Koṅka kedeńae̠ uni
E̠se̠l kuṛi,
Ḍiglạu ạdińae̠
Kulhi dhuṛi.
Din – bho̠rmań jạpit́ ke̠t́
Ńindạń tahe̠n be̠ṅge̠t́,
Mo̠nre̠ haso e̠mkate̠ am
Iń nito̠ḱiń so̠ṅge̠t́.
kagoc – ko̠lo̠m saṕ kate̠
Gate o̠nako̠ń me̠lao̠
Acka amaḱ jạstie̠ntam
Ḍisko dulạṛ hilạu.
Riskạ- ce̠tan jãwãe̠ são̠te̠
Mobile me̠naḱ tire̠
Jiṛiṕ jiṛiṕ araḱ ńe̠lo̠ḱ
Sindur ho̠rasire̠.
Mit́ṭen ayo ho̠ṛ
Aema haro̠n sahaokate
Benaoedae mit́ṭen sajao gharõ̠ńj
Am ar iń lạgit́te.
Setaḱ tora beret́ cho̠ṭ
Jo̠ḱ raca, chõ̠c potao
Ge̠ć gurić gasao mańjao
Guriće hạra simiće saphaea
Mit́ṭen ayo ho̠ṛ
Aema harket sahaokate
Benaoedae mit́ṭen sajao gharõ̠ńj
Am ar iń lạgit́te.
Daḱe ạgui kũi ḍạḍi
Jo̠ḱ sapha jobra giḍi
Sahane halaṅ culhại o̠ṅ
Dhurạuakan isin basaṅ
Mit́ṭen ayo ho̠ṛ
Aema hamalaḱko sahaokate
Benaoedae mit́ṭen sajao gharõ̠ńj
Am ar iń lạgit́te.
No̠te aćren nunu gidrạ
Lokha ho̠bo̠r ce̠re̠ć dulạṛ
Duk suk ạtuḱ ać beṛhae
Sunum na sindhet́ enkage menae
Mit́ṭen ayo ho̠ṛ
Aema hirdạn sahaokate
Benaoedae mit́ṭen sajao gharõ̠ńj
Am ar iń lạgit́te.
Mimit́ jinis hisạb bạki
Huḍiń maraṅ ruti ruti
Ghaney disại ghane̠ hiṛiń
Kạmirege menae dinman din
Mit́ṭen ayo ho̠ṛ
Aema haṛhat́ sahaokate
Benaoedae mit́ṭen sajao gharõ̠ńj
Am ar iń lạgit́te.
Setaḱ kho̠n ạyuṕ hạbić
Kạmirege menae bạpuṛić
Mimit́koe jo̠to̠n sãohãet́ko
Aćaḱ sebel sạgạitey to̠let́koa
Ro̠ḱ joṛaoet́koae dulạṛ sutạmte
Mit́ṭen ayo ho̠ṛ
Aema hasoko sahaokate
Benaoedae mit́ṭen sajao gharõ̠ńj
Am ar iń lạgit́te.
Hãsge ńe̠lo̠ḱ Baha poraeni,
Pase̠ć amge bahare̠n rạni?
Sit́megeń mena baha poraeni,
Mo̠ne̠y mena baṅa amdo̠ Maharạni.
Daḱ cetan amdo̠m upe̠l,
Dinge ale̠ so̠ṅge̠m ńẽ̠pe̠l,
Amaḱ hilạu hipiṛ dinge̠le̠ ńe̠l,
Mo̠ne̠r gaḍa aleaḱ cehel-cepel.
Hahaṛage daḱ talam teṅgoakan,
Hahaṛage daḱ cetane̠m saṛakan,
Hahaṛage daḱ kho̠ne̠m o̠mo̠nakan,
Hahaṛage cạriạko̠nḍe̠m abhranakan.
Hạriạṛ sakam tala naṭal-
naṭale̠m bahawakan,
Ce̠t́ baṅ se̠ Baha poraeni
ńitdo̠m cekawakan,
Tin dhạbine̠m teṅgona
amdo̠ lo̠so̠t́,
Un dhạbić Baha poraeni amdo̠ baco̠m mo̠so̠t́.
Ạkil hoe tayo̠mge amiń
Ńel akat́ meạń,
Ko̠yo̠ḱ thir kạmạń
O̠nto̠r po̠nḍ kago̠jre amaḱ
Citạrgeň sendrabaraea..
Mit́ Maraṅ ạyurić mon-o̠nto̠rreń ṭhại akadia…
Cedaḱ je amma ạḍi maraṅ
Amaḱ kạmi hora do̠ ạḍi…
Mońj ar napaege.
