Ḍaṅgra Sagaṛ

Adaṛrẹ Jaṭa ńutuman ạḍi kisạ̃ṛ ho̠ṛe̠ tahẽ̠kana. Unire̠n barea darmo̠ṭ darmo̠ṭ ḍaṅgra ar ḍaṅgra sagaṛ tahẽ̠kantaea. Mit́din uni do̠ hạṭiạte̠ hoṛo idi lạgit́ sagaṛ re̠ hoṛo bostae lade pe̠re̠ćkeda. Me̠nkhan ḍahar ạḍi lo̠so̠t́ tahẽ̠kante̠ do̠lhare̠ thạli ṭarhaoentaea. Unkin darmo̠ṭ ḍaṅgra do̠ ạḍi murukte̠ sagaṛ o̠r rahaṕkin kurumuṭu keda me̠nkhan bạkin daṛelena.

Ona ḍahar tege peḍel gạḍite̠ haṭo̠ḱ ho̠ṛko calaḱkan tahẽ̠na ar thạliakan sagaṛ ńe̠l teko teṅgoena. Ar jo̠to̠ ho̠ṛte̠ hẽiyo̠ hẽiyo̠ kate̠ko ṭhelao rakaṕkeda.Ona tayo̠m jo̠to̠ko ge hạṭiạte̠ ko mohnḍayena

Doṅ Sereń

Bilạn bilạn talare, tala bilạn talare

Kaḍa pańjare lipi cẽṛẽ,

Hoe lolo din do dare rekin tahẽna

Jarge jạput́ din do daḱ talare.

BẠḌẠIAN HAKO

Mit́ṭen pukhrire̠ aema hako ko tahẽ̠kana. Onko do̠ ạḍi bạḍạiankoko tahẽ̠kana ar o̠ko̠eaḱ kathage bako ańjo̠me̠t́kan tahẽ̠kana. Ona pukhrirege mit́ṭe̠n ạḍi maraṅ haṛam tayaṅe tahẽ̠kana. Uni do̠ ạḍi bhage ar dayawane tahẽ̠kana. Jaoge hakokoe metaoako kan tahẽ̠kana alope bạḍaia mũhinrepe paṛaoḱa. Uni do̠ ḍe̠ho̠ṛe̠ disạkoa.

Mit́din tayaṅ do pukhri aṛere̠ dhiri danaṅre̠ye̠ jirạuakan tahẽ̠kana. Ona okte̠ barea jạliạ pukhrire̠ daḱ ńũkin he̠će̠na. Daḱ ńũ jo̠khe̠ć ạḍi ãṭ hako laṛao ńe̠lte̠ mit́ ho̠ṛ do̠e me̠nkeda ma ńe̠lkom hako ce̠t́ le̠kako haḍbaḍaoeda. Gapage lạṭu ar ke̠ṭe̠ć jhạli ạgu katelaṅ jhạlikoa.

Tayaṅ do̠ ona kathae ańjo̠m keda ar ruạṛ se̠nkate̠ hakokoe lạiat́koa. Hakoko do̠ uniaḱ katha bako luturat́taea me̠nkhan unigeko siṛạgadea. Dosar hilạḱ unkin jạliạ do̠ ạḍi ke̠ṭe̠ć ar lạṭu jhạlikin ạgukeda ar jo̠to̠ hakokin jhạlike̠t́koa. Hakoko do̠ bańcaoḱ lạgit́ ạḍiko kurumuṭu keda me̠nkhan bako bańcao daṛeada. Ado̠ mo̠ne̠te̠ko me̠nkeda tayaṅaḱ kathakobon ańjo̠m le̠khan bańcao daṛe koḱabon.

Lagṛẽ Sereń

Kulhi tehõ jhiṅgạ nạṛĩ,

Baṛge tehõ jhiṅgạ nạṛĩ

Jhiṅgạ nạṛĩre dada gạiye jhạliyen,

Gại dada alom dale, jhiṅgạ nạṛị̃ gedme

Bạchur tore dada, jonome ṭuạr.

Ebhen

Ato ńutum Birṭola. Noa Birṭola ato beṛhaete hạriạṛ dare nạṛĩte pereć akana. Usul jaega kore lạṭu lạṭu jo dare menaḱa. Ar latar ot jaegakore hoṛo, ar eṭaḱ eṭaḱ jo dare hõ rohoe menaḱa. Noa atorege Onu ńutuman mit́ṭen Kolhe kuṛi gidrạ menaea. Umer tae 12 bochor. Iskul re paṛhaoḱ kana.

