Meskoć

Meskoć

Pạhil hoṛ: Boeha, noa ḍahar (road) do oka seć calaoena?

Dosar hoṛ: Cedaḱ! Oka seć hõ baṅ calao akana!

Pạhil hoṛ: Cedaḱ nonka eṛe katha dom roṛeda boeha? Sạri katha lạime!

Dosar hoṛ: Cedaḱ ińaḱ katha do eṛe eṛem bujhạueda boeha? Iń do bar gel bochor khoniń ńel ạguet́ kana, ḍahar do nonḍege menaḱa.

Meskoć

Meskoć

Mahasoe mit́din kelas re mit́ṭen gidrại kulikedea-Am samaṅre jãhãe ṭaka paesa ar ạkil noa barea jinisko doho lekhan, okaṭaḱem bachao hataokea?

Pạṭhuạ gidrạ: Noa ma ạḍi alga kukli kan Mahasoe. Iń do ṭaka paesageń hataokea.

Mahasoe: Iń do ṭaka paesa do baṅ, eken ạkil geń bachao hataokea.

Pạṭhuạ gidrạ: Mahasoe, okoe okaṭaḱte okulạn se ṭonṭage, uni do onage jạruṛaea are hataoa.

Meskoć

Meskoć

Biḍạure cet́ khạtir nombor komena?

Gogo: Bangla re cedaḱ unạḱ thoṛa nomborem ńamkeda?

Gidrạ: Hạjir baṅ khạtirte.

Gogo: Cet́ enḍekhan am do biḍạure bam tahẽkana?

Gidrạ: Iń do hạjirgeń tahẽkana, menkhan iń aṛere duṛuṕ akan koṛa bae tahẽkana, one okoeaḱ ńelte biḍạureń olet́ tahẽkan.

Nú Bubulaḱ Oprom Ar Bạṛićtet́

Ńu bubulaḱko se nisạ do niạ jugre goṭa dhạrtire mit́ṭen ạḍi maraṅ ruạ kana. Noa ruạ do hoṛ khon somaj, somaj khon disạm seć ạḍi usạrai dạdạṛ kana. Nisạ ńutuman noa ruạ khon bańcao ńam lạgit́ goṭa dhạrti ạḍi ãṭe kurumuṭu kana. Jao bochor nisạ birud (Madok Protirodh dibos) din ko manao ạguieda. Enrehõ niạ do somaj khon baṅ cabaḱ kana. Boroṅ din dinte arhõ bạṛti calaḱ kana. Nisạ do khạli hoṛmo reaḱ do bae khotia. Noa do ṭaka poesa reaḱ hõ maraṅe khotia. Somaj reaḱ ạn-ạri ko cetanre hõ maraṅ probhab paṛaoḱ kana. Nisạ reaḱ bạṛti probhab do paṛaoḱ kana somaj ren juạn-juạniko cetanre. Noa nisạ karonte goṭa dhạrti ren koṭi-koṭi juạn-juạni koaḱ jibone nosṭoeda.

Ńu bubulaḱko se nisạ oprom:

Ńu bubulaḱko se nisạ modre hạnḍi, tạṛi, gãńja, hiroin, phensidil, koḍin, pethiḍin, aphim, morphin yaba, jạpit́ buṛi, traṅkuijar noako jinis lạgit́ bạṛti ko beohareda.

Ńu bubulaḱko oprom:

Ńu buluḱ koaḱ cạl-colon se cinhạ do bạṛti katete noako ńelogoḱa-(1) Ńindạ mońjte bako jạpida siń marsal ko dudṛuma, (2) Mońjte bako galmarao daṛeaḱa, (3) kạruć-bạrućko jom ńuia, (4) Alaṅ ar luṭiko rohoṛoḱtakoa (5) Monko ạḍi mońj baṅ tahen takoa, (6) Ghaneko thiroḱa-ghane ạḍi bạṛti kathako roṛa, (7) jãhãnaḱ cintạre monojog komaḱ takoa (8) duṛuṕ duṛuṕ ạuṛiaḱ somoeko nosṭoea, (9) Ạuṛiaḱte ạḍi utạr ṭakako khoja, (10) Bạibạite hoṛmoko rańjaoḱtakoa.

