Gapa khon bond tahẽna Interneṭ

Goṭa Diso̠mre̠ gapa Robibar (18 October) khon dinạm din 3 ghonṭa kate̠ Interneṭ ar TV Cable bond ge tahẽn re̠aḱ katha ko lại akada ISPAB ar COAB. Jhamka jhạkur tar (Cable) ocoḱ cabae̠ lạgit́ noa te̠ṅgo daram re̠aḱ got̠awaḱ hatao ̠hoe akana mente̠ baḍae̠ akana. No̠a bhitrirege onko do̠ aema ṭhạ̃i re̠aḱ Internet goṛoko e̠moḱ kan gãota koren rạsiạ ko ṭhe̠n Mobile phonete SMS ar email teko baḍae̠ ocoe̠t́ko kana je, se̠taḱ 10 baja khon tikin 01 baja hạbić Internet do̠ bond do̠ho̠ akana me̠nte̠̠.

Goṭa diso̠m rege arhõ bạṛti botorre me̠naḱkoa lonbonko. Tinạḱ kạṭić lonbonić kane botor do̠ unạḱge ḍhera. Ente̠ uniaḱ do̠ asol punji at́ re̠aḱ botor tahẽn kan tae̠a. Interne̠t bo̠nd tahe̠n khan KORONA re̠aḱ no̠a mahamạri re̠aḱ no̠a oktere̠ ae̠ma hoṛge kạuḍi se̠ćte̠ko kạbuḱa se̠ko laṅgaḱa.

Kạmi ho̠ra re̠aḱ ḍhạrwạḱ re̠ te̠ṅgo hape̠ akana me̠nae̠a Dhaka Dạkhin City Corporation (DSCC). ISPAB, COAB ar NTTL cạlạuako são̠ dupuṛuṕ kate̠ hasa latarte̠̠ tar idi ạgu se tić ạuri hoyoḱ hạbić tar emanko baṅ ge̠t́ re̠aḱ niạme doho akada Dhaka Utạr City Corporation (DNCC). Tobe̠ tar o̠co̠ḱ kạmi nit hõ calaḱ tegeye do̠ho̠ akada DSCC.

Aema le̠kan ạnḍuṅ, muskilaḱ baḍae̠ oco kate̠ rehõ thir do̠ bạnuḱa Raj nagraha re̠aḱ tamkur tar ocoḱ re̠aḱ kạmi. Baṅ hoe̠ akana e̠ṭaḱ jahan lekan kạmi hora hõ,Internet se Satelite goṛoko hatao̠e̠t́ kan hoṛko do̠ ạḍi le̠kan haronre̠ko par̠ao̠ akana Raj nagrahare̠n Lakh lakh hoṛko.Loksanre̠ par̠ao̠ kate̠ (18 October) khon dinạm din 3 ghonṭa kate goṭa diso̠mre̠ Internet ar Cable TV re̠aḱ goṛo kạmi bond re̠aḱ husiạriko e̠m akana Goḱṛo emoḱko.

KORONA eṭkṭõṛẽ são ̠lạṛhại okte̠re̠ Diso̠m re̠aḱ kạuḍi niti calaḱkan hor saṕ dohoe̠ lạgit́ Online jopor̠ao̠ re̠ge Goṭa dhạrti doe̠ Bhorsa akana. No̠a Obostare̠ ackage tar ocogre̠ te̠ṅgo thir akana ạpisko re̠aḱ aema kạmiko. Diso̠m re̠aḱ sare bajar, Kendrio Bank menek Banijjik Bank re̠aḱ kạmi kohõ no̠a iạte̠ akot̠oḱ kana, sapha alga se mit́ jumte̠ Internet bae ńamle̠ khan Bond tahẽna ATM goṛo kạmi hõ. No̠a iạte̠ sae sae kạrur ṭaka re̠aḱ loksan hoyoḱ re̠aḱko hudiseda Projuktibidko.

No̠te̠ 17 October bhitrire̠ calaḱkan muskilaḱ saphae lạgit́ City Corporationko okte ko tol akawadia Internet ar Diss em kạmire̠ goḱṛokan 2 gão̠tare̠n ạḱyurko.

Ạdibạsi ar Reṅgeć hoṛko sapha sạphi Jom-Ńu hok Ńam lạgit́ Dạbi

“Sapha sạphi jom ńuyaḱ joto hoṛaḱ dạyik” no̠a bohoḱ katha samaṅre̠ doho kate̠ Dhạrti jakat sapha sạphi jom-ńuyaḱ mãhã-2020 lạgit́ teheń sokolbar (16 October 2020) se̠taḱ 10 baja o̠kte̠ (ANSKS) Hall Room,Mohipur panch bibi, Joepur Hatre̠ mit́ gapal marao̠ sabha hoe purạue̠na. Ạdibạsi Nari O Sishu Kollan Songstha (ANSKS) re̠aḱ Ạyurte̠ ar Association for Land Reform And Development (ALRD) aḱ goṛo sopohot́te̠ noa gapal marao̠ do̠ hoe purạu e̠na.

