Mit́ ho̠ṛ ren ạḍi mońj seta ar gadhakin tahẽkana. Seta do̠ jao ghuṛige uni ho̠ṛaḱ jaṅga pheḍrey ạcur baṛaea. Kisạ̃r do̠ uni seta ạḍi kajaḱe dulạrede kan tahẽkana. Ar opsor kin ńam lekhan mit́tekin khiloḍa. Kisạ̃r do̠ bahre seće calao lenkhan ar ruạr oktere uni seta bakhra jomaḱkoe ạgu toraea.

Gadha do̠ noa ko ńelte seta ạḍi ãṭe hiṅsạwae kan tahẽkana. Mit́din gadha do̠ uni seta leka kisạ̃r aḱ jaṅga ṭhene ạcur baṛae kan tahẽkana. Gadhawaḱ maraṅ okoć ho̠ṛmo̠ante kisạ̃r samaṅrey ạcur baṛae kan ńelte kisạ̃r do̠ ạḍi kajaḱe raṅgaoena. Kisạ̃r do̠ raṅgaote gadhae thạiạ kedea are laga oṅḍok kedea. Ar cakor- bakore hukumat́koa, ‘ ma uni gadha do̠ piṭạuepe ar  khunṭrire tolkaepe.’

Sikhạuna: Jo̠to̠ ho̠ṛ jo̠to̠ jaegare bako jojaoḱa.

Gaḍa aṛe ḍhipre mit́ṭen bir tahẽkana. Ona bir re aema lekan jạtren cẽṛẽ ciprut́ko basoḱ kana. Onko Cẽrẽ ciprut́ do lạṭu lạṭu darereko tukạ akada. Ona birre dare bhugạḱre mit́ dol goḍo hõko tahẽna. Tinre goḍo jom bako ńama unre onko Parwa anaj metaḱme phosol halaṅ ạgukate goḍo ko emako kantahẽna. Mit́din ona birre mit́ṭen Sikạri hećena.  Uni Sikạri do ńel jutkate mońj jaegare jhạli oḍaokeda ar ona cetanre thoṛa hoṛo erkeda. Menkhan Parwa do hoṛo bogeteko kusiaḱa. Hoṛo er se chiṭạu são sãote reṅgećte udạuḱkan Parwa ona hoṛo ko ńel ńamkeda.

Khange onko Parwa do usạra ruạṛente ona rạskạ khobor akoren mukhiạko lạiadea. Parwa dolren mukhiạ do ạḍi bud akelane tahẽkana. Adoe menkeda, noa hoṛo do oka khon hećena? Paseć nonḍe do jahan karon menaḱa. Sạrige paseć jahae Sikạr aḱ kạmi kana. Onate noa jomaḱ cetanre baṅ lalocakge bogea. Menkhan onko Parwa do akoren mukhiạko metaekana, hola mandher khon reṅgećte menaḱlea, cet́ge bale jom akada. Ạḍi aṭ reṅgećetlea. Reṅgećte onko Parwa bogeteko kạluṅ ḍabuṅ cabayena. Onko ńelte dolren mukhiạ doe mengot́keda, “dela enḍekhan bon pheḍlenge.