Onate jo̠to̠ jaega rege amaḱ ńutum do..
Gumanao menaḱa…
Amaḱ o̠na garjao̠ aṛaṅ do̠
Dhạrti nakha hạbić raṛaṅ raṛaṅge ańjo̠moḱ.
Am do̠ mit́ṭen jạtem em akat́lea…
Mit́ṭen phurgạl diso̠m em akat́lea…
Onate am do̠ baṅgli jạtren Apatge
Am ge no̠a dhạrtire Baṅgladiso̠mren maraṅ ạyurić
Bo̠ṅgo̠ Bo̠ndhu Seikh Mo̠jibur Rahman
Ale ko̠ ṭhen do̠ Sheikh Saheb ge.
Cẽṛẽ le̠ka tinạḱ laṅ uḍạuḱ
Se̠rma uḍạu uḍạute̠ń laṅgaena .
De̠n tho̠ṛa sãhe̠t́ dulạṛ
O̠ka jhạl khon dulạṛ te̠taṅ ińma.
E̠ ! amma bahań landa mẽt́tam
Ko̠ṛam baṛge re̠ ro̠ho̠e̠ ke̠dam ae̠ma abad .
Ạḍi jhạl khon hõ amma e̠se̠l sapha
Amaḱ mãyãm te̠ma
Bại-bạite̠ń e̠se̠t́e̠n
Ho̠ṛmo̠ – mãyãm-sahẽ̠t́ lo̠lo̠e̠n.
Kạṛuṅ ńutre̠, se̠to̠ṅ talare̠
E̠ne̠ćjo̠ḱkan kukmu bhabnako
O̠ko-cukute̠ bana ho̠ṛaḱ ge .
E̠ṭaḱ koaḱ to̠paḱ dulạṛ le̠kado̠
Ar baṅ hanḍe̠-nanḍe̠ jiṅgi juri.
Alaṅaḱ hulạs landa sirijano̠ḱ le̠ka
To̠l te̠aro̠ḱ so̠na bando̠ nạṛi.
Hẽ̠ iń dõ̠ń Ạdibạsi kana,
Ho̠ṛ do̠ń licạṛgea,
Bul hõ̠ń bul bhucạṛgea,
Kạrạiṭha he̠nde̠giạń,
Me̠nkhan….
Ińaḱ ho̠ṛmo̠re,
Dạṛe̠t́kan mãyãm do̠,
Am lekage araḱgea,
Hẽ̠ ar mit́ do̠m hul hoyoḱgea,
Hul lạgit́iń sapṛaogea,
Ce̠t́ am hõ̠m sapṛaogea?
Baṅ….
To̠be̠ de̠ e̠nḍe̠ khan sapṛaoḱme,
Curạmar hako̠-pako̠ laṛaoḱme,
Bir gajaṛre tahe̠nić kạnạń,
Cedaḱ bir buru kho̠n do̠m,
Be̠do̠kho̠l dińkana?
Arhõ̠ am do̠m do̠kho̠l jo̠ṅkana,
Daḱ ińaḱkana,
Buru ińaḱkana,
Hasa ińaḱkana,
Hẽ̠ burum thir biń kạnạń,
Buskuiń khan do̠m,
Sogaḱmegiạń,
Sar lekań sidhạgea,
Edre ocoliń khane̠m,
Aḱ lekalaṅ o̠r kukućmea,
Iń do̠ alo se̠m sibạṛa,
Ar baṅkhan goṭam ńir dạṛa,
Tinạḱ dine̠m sahaokaḱa,
Cehaoet́ miạń cehaoḱme,
Alom thir hapeko̠ḱa,
Alom ko̠yo̠ḱ ho̠rkaḱa,
Juṛạu jo̠ṅme aḱ sar,
Ro̠ho̠e jo̠ṅme sạru saṅ,
Caḱ co̠ Ạdibạsi am do̠,
Nunạḱ do̠m asaṅ,
Sapṛaoḱme,
Laṛaoḱme,
Lahaḱme,
Hạni Deko pusi kho̠n!