Ạdibạsi Nari o Sishu Kallan Songsthare̠n são̠ sabha mukhiạ Anjali Murmuaḱ Ạyurte̠ No̠are̠ selet́ko tahẽ kana Songsthare̠n kạmiạ Manik Soren project Coordinator Sohagini Hasda, General Secretary Nila hasda ar o̠nare̠n rạsiạ Liton Murmu, Royel Murmu.

No̠a chaḍa hõ phaelao̠ gapal marao̠re̠ Noyomi Murmu, Dipti Mardi,Anita Munda, Iti Marandi,Candni Murmu, Bipul Marandi takoko selet́le̠na.

Gapal Marao̠re̠ Manotan koko lại keda, Ato oṛaḱre̠n Ạdibạsiko nit hõ Bir pakaṛ ar ṭạnḍi re̠aḱ aema le̠kan jomaḱko ce̠tanre̠ko ṭehaḍoḱ kana. Menkhan din din te̠ nit do̠ aema le̠kan ranko (Bis) re̠aḱ beo̠har bạṛti akante̠ Jola/juli kore̠ hako kaṭkom ko hõ ar do̠ bako ńamoḱ kana. O̠na chaḍa Bir pakaṛ kohõ kom cabae̠nte̠ aema le̠kan jomaḱko je̠mon, aṛaḱ sakam bạḍgu bayaṅ oka do̠ ńamoḱ kan tahẽ o̠na kohõ nit do̠ ar ńamoḱ kana.

COVIT-19 mãhãmạri iạte̠ Ạdibạsi koaḱ Jom-ńu lạgit́ aema lekan eṭkẹtõṛe do̠ hoe akana. Ai-Rojgar kom akante̠ sapha sạphi jom-ńu do̠ cet́ dinạm din re̠aḱ jạruṛoḱ jom-ńuaḱ kulạu anṭao̠tege aema muskil re̠ menaḱkoa. Nitoḱ noako thoṛa mońj ńoḱ akan re̠hõ laha din kore̠naḱ ghạṭti khon rakaṕ daṛe do̠ Ạdibạsiko bako ṭhen baṅ hoe akana.

Roroṛko do̠ arhõko menkeda Jom-Ńu do̠ Manwakoaḱ pạhil hok kanre̠hõ Ạdibạsi kodo̠ Kạuḍi seć lekate̠ko laṅga se tayom gete̠ nit hõ sapha sạphi jom-Ńu hok khon do̠ ko e̠ṛan gea, No̠a sabha khon Ạdibạsi reṅgeć hoṛko sapha sạphi Jom-Ńu hok jemonko ńam no̠a lạgit́ jạruṛoḱ kạmihora purạu lạgit́ Sarkar ṭhe̠n dạbi e̠m hoena.

Source: Adivasi News

Badarganj upojilạ Lohani paṛare̠ ạdibạsi Iskul paṭhuạ kuṛi jhapṭao saṕ ar bạṛić kạmi bulạu iạte̠ mit́ Muslạ koṛawaḱ aṭok

Rangpur Badarganj upojilạre̠ Ạdibạsi Iskul pạṭhuạ 8 Irạl kilạs paṛhao̠ḱ kan kuṛiwaḱ jormoṭte̠ hoṛmo bạṛijtae̠ lạgit́ kurumuṭu re̠aḱ lạlisre̠ lailatul borat (19) ńutuman mit́ muslạ koṛae̠ giriptar oco akana. No̠a ghoṭona do̠ hola budhiloḱ ạyuṕ be̠la upojilạ Lohanipaṛa Union re̠aḱ Ạdibạsi Ato Simuljhuṛire̠ (diṅgạpaṛa) hoe̠ akana,.

No̠a ghoṭonare̠ pạṭhuạ gidrạre̠n Eṅgatte̠t́ bạdi hoe kate̠y mamla akada. Teheń Lukhibar uni muslạ koṛa Rangpur hajot teko kol kedea. Mamla re̠aḱ Ijạharre̠ baḍae̠o̠ḱ kana Dinạm hiloḱ Iskul horre̠ calaḱ hijuḱ lailatul Borat́ do̠ uni kuṛi gidrạ horre̠ eset́kate̠ dulạṛ re̠aḱ arojae kan tahẽna, o̠nate̠ Uniaḱ ona aroj nẽhorre̠ bae rạjilente̠ raṅgao̠ kate̠ uni boskoye̠ ehoṕ keda. Korona oktere̠ Iskul bondge tahẽkante̠ oṛaḱre̠ hećkate̠ uni uni kuṛi gidrạ ạṛisede kan tahẽkana.

