Kuṛcạ beṅgaṛ rasi utu,

Baṅ sebel kan,

Dela bạbu cẽṛẽ ṭuṭi,

Jotoko calaḱkan.

Bạń calaḱkan cẽṛẽ ṭuṭi,

Bạnuḱtińa iskul chuṭi,

Iskulteń calaḱa,

Ạkil ḍahar menaḱa.

Toyo am do̠ ạḍi ãṭem siyanage,

Ńindạ jokhen sim ge̠ḍe̠.

Ạtkir katem jo̠mko,

Bhiḍi ho̠po̠n me̠ro̠m ho̠po̠n,

Go̠go̠ katem ạtkir koa.

Bhugạḱre eskar bolokate,

Raṭpaṭem jo̠mkoa.

Reaṛ rabaṅ seṭerena oyon kicrićante

Setaḱ tora kuṛhạ hijuḱ thar tharaote,

Kuṛikoaḱ daḱ joṭet́ ạḍi ritić ạikạuḱ

Thạri bạṭi gasao mańjao ạḍi mohńjor bikạuḱ.

Onatege lolo daḱte sanamaḱko kạmi

Sanamaḱge kạmi hoyoḱ sanamkoge jumit́,

Baṅdo mańjao baṅdo gasao baṅdo sapha sạphi

Jotoaḱge kạmi hoyoḱ joroḱ seṅgel sạkhi.

Setaḱ tora gachal koko calaḱ khiur dare

Akaledae hola ạyuṕ cheo kate lubni tạṛi,

Reaṛ rehõ ona ṭạṛi ńuńu ạḍi ekal sana,

Judim mesal ona soṅge caole ata cana.

Heṛem tạṛi ńuńu redo sanam koge kusi

Judim ńuia ạḍi jạsti hoyoḱ tama dusi,

Matao tạṛi ńu katege adom koma jare jare,

Ona tege santal atorem ńela KHIJUR DARE.

Choto choto pukure,

Carkona pukure,

Poraine phute lale lal-(2)

Paera kate boloḱme,

Taber kate sit́me,

Daḱ bạbu alom boḍea-(2).

Uḍạn gạḍi coṭte dạṛae,

Jahaj dạṛae daḱte.

Rel gạḍi dạṛae linte,

Moṭor gạḍi dạṛae soṛokte.

Roṭe sagaṛ ṭheṛe ṭhepe,

Sadom sagaṛ cihõ.

Dadae calaḱ bạhu ạgu,

Iń hoń calaḱ sãote.

Ńeloḱ am tạruṕ leka,

Hoṛko metam pusi.

Jil hako toa ńelte,

Ạḍi aṭem kusiḱ.

Taṛamam bại bạite,

Otte oroḱtam canḍbo̠l.

Ragam mẽao mẽao,

Sanam ho̠ṛ ko ańjo̠m.

Paromena daḱ jạput́ asin kạrtik

Seṭerena hilạu hisit́ cando ãghaṛ,

Setaḱ ạyuṕ judim oḍokoḱ bahre

Bujhạuam nit ạikạuḱ thoṛa reaṛ.

Bilạn bạihạṛ ńeloḱ eken sona roṅ

Hara hạri sanamko kạmire ạujhạṛ ,

Samṭaoako arjao akat́ sanam phosol

Setaḱ tora hanko tora jhaṛ jhaṛ.

Bele hoṛo ńelte ạikạuḱ ạḍi rạskạ

Cabaḱ aneć nit do sanam reṅgeć,

Hoṛmo reaḱ joto lekan laṅga hisạ

Nit ko ńama  jom ńu  aseć taseć.

Onatege pạhil phosol samṭao tora

Kulhi duṛuṕkate goṭayako din khon,

Nenḍayako sanamko kạmi hora

Nãwã hoṛote rạskạ POROB LOBAN.

Cunur munur mạ̃i tale

Tuṛi tele bodol ledea,

Gaḍarele idikede

Gaḍa daḱ ma rilạmala,

Gaḍarele buhelkede hae dayage

Leo-Leo-Leo.

Kulhi mucạt́ dene banar sare menaḱ juri pukhri

Mit́ do ḍaṅra kaḍa gasao mańjao ar jobeako  sukri,

Ona sorre  dosaraḱ do ekal heṛan sohan kedeć

Ona re do menaḱ aneć hạriạṛ poraini sakam  pereć.

Ona sorem calaḱ khanem ńama monre nirạ sahẽt́

Oka leka tehõ eṭaḱ redo bam sendra ńamet́ tahẽt́,

Noa sakam sedae redo aema kạmi reko lagao

Ona baṅkhan bapla bihạ hoyoḱ kan tahena lajao.

Netar leka unre do baṅ tahẽkan polithin ar Ṭisu

Sanam kạmi purạuḱ kan tahena onatge ạḍi kusi,

Hạṭiạ bajar buluṅ hako jel ar emanteaḱ saoda

Hoṛ deko jotowaḱge kiriń kate noa teko reda.

Bapla bihạ bhoj eman kore jom ńu ato peṛa

Santal koaḱ hudis redo noa tege manot ḍhera,

Sakam hạriạṛ nạṛ̃i jạnum baha do nirạ rạni

Sanam lekan bahako tala noage daḱ PORAINI.