Mit́ hisạbte ńelakana mit́ṭen ńu bul hoṛ babotre din hiloḱ goṛre 87/= ṭakai khoroceda. Joto lebel se shreniren hoṛge noa ńu buluḱ nisạ reko boloḱ kana. Reṅgeć hoṛge bạṛti kaeteko noa nisạeda. Juạnko modre noa nisạ do ạḍi usạra ṭhạiye ńameda. Ar juạn koṛa-kuṛiko do noako nisạ ńu kate aema bạṛić kạmi jemon- khun, kombṛo, ḍakati, chintai, emanteaḱko kạmieda. Thoṛa din laha reaḱ ghoṭona bon ńelle khan oisi do jaoge nisại ńuet tahẽkana. Ar noa nisạ ńu baron karonte uni do ać gogo-baba goćkin hõ bae digdhạlena. Nonkan aema ghoṭona do ńu buluḱko hotete hoyoḱ kana.

Ńu bubulaḱre boloḱ reaḱ karon:

Porikha-nirikkha kate ńelakana okako karonte hoṛ ńu bubulaḱre bon boloḱ kana se ona rebon soṅgeḱ kana ona kodo hoyoḱ kana-orthonoitik karon, gharońjre jhogṛa-jhạṭi, ńu legae reaḱ sana, dhorom reaḱ ạn-ạri baṅ manao gateko são bạṛti somoe khemao, bạṛti rạskạ reaḱ as, noako karonte abo do bạṛti bubulaḱ rebon boloḱkana.

Ńu bubulaḱ se nisạ pasnaore akoṭaḱ:

1990 sermare madok drobbo niyontron odhidoptor benaoen tayom noa protisṭhan do ńu bubulaḱko bond lạgit́e kạmi edieda madok drobbo niyontron ạn benaoen tayom ńu bubulaḱ benao, ạkhriń, beohar, noare selet́ko ạnre soprot́ko do ạn reaḱ aotare benao akana madok niyontron board. Noa board do sorkari ar besorkari ar besorkari office são gãota kateye kạmieda. DC se jela proshasok mukhiạ kate noa komiṭi doe kạmieda. Noako nisạ bond lạgit́ ạn reaḱ soṭhik beohar, bises adalot benao ar noako cetanre hoṛ udgạuko reaḱ kạmi do jạruṛ menaḱa.

Kuṛhiạ Hoṛ Reaṅ Golpo

Mit́ṭen birre sạpạri dare latar re mit́ hoṛe tahẽkan tahẽkana. Sanam hoṛ uni do kuṛhiạ hoṛ ko metaea. Joto hoṛge uni do noa ńutumteko hohoae kan tahẽkana, ente uni do ạḍi kuṛhiạge tahẽkana. Uni do aćaḱ jionre tis hõ kạmige bae kạmi akada. Uni do jom lạgit́ hõ bae cas bas leda. Uniaḱ do eken mit́ṭen kạmi tahẽkana. Din bhor uni do sạpạri dare latar re duṛuṕkate tạṅgikaḱa, tinre ona jo do aćaḱ moca pheḍre ńuroḱa mente. Hoṛko do uni ạḍi bạṛićko ruhet́ede kan tahẽkana ar iṭạ, dhiri teko capat́ede kan tahẽkana. Menkhan onako katha bae luturaḱkan tahẽna. Uni do aćaḱ rukhiạḱ lạgit́ oka kạmi jạruṛaekan tahẽkan, inạḱ hõ bae kạmia.