Ae̠ma dhao mana kate̠ re̠hõ Lailatul ńutuman uni muslạ koṛa do̠ katha bae ańjom leda. Tayomte̠ ać gharońjre̠nko ona katha lại kate̠ re̠hõ jahan boge kạmi do̠ baṅ hoelena. Hola tayo̠m be̠la lailatul Borat do̠ tho̠ṛa kạmiạ são dare maḱ lạgit́ uni kuṛi tako seće hećlena,o̠na oktere̠ uni kuṛi tako oṛaḱre̠ bolokate̠ ńui lạgit́ daḱe̠ koekeda unre̠ uni do̠ tubewell khon daḱ ạgu kate̠ unie̠ emade khan uniaḱ hoṛmore̠ daḱe̠ chiṭạu adea, ona oktere̠ oṛaḱre̠ kuṛire̠n Gogo baba bạkin tahẽkan ạtre̠ bạṛić kạmi re̠aḱe̠ nẽhorade teye jhapṭao kedea ar lajao̠ jaega kore̠ ti emkate̠ bạṛijiye kurumuṭu keda uni lailatul Borat.Unre̠ uni kuṛiaḱ kạumạu ańjomte̠ eṭaḱ gharońjre̠n hoṛko ńir hećente̠ lailatulko saṕ kedea. Ona re̠aḱ khobor ńam ket́ khan pulis do̠ he̠ć kare ona ńindạge uni lalociạ Boratko saṕ kedea. No̠a ghoṭonare̠ kuṛire̠n acu gogo bạdi kate̠ lalociạ lompoṭ Borat ńutumte̠y mamla keda. Teheń Lukhibar Rangpur Adalot hũyạte̠ jehel hajotre̠ko kol kedea.

Natorre̠ Jumi rereć ḍạku tire̠ Ạdibạsi Basonti ar uniaḱ gharońj

Nator Lalpur re̠ jumi rereć ḍạku (bhumi dossu) Samad gãota re̠n koaḱ lilkạrre̠y paṛao̠ akana Basonti Rani Sardar. Katha rakaṕ akana Nator Lalpur Duaria Union re̠n Jumi rereć ḍạku ( Bhumu dossu) Abdus Samad gãota re̠n koaḱ lilkạrre bundi dosare̠ jione khe̠mao̠eda Ạdibạsi Basonti Rani Sardar. Ạdibạsi Basonti Rani Sardar ać babawaḱ record sanam Sompotti do̠ daṛe̠ uduḱ kate̠ko dokhol akada jumi rereć ḍạku(Bhumi dossu) Samad gãota.

Sorejumin se̠nkate ńel akana Ạdibạsi Basonti Rani Sardaraḱ joto jumi do̠ jumi rereć ḍạku (Bhumi dossu) Samad ar unire̠n gãotako jor kate onakoko dokhol akada.

No̠a bisại re̠ ona Ṭoṭhare̠n ko ṭhen baḍae̠joṅ khoj kate̠ ńutum baṅ sodor kate̠ thoṛa murubbi hoṛko lại keda Basonti Rani Sardar ać Babawa ḱ record me̠naḱ jumi Samad ar uni gãotare̠n hoṛko mit́te̠ jor kate̠ dokhol kate̠ko jomeda.

No̠a bisạire̠ Basonti Rani Sarda ṭhe̠n baḍae̠ joṅ khoj kate̠ unie̠ lại keda, “Iń Babawaḱ Rekorḍiạ Sanam sompod kodo̠ jumi rereć ḍạku (Bhumi dossu) Samad ar uni gãotare̠nko jor jobosti dokhol kate̠ko jomeda. Ińaḱ be̠nao̠ oṛaḱ Samad ar uni gãotare̠nko tinre̠ rạput́ lạgit́ko hećlena unre̠ iń ar ińre̠n 4 boe̠ha kuṛiko mit́te̠ onkole̠ te̠ṅgo daram let́kogea,menkhan onko do̠ aleko joto hoṛ ṭhe̠lao̠ giḍikate̠ ińaḱ oṛaḱko rạput́keda. No̠a bisạite̠ iń do̠ são sãote̠ pulisiń phoneat́ koa unre̠ thana khon pulisko heće̠na ar ińaḱ rạput́ akan oṛaḱ re̠aḱ ṭin, mãt́ khunṭi são sanamaḱ ge pulisko idikeda. Tayo̠mte̠ thanare̠ mit́ṭe̠n ardasiń e̠mkeda Samad ar uni gãotare̠n 7 hoṛ ńutumte̠.”

