Ińaḱ pạrsi ińaḱ go̠ro̠b

Ińaḱ pạrsi ińaḱ dho̠mo̠k

Ińaḱ pạrsi ińaḱ dho̠n

Ińaḱ pạrsi ińaḱ oporom

Ińaḱ pạrsi ińaḱ man

Ińaḱ pạrsi ińaḱ abhran

Ińaḱ pạrsi ińaḱ mẽ̠t́

Ińaḱ pạrsi ińaḱ sahẽ̠t́

Ińaḱ pạrsi ińaḱ jiwi

Ińaḱ pạrsi ińaḱ ạri cạli

Ińaḱ pạrsi ińaḱ aṛaṅ

Sebel he̠ṛe̠m saḍe raṛaṅ.

Sedae do̠….

Lajao tahẽ̠kan,

Lajao tahẽ̠kan do̠,

Sajao tahẽ̠kan.

Sedae do̠….

Man mano̠t tahẽ̠kan,

Man mano̠t tahẽ̠kan do̠,

Jo̠to̠aḱ tahẽ̠kan.

Sedae do̠…

Iṅgạń Ạpuń bo̠to̠r tahẽ̠kan,

Bo̠to̠r cabaen do̠,

Jo̠to̠aḱ cabaen.

Sedae do̠….

Ato ṭola ho̠ṛaḱ manao ganao tahẽ̠kan,

Manao ganao cabaen do̠,

Sanamaḱ cabaen.

Sedae do̠….

Lạṭu kạṭić ho̠ṛaḱ ijjạt tahẽ̠kan,

Ijjạt tahẽ̠kan do̠,

Aema tahẽ̠kan.

Sedae do̠….

Lạṭu kạṭić ho̠ṛaḱ sạgại tahẽ̠kan,

Sạgại cabaen do̠,

Ce̠t́ hõ̠ baṅ sare̠ćlen.

Sedae do̠….

Duk bipo̠tre go̠po̠ṛo̠ḱ tahẽ̠kan,

Go̠po̠ṛo̠ḱ cabaen do̠,

E̠ke̠n ro̠po̠ṛo̠ḱ bańcaoen.

Dulạṛ Dulpulạṛ ma hoyen

Gel pon february

Dạṅwạrege chạḍwi ako̠

Chạḍwiako̠ tinạḱ co̠ṅ ko̠ṛa kurị.

Juạn ko̠ṛawaḱ ro̠moń rasa

Tearako̠ jio̠n gate

Ragako̠ jo̠to̠ bạckạr sado̠m,

Bạlis hạṛuṕ kate.

Dulạṛ ńutumte uku coku,

Ro̠ḍo̠ć jo̠ṅako̠ heṛem,

Ako̠aḱ monere kuṛi ho̠po̠n do̠,

Eken so̠ṛo̠m sebel reṛem.

E mại am do̠ mano̠tiạ,

Sirjo̠n ḍaharem arsala,

Nasem tho̠ṛam gayo̠ḱlenre Jiwim hale dale.

Amdo̠ pạurạ…..

Hudis ocońam,

Gunạn ocońam,

Okareń ńam?

Amdo̠ pạurạ…..

Ghane̠ń dul milạume,

Ghane̠ń hilạume,

Setaḱ ạyuṕ baco̠ń ḍhilạume.

Amdo̠ pạurạ….

Ghane̠m bhindạṛ ocoń khe̠tre,

Ghane̠m bhindạṛ ocoń le̠ḍtre,

Cetan latar co̠ṭ phe̠ḍre.

Amdo̠ pạurạ….

Ghane̠m chilkạuḱ,

Mõ̠ńjem ạikạuḱ,

Ho̠ṛmo̠ mo̠ne̠ hilạuḱ.

Amdo̠ pạurạ….

Cedaḱ co̠?

Era uru kho̠n jạstiń dulạṛme,

Dho̠n durib kho̠n ḍhergeń dulạṛme.

Amdo̠ pạurạ….