Mit́ din kajak hoete ona dare reaḱ sạpạri jo do oṭaṅkate thoṛa sạńgiń re ńurena. Unre Raj ren bhạgnạt kuṛi do daḱ ṭhenge duṛuṕ akan tahẽkana. Hoete oṭaṅ heć akan mit́ṭen sạpạri jo halaṅkateće jomkeda. Nonkan bhage jo do tis hõ bae jom akada. Uni do ona sạpạri dare okoeaḱ kana, uni baplaḱ reaḱe goṭakeda. Uni do aćaḱ katha Raje lại sodoradea. Raj do uni ase emadea je, sạpạri dare ren mạlike sendra ńamea mente. Ona disomre okoe koaḱ sạpạri dare menaḱtako, onko do mit́ṭen kate sạpạri jo raj dorbarte idi ocoko lạgit́ hukume emadea. Raj ren bhạgnạt kuṛi do ạgu akat́ joto hoṛaḱ sạpạri jojome ehoṕena. Menkhan enhiloḱ reaḱ hoete oṭaṅ heć akana sạpạri leka do okoeaḱ hõ baṅ sebel kana. Raj doe kulikeda, arhõ jãhãeaḱ sạpạri dare menaḱa se baṅ, menkhan sạrige baḍae ńamkeda, eken mit́ hoṛaḱge menaḱa. Menkhan ona dareren mạlik do nonkae kuṛhiạgea je, ańjom katet́ se baḍae katet́ rehõ raj dobarre jo bae idileda.

Raj ren bhạgnạt kuṛi doe goṭakeda, ona dareren mạlik sãoiń ńapama ar jo hõń jom legaea. Ona sạpạri jom torage bujhạukeda je, noa do ona enhiloḱ reaḱ jo kangea. Uni do ruaṛ senkate raje metadea je, iń do uni kuṛhiạgeń baplayea. Raj do ar cet́e mena, aćaḱ goḱ katha lekage kuṛhiạ hoṛ sãote aćren bhạgnạt kuṛi bapla kadea. Kuṛhiạ koṛa do raj ren bhạgnạt kuṛi bapla tayom dare buṭarege suluk nirạite girobasoḱ kin ehoṕena. Uni kuṛhiạ hoṛ do aćren bạhu ṭhen ạḍi dulạṛe ńam kan tahẽkana. Aćren bạhu do oka kạmi jạruṛae kan tahẽn, onakoe kạmi idiet́kan tahẽkana. Menkhan ackage mit́ din onkin aḱ jionre bạṛić dosa heć paṛaoena. Sạpạri dare do jo emoḱe bondkeda. Uniren bạhu hõ ạḍi akal sakale ruạyena. Kuṛhiạ hoṛ hõ ać bạhu ạḍi ãṭe dulạṛedekan tahẽkana. Noa lahare okoe hõ kuṛhiạ hoṛ são bhage bako beohar akada, ar joton hõ bako joton akadea.

Menkhan mucạt́re ać bạhu jiwet́ dohoye lạgit́ kạmi ehoṕena. Uni do ạḍi ḍher sạpạri dare rohoekeda. Onako joto dare reaḱ jo jomte ar seba jotonte ać bạhu doe bogeyena. Kuṛhiạ hoṛ do kạmie ehoṕ akada ona khobor raj ṭhen seṭerena. Inạkatet́ hõ aćren bhạgnạt kuṛi hõe boge akana, ona khobor ańjomte raj do onkin raj bakholte ạguket́kinạ. Khan kuṛhiạ hoṛ do raj bakhol re sulukte jingi khemaoe ehoṕena. Laha leka do ar kạmige baṅ lagaoaekan tahẽkana. Adoe menkeda, tinre reṅgeć ar kuṛhiạgeń tahẽkan joto hoṛge ạḍi kajak ko ruhet́ akadińa. Menkhan nitoḱ doń kisạ̃ṛ akante joto hoṛko manotediń kana.

Meskoć

Meskoć

Mit́ din juripạrikin gapalmarao kana-

Bạhu: Cet́ hoyoḱ kana, ạrsi samaṅre teṅgo kate, cet́em ńeńel kana?

Jãwãe: Nui hoṛ do ạḍi oporomgeń ńele kana, menkhan okareń ńel akadea ona do bạń disạ daṛeaḱ kana.