No̠a bisạire̠ Lalpur Thanare̠n dạyikan kṣmiạyić OC Selim Reja kuli ledere̠ye menkeda, No̠a bisạite̠ mit́ṭe̠n ardas ńam akana tojbij le̠kate̠ ạn dharate̠ no̠a re̠aḱ kạmikodo̠ hoe purạuḱa.

Source:Dainik protibadi kontho

Sada Canḍbol Khikṛi

Khikṛi do̠ losoponḍo sasaṅ ńoḱgeye tahẽkana, me̠nkhan canḍbo̠l do̠ ponḍge taya. Ạḍi sạṅgiń diso̠mre̠ maraṅ bir aṛere̠ mit́ṭe̠n buḍhiye̠ tahẽkana, unire̠n do̠ ar okoe̠ hõ bako tahẽkana. O̠kte̠ khe̠mao̠ lagit́te̠ turui go̠t́e̠n sukri ho̠po̠n ar ge̠l go̠ṭe̠n sim ho̠po̠ne̠ ạsul harae̠t́ ko tahẽkana. Sim-sukri kodo̠ thoṛako dạṛ ke̠ṭe̠ć e̠n khan ar ṭhik le̠ka bae ńe̠l to̠daro̠t daṛe̠ako kan tahẽkana. Buḍhi do̠ ạḍi hudis re̠ye̠ paṛao̠e̠na, ce̠t́e̠ ce̠kaya! Mit́ din uni buḍhi do̠ sor ńo̠ḱre̠ tahẽkan hoṛ ṭhe̠ne̠ calao̠ e̠na are̠ nẽ̠ho̠r adea, je̠mo̠n aćre̠n sim-sukri kodoe̠ ńe̠l go̠ṛoae̠. Me̠nkhan uni hoṛaḱ do̠ ae̠ma kạmi tahẽkan tae te̠ bae̠ rạmjạu le̠na, me̠tadeyae̠ ohogeń ńe̠l goṛo daṛe̠ama, ma arhõ jãhãe ko ńe̠l joṅ me̠.

Niạbar buḍhi do̠ mit́ṭe̠n bana ṭhe̠ne̠ calao̠ e̠na. Bana do̠ oṛaḱ se̠ć regeye̠ tahẽkana, ńam kede̠ khane̠ nẽho̠r adea, je̠mo̠n sim-sukrikoye̠ ńe̠l kotae̠. Bana do̠ sim ar sukri hõye̠ jo̠mkote̠ ańjo̠m torageye̠ rạji got́e̠na. Buḍhi do̠ banaye̠ kuli kedea, am do̠ noko janwar ko são̠te̠ ce̠t́ le̠kam be̠bo̠hara? Mońje̠m be̠bo̠har daṛe̠aḱ gea tho? Bana do̠ bo̠ho̠ḱ ruku ke̠t́te̠ye̠ me̠nke̠da, mońj be̠bo̠har do̠ń daṛe̠aḱ gea. Bana do̠e̠ me̠ngo̠t́ ke̠da, iń do̠ onko ‘gorob’ me̠nkate̠ń ho̠ho̠ akoa. Buḍhi do̠e̠ me̠nke̠t́a, nonka hoho te̠do̠ sim-sukri ho̠po̠n ko bo̠to̠ro̠ḱa. Mo̠nre̠ jut bae ạikạule̠t́ te̠ bana ṭhe̠n kho̠ne̠ se̠n pharake̠na. O̠na tayo̠m buḍhi do̠ mit́ṭe̠n tạruṕ (nekṛe̠ bag) ṭhe̠ne̠ calao̠e̠na. Tạruṕ hõ ańjo̠m baṛakate̠ bae bilo̠m le̠da, usạrageye̠ me̠ngo̠t́ ke̠da, hẽ ge iń doń ńe̠l do̠ho̠ daṛe̠ akoa. E̠nte̠ tạruṕ hõ sim ar sukri do̠ko jo̠mko gea. Tạruṕe̠ kuli ocoe̠na, am do̠ ińre̠n ạsul janwarko ce̠t́ le̠kam ho̠ho̠ akoa! Ne̠kṛe̠ tạruṕ doe̠ me̠nke̠da, ce̠daḱ onko do̠ iń ‘oi oi oi’ me̠nkate̠ń ho̠ho̠ akoa. Buḍhi do̠ bae kusi le̠na, me̠tadeae̠ amaḱ ho̠ho̠ ańjo̠mte̠do̠ ińre̠n ạsul ko do̠ko bo̠to̠ro̠ḱa.

