Juạn Okte

Janamenam tejo leka,

Go̠go̠ baba ho̠bo̠r re.

Dulạṛteko harake̠t́me,

Gharo̠ńj talare.

Loka ho̠bo̠r co̠ḱ ce̠re̠ć,

Gharo̠ńj dulạṛ tam

Putli bandem cet́ ke̠t́ khan pharak enaem.

Go̠go̠ dulạṛ koṛam cetan,

Baba dulạṛ taren re̠.

Buḍi dulạṛ khilḍu e̠ne̠ć,

Buḍạ dulạṛ rehet́ re̠.

Umạr amaḱ hoye̠n tama,

Gel bar – pe̠.

Dulạṛ jo̠to̠ hiṛiń kateḱ,

Me̠nedam khecalidińape̠.

Go̠go̠e metamkan am do̠

Mo̠nte o̠lo̠ḱ me̠.

Babae metamkan am do̠ napae tahẽ̠n me̠.

Go̠ babawaḱ jo̠to̠ katham

Deya giḍike̠t́.

Hạnḍi pạurạ emanteaḱ

Jo̠to̠m hameṭe̠t́.

Go̠ babawaḱ as tahẽ̠kan

Hara meakin.

Kukmu jo̠to̠m

Rạput́ keda dukem e̠maḱkin.

Jiṅgi amaḱ tear lạgit́

Juạn o̠kte̠kan.

Juạn o̠kte̠ paro̠moḱkan,

Hudis ruạṛtam.

Gol

Gol Gol Gol

Noa dhạrti puri gol

Gol Gol Gol

Jom Ñure gonḍogol.

Gol Gol Gol

Katha roṛre gonḍogol.

Gol Gol Gol

Cạl colonre gonḍogol

Gol Gol Gol

Am ińre gonḍogol

Gol Gol Gol

Somaj talare gonḍogol.

Gol Gol Gol

Jạt jạtre gonḍogol

Gol Gol Gol

Disạm disạmre gonḍogol.

Gol Gol Gol

Aboaḱ hudis cintạre gonḍogol

Gol Gol Gol

Jotoge gonḍogol.

Jisuaḱ Janam

Bale huḍiń Jisu ạḍi nindhạn re

Janamenae reaṛ rabaṅ tala ńindạre

Duṅut duṅut dut ko pheḍen gupi ko ṭhen

Rạskạ sombad jạhir ket́ ko pạhil onko ṭhen

Dhaoṛi dhạuṛi usarako sendra kedea

Babańcaoić ńam kate ko sẽwa adea

Gupi ko lại jạhiraḱ ko gonoḱ ponḍit ko

Puruạ ipil Bethlehem tey seṭer ket́ ko

Sona kunduru gondhorosko dan adea

Ombaḱ kate rạskạ teko sewa adea

Janam tayom serma rajak aema duk tae

Un okte Herod rajawaḱ jug tahẽ kantae

Eṅgat apat Joseph Mạriom Jisu gidrạ tạkin

Herod Rajaḱ gujuḱ khon bańcaokede kin

Cristan manwa baḍaebon Jisuaḱ janam

Saphayet́ bon oṛaḱ, duạr, kombol ko sanam

Manwakoaḱ hoṛmo mon bạṛić mạilạkoge

Jisuaḱ janam disạite sanam sapha jạruṛge

Gonoḱ ko leka abo hõ samaṅae bon dan

Goṭa hoṛmo jiwi ar mon ontorge bon dan.

Jisui Janamen

Sạṅgiń sạṅgiń sạṅgiń disom

Bethlehem atore

Probhu Jisui janamakana.

Bạnuḱtaya mech mạchi

Bạnuḱtaea ṭenḍer mạchi

Bale Jisu nandaware kucạwakana.

Dhondor pondor gạigoṛa

Gạyur ṭạpur Probhu Jisu

Bale Jisu nandaware gitićakana

Maraṅ Peṛa

Erik birik erik birik

Bar gel moṛẽ tạrik

Sajoḱpe ho sajaope

Kunduru sunum sipińpe.

Nạbi koaḱ katha leka

Seṭerenae abo tala

Huḍiń maraṅ sanamko

Sodorae bon dulạṛ mala.

Jhalkaoena jhak jhak

Bathan ṭạnḍi gại goṛa

Seṭerenai abo tala

Sanam koren maraṅ peṛa.

