Hopon Bạbu

Aleren dulạṛ hopon bạbu

Oṛaḱren jotogiye koa kạbu,

Katha hõ thoṛa bae ańjom

Jel utu chaḍa daka bae jom.

Iskul calaḱ bae reben

Baskeaḱ bela chaḍa bae ebhen,

Paṛhaoḱe duṛuṕ ceṭe ceṭe

Gogo soṅgeće reṭe peṭeć.

Mobile reye gatić free-fire

Roṛae uni phaṅka phayaṛ,

Aleren hopon bạbu cạṭuạ

Bapla reye dona nạṭwạ.

Sanam ghạṛi lạṭ kuṭạ

Gog baṛayae parkom kuṭhạ,

Raṅgaolen khane bok boko

Usạtlen khane pok poko.

Aleren hopon bạbu jhẽṭ beṭa

Kạmi kotae do eken eṭaḱ eṭaḱ.

Hijuḱ Me Gate

Hijuḱ me gate dulạṛiạ

Sorre duṛuṕme,

Gapal marao kaḱ gelaṅ

Bogi judạ katha.

Ạḍi din khongeń menjoṅ

Am soṅgeć ropoṛ,

Menkhan gate iń soṅge ropoṛ

Opsor getam baṅ.

Jiwi re duk monere kosṭo

Tinạḱem emạń gate,

Enhõ ińaḱ dulạṛtiń gate

Ame hohoama.

Hijuḱme gate dulạṛiạ

Sorre duṛuṕme,

Golpoyalaṅ dulạṛ katha

Panti ńapam kate.

LẠUṚIẠ

Iń bạń ńel akada

East India Company aḱ harket́,

Bạń ńel akada iń

Pakistani aḱ saset́.

Ńeledaiń kombṛo baṭpaṛ,

Lạṭkuṭạ aḱ karbar;

Capeḱ kan hirkhạ bo̠to̠r ruṕ.

Iń do̠ bạń ńel akada

Sidu-kạnhu aḱ lạṛhại.

Ńel akadạń nãwã bạhu-jãwãeaḱ

Bańcao lạgit́ lo̠lo̠-setoṅ kạmi.

Iń do̠ maraṅ kipisạ̃ṛ hoṛko são

Oprom cinhạu bạnuńa

Oprom cinhạu menạń

Nalha tumạl nacar

Kạmi bańcao kurumuṭu

Hor̠ko são.

Ekal nãwã bidạu

Samkasạṭi são.

Ado iń do

Lạuṛiạ baṅdo Ạuṛiạ.

Hako Kaṭkom

Ho̠ṛ ho̠po̠naḱ maraṅ rạskạ po̠ro̠b so̠hrae,

Um, dada,khuṭạu, jale sakrat.

Oṛaḱ oṛaḱ rạskạ reaḱ ṭamaḱ saḍekana.

Cun potao bhitre nana hunạr

Hạti sadomko laṛaḱkan.

Araḱ hạriạṛ nạ̃ṛĩ sakamte,

Jhiṅgạ baha ḍuriạo ate;

Oṛaḱ duạr do sohanakan.

Hipiṛ hipiṛ hoete sapṛao akan

Jaher sạrịmre birbaha do

Likir likir laṛaoḱ kan.

Teheń do khunṭạu mãhã.

Gại ḍaṅgra mihũ merom

Ạtiń sarhao kusiạco̠ko kurumuṭu.

Jo̠to̠ ho̠ṛaḱ oṛaḱre peṛa koko seṭerakana,

Rạskạte aḍepaseko andoṛ akada.

Maraṅ mạ̃i doe hećenre hõ-

Ho̠po̠n mạ̃i do bae seṭerlena.

Baḍayena calaoen candore

Jumi-jaegako rećket́koa,

Baṅma bhiṭạ khonko lagaet́koa.

So̠hrae jale mãhãre, jo̠to̠ boeha mit́kateć

Lać pereć jo̠m ńũ do

Baṅ hoelena.

Heṛem se̠be̠l so̠ṛo̠m sunum piṭhạ

Khạjạuṛi muṛki keṭeć liṭiyena.

Um daka jale khunṭạu mãhãre

Rạskạte ato oṛaḱ sohan tahẽlena.

Sakrat sendra gajaṛre

Mama buḍạ sedaere

Tạruṕ ko hạmbuṛ goć ledea.

Ar ne̠be̠tar jumi jaega bibatte

Sakrat hiloḱ bon ṭhũ go̠ć ocoḱkana.

Onate paseć

Mõṛẽ mãhã so̠hrae do

Bar -pe mãhã regebon cabaeda.

Sohrae etohoṕre

Um kategebon,

Hako kaṭkomoḱ kana.

Santal Hopon

Abo kanabon santal hopon

Menaḱbona nit hõ nacar

Eṭaḱ ko mako hoyen roton

Tis adobon bud bicạr.