Monko ạnduḱ mạnduk kate̠ge̠ ruạṛo̠ḱ kan o̠kte̠rege khikṛi são̠te̠ horre̠ ńapam do̠ hoye̠n taya. Khikṛi do̠ buḍhiyaḱ jo̠to̠ katha ańjo̠m kate̠ye̠ me̠tadea, amre̠n ạsul sim-sukri ńe̠l são̠ha ko lạgit́ do̠ unạḱ ce̠daḱe̠m dạndiḱ kana. Iń tinạḱ din me̠nạń unạḱ din do̠ ar jãhãn muskil ge baṅ ho̠yo̠ḱtama. Ińge jo̠to̠ sim-sukriń ńe̠l to̠daro̠t daṛe̠akoa! Buḍhi do̠ uniye̠ kulikede̠a, am do̠ ińre̠n ạsul sim-sukri cet́le̠kam ho̠ho̠ akoa! Ạkilan khikṛi do̠ bo̠ho̠ḱ se̠ć tiye̠ tiạr ke̠t́te̠ye̠ me̠tadea, ce̠daḱ amre̠n dulạṛiạ sim-sukri kodo̠ iń doń ho̠ho̠ akoa, ‘de̠la gateko de̠la huḍiń gateko iń ṭhe̠n hijuḱpe̠’ no̠nkań ho̠ho̠ akoa! Buḍhi do̠ uni khikṛiaḱ calaki bae bujhạu daṛe̠ada, ańjo̠mte̠ye̠ kusi ḍho̠pe̠na.

Tanorre̠ bạṛić kạmire̠ bae rạjilente̠ ạdibạsi maejiuko dal ghạl akadea.

Rajshahi jilạ Tanorre̠ bạṛić kạmi lạgit́ bae rạjilente̠ mit́ ektiạranićaḱ demạriạ dalte jokhom kate haspatal re̠aḱ aṭe̠t́ re̠ye̠ aḍrao̠ baṛae kana mit́ ạdibạsi maejiu (21) No̠a ghoṭonate̠ o̠na ṭotha bạṛić obostare̠ me̠naḱa. O̠na aḍepasere̠n hoṛko uni maejiu ona bạṛić obosta khon usạra tanor upojila health complex re̠ko bhurti kedea.

Ato hoṛ ar haspatal pahṭa seć khon baḍae̠oḱ kana tanor upojilạ re̠aḱ kolma union ṭothare̠n ạdibạsi atore̠n mit́ maejiu ae̠ma din khon bạṛić kạmire̠ hẽḱae lạgit́ chalknaka simultola nicpara atore̠n saiphuddinre̠n kor̠a Sohidul Islam (30) do̠ jaogeye̠ men ạguae̠ tahẽkana, Menkhan uni maejiu do̠ Sohidulaḱ o̠na bạṛić kạmire̠ baṅ hẽḱ kate nachoul upojilạ re̠aḱ Rajbari ạdibạsi atore̠n Roton Murmu (34) são dulạṛ dupulạṛ hoen taea.

Calaoe̠n Robibar ńindạ uni rạnḍi maejiu do̠ aćre̠n dulạṛiạ sãote̠ or̠aḱ khon oḍok calaḱ o̠kte̠re̠ Simultola ṭhe̠n Sohidul do̠ unkine̠ ńe̠l ńamke̠t́ kinte̠ onḍege uni maejiu aṭkao dohokate Roton doe̠ dal ńir kedea, ona o̠kte̠ Sohidul do̠ uni maejiu arhõ aćaḱ bạṛić sanare̠ jormoṭ kedea, menkhan enre̠hõ bae rạjilente̠ Sohidul do̠ ạdibạsi maejiu demạriạ ṭheṅgateye̠ dal kedea,o̠nate̠ uni maejiu do̠ ạḍite̠t́ ạḍigeye̠ ghạl akana.

No̠a khạtir Sohidul são ropoṛre̠ Sohidul doe̠ menkeda ńindạ uni maejiu do̠ kombṛo̠ sondhte saṕ hoe̠lena ar thoṛa thuri dalkate̠ se̠taḱ do̠ aṛaḱ hoe̠ akana,no̠a mekate khoboriạkoe̠ eṛan akat́koa.