Isoraḱ Dan

Serma seć ti tul kate

Juri gunṭhi ikṛum kate

Isor sarhaoebon dela,

Sirjạu kedae bir buru

Sirjạu kedae jharna gaḍa

Isoraḱ dan tinạḱ rilạmala.

Jo baha joto dare pereć

Ḍạr re cẽṛẽkowaḱ sereń ar cereć

Joto ge noa Isoraḱ dan,

Gogo baba ar boeha joto

Tinạḱ menaḱ ko gate peṛa joto

Isor baba geye em akan.

Lili bici coṭ serma ipil

Jiṛiṕ jiṛiṕ ńeloḱ gaṅga gitil

Ńeloḱ hahaṛa Isoraḱ sirjon,

Siń re lạgit́ menae siń cando

Ńut re lạgit́ menae ńindạ cando

Marsal kin emet́ coṭ serma khon.

Coṭ sermare ńeloḱ uḍạuḱ gạḍi

Daḱ cetan latar daḱ gạḍi

Benao lạgit́ babae emen daṛe

Sukre teheń manwa cehel cepel

Dhạrti pereć teheń bud ar ạkil

Joto ge Isoraḱ dan ar daṛe.

Maraṅ Din

Nijum ńindạ kãṛãṅ ńut

Arhõ reaṛ rabaṅ

Ḍigḍigạuen dhạrti puri

Ańjomoḱ sereń aṛaṅ

Sereń ate dutko lạiyet́

Seṭeren bańcaoḱ din

Bochor mucạt́ seṭerena

Rạskạ maraṅ din.

Laṅga hoṛmo manwa joto

Jạpit́ kan do ạḍi

Reaṛ rabaṅ guti koma

Meneḱ ko bathan ṭạnḍi,

Acka bathan marsalena

Gutiko botorena

Dutko lạiyet́ jisuaḱ janam

Maraṅ din seṭerena.

Purub disom gonok ponḍet

Ontor pereć ạkil

Ńel kedako acka teheń

Ḍigḍigạuḱ kan ipil,

Ponḍetko guni ńam keda

Nawa raje janamen

Dhạrti re hećen suluk

Manwako kusiyen

Joseph, mạriạm soṅge kate

Betlehem kin seṭeren

Bhạrti hoṛmo mạriạmaḱ hõ

Duṛuṕ dinge tiạḱen

Nandware jisui janamena

Meṭao lạgit́ kại rin

Rạskayenako dhạrti manwa

Seṭerena maraṅ din.

Isoraḱ Bhor

Alom landaea

Reṅgeć hoṛ ńelte

Alom rạskạḱa

Kisạṛgeam mente

Alom lajaḱa.

Lelhako soṅge ropoṛoḱ

Mit́din hiloḱ cet́korecoṅ

Onkogeko jạruṛoḱ

Beṅget́akome aḍepaseren

Reṅgeć nacar hoṛ

Tobem ńama coṭkhonaṅ

Isoraḱ Bhor.

Ti Tiạrtam

Aghãṛ cando tiyoḱ lenkhan monre ạikạu Botor,

Reṅgeć nacar hoṛ koaḱ cet́ dosa co hoyoḱ

Niạ reaṛ te him utạroḱ hoṛmo reaṅ jaṅ

Thar tharaoḱ kan goṭa hoṛmo jiwi oḍoṅoḱ kan.

Jaoge noko nacar hoṛko cetan

Duk haron hoe – bharḍu paromoḱkan.

Hiṅsạ bạḍạe bạgi kate dela onko pheḍ re bo

Niạ rabaṅ bo tiṅgo daram.

Ona lạgit́ de amaḱ goṛo ti tiạrtam.

HAHAṚA

Hahaṛa janam tae

Hahaṛa kạmi tae

Hahaṛa gujuḱ tae

Hahaṛa beret́ tae.

Ạḍi maraṅ hoṛ kanae

Ạḍi maraṅ daṛe tae

Ạḍi maraṅ daya tae

Ạḍi maraṅ dulạṛ tae.

Dhạrti teye hećena

Manwa lạgit́e alayena

Miridos mayam joroena

Puruchun kạmi purạuena.

Hoṛ ńutumteye nindhạuena

Hoṛ ńutumteye nacarena

Hoṛ ńutumteye dukena

Hoṛ ńutumte jione alaekeda.

Okoyaḱ noa hahaṛa dulạṛ?

Okoyaḱ noa hahaṛa kạmi?

Okoyaḱ noa hahaṛa katha?

Uniaḱ ńutum Jisu Mạsi!