Ado inạ menkate Parwa do pheḍente jojomko dhurạuena. Inạ mit́ ghạṛi khangeko bujhạukeda je, akoaḱ jaṅga do oḍaoakat́ jhạlire jhạliyentakoa. Ado onḍe khon rukhiạḱ lạgit́ jhạli or ko ehoṕena. Onkate onkoaḱ jaṅga arhõ ḍherge bedhaoena. Ado Parwa do memenko dhurạuena, cet́bon cekaea? Cekate nonḍe khon bon bańcaoḱa. Akoren mukhiạ doe menkeda, nonkan gạr okte thoṛa sạburoḱ hoyoḱa. Hudis ganḍonabon cekate nonḍe khonaḱ rukhiạbon ńam daṛekea. Ado onko Parwa do ako ako talareko mepenkana, sạrige aboren mukhiạ aḱ katha babon ańjomlet́te nonkan dosarebon paṛaoena. Un jokhen dolren mukhiạ do ạcuren khan uni Sikạri hijuḱkane ńel ńamkedea. Ado uni dol mukhiạ doe menkeda, ar bilom baṅkate dela joto mit́te noa jhạli selet́bon udạuḱa. Uniạḱ katha lekage mit́te ona jhạli selet́ko udạu rakaṕena. Ado uni Sikạri ạḍi hahaṛayente coṭte koyoḱ rakaṕket́koa. Uḍạuḱ tuluć Parwa ren mạlik se mukhiạ doe menkeda, dela nit do aboren goḍo gate ṭhenbon calaḱa, onkoge aboaḱ noa jhạliko ger topaga. Onko Parwa do goḍo ṭhenko senente onko goḍo do akoaḱ kạṭić kạṭić ḍaṭate ona jhạli ko ger topaḱket́a. Nonkate onko Parwa ona muhim se gạr khon ko rukhiạyena.

Sikhạuna: Gạr se muhim okte ạṛis baṅkate mit́te kạmi hoyoḱa.

Mit́ disạmre mit́ṭen Raje tahẽkana. Uni do̠ ạḍi raṇgaoḱ hoṛe tahẽkana. Uniaḱ santhaote sanam hoṛko ạris cabalena. Ona nagrahare jahan sulukge baṅ tahẽkana. Uni Raj aḱ nagrahare mit́ṭen reṅgeć koṛa gidrạe tahẽkana. Reṅgećge rehõ bud-ạkil te do ạḍi sẽṛa ar sorosge tahẽkana. Mit́din uni gidrạ do̠ simraḱ re beret́ kate daṛane calaoena. Daṛan daṛante mit́ jokhen uni do̠ Raj aḱ bagwane heć sorena. Ado bae badaea, noa bagwan do̠ Rajaḱ kana mente. Bagwan ńelte uni gidrạ do boloḱ sanakedea. Nonkan sajao akan mońj bagwanre boloḱ ar daṛa baṛae okoe do baṅ monaea? Khange uni gidrạ do bagwane boloyena are ạcur baṛae kana.

Ackage Raj aḱ nońjor do̠ uni gidrạ cetanre paṛaoentaea. Raj do̠e tạṅkhikeda, okoe co aćaḱ bagwanre ̣ạcuṛ baṛae kana. Ado̠e hudiskeda, nunạ̣̣ḱ aṅga simraḱ re uni gidrạ do̠ cedaḱ  nonkae ạcur baṛae kana. Enḍekhan tobe kombṛo kanae se cet́? Se okoe kanae nui gidrạ do̠? Raj aḱ monre nonkan aema lekan hudis cintạ hećadea. Enḍekhan khạṭige noa reaḱ karontet́ baḍae hoyoḱa.

Inạ menkate Raj do̠ eṭaḱ chin se ruṕte oṛaḱ khone oḍokente uni koṛa gidrạ ṭhene calaoena. Calaokate uni gidrạe kukliede kana, noa disạmre baṅ ma mit́ṭen Raj menaea? Mase tobe lạime, Uni Raj do̠e cet́ lekana? Khange uni gidrạ do̠ ro̠ro̠ṛe dhurạuena, noa disạmren Raj do̠ ạḍitet́e bạṛićgea, ente disạmren hoṛko bogete santhaoet́koa, je̠lkhana kore bhoraoet́koa. Uni gidrạ do̠ arhõ cet́ko coṅ memen sanaedekana, un jokhen Raj do̠ uni gidrạ dhumkaokedete thirkedea. Ado̠ raṅgaote Raj do̠e menkeda, baḍaeam okoe kạnạń in do̠? Ińge noa disạmren Raj do̠. Okoe ńutumte am do̠ noako katham roṛeda. Dela teheń amaḱ do pạsi hoyoḱtama. Onako katha ańjomte uni gidrạ do̠ nase hõ bae tharbasaolena. Un jokhen uni gidrạwaḱ bo̠ho̠ḱre mit́ṭen bud hećadea. Are menkeda-iń okoe kana amem badaea? Iń do̠ amaḱ nagraharen uni koṛa gidrạ kạnạń, okoe do̠ haptare pon dinge paglae tahẽn. Ar teheń do̠ pon din reaḱ dosaraḱ din kana. Ona katha ańjomte Dhur! Pagla! menkate uni Raj do̠ onḍe khone calaoena. Ado̠ uni koṛa gidrạ hõ pagla lekage sereń enećate bagwan khone oḍok calaoena.

