̠e reaḱ Sarkar do̠ arhõe hudis baṛayet́ kana. Noa babotre teheń Robibar ńindạ 10 baja okte Covid-19 jatiyo karigori so̠lha se̠ porames committee são virtual hotetey duruṕ ńapamoḱa Sikhnạt Montri Dr. Dipu Moni. Teheńaḱ dupuṛuṕre mit́ goṭa katha ko hataoa, ar noa goṭa katha do̠ gapa (Sombar) sombad Sonmelon re Sikhnạt Montri Dipu Moni do̠ noa babotrey baḍae ocoḱa.

Noa dupuṛuṕ se̠ gapalmarao talate arhõ mit́ dhao sikhnạt gãotako bond reaḱ goṭa katha ko hatao daṛeaḱa. Jatiyo porames se̠ so̠lha committee ko miljul kate goṭa katha ko hatao lekhan mit́ cando lạgit́ sikhnạt gãota bond tahẽ daṛeaḱa. Jo̠to̠ seć hudis – ganḍon kate committee ko noa ko goṭaea.

Jatiyo Bissobiddaloy Re Honors Dosar Bo̠rso̠ Reaḱ Bidạu Do̠ 29 January Eho̠bo̠ḱa

Jatiyo Bissobiddaloy re 2020 serma reaḱ Honors Dosar Bo̠rso̠ ren pạṭhuạ koaḱ (Niyomito, Oniyomito ar Grade Unnoyon) bidạu do̠ darakan 29 January eho̠bo̠ḱa. Hapta reaḱ chuṭi se̠ Sarkari chuṭi chaḍa din hiloḱ setaḱ 9 baja kho̠n bidạu do̠ eho̠bo̠ḱa. Ar darakan serma reaḱ 15 March biḍạu do̠ mucạdoḱa.

Inạ begor hõ 2020 serma reaḱ Honors Tesar bo̠rso̠ ren pạṭhuạ koaḱ biḍạu hõ darakan serma reaḱ 26 February eho̠bo̠ḱa ar 27 March bidạu do̠ mucạdoḱa. Noa biḍạu reaḱ Somoysuci Bissobiddaloy reaḱ website (www.nu.ac.bd) re e̠m akana. Hola (8 December) Budhbar ńindạ Bissobiddaloy reaḱ mit́ ḍhạrwạḱ talate noa kho̠bo̠r do̠ baḍae oco akana.