Pukhri jalapuri gaḍako eman daḱ

Kạṭić ṭhop midoḱte ạtu jarwaḱ

Mimit́ goṭeć akhorkoge joṛaole khan,

Hajar hajar puthiko cet́ baṅ benaoḱ kan!

Mimit́ goṭeć itạko gathao mit́kate

Hapṛaḱ hapṛaḱ dolan hõ benaoḱ kajakte;

Sutạm lekan sobot́ son ḍherae pãktege

Moṭa moṭa barahi ạḍi keṭećge.

Manwa hoṛmo jaṅ jel mãyãm ar sirkote

Muṭhạn akana onako mit́ akante.

Uć phạnṭillenre oka eskar bam dhej,

Gel hoṛ ekoṭoḱte do algatem leṭej.

E gidrạko! Mit́ monoḱ de kurumuṭuipe,

Ekoṭ mon hạrjoṅ lạgit́ mage jhũkoḱpe.

Cẽṛẽ leka tinạḱlaṅ uḍạuḱ

Serma uḍạu uḍạuteń laṅgayena.

Den thoṛa sãhẽt́ dulạṛ

Oka jhạl khon dulạṛ tetaṅ ińma.

E! amma bahan landa mẽt́tam

Koṛam baṛge re rohoe kedam aema abad.

Ạḍi jhạl khon hõ amma esel sapha

Amaḱ mayam tema

Bại bạiteń eset́en

Hoṛmo – mayam – sãhẽt́ loloen.

Kạṛuń ńutre, setoṅ talare

Eneć joḱ kan kukmu bhabnako

Oko – cukute bana hoṛaḱge.

Eṭaḱ koaḱ ṭopoḱ dulạṛ leka do

Ar baṅ hanḍe – nonḍe jiṅgi juri.

Alaṅaḱ hulạs landa sirijanoḱ leka

Tol tearoḱ sona bando nạṛi.

Ạḍi mońjtam iṭạ oṛaḱ

Met́ lagaoḱ kan joto hoṛaḱ

Tãhẽn hoṛge bạnuḱ kotam

Oṛaḱkate cet́ porho tam?

Oṛaḱre menaḱ chapor khaṭ ar almari

Ar hõ joloḱ elekṭeri

Ona begor hoṛ bạnuḱ kotam

Cet́ ado hoyen porho tam.

Oṛaḱ pereć dhon tam

Pokeṭ pereć ṭaka tam

Ona onḍege tãhẽn khan

Cet́ ado porho tam.

Saj sapaṕtam ạḍi ạḍi

Ar hõ menaḱ phoṭo gạḍi,

Koyoḱam hoṛ bạnuḱ ko tam

Porho ona reaḱ bạnuḱtam

Marshal ge bam bamber lekhan

Cet́ porho ge bạnuḱtam.

Paṛhaoenam ạkilenam

Ạkil marsal okortam

Marshal ge bam bamber lekhan

Cet́ porho ge bạnuḱtam

Biḍạuenam pasenam

Daman hudạ ńamanam

Nit kạmi bam kạmi lekhan

Hudạ reaḱ cet́ porho tam?

Bạptisenam isạiyenam

Girjạ koejoṅ bạnuḱtam.

Kurus malayem ṭoṭko lere hõ

Jahan porho bạnuḱtam.

Jhunkạ beṅgaṛ jhunuk jhupur

Ńeloḱa kạṭić kạṭić;

Jhunkạ beṅgaṛ bejai sebel

Hako soṅge utu lekhan;

Jhunkạ beṅgaṛ arhõ sebel

Ạlu ṭamaṭol soṅge,

Jhunkạ beṅgaṛ onate bole

Hoṛ ạḍi ko kusiaḱa.

Baba gogo boeha misera

Boge hudisabon usara

Koṛa kuṛi gidrạ lạgit́ ge

Begar babon dohoe tis ge

Baḍae abon gharońj rege

Baba do gusṭi ren bos ge.

Onate gogo baba lạgit́ ge

Sareć dohoyae hako bohoḱ ge

Maraṅ din horoaḱ new market́ re

Bạbu lạgit́ ge ḍher tahena bajeṭre

Menkhan mare munḍumala hạṭiạre

Kuṛi lạgit́ do thoṛa tahena bajeṭre.

Sạri kahni ge hoyoḱ kan okte re

Onate babon dohoe monduk ontor re

Disạyabon dhạrti re nawa sirjon em re

Mit́ bedon ge tahena koṛa kuṛi gidrạre

Onate begar babon dohoe sanam oktere

Ente banar ge ạḍi jạruṛa ruạ joton okte re.

Suluk suluk bon khojoḱ kana

Sulukge bạnuḱ dhạrtire

Be suluk ren hoṛ onate

Din ko khemaoet́ phurtite.

Dhạrtiren Raj- porja sanam

Suluk lạgit́ko dạdạṛ kan

Suluk ạuri ruạṛ rege

Be suluk ko janam kan.