Cahe cabaḱtiń khet baṛge,

Cahe cabaḱtiń hasa jumige,

E̠nhõ̠ dulạṛmeạń bạṛtige.

Onoṛiạ do Inḍiaren kanae.

Bo̠ho̠ḱre moṭra dipil kateḱ,

Tarenre jhola go̠ḱ kateḱ,

Laha tayo̠m ko̠yo̠ḱ kateḱ,

E̠ Go̠…! Ar Tinạḱ Sạṅgiń?

Bạnuḱko ho̠ṛ so̠ṛo̠kre,

Nijhum sãć suć ho̠rre,

E̠ beṭa…alom kuliń,

E̠ Go̠…! Ar Tinạḱ Sạṅgiń?

Calaḱrege tahẽ̠nme,

Taṛamrege tahẽ̠nme,

E̠ Beṭa…ro̠ṛ ińaḱ ańjo̠mme,

E̠ Go̠…!Ar tinạḱ sạṅgiń?

Cekań lạiae beṭa tiń,

Ho̠r ạḍi sạṅgiń gea,

Lo̠lo̠ setoṅ sahao hoyoḱgea,

E̠ Go̠…! Ar Tinạḱ Sạṅgiń?

Nho̠te̠ bo̠ho̠ḱ reaḱ hamal,

Nho̠te̠ taren reaḱ hamal,

Nho̠te̠ beṭa tińaḱ kukli,

E̠ Go̠…! Ar Tinạḱ Sạṅgiń?

Bạbui me̠ne̠t́ ar balaṅ ruạṛ,

Beṭa tiń do̠ onatey ko̠yo̠ḱ ruạṛ,

Pulis hõ̠ janwar lekako khạṛ,

E̠ Go̠…! Ar Tinạḱ Sạṅgiń?

Jo̠maḱ bạnuḱ,

Paesa bạnuḱ,

Dokan bạnuḱ,

E̠ Go̠…! Ar Tinạḱ Sạṅgiń?

Moṭra jhoṭra,

Ạḍi sạṅgiń jatra,

Ho̠r birre khatra,

E̠ Go̠…! Ar tinạḱ sạṅgiń?

Bhagete daḱ tetaṅ,

Moṭra dipilte lo̠lo̠ḱ hataṅ,

Taṛam-taṛamme delaṅ,

Serma setoṅte elaṅ,

Bạnuḱ sãote ṭukuć celaṅ,

E̠ Go̠…! Ar tinạḱ sạṅgiń?

*Onoṛiạ do Inḍia ren kanae*_

1. Heć akanạṅ paṛhaoḱ cet́joṅ

Iskul Oṛaḱte,

Sanań kana oloḱ cet́joṅ

Diṛạ munḍạte.

2. Nãwã puthi ńam akat́ạn

Ạḍiń kusiḱ kan,

Usạrage paṛhao sạtiń

Muruk akawan.

3. Hante nate beṅget́ baṛae

Opsor bạnuḱtiń,

Jãhãe são galmarao baṛae

Jạruṛ bạnuḱ tiń.

4. Cecet́ićtiń okae lạiạń

Onań atena,

Baṅre ma okae batlaoạń

Khạṭiń purạua.

5. Hola oka bharadińae

Paṛhao cet́ godạń,

Tobe nạhiń lại ańjomae

Khane kusiạń.

Source-Santali mare olaḱ khon tumạlaḱ

Ńel me netar araḱ hạriạṛ chatar

Nana hunạr lili bici,

Kiriń amań amhõ biṭi.

Setaḱ beret́ iskul calaḱ

koyoḱ kạmạń ńalaḱ ńalaḱ.

Paṛhaoḱ tabonme kurumuṭu

hoyoḱ tabon me ạḍi lạṭu .

Hameṭ mese bud ạkil

Saõta sorre onam dạkhil.

Adom hoyen Santal Ạdi bạsi

Tearoḱ tabonme  jugren ạrsi.

Hoyoḱ me jaega  phuṭạu baha

Ạyurme saõte  amge laha

Amge biṭi lạṭu laha.