Sedae re kathae, mit́ṭen Raje tahẽkana. Uni Raj do̠ mit́din ḍahar re maraṅ utạr dhiri do̠holeda ar ać do̠ ona dhiri danaṅre oko akan tahẽkana. Ado̠ ona danaṅ khonge ńeńele dhurạuena jahae ona dhiri ḍahar khon ko ocoga se baṅ. Raj ren mit́ bar bạnij bepar ar karbạriạko ona ho̠rteko taṛam idikeda. Ḍahar re noa dhiri menaḱte adom hoṛ do̠ Rajako dusi kedea. Ente ḍahar do̠ eset́ akana.

Menkhan enrehõ onko modre mit́ hoṛ hõ noa dhiri ocog reaḱ bako cintạlena. Unre mit́ṭen casa sạbji bojha dipil kateće hijuḱkan tahẽna. Ona dhiri ńelte onḍe heć sorena ar dipil akat́ bojha gidiket́te dhiri ocog lạgit́ ạḍitet́e kurumuṭukeda.

Ạḍi ghạṛić kurumuṭu kurumuṭute mit́ okte onḍe khon ona dhiri ṭhelao ocoḱkeda. Khan casa do̠ ona sạbji ạgui senenre tạṅkhikeda , okare dhiri tahẽkan onḍe mit́ṭen ṭaka do̠ho aḱ (purse) do̠ ńurho akana. Uni casa hoṛ do̠ ona purse-e jhićket́re ạḍi utạr sona reaḱ jinise ńamkeda ar ona sãote mit́ kuṭrạ kagoj hõ tahẽkana. Ona kagojre nonka ol tahẽkana, noa sona reaḱ jinis do̠ uni lạgit́ge, okoe do̠ noa dhiri ḍahar khone ocoḱ akat́.

Sikhạuna: Dhạrti ṭunḍạṅre noa jionre abo hõ nonkanaḱ aema lekan tạkićaḱ rebon paṛaoḱa. Unre lahanti reaḱ ạtbon ńam daṛeaḱa, ar asketiạ se kuṛhiạ hoṛ do̠ hana nawa ko ạnḍuṅ baṛaea, menkhan eṭaḱ ko do̠ ạḍi gakhuṛ ar kurumuṭu salaḱ akoaḱ kukmu purạu talate lahanti lạgit́ horko tearjoṅa.

Meskoć

Mit́ṭen ca dokanre thoṛa kuṛhiạ hoṛ duṛuṕ pante katećko golpo kana. Mit́ hoṛ do ar mit́ hoṛ eṛe kathae lạiae kana. Ar eṭaḱ hoṛ doko ańjomet́ kana. Menkhan onko hoṛaḱ nonkan ropoṛ se golpote dokandar aḱ do cet́ muskil hõ bạnuḱtaea, nonkate boroṅ upkạrge hoyoḱkantea. Cedaḱ je, mit́ bar gilạs ca ạkhrińoḱtaea khạṭige. Pạhilić do nonkae meneda: iń haṛam ba ren mit́ṭen setae tahẽkana. Uni seta do hoṛ lekae roṛet́ tahẽna ar ḍaṅgra leka ghãse jomet́ tahẽkana.