Mit́ṭen Kuṛi Iń Dulạṛkedea-Bargel Aḱ Porbo

Dulạṛiạ Gate,

Mit́ ńindạ bạń jạpit́ daṛeada, raḱtegeń aṅgakeda. Bhagete apnargeń ruhet́ena ente am sãote bạń roṛleda. Monre cet́ leka co ạḍi perećiń ạikạuet́ tahẽkana. Aema katha lạiam sanaledińa, menkhan bạń, daṛeada. Paseć am hudiseda bạń puchạuet́mea mente se am reaḱ iń do mone-hõ-lagena.

Dayakate baḍaekam je amem hećente nunạḱ ãṭiń rạskạyena je roṛge bạń roṛ daṛeada. Ińren do am chaḍa celege bạnuḱkotińa.

Noage Amren

Pạtiạr gate

Kanṭhaṛ Jom Reaḱ Golpo

Amdaj Mõṛẽ gel bochor laha reaḱ katha. Mit́ṭen atore jawa koṛakin tahẽkana. Unkin do ńeloḱte mit́ge, ạkinren eṅgat-apat chaḍa okoe hõ bako orom daṛeakin kan tahẽkana. Ado onko oṛaḱ pheḍre mit́ṭen hạṭiạ tahẽkana. Ona hạṭiạ do haptare 2 din duṛuṕa, Sokolbar ar Sombar hiloḱ. Mit́ din onkin jawa koṛa modre maraṅić do hạṭiạte kanṭhar kirińe sen akana. Goṭa haṭiạ daṛakate mit́ṭen lạṭu macha kanṭhaṛe kusiada.Ado mone monete hudiskeda, noa kanṭhaṛ joṛateń kiriń lekhan oṛaḱ ren sanamkole jom anṭaoḱa. Onate bepariạ kanṭhaṛ dame kulikedea.

Bepari: Noa kanṭhaṛem kusiaḱ kana besge, menkhan ạḍi damangea. Mimit́ goṭen kanṭhaṛ reaḱ dam bar adha ṭaka ar joṛate do mõṛẽ ṭaka paṛaoḱa. Khan uni koṛa doe mengot́keda, noa kanṭhaṛ eken iń eskarteń jom daṛeaḱa.

Bepari: Nonkan eṛe eṛe katha do alom roṛ baṛaea. Dam hõ jạstigea. Ar noa kanṭhaṛem jom daṛeaḱ khan, arhõ barea kanṭhaṛ maṅnateń emama. Ado uni koṛae mengot́keda, sạrigeń meneda, jom daṛeaḱgeạń.

Bepari: Baṅ, noa do baṅ hoe daṛeaḱa. Ma enḍekhan,nonḍe iń samaṅrege duṛuṕkateć jom me. Judim jom daṛeaḱ khan, arhõ barea kanṭhaṛ bin kạuḍiteń emama.

Khange uni koṛa do kanṭhaṛ jojome lagaoena. Adha jom tayom uni doe menkeda, daḱ thoṛań ńũia, nõḱõe nonḍe ale oṛaḱ, thoṛań ńũ ạgulege. Bepariạ hõe rạjiyena. Ado oṛaḱe senen khan aćren huḍiń boeha joto ghoṭna pusṭạute baḍae ocokedea, are metadea, do usạrate calaḱme. Aćren boeha hõ uniaḱ katha lekage usạra dokane senena ar kanṭhaṛ jojome lagaoena. Mit́ duṛuṕre jom cabaket́te, bepariạ do ekalte uni koṛa sećge koyoḱ hape akada. Ente ar jãhãn katha roṛ reaḱ jaega bae ńamleda. Adoe roṛlet́ katha lekage barea kanṭhaṛe emadea. Enrehõ bepaṛi do ona ghoṭna reaḱ khạndrińtet́ babotre cet́ge bae aṭkar daṛeada. Adoe metae kana, am dom rakas kana se cet́?

Reṅgeć Hoṛ Cedaḱ Arhõ Ko Reṅgecoḱ Kana?