Teheń Onu soṅge hor re ńapam hoyentińa kulikedeạń, Onu oakte caḱ kanam? Gại gupi caḱ kạnạń. Ạribạndhi kate Onu ńel kedea, uniaḱ monre haron kosṭo. Eṭaḱ gidrạ leka uni hõ iskule calaḱa, gidrạko soṅge eneć baṛaea, ar rạskate dine khemaoa. Menkhan Onuaḱ jion re joto lekanaḱ kukmu, rạskạ ar paṛhao ar eṭaḱ soṅge gate baṅ hoyoḱ kantaea. Reṅgeć hoṛ kanako. Ayo baba bahre kạmikin calaḱa ar Onu hõ gại merom gupi calaḱa. Ać ayo kạmi bae calao lenkhan Onu unre iskule calaḱa.

Eṭaḱ gidrạ hõ teheń iskulte bako sen akante iskul mahasoe pạṭhuạko hoho heć akana. Ińe metạń kana pạṭhuạko iskul bako hijuḱ kana, ar mońj tehõ bako paṛhao daṛeaḱ kana, alele kurumuṭueda jate gidrạko jao hiloḱ iskulko hijuḱ ar mońjte paṛhao ko cet́ dareaḱ .

Onu lekan aema gidrạ iskul baṅ calaḱ karonte oloḱ paṛhao bako cet́ daṛeaḱ kana. Oloḱ paṛhao chaḍa tishõ mit́ṭen jạt bae lahanti daṛeaḱa. kol jạt akoaḱ obostha pherao lạgit́, lahanti ạgui lạgit́ jạpit́ khon ebhenoḱ jạruṛ menaḱa.

Se̠ṅge̠l Ar Miru Cẽ̠ṛẽ̠

Bahare̠n mit́ṭe̠n Miru cẽ̠ṛẽ̠ tahẽ̠kana. Uni cẽ̠ṛẽ̠ do̠ ho̠ṛ lekageye ro̠ṛ daṛeaḱkan tahẽ̠kana. Mit́din atore̠n soetan gidrạko do̠ se̠ṅge̠l liạ busuṕ pala ṭhe̠nko gateḱkan tahẽ̠kana. Gate gatete̠ busuṕ palare̠ se̠ṅge̠lko lagao ocokeda ar bo̠to̠rte̠ko dạṛkeda.

Se̠ṅge̠l ńe̠lte̠ uni Miru cẽ̠ṛẽ̠ do̠ se̠ṅge̠l se̠ṅge̠l me̠nte̠ye̠ kạumạukeda. Ona ańjo̠mte Baha hõe dạṛ ạgukeda ar se̠ṅge̠l ńe̠lte̠ se̠ṅge̠l se̠ṅge̠le kạumạukeda. Unkinaḱ kạumạu ańjo̠mte atore̠n ho̠ṛ daḱ liạko dạṛ ạgukeda ar se̠ṅge̠lko dul ạṛićkeda. Atore̠n ho̠ṛ Baha ar Miru cẽ̠ṛẽ̠ aemako sarhaoke̠t́kina.

Roṭe Gharońj

Sedaere mit́ serma do ạḍigey setoṅ keda ar daḱ hõ bae daḱleda. Mit́ṭen pukhrire barea roṭe ar unkinren pea gidrạko tahẽkana. Setoṅte pukhri ar gạḍiạko joto rohoṛ cabaoakana. Gaḍa kohõ paṛaḱ utạr akana. Gidrạ kodo daḱ begorte gatiḱ hõ bako sen daṛeaḱkan tahẽkana. Mon bạṛić kate oṛaḱrege ko duṛuṕ koḱkan tahẽkana.

Kạṭić gidrạ do ać gogoe kulikedea, E go tise daga? tis ado barhete gatiḱle senoḱa? Ado gogoe menkeda, bạrsạ din seṭerena. Gapa meaṅ khongey daga.

Dosar hiloḱ setaḱ khon sermare ńũtge rimil rakaṕena ar jhomor jhomore daḱkeda. Roṭe hopon kodo barheteko don oḍokena ar nãwã daḱre rạskạte pẽ pÕ pẽ pÕ sereń ar dodonko dhurạuena.

Siń Cando Ar Ho̠e

Mitt́din ho̠e ar siń cando do̠ hapaṛaḱkin eho̠ṕena baṅma o̠ko̠eaḱ daṛe ḍhera mente. Ona o̠kte cado̠rte oyokate mit́ṭen ho̠ṛe calaḱkan tahẽkana. Uni ńel katekin menkeda o̠ko̠e uniaḱ ho̠ṛmo̠ kho̠n ona cado̠re o̠co̠ḱ daṛeaḱa unigey maraṅangea.