No̠a khạtir Tanor thanare̠n dạyik ńam akat́ kạmiạić (OC) Rakibul Hasan doe̠ menkeda nonkan jahan khobor se ijạhar do baṅ ńam akana. Uni doe̠ menkeda ijạhar se ardas ńamlen khan o̠na re̠aḱ ạn le̠kate̠ dạyikaḱle kạmia,

source: padmatimes.com

Rajshahire̠ Ạdibạsi kuṛi jormoṭte̠ bạṛije (Dhorson) re̠aḱ kurumuṭu

Rajshahi jilạ Godagaṛi upojilạre̠ are̠(9) kilạs paṛhao̠ḱ mit́ ạdibạsi kuṛiaḱ hoṛmo jormoṭ bạṛić ocoḱ re̠ye̠(dhorson) paṛao̠ akana. Sunicar 10 October tayo̠m be̠la amdaj 3 baja o̠kte̠ upojilạ re̠aḱ Gogram union Baliạḍaṅga atore̠ no̠a ghoṭna do̠ hoe̠ akana.

Henostarey paṛao̠e̠n kuṛi gidrạwaḱ o̠ṛaḱ do̠ o̠na Borgitola atorege mente̠ baḍae̠ akana. Hola ńindạ 9 baja o̠kte̠ uni kuṛi do̠ ar ać Baba- Go são̠ aḍe̠pase̠re̠n tahẽkate̠ Godagaṛi thanare̠ye ijạhar akada.

Ijạhar dạkhil se̠ćte̠ baḍae̠o̠ḱ kana, uni ạdibạsi kuṛi (14) hola tayom be̠la amdaj 3 baja oakte̠ o̠ṛaḱ khon praebheṭ(privet) paṛhao̠ḱ lạgit́ bạliạḍaṅ atote̠ mahasoe̠ o̠ṛaḱe̠ calaḱ kan tahẽkana, o̠na horre hoṛo khet pinḍhạre̠ Baliaḍaṅ atore̠n Alom Hossain re̠n koṛa Al- Amin do uni kuṛi eskar ńamkedete̠ jormoṭte̠ bạṛić kạmie̠ (Dhorson) lạgit́e̠ kurumuṭuet́ tahẽkana, menkhan uni kuṛiaḱ kạumạu hohore̠ aḍepaserenko ńir heće̠n khan Al-Amin doe daṛ keda.

Godagari thanare̠n daroga(OC) Khairul Alom doe meneda mamla ol caṛhao̠ re̠aḱ kạmi calaḱ kana(report ol hạbić) uni dusiić sabe re̠aḱ hõ kurumuṭu do ̠e̠hoṕ akana.

Mamla e̠m tayom uni ạdibạsi kuṛi ar gharońj re̠n sulukre̠ko tahẽ daṛe̠aḱ ar uni dusi hoṛ usạra giriptare lạgit́ mit́ hokum e̠m hoe akana mente̠y lạikeda Rajshahi Otirikto pulis super Ifte Khayer Alom

Source: Jonojatir Kontho-11.10.2020

Hạnḍi ńũ re̠aḱ bhạlạite̠t́-3

Iń kumạṅ Mo̠ṅgla Hasdaḱ tho̠ṛae̠ ńũ lase̠rle̠n tayo̠m guhuṛ guhuṛ se̠reń iń ańjo̠m kedere̠ń kuliledea, ce̠t́e̠m sereńe̠da! Niạbar do̠ tho̠ṛa muruk te̠ye̠ sereń ke̠da are̠ lại ạdińa-

‘Hạnḍi tạṛi ńũ te̠

Baro̠ bighạ so̠mpotim bho̠rnake̠da.

Bulmam ce̠tao̠e̠n, hudis ạcure̠n

Po̠ṭo̠r ṭo̠ya le̠kam uḍạu baṛae̠.’