Oloḱ paṛhaoḱ sẽṛa kate

Udugoḱ kanbon iń do okoe

Bạnuḱ tabona mit́ jhukate

Sãota tabon doho rokao.

Hudis kate lahaḱ mabon

Diku talare jitkạr hoyoḱ

Delabon nitge jotoko logon

Tayomseć do alobon koyog.

Sãota reaḱ bhạlại redo

Juạnkoṛako lahaḱ mabon

Abo geco ho ạyur kodo

Somaj sagaṛ happen lagayabon.

Nitge okte babon bilom

Ar baṅ khan bon bhagao ocoḱ

Ekraṛabon doho sãota niạm

Tisge ona khon babon pacoḱ.

Ń A P A M

Ńapam Ńapam Ńapam hoyoḱa mit́din

Unredo ạḍi rạskạ baṅ hoyoḱa,

Menkhan ńapam do hoyoḱ talaṅgea.

Enhiloḱ ukoḱ reaḱ em kurumuṭuiea iń ńelte

Enhiloḱ iń ńelte bam landaea,

Enhiloḱ iń ńelte bam koyoga

Menkhan ńapam do hoyoḱ talaṅ gea.

Enhiloḱ in kusiaḱ aṅgroṕ bam horoga,

Iń hõ am kusiaḱ aṅgroṕ bạń horoga

Menkhan ńapam do hoyoḱ talaṅ gea.

Tislaṅ ńapamoḱa, okare, balaṅ baḍaea

Enhiloḱ ińaḱ ti am bam saṕtińa,

Enhiloḱ amaḱ ti iń bạń saptama

Menkhan ńapam do hoyoḱ talaṅ gea.

Ńapam hoyena mit́ din ….

Hạṭiạ re, bazarre, horre, bapla oṛaḱre, gạḍire, busre

Menkhan dulạṛ ma baṅ tahẽlen laha leka

Tobe ńapam do hoylen gea to.

Ackage mit́ din ńapam hoyena re̠l gạdi cetanre

Iń mań duṛuṕ akan siṭ re,

Amem teṅgo akan iń aṛere.

Ńel sãoteń teṅgoyena, emaḱ meạń duṛuṕ siṭ

Bam duṛuṕ len edrite, joro kedam mẽt́ daḱ ạḍi okore

Menkhan ńapam do hoylen gea to.

Ńapam Ńapam Ńapam hoyena eyae gel umerre

Amaḱ koyok ar ińaḱ koyok re roṛ do banuḱa,

Joroyena mẽt́daḱ eken, jot begor upại banuḱa

Cabayena sedae dulạṛ, goso mosot́te

Daṛege ma cabayen cekań sotoḱ me

Mon rema tahẽyen dulạṛ pereć ge

Menkhan ńapam do hoylen talaṅ gea to.

Doṅ Sereń

Lintạ loyoṛ podda setu benaokedae ho Sheikh Hasina

Badha tahẽkana akoṭ tahẽkana,

Enhõe benaokeda podda setu.

Joharaeabon sarhaoeabon,

Hoṛ lạgit́ bhạlạianaḱge kạmikeda.

Ol tahẽna itihas sakamre

Baṅ benaoḱ podda setui benaokeda.

Hoe Dak

Bạisạk jusṭi cando ạyuṕ bela

Hende rimil rakaṕen ńut́ge,

Hoe daḱ darae kan hud hud

Pạchim disom khon botorge.

Hende rimil guḍ gudạḱ kan

Oktoreye huḍuret́ diṛim diṛim.

Cẽṛẽ ciprut́ ko cero beroet́

Ponḍ kõk ko uḍạuḱ kan coṭ seć.

Gogo oṛaḱre uduṛ dupuṛ

Hana noaye aderet́ harephare,

Gupi koṛako gupiṭạnḍi khon

Gại ḍaṅgra ko piḍgạuket́ko.

Kạmi hoṛko dạṛ ạguet́ akbak,

Ato oṛaḱte umuloḱ lạgit́.

Hoe kedaye gurlạ gurli radrad,

Daḱ kedaye jhomor jhomor.

Oṭaṅ idikedae oṛaḱ duạr ko,

Rạput́ idikedae dare ḍạrko.

Lihạḱ Do̠ṅ Sereń

Okayenam baba sirjon mạlik

Dhạrtire ko̠ro̠na virus hećakana,

Dayawalem baba mãyãwalem

Korona khon baba de bańcaolem.

Ko̠ro̠na virus halaṅme, samṭaome

Dorẽore giḍime,

Danaleme baba nawa dhạrti.

Sohrae Sereń

Niạ ṭola peaj ṭola

Niạ ṭola rạsun ṭola,

Niạ ṭola mosola ṭola

Mosola ṭola dada jhiṭạṅe jhaṛaṅ.

Durgạpur gutugalaṅ

Ḍạhu ṭola huduke huduke huduk (2)