Hanhareya jhogṛa jaoge

Suluk bạnuḱ gharońj re,

Apa honko tapam kana

Gharońj ḍheroḱ kan mucạt́re

Ato somajre suluk lạgit́

Mạńjhi hõko dohoḱ kan.

Suluk lạgit́ bicạr bicạrte

Somaj geko bhaget́ kan.

Disom rẽhõ disom calaoić

Dạṛet́ kanae muluk muluk

Suluk lạgit́ dạṛ dạṛ tege

Bạṛti kedae be suluk.

Dhạrti ren sanam bigganiko

Kạmi kanko ạḍi jhuk

Benaoet́ ko suluk jontor

Ona jontor rege be suluk.

Suluk lạgit́ manwa judi

Mońjko kạmi dhạrti re

Dhạrti puri bạgi tayom

Suluk bon ńam serma re.

E ho Juạn

Koclon ocoḱkan jạtiaḱ homor raḱte

Nit hõ cedaḱ

Bạnuḱ tama audhạn?

Goć gopoć ar jabor dokhol

Kạmi kanko soetanren dol

Ńeńel kan com baṅ co

Jạpit́ akadam nirodhol?

Lekcarako lạṭu lạṭu

Mil bạnuḱa kạmire

Onko gema eṭkeṭõṛẽ

Reńgeć koaḱ Bhạlạire.

Rohoṛ sakam hae! Bes dintamkore,

Hạṛiạrgem ńellen dare cetanre;

Hẽ, dare sajaotet́ baḍhaoledam,

Ohae! Bhabnage nit ńeloḱ kana.

Tahẽkanam tis dare cetanre,

Cet́ dukge bam baḍaeleda unre;

Rereń ar cẽṛẽko sereńat́me,

Nitoḱ do hae amko hiṛińket́me.

Sisirtem purṭhạḱ kan tahẽkan coṅ,

Hoe hõe hoyoṅet́me tahẽkan coṅ;

Ohae okayen baṅ ona mantam!

Janwar ar hoṛ nit lebet́me am!

Dare cetanrem tahẽkan jokheć,

Amaḱ umulre hoṛko asraelen;

Janwarko jirạulen am latarre,

Jotoko sarhaolet́mea unre.

Nitoḱ do muhinrem paṛao akante,

Hiṛińket́meako hae! Algate.

Nonkage ńeloḱ dhạrti dosa do,

Ạḍi sondhe hae, dukre gate do!

Hae sakam! Hoṛ hõ am lekage co,

Dhon tahen hạbić manot ńamako;

Nandanlen khanko am lekage co.

Sesantire do hae ḍhilạuḱako.

Guḍ guḍ saḍeate hane hawagạḍi,

Ńirrate dara kan ạḍi canḍa cạnḍi.

Sadom joṛao baṅ jạruṛ ona gạḍire,

Hoṛe calao kol menaḱ ona bhitrire.

Laharey duṛuṕ akan gạḍi caḱlaoić;

Hopon caḱe capo akat́ ṭhikạn hạbić.                                       

Ṭhik horte calaḱ lạgit́ ona hopon cãḱ,

Nase nasey’ peṭera ạcur baṛae tak.

Ać lahare samaṅ sen hijuḱ senoḱko,

Põḱ põḱate etom końe’ sa ocoko.

Lạṭugea banar cãk ḍaṅgra gạḍi reaḱ;

Kạṭićgea ponon cãk noa gạḍi reaḱ.

Deć nạ̃wạ̃ioḱ ạḍi sad hawagạ̣ḍire,

Legem jutạ ạikạuḱa calaḱ ghuṛire.

Iń Bebenaoić do jotoaḱge;

Ṭhosoḱ mõńj sirjontae sanam sećre.

Coṭ phaelaore ńelkom ma ipilko,

Ah! Dulạṛet́ko mẽt́kintabon.

Adomko huḍiń, adomko hapṛaḱ

Ar kạṭić kạṭićko cumkạḱ cumkaḱ.

Tinạḱ mõńj hõko liplipạuḱ kan,

Gidrại thiroḱ kan onko ńelte ma.

Jhalkaoḱ siń cando ma ńeleme se

Cet́ m̃ońj ho gol-sona cakta leka.

Ńindạ cando do ńindạ lạgit́ge,

Hẽ, hoṛko rạskại dulako kana.

Hisit́ hisit́ hoye hoe ocoyet́

Ar hoṛmotabone juḍasiyet́;

Ńũi daḱ hõ coṅ mõńjge rilạmala,

Sapha ar sebelgey imạń kana.

Jomaḱ ńũaḱ isin aroe lạgit́

Seṅgel benao hõe cet́abon kana.

Ar hoṛo eman casbas lạgit́

Bud ar akel doe emabon kana.

Em akawadińae soros mẽt́kin.

Ar mẽt́ pipnikin, bạń cubạgoḱa;

Em akawadińae mũ ar luturkin,

Alaṅ hõe emdińteń roṛet́a.

Tikin ar jaṅgakin, hoṛmo ińaḱ

E benaoket́te iń ạsul daṛeaḱ.

E gidrạko Isor joharaepe;

Uniaḱ mạhima sabasipe.