No̠a sereń re̠aḱ bhe̠d se̠ khandrite̠t se̠ndrań e̠ho̠ṕe̠na. Baṅgladiso̠m re̠aḱ bạrin ar utạr nakha jilạko̠re̠ santal ho̠po̠n ko̠aḱ ae̠ma ae̠ma so̠mpoti eṛe o̠co̠ḱ re̠aḱ maraṅ e̠ṭke̠ṭõ̠ṛe̠ kana hạnḍi do̠. Jạnum jhạnti deko̠ pe̠ṛa do̠ e̠kal se̠taḱ ạyuṕ ko̠ hiri lebo̠nre mo̠ne̠ jiwi do̠ lạbit́ go̠do̠ḱ tabo̠na. Pe̠ṛaḱ abo̠n, o̠nko̠ tuluć jo̠m-ńũ e̠dabo̠n to̠be̠ e̠ke̠n abo̠ko̠aḱ ghạro̠ńj ko̠rege. Jo̠m-ńũ do̠ bạṛti kaete̠ tạṛi-hạnḍi, pạurạge. Gharo̠ńj re̠aḱ muskilre̠ rin dhar lạgit́ hõ̠ kạudi e̠mo̠ḱ e̠kal geko̠ khaṛa go̠do̠ḱa. Mo̠ne̠r katha ma mo̠n regeye̠ re̠be̠t́ akat́, rin re̠aḱ jhạlire bo̠lo̠kate̠ algatege aosan e̠mo̠ḱ hõko lại sadego̠da. Me̠ne̠k unạḱ do̠ ce̠daḱe̠m guni bhạbiḱ kana, amaḱ khe̠t-baṛge tho̠ṛam e̠mạń khange rin do̠ń me̠tao̠ gidikaḱa. Ganḍra le̠ka rubuḱ rubuḱ ghạrõńj, so̠maj re̠aḱ bisi jaṅko̠ rạput́ akada, sanam so̠mpoti ho̠e̠ le̠ka o̠ṭaṅ caba akan tabo̠na. Santal ho̠po̠nko̠ me̠ne̠da, no̠a kando̠r re̠ ale̠aḱ jumi tahẽkana! No̠a baṛge do̠ So̠ko̠l go̠ṛo̠mba tako̠aḱ kana. Mit́ piṛhi hõ̠ ạuri paro̠mo̠ḱ rege ako̠aḱ khe̠t baṛge re̠ nito̠ḱ do̠ kamlako̠ khaṭao̠ḱ kana. Haere santal ho̠po̠n, haere santal so̠maj!

Abo̠ko̠ren juạn ko̠ṛa-kuṛi ko̠hõ ne̠be̠tar ma hạnḍi, tạri pạurạ bo̠ge teko̠ kusiaḱ kan. So̠ho̠rae ar e̠man po̠ro̠bko̠re naṅgraha ko̠re kho̠nko̠ so̠ho̠r se̠ṭe̠r le̠nre̠ o̠raḱ ko̠ca geko̠ o̠yo̠ṅ baṛaya. Kubrạj ar Sunil do̠ mit́ ato̠re̠n kanakin. Mit́ dhao̠ Kubrạj ar Sunil do̠ so̠ho̠rae re̠ o̠ṛaḱkin he̠ćle̠nre̠ Kubrạjre̠n mamo̠te̠t́ tako̠ ṭhe̠n pe̠ṛaḱkin ãṛgo̠e̠na. Naṅgraha re̠kin tahẽna ar po̠̠ro̠̠b kana bạṛti rạskạjo̠ṅ lạgit́ge hạnḍiko̠ do̠ho̠akada. Juạn ko̠ṛa mo̠ṭo̠r cycle re̠kin co̠ghaye̠nte̠ giṛ giṛạu calao e̠nakin. Bo̠gete̠ko̠ jo̠m ke̠da, ńũ ke̠da arko̠ rạskạe̠na. Ńuhum ńuhumko̠ bidake̠t́ kina, bidaḱ lahare̠ bar bạṭi kate̠ se̠be̠l hạnḍi ko̠ calat́kinre̠ po̠yo̠ṛ po̠yo̠ṛkin ńũ go̠t́kada. Kubrạj do̠ mo̠ṭo̠r cycle start go̠t́ke̠da ar de̠će̠nte̠ ṭipạ ṭape̠kin mo̠hnḍae̠na. Hudiń ḍahar kho̠n district ro̠ad re̠kin rakaṕ go̠t́e̠na. Bul akankin tahẽkante̠ so̠jhe do̠ bạkin calao̠ daṛeaḱ kana. District ro̠ad te̠do̠ o̠na district kho̠n raj naṅgraha calaḱ night co̠ach e̠ne̠geko̠ aṛaḱgo̠t́ akada. Ńuhum ńoḱ tahẽkante̠ ar Kubrạj do̠ ḍhe̠rge bulakane̠ tahẽkante̠ ro̠adrege samna sạmni tạpińena. Night co̠ach do̠ calao̠ paṛo̠me̠n re̠hõ mo̠ṭo̠r cycle ro̠ad kho̠n o̠ṭaṅe̠nte̠ Kubrạj ar Sunil do̠ accident te̠ ạḍikin ghạle̠na, e̠nte̠ bana ho̠ṛaḱge mit́go̠ṭaṅ kate̠ jaṅga do̠ ge̠je̠re̠n tạkina. Ho̠spiṭal te̠ko̠ idike̠t́ kina, tho̠ṛa din tayo̠m do̠kin ro̠phae̠na me̠nkhan le̠ḍha ge taṛam do̠kin eho̠̠ṕke̠da. Gate ar pe̠ṛako̠ ṭhe̠n kho̠n ańjo̠me̠na ḍherge bulkin tạhẽkante̠ no̠nkan accident do̠ ho̠eakana. Pase̠ćre̠ pase̠ć baṅkin bulko̠ḱ khan o̠ho̠ge muskil re̠kin
paṛao̠ko̠ḱa.