Ho̠e-e menkeda uni ho̠ṛre ińaḱ daṛe ńelme. Ado̠ ạḍi ãṭ ho̠e rakaṕena ar rad rade ho̠e keda ar oṛaḱ duạr, dareko ho̠ete rạput́ena. Ar uni ho̠ṛ hõe orlo porlo cabaena, aćaḱ kicrićko oṭaṅo̠ḱ kante hạṛuṕ samṭao ket́taea.

Ar ona setoṅ hõ aćaḱ daṛe uduḱe eho̠ṕena. Ar ạḍi ãṭ jharla jhạrli setoṅe eho̠ṕena. Setoṅte sanam gaḍa pukhriko ro̠ho̠ṛena. Ar uni ho̠ṛ hõe lorao cabaente dare umulre duṛuṕkate mit́ mit́te sanam kicriće bo̠ć cabakeda. Ar noṅkate siń cando do̠ ho̠e kho̠ne maraṅena.

Me̠sko̠ć

Me̠sko̠ć

Mit́ṭen dhubi ho̠ṛ ren Gadhae tahẽ̠kana. Mit́din uni ho̠ṛ ren gadhae at́ena. Sendra sendrate goṭa din paro̠m calaoena. Ạyuṕ bela jo̠khen mit́ṭen darere dećena ar cetan kho̠n gadha sendra ńame reaḱe kurumuṭukeda.

Me̠nkhan ackage ona dare buṭa latarre barea kuṛi-koṛa hećkatekin duṛuṕena. Ado̠ uni koṛa do̠ kuṛi seće beṅget́ go̠t́keda are me̠nkeda, iń do̠ amaḱ mẽt́te goṭa dhạrtiń ńel daṛeaḱa. Noa katha ańjo̠mte uni dhubi ho̠ṛ do̠ dare kho̠ne do̠n go̠t́keda ar nehõrate metat́kinạ, mase daya kate ona mẽt́te beṅget́ kate ińren gadha sendra ńamạńben.

Bhạg Do̠ Cet́ Kana?

Mit́ṭen ciṛiạkhana re gidrạ Ũṭ do̠ ać go̠go̠e kulikedea, E go̠, aboaḱ deare usulge ona do̠ cet́ ko metaḱa? Uni do̠e ro̠ṛ ruạṛadea, noa do̠ ducut́ ko metaḱa. Hahaṅkar jaegare ạḍi sạṅgińte calaḱ hoyoḱa, ar jãhã tinre daḱ reaḱ jãhãn cinhạge baṅ ńelo̠ḱa. Menkhan daḱ reaḱ hõ jạruṛ menaḱa. Noa ducut́re abo daḱ bon do̠ho̠ daṛeaḱa, o̠ka do̠ aboaḱ jạruṛ o̠kte rebon beohar daṛeaḱa.

Ado̠ uni gidrạ Ũṭ do̠e mengo̠t́keda, Oh, ona do̠ ạḍi bhagegea! Ar aboaḱ jaṅga do̠ cedaḱ nunạḱ jeleńa? Ado̠ go̠go̠ Ũṭ do̠e menkeda, E baba, noa hahaṅkar jaegare ạḍi sạṅgińte calaḱ hoyoḱ tabona, onate jemo̠n babon haro̠no̠ḱ ar babon dukoḱ ona lạgit́ge nunạḱ jeleṅ jeleń jaṅga kantabona.

Arhõ uni gidrạ Ũṭ do̠e menkeda, E go̠, aboaḱ mẽt́, mũ re lạṭu lạṭu uṕ do̠ cedaḱ ? Noa kukli reaḱ hõ ać go̠go̠ do̠ landa landate ro̠ṛ ruạṛadea, E baba, hahaṅkar jaegare hoe daḱ hećlenre bogete gitilko hoete oṭaṅ baṛaea. Aboaḱ mẽt́ mũre gitil jemon alo bo̠lo̠ḱ, ona lạgit́ge sisirjạuić do̠ mẽt́, mũre nonka lạṭu lạṭu uṕe em akat́bona.

Niạ dhao uni gidrạ Ũṭ do̠e menkeda, E go̠ iń do̠ noa bạń bujhạueda je, sisirjạuić daḱ do̠ho̠e lạgit́ nonkan ducut́e em akat́bona, hahaṅkar re daṛan lạgit́ jeleń jeleń jaṅgae em akat́bona, gitil kho̠n rukhiạḱ lạgit́ lạṭu lạṭu uṕe em akat́bona, enḍekhan cedaḱ, noa ciṛiakhana redo̠ cet́bon cekaedea?

Sikhnạt: Jãhã tinạḱ gun ge menaḱtam, ṭhik jaegare bam tahẽn khan bhạgan ho̠ṛ do̠m baṅ kana. Bhạg do̠ cet́ kana? Ṭhik o̠ktere, ṭhik jaegare, ṭhik ho̠ṛko talare tahẽnge bhạg ko metaḱa.