Inạkate Dosarić doe menkeda: dhur, am haṛam ba ren seta khonaḱ iń mamaba ren pusi ạḍi maraṅe tahẽkana. Okoe seta hõ nit́ dhạbić uni são baṅko daṛeakana. Onate ạḍiko botoraea. Onkoaḱ onka eṛe eṛe galmarao ańjomte, Tesarić hoṛe mengot́keda: Ma nit do tobe ińaḱ katha pạri ańjomlepe. Hạṭia re calaokateń ańjomkeda, baṅma mit́ṭen maraṅ utạr biman bus gạḍi são tạkićente otre ńurhoyena. Noate okoe  hoṛ hõ bako gur akana, menkhan ona aṛe re mit́ṭen seta ar mit́ṭen Pusi gur akanko ńam akat́kina.

Mit́ṭen Pusi ar Toyo kin galmaraoḱ kana, cet́lekate seta ko khon rukhiạ ńamoḱa.   “Ado Pusi mengot́keda seta do thoṛa hõ bạń botorakoa. Cedaḱje bańcaoḱ reaḱ mit́ṭen bhańj se dhara do baḍae menaḱtińa. Khange Toyo hõe menkeda, eken inạ mit́ṭen bhańjte cekate setako khonem rukhiạ daṛeaḱa? Iń ma nonkanaḱ eyae gel (70) goṭen dhara baḍae menaḱtiń.

Tinre nonkakin ropoṛkan tahẽkana inạ oktege ona horte mit́ dol sikạri akoren setako soṅge kate bir sendrako senoḱ kan tahẽkana. Unre botorte Pusi do eken inạ mit́ bhańj se dharage beoharkeda. Uni do mit́ṭen dare re dećena ar seta bako tioḱ daṛeadea. Menkhan note Toyo do aćaḱ baḍae aḱ eyae gel goṭen upạige kạmire lagaoe kurumuṭukeda menkhan okaṭaḱge aćaḱ kạmire baṅ lagaolena. Nonka baṛaetege seta ko heć sorena ar Toyo ko saṕkedea

Baṅgladisom 30 lakh korona ṭikạ emadea Pfizer. Sastho ar Poribar kollan montri Zahid Malek-e baḍae ocokeda noa ṭikạ do buster doge hisạbte hoṛko talare emogoḱa. Niạ haptage buster doge emoḱ do ehoboḱa.

Sombar (29 May) sastho montronaloy reaḱ mit́ dupuṛuṕ re uni do noa khobore lại saḍekeda. Arhõe baḍae ocokeda je, turui  gel (60) cetan umer ren hoṛko ponaḱ doge ar gel irạl (18) khon cetan umer ren ko do tesar doge korona ṭikạ ko ńama mente lại sodor keda.

Meskoć

Mit́ṭen hoṛe tahẽkana ar uni do merom-e ạsulet́ko tahẽkana. Mit́din uni hoṛ do kombolte uyu kateće gitić jirạujoṅ kana. Ado enege dudṛumkedete jạpit́ got́keda, khan ackage uni hoṛ ren bạhu hećkate menkeda, okayenam, aṅjomet́ kanam se baṅ maraṅ utạrić merom khạsi sendrate bae ńamoḱ kana. Noa katha ańjomte uni hoṛ do beret́ente dạdạṛe ehoṕena. Ackgae pinḍạre hećkateće tạṅkhiyet́ kan bandenaḱ ma bạnuḱtae.

Samaṅre ạkinge juri-pạṛi aḱ chobi tol tahẽkana, ado one tol akat́ chubi frame tege thoṛae bandeyena  arhõ dạdạṛe dhurạuena. Dạṛ dạṛte hor birre okoe sãoe ńapam kan onkoge kuliyet́koa ińrem merom pe ńel akadea? Nonka kuli tutluće dạdạṛ kana. Ackage one bande akan frame khon chubi ńurhoyen. Khan eken frame tahẽyena. Ado uni ńelte ato-ṭolaren sanam maejiu ar kuṛi ko lajaote oṛaḱ ko boloḱkana arko bakheṛeda, cekaenae nui hoṛ do. Nui hoṛaḱ nonkan dosa ńelte hor bir do phaka cabayena, metaḱme kuli ko lạgit́ ar cele hoṛge bae ńamlet́koa, ar merom hõ bae sendra ńamledea.