O̠lo̠ḱ paṛhao̠ baṅte̠
O̠lo̠ḱ p̠aṛhao̠ḱ babon baḍae̠
Khaṭao̠ḱ kanabon kadae kadae̠
Le̠kha jokha baṅ baḍae̠te̠
E̠ṛe̠ ocoḱ kanam hante̠ no̠te̠
Upại baṅte̠ bạḍgu pạṭuṕ
Raṭen birhõ marao̠e̠na
Aṛha kolosaṅ hõ cabae̠na
Ańjom pe̠ho hoṛ hopon
Alom tahen thoroṅ thopoṅ
O̠lo̠ḱ p̠ṛhao̠re̠ lagao̠me̠ mon
Ńam ruạṛam ae̠ma dhon
Dhorom korom suluk dulạṛ
Cạriạkona buru bo̠ṭko̠ć,
Ńe̠loḱ jiạṛ hạriạṛ mõ̠ńjo̠ko̠ć,
Cedaḱ hale mo̠ne baṅ so̠ko̠ć,
Jharna jhinuk gạḍiạ ro̠ko̠ć.
Bir buru cẽ̠ṛẽ̠ ciprut́ sereń aṛaṅ,
Gại ḍaṅgra me̠ro̠m ghạnṭi ṭaṛaṅ,
Gupi koṛa tirio ńõ̠hõ̠ṛ aṛaṅ,
Rãwãoḱ usul co̠po̠t́ ḍhopko daṛaṅ.
Co̠ṭ mutul sarjo̠m dare,
Gupi koṛa tirio raha phe̠nṭo̠ṛ banam;
Jivir juḍạsi ańjo̠m haere!,
De̠ćakane buru lodam dare karam.
Me̠ro̠m ṭo̠ṭko̠ gại ghạnṭi ṭhiṛiń,
So̠ho̠r bajar tahẽ̠ kateḱ cekań hiṛiń,
Bo̠ho̠ḱre he̠ćạń disạ iń,
Cekań hiṛiń kudum kisạ teheń.
Bir jan-janwar cẽ̠ṛẽ̠ go̠ć,
Jharna ḍạḍi hako co̠ḍgo̠ć,
Lade me̠se̠ rapaḱ ṭo̠go̠ćjem
Haere! sebel caṭo̠ḱ mo̠ṭo̠ćjem.
Mase̠ be̠ṅge̠t́ am
Latar cetan co̠ṭ,
Haere! hạriạṛ jonḍra
E̠kal moṭa-moṭa pho̠ṭ.
Haraena buruiena
Teṅgo cacoena,
Go̠do̠r-go̠do̠r aema mesal
Jeleń -jeleń gocoena.
Co̠ṭ utạrre ge̠le̠
Ńe̠loḱre ṭuilạ,
Ar mit́ hapta bad
Rapagale se̠ṅge̠l aṅgra kuilạ.
Beret́ co̠ṭaḱ
Dingele ńe̠la,
Rapaḱ kateḱ jo̠mlere
Haere! ńuṭuḱ he̠ṛe̠m,
Bhagete sebela.
E̠ Maraṅ Buru!
Tis kho̠n hạṇḍi do̠ho̠em sikhạuke̠t́lea, Un kho̠nge
Hihiṛi Pipiṛi kho̠nle chuḍạrakana,
Hararata kho̠nle chingạuakana.
E̠ Maraṅ Buru!
Tis kho̠n hạṇḍi co̠ḍo̠rem sẽṛãwat́lea, Un kho̠nge;
Kho̠j Kaman kho̠nle at́akana,
Sasaṅ Beḍa kho̠nle oṭaṅakana.
E̠ Maraṅ Buru!
Tis kho̠n hạṇḍi ńuem sẽṛãwat́lea, Un kho̠nge;
Cae Campa kho̠nle sạ̃ngińena,
Bado̠li Kõ̠eḍa kho̠nle sahaena.
E̠ Maraṅ Buru!
Tis kho̠n hạṇḍi ńuem hewa ket́lea, Un kho̠nge;
Aema sabhyatale ńir bạgiada,
Aema sona gaṛle deya giḍiada.
E̠ Maraṅ Buru!
Tis kho̠n hạṇḍile tala oṛaḱ kedea, Un kho̠nge;
Aema simạle re̠ć ocoakana,
Aema ḍiṇḍạle e̠ṛe̠ ocoakana,
Sajao gharo̠ńj rạput́akana
Rilạmala somaj bo̠ḍeyakana.
E̠ Maraṅ Buru!
Cedaḱ co̠m sẽ̱ṛãwat́le
Cedaḱ co̠m hewaket́le
No̱ḱo̠e ona dusturge nit hạbić
Enan hewage teheń hạbić
Menaḱge somajre jiạṛ jiwet́.
E̠ Maraṅ Buru!
Ar tinạḱ din noṅkage…
Hạṇḍirege jo̠be̠le tahe̠na