Bangladisom ren Manotan Onoliạ Timon Hasdak aḱ ạḍi aema soros sereń menaḱa. Onako modre teheń ińaḱ olok reń tumạl hatao keda; “Pạtiạrge Lonbonić, Pạtiạrge: Sạrige, Lonbonić, Kạmire pạtiạr” Santali sereń puthi Seren#579. Sạrige teheń abo sanam santalko lonbonić re pạtiạr ar kạmire pạtiạr, menkhan cedaḱ santal jạtiạriko reṅgeć hoṛ cedaḱ arhõ ko reṅgecoḱ kana.

Brian Tracy doe hoyoḱkana Canadian-America ren udgạu emoḱić ar maraṅ onoliạ hõ kanae. Uni do irạl gel cetan puthi doe ol akada, ar onako puthi do aema pạrsite chapa sodor akana. Sanam puthiko khon soros puthi do hoyoḱ kana; What You’re Really Worth, Eat That Frog!, No Excuses!

Brian Tracy aḱ katha lekate,“amak ae umạ̃ṛ ḍher hoyoḱtama, gạkhuṛoḱ hoyoḱtama ar bud ạkil hameṭ hoyoḱtama.” Enḍekhan, onkoaḱ ae ḍherem menet́ khan, noa sạriaḱ lạgit́ am do thoṛa kạmihora do hatao hoyoḱtama. Amaḱ ae ḍher lạgit́ lagan (biniyog) ar gạkhuṛoḱ reaḱ bud ạkil lekate kạmi hora do hatao jạruṛ kana. Noa lạgit́ lekha, jhũki hatao ar ṭaka paesa reaḱ jạruṛ hoe daṛeaḱa, menkhan onako do bại bạite ḍher dinte purạu do bạṛti bhạlạianaḱ hoyoḱa. Amaḱ ae roṅ-beroṅ se rosanjon lekate benao rakaṕ são sãote, noa do amaḱ ae reaḱ onoṛ do sạrdi ar dhurpạure goṛo daṛeama.

Am do cet́ arhõ ṭaka paesa arjao ar amaḱ kạuḍiko lahanti lạgit́ soros utạr hor se upại em sendra kana? Arhõ bạṛti ae ar ae bạṛtiḱ lạgit́ cet́ lekate hameṭoḱa ona babotte nonḍe latarre thoṛa kạmi hora do ol caṛhaoena.

Pe lekate Ae hoe daṛeaḱa:

Akṭiv kạmi
Nisạm kạmi
Pọrṭfolio reaḱ kạmi

1.Akṭiv kạmi; Akṭiv kạmi reaḱ manetet́ do kana nonkan ae oka do am khaṭaokate ar okto khemao kateć em arjaoet́ kan. Jemon, nukri, bạnij-bepar, se nonkanaḱ jãhãn kạmi, am tin ghạṛić okto khemao kateć em ae daṛeaḱ.

Nạmuna lekate, amaḱ mit́ṭen dokan menaḱa, ona dokanre tin ghạṛićem duṛuṕa in ghạṛićge amaḱ ae do; menkhan dokanre bam duṛuṕ len khan, amaḱ ae do baṅ hoyoḱtama. Nonkan ae do ḍher hoṛge alga ar usạrate ae lekako hudisa. Noa do joto hoṛ ṭhen oprom hora kana, ar ḍher hoṛge akṭiv kạmi sećko laha calaḱ kana. Nạmuna lekate, nukri ńam, candore niṭ akan kuṛại/beton ńam, se jãhãn onkan huḍiń macha bạnij-bepar. Menkhan nonkanaḱ ae do simạ bhitrire menaḱa, entet́ tinạḱem khaṭaoḱa, unạḱgem ae daṛeaḱa. Ar mit́ hoṛ din hiloḱ kom se kom 10-12 ghonṭae khaṭao daṛeaḱa, inạ khon bạṛti do baṅ.

Jãhãtin maraṅ Ḍaktar, Engineer se kạḱmiyićem hoyoḱ, akṭiv kạmi te tinạḱem ae daṛeaḱa? Noa reaḱ soṅkha do niṭ akan, ar mit́ okte ona simạrem jhạliḱa. Onate, akṭiv kạmi do ḍher din reaḱ dhon-dạulat benao rakaṕre baṅ ṭhika.