Ińaḱ ńe̠lre̠ ae̠ma Santal ho̠po̠nko̠ ńu bulkate̠ accidentte̠ ako̠aḱ mo̠ńj ho̠ṛmo̠ko̠ ko̠mjuri akan tako̠a. Juri pạri ko̠aḱ bhinạ-bhini ho̠e akana, go̠ć-go̠po̠ć ho̠e akana. Haere Santal bo̠eha, haere Santal ho̠po̠n delabo̠n hạnḍi-tạṛi, pạurạ kho̠nbo̠n ńir pharako̠ḱa.

T O̠ P O̠ L

Hape hape duk do̠

Aṛerem teṅgo̠ḱkan

Hara – hiri jiwi

Taṛam ḍahar re

Acka ge thiro̠ḱ mo̠n.

ạṛić eṭaḱ bhabna ge

Bhiṛkạuae ạḍi jhạl hante

Eṭaḱ bilạn seć.

Serma ipil bhitri re

Co̠ko̠ o̠na as

Ar bae gupiete

Mo̠n o̠nto̠r do̠e hapeḱ

Dhasaḱ bo̠hel jo̠to̠ kukmu kumbạ.

Serma – tapaṕ kate juạn bayar

Uḍạu calaḱako̠ ạḍi jhạl

Bar dinaḱ no̠a

Helmel hulạs re

Rạskạ hutạs mo̠n .

So̠ – baha nạṛi re

An – mo̠na ko̠ḱam hahaṛa te .

Haere diglạ ḍigli dhuṛi dhạrtire

khange hudis ruạṛạń

Mo̠ha – muhim renaḱ katha,

O̠ka reba bạṛić menaḱ

Mit́ mit́te jo̠to̠

Duk do̠ jarwaḱ

To̠ro̠ć to̠pa seṅgel leka

Mo̠n o̠nto̠r do̠ lo̠ḱ.

Hoṛko Goṛo ar joḱtonko lạgit́ge Ḍanṭao̠ do̠

Teheń BTV re̠aḱ khoborre̠ uchạne̠na Ṭhạkurgaon jilạ re̠aḱ sodor Rahiman Union Krisnopur Ạdibạsi atore̠ Upojilạ ḍanṭao̠ Thakurgaon sodor hote̠te̠ hoe̠ purạue̠n 10 go̠ṭẹć adha dolan o̠ṛaḱ.5 go̠ṭeć Ḍhokoć kol, 5 go̠ṭen dolan Ṭạnḍite̠ o̠ṛaḱ (Latrine), o̠na são̠te̠ Ạdibạsi santal koaḱ Krisnopur Ạdibạsi Iskul lạgit́ 3 adha dolan o̠ṛaḱ. Manotan Maraṅ Montri aḱ sandes hisạbte̠ Maraṅ Montriaĺ Mahal khon ńam akan kạuḍite̠ no̠a kạmi do̠ hoe purạue̠na. Upojilạ Ḍanṭao̠ pahṭa seć khon BTV ae̠ma sarhao̠, ar mońj kạmiho̠ra re̠aḱ khobor uchạn ńutumte̠ hõ ae̠ma johare̠ e̠mae̠ kana.

Calao̠e̠n se̠rma Upojila ̣ Nirbahi Officer do̠ no̠a atoe̠ hiri leda unre̠ phaelao̠ se̠rma latarre̠ cet́ joṅ kan santal Ạdibạsi gidrạko lạgit́ Iskul ar O̠ṛaḱ re̠aḱe mit́ khojoḱaḱe̠ kol le̠da Maraṅ Montri Mahalte̠.

Ńum uduḱ gano̠ḱa niạ se̠rma hõ Nirbahi Officer Abdullah-Al-Mamun do̠ no̠a Ạdibạsi santal ko lahanti jionre̠ seṭẹrko lạgit́ arhõ 11 go̠ṭe̠n adha dolan o̠ṛaḱ be̠nao̠ kate̠ e̠mako re̠aḱ mit́ ardas Maraṅ Montriaḱ mahal teye̠ kol akada.