Mit́ dhao mit́ṭen hoṛ sadom kombṛo sen kateće saṕ ńamena. Ado Sadom ren mạlik do uni kombṛoe metadea, kombṛom heć akante maraṅ sạjại iń em daṛeama, menkhan eken mit́ sortote iń khonem bańcao daṛeaḱa.

Kombṛoe menkeda: Ma enḍekhan cet́ sorto emoḱ hoyoḱ tińa thoṛa lại saḍe me, asoḱ kạnạń onań manao daṛeaḱa. Ado uni Sadom mạlik doe menkeda, cet́ lekate Sadom ko kombṛo koa ona cet́ạń me khaniń aṛaḱkama. Noa katha ańjomte uni kombṛo do ạḍi algate hẽḱ got́keda ar ona bhańj uduḱe ehoṕena. Pạhilte uni daṛean Sadom ṭhen senente goṭa hoṛmo thoṛae iskir baṛakedea are menkeda, pạhil dhap kạmi do mucạt́ena. Ente amren Sadomaḱ biswạs doń hameṭkeda. Nit enḍekhan lebet́ se don reaḱ jãhãn sombhabge bạnuḱanaṅ. Ado ma ńelme nit do Sadomaḱ hoṭoḱ baberiń laṛaetaea-inạkate gạkhuṛ tite jhin baber se lagam harephare horoḱae hoyoḱa. Noḱoe noa hõ algateń purạukeda. Niạ dhao ekal thoṛa sontorate Sadomre dejoḱ hoyoḱa. Dećkate nit do banar jaṅgate Sadomaḱ lać lebet́ hoyoḱa jemone raṅgaoḱ are dạṛ. Khange uni Sadom do riạḱ riạḱ dadạṛe ehoṕena.

Kombṛo doe menkeda, Noḱoe nonkate Sadom ko kombṛo koa. Menkhan Sadom mạlik samaṅte Sadom kombṛo do sạrige hahaṛa. Kombṛo lạgit́ nunạḱ mońj ạt́em emadiń ńutumte aema johariń emamkana. Khange uni kombṛo nonka memen tulućge usạrae danaṅ got́ena. Ado uni Mạlik hõ eṭaḱ Sadom re dećkate kombṛoe sabea mente lagakede rehõ ohoge tioḱ daṛeadea.

Mit́ṭen lạpite tahẽkana. Uni lạpit́ do̠ ạḍi mońj hoṛe kạpci daṛeako kan tahẽkana. Mit́din mit́ṭen officer kạpciḱ lạgit́ uni lạpitaḱ dokane hećena. Ado kạpciḱ jokhene metaekana, sir am do̠ ghũs ṭakate amaḱ gharońjem calaoeda, hoṛko baḍae keda arko raṅgao akana, paseć amaḱ khobor hoyoḱa. Khange officer-e menkeda, thiroḱme beṭa!

Arhõ onkage mit́din mit́ṭen sarkari officer uṕ kạpci lạgit́e hećena. Ado̠ uni lạpit́ roroṛe ehoṕena, Sir am do̠ ạḍi lạṭu fạkibạji hoṛ kanam. Ente am do̠ hoṛem eṛe baṛakoa. Uni officer do̠e menkeda, lạpit́ moca bond tam, ar baṅ khanem ńela. Khange thoṛa din tayom polis ona dokan ko gherao eset́keda ar uni lạpit́ jerako ehoṕena, E beṭa nonkan baṅ ganoḱ ạuri katha hoṛko cedaḱem metako kana? Uni Lạpit́ do̠ bo̠to̠r bo̠to̠rte menkeda, Sir nonkan kathań metako khan bohoḱ reaḱ uṕ algate usạra teṅgoḱtakoa ar ińaḱ kạpci kạmi hõ mońj hoyoḱtińa. Nonkate mit́ ghạṛite hoṛkoń kạpci daṛeakoa.