2.Nisạm kạmi; Nisạm kạmi do noako metaḱ kana, oka do begor kạmite hõ ṭaka paesam arjao daṛeaḱa. Jemon, amem jạpit́eda, se eṭaḱ jãhãnaḱem kạmi kana, enre hõ amaḱ ae do hoyoḱ kana. Okoe do Nisạm kạmi ko benaoet́ kan, onko do aema okte acel pacel ko kisạ̃ṛoḱ kana, cedaḱ je, nisạm kạmi reaḱ maraṅ subita do kana, noa do okte nạpitre ḍher idiḱa ar tis hõ baṅ thiroḱa.

Nạmuna lekate; am mit́ṭen oṛaḱ bhaṛa bạisạume, enḍekhan jao candore bhaṛam ńama, ar ona seć jãhãn bises dekbhal baṅ lagaoama. Inạ chaḍa hõ puthi oloḱ, You Tube channel calao, Website talate ae, Facebook page se instagram khonaḱ ae, YouTube sećte noako do nisạm kạmi reaḱ nạmuna kana.

Nisạm kạmi etohoṕ do baṅ algawa, entet́ noa lạgit́ pạhilte thoṛa okto emoḱ reaḱ jạruṛ menaḱa ar kạmi hoyoḱa. You Tube channel jhićem mone lekhan, pạhilte thoṛa cando bam ae daṛeaḱa, menkhan mit́ okte ńeloḱa je, tinre amaḱ video joto hoṛ ṭhen porcaroḱa arko kusiaḱa, unre amaḱ ae do ehoboḱa. Aema okte nonkanaḱ income ehob lạgit́ thoṛa ṭaka paesa hõ jạruṛoḱa. Ona karonaḱte ḍher hoṛge nisạm kạmi do bako kusiaḱa, ar onko do Akṭiv kạmi re lobdhao akanko tahẽn kana. Enrehõ okoeaḱ do nisạm kạmi tahẽn, onko do tis hõ ṭaka paesa reaḱ okulạnre bako paṛaoḱa, ente onkoaḱ ae do bond baṅ tahẽna. Onate, jion jingirem jitkạroḱ khan, Akṭiv kạmi khon thoṛa ṭaka paesa bańcao kate nisạm kạmi reaḱ onoṛ benao hoyoḱa.

3.Pọrṭfolio reaḱ kạmi; Pọrṭfolio reaḱ kạmi do kana oka ae lagan se (biniyog) lekate hijuḱa. Okoe aḱ do ṭaka paesa menaḱtako, onko do aema jaegakoreko ae daṛeaḱa. Nonkan ae re do jãhãn haron bạnuḱa.

Nạmuna: Share bajar re se mutual funds re lagan (biniyog) daṛeaḱa. Inạkate, jahae karbạriạ aḱ goṛo hatao me, menkhan ona karbar khon ae em ńama, onḍe tahẽn reaḱ jahan jạruṛ bạnuḱtama.

Kisạ̃ṛ hoṛ do nonkan investment se laganre ṭaka paesa ko dohoea. Entet́ bank re ṭaka paesa ko doho lekhan, asol ṭaka paesa reaḱ dam din dinte komoḱa. Okte calaḱ são sãote amaḱ ṭaka paesa hõ share bajar re, mutual fund re se jarkhar daṛeaḱa. Enḍekhan ona ṭaka paesa share bajar re, mutual fund re se mońj karbạriạ aḱ goṛote lagan ako, nonkate amaḱ ṭaka paesa hõ ḍheroḱa ar am hõm kisạ̃ṛoḱa.