Boge bạṛić amgem ńela.

Dhạrti gogo amdo biṭi.

Marsal tabon am- lahanti.

Jiwet́ jionre nãwãḱ sebel

Hạṭiń aleme amge pạhil.

Amge hoyoḱ me hạriạṛ chatar,

Jaogem dohobon umul latar.

Uni kulie̠m…

Duk ko̠sṭo̠,

Haro̠ne̠ sahaoakat́,

O̠ko̠e do̠e ńe̠lakat́,

Ar am do̠m landakana?

Uni kulie̠m….

Bhabna hudis,

Cintại ńe̠lakat́,

Jo̠to̠e sahaoakat́,

Ar am do̠m kusiḱkana?

Uni kulie̠m….

O̠ko̠e do̠,

Kạṭićre ać,

Go̠go̠ Babae at́akat́kin,

Ar am do̠m rạskạḱkana?

Uni kulie̠m…

Dukre ko̠sṭo̠re,

Haro̠nre bhabnare,

Jo̠to̠aḱ hiṛiń kateḱ,

Aćaḱ so̠ṅsare benaoakat́,

Ar am do̠m unim,

Henostawaekana?

Uni kulie̠m….

O̠ko̠e do̠,

E̠ge̠r e̠pe̠ṅge̠r,

Dal jo̠to̠e sahaoakat́,

Ar am do̠?

Unim hĩskạwaekana.

Uni kulie̠m….

O̠ko̠e do̠,

Lajao so̠ro̠m,

Lạṛhại tapam,

Jo̠to̠e sahaoakat́,

Ar am do̠,

Unim nisṛạuedekana.

…….. Poha Ḍạr….

Bakḍulutiń, E Bakḍulu !

Oka khon co, E Bakḍulu

Ińaḱ Jhiṅgạ jhaṭa rege,

Aṕ hapeyenam eh mońjge.

Mạluṅoḱ kạnạń Bakḍulu,

Pkạ̃kṛaḱ ńelte Bakḍulu;

Tire aṕ kamge sanań kana,

Asen ạcurmeń menjoṅ kana,

Hapese thir, hapelenme,

Mit́ dom ma saṕ ocoạńme.

Baṅa baṅa bạń thirama;

Saṕ hõ bạń saṕ ocoama,

Aloge men alom soroḱa,

Nonḍe khon ma coń uḍạuḱa,

Uḍạuḱ lạgit́ mońj phạkṛaḱ tiń

Am do ekenem rạput́ kạtiń;

Nitge nẽḱẽ uḍauḱ kạnạń,

Am cetante manḍraoḱ kạnạń;

Hanko gateń darako kan,

Iń ṭhen nitko seṭer akan.

Aema nitle jomkaoena,

Rạskạ gele eneć kana;

Beṛhaele manḍrao ạcur kan,

Ale ńelte bam rạskaḱ kan ?

Source: Mare Santali golpo khon Tumạlaḱ

Noa jivi….

So̠bo̠go̠ḱa rago̠ḱa,

Banago̠ḱa bago̠ḱa,

Ramphaḱ jhampaḱa.

Noa jivi….

Potam leka,

Parwa leka,

Uḍạuḱa ạphiro̠ḱa,

Ho̠erege maṇḍraoḱa.

Noa jivi….

Dãṛãna kukmuḱa,

Rạskạḱa dukuḱa,

Haraḱa buruḱa,

Jive̠do̠ḱa gujuḱa.

Noa jivi….

Kisạ̃ṛre re̠ṅge̠ćre,

Jo̠to̠rege tahe̠na,

Setare pusire,

Ho̠ṛre Dekore.

Noa jivi….

E̠se̠lre he̠nde̠re,

Girạbạsiḱae o̠nto̠rre,

Bae ńe̠loḱ so̠do̠rre,

Sạrige noa do̠,

Ho̠e jivi hasa ho̠ṛmo̠ge.

—Poha Ḍạr—