20-80 system ar amaḱ tayom daram: nisạm kạmi se Pọrṭfolio reaḱ kạmi bam kusiaḱ khan, enḍekhan am hõ paseć ona 20-80 system regem aṭkao tahẽna. Noa system lekate, 20% hoṛko kisạ̃ṛoḱa, ar 80% hoṛko reṅgecoḱ kana. Dhạrtire joto khon dhon dạulat reaḱ maraṅ hạṭiń do 20% hoṛko ṭhenge tahẽna. Onate am oka kạmire menama, kurumuṭuime nisạm kạmi. Eken inạ Akṭiv kạmi re lagao akanem tahẽlen khan, enḍekhan amaḱ ae do mit́ okte simạre hijuḱa. Ar nisạm kạmi se Pọrṭfolio reaḱ kạmi baṅ tahẽlen khan, am hõ onko 80% hoṛko taberem paṛaoḱa, okoe do goṭa jion ṭaka paesa reaḱ obhab okulạn reko tahẽnkan. Onate, teheń khonge amaḱ income hõ ḍher reaḱ ganḍonoḱ hoyoḱa ar Akṭiv kạmi khon thoṛa ṭaka paesa bańcaokate nisạm kạmi se Pọrṭfolio reaḱ kạmi benao rakaṕme. Nonkate amaḱ tayom daram dinko mońjem khemaoa ar kisạ̃ṛ hoṛem hoe daṛeaḱa.

Arhõ thoṛa nạmuna:

-Puthi oloḱ: mit́ṭen puthim ol chapa sodor lekhan, onḍe khon thoṛam ae daṛeḱa, oka do calaḱtege tahẽna.

–Investment: Stock market, Real estate se Crypto market re lagan (biniyog) lekhan nonkate hõ nisạm kạmi tem arjao daṛeaḱa.

-Online course reaḱ bebostha: Onkan jãhãnaḱ babotre gạkhuṛoḱ me, enḍekhan Online course reaḱem bebostha daṛeaḱa, oka do hoṛko kirińa ar nonkate amaḱ ae hõ hoyoḱtama. Jionre jitkạr hoyoḱ ar kisạ̃ṛoḱ reaḱ sana menaḱtam khan, Akṭiv kạmi chaḍa hõ nisạm kạmi ar Pọrṭfolio reaḱ kạmi re mon gaḍaotam.

Mucạt́ re niạ oloḱ sećte sanam santalko udgạu et́ bon kana je, arhõ bạrti kạmi lagao abona, bud ạkil ḍahar jhić katet́ nawa hor oḍok lagao abona, jemon santalko babon reṅgejoḱ. Bickom bon kisạ̃ṛoḱ bud ạkilte ar ṭaka paesate. Onate cetanre ol akan bisoko arhõ bạrti bon ganḍonoḱ ma ar bon hudis te reṅgeć do baṅ bickom bon kisạ̃ṛoḱ.

“Gadha Jokhon Montri”

Mit́ṭen Raje tahẽkana. Uni Raj do mit́ din bir gajaṛ aṛe aṛete taṛam idiyet́ tahẽkana. Sãote aćren montri hõe tahẽkana. Ackage Raj do montri kulikedea, mase lạiańme, teheń aḱ abohaoa do cet́leka menaḱa? Raj do thoṛa sạṅgińe senena. Raj samaṅte mit́ṭen kićrić saphaeiće (Dhopa) calaḱkan tahẽkana. Ado uni hoṛ do Raje metadea, E Raja mahasoe, calaḱ kanam noa ma bhagege, menkhan kajak hoe-daḱ hijuḱa. Khange uni hoṛaḱ katha lekage, Raj do hoe-daḱe eset́kedea. Unre Raj do aćren montri bad kedete, kićrić saphaeićge aćren montri benaokedea.

Onkage mit́ din Raj do bagwanrey ạcur baṛae kan tahẽkana. Ackage monre kukli janamadea, montri do cekate baḍaekeda enhiloḱ reaḱ hoe-daḱ khobor do? Ado montri hohoadete metadea, am do cekatem baḍaekeda hoe-daḱ hijuḱa?

Montri:Tinre hoe-daḱ leka ạikạuḱa, unre ińren Gadhawaḱ lutur laṛaḱtaea. Onateń lạiat́me tahẽkana, teheń do hoe-daḱ menaḱa. Unre Raj do uni kićrić saphaeić montri hoṛ hõe bad kedete Gadha ge aćren montri benaokedea. Ado unre asol muskil do hoyena. Goṭa naṅgraharen Gadha ko heć jarwayena ar Raj ko metae kana, ale hõ amren montri benaoleme.