Lagṛẽ Sereń

Kulhi tehõ jhiṅgạ nạṛĩ,

Baṛge tehõ jhiṅgạ nạṛĩ

Jhiṅgạ nạṛĩre dada gạiye jhạliyen,

Gại dada alom dale, jhiṅgạ nạṛị̃ gedme

Bạchur tore dada, jonome ṭuạr.

Gol

Gol Gol Gol

Noa dhạrti puri gol

Gol Gol Gol

Jom ńũre gonḍogol.

Gol Gol Gol

Katha roṛre gonḍogol

Gol Gol Gol

Cạl colonre gonḍogol.

Gol Gol Gol

Am ińre gonḍogol

Gol Gol Gol

Somaj talare gonḍogol.

Gol Gol Gol

Jạt jạtre gonḍogol

Gol Gol Gol

Disạm disạmre gonḍogol.

Gol Gol Gol

Aboaḱ hudis cintạre gonḍogol

Gol Gol Gol

Jotoge gonḍogol.

Dulạṛ redo Kosṭo

Dulạṛ do baṅ bogea

Onḍe menaḱ kosṭo,

Dulạṛ khạtir ińaḱ jibon

Hoyen tińa nosṭo.

Bhạbit ledạń dulạṛ kate

Tahẽ nalaṅ sukre,

Jiwet́ menạń iń do nitoḱ

Duk liạ jiwire.

Bam kusiạń iń do

Lại ạdińam isposṭo,

Bujhạu kedạń nitoḱ do

Dulạṛ redo kosṭo.

Bapag

Onka katedo caḱem sahayena

Jiwire hoe bharḍo rakaṕ kate

Onaki ạḍi napae?

Nit hoń disại enhiloḱa citor

Bạń bujhạukea ińaḱ baher bhitạr

Duk eman roṛ bạṛić uihạriń ukur

Lại lapai baṅ bạgiạdạń ṭamar ṭumur

Enhõ asoḱ kạnạń dulạṛ ińaḱ jiạṛa

Bapag akan mone topol ruạṛa.

Disạ ocoń kan amaḱ roṛ rãhã

Cinhạ akan baha ontorre laha

Enhoń khojoḱ kana katha amaḱ mocate

Tahẽ kạnạń amren dulạṛiạ gate.

Onka kate do caḱem sahayena

Ińaḱ mone ulạṭ kacaṛ kate

Ona ki ạḍi napayena?

Am kusi ocome leka beohar roṛ

Bạń daṛe akada am são joṛ

Banam koṭaṕ são amaḱ tal

Be tal akadạń sereń reaḱ hal

Enhoń baḍaea mone do ojok

Ńapam lạgit́ banar ontor doe khojoḱ.

Onka kate do caḱem sahayena

Ińaḱ ontorre sar tuń oṭo kate

Onaki ạḍi napayena?

Ontor reaḱ buṭuń haso nit

Bạṛtiḱ kan rehõ bạń ńamet́ bhit

Gạhir okareco guṛgu dhiriteń rid

Hamal koṛamre sae sae sui bid

Enhõ okareco bujhạu edạń suk

Dulạṛ reaḱ gaegom nase nase duk.

Sạri Dulạṛ

Iń okań khojoḱa caḱ do emoḱ samane

Saham tahẽn bạṛićaḱre okoe undo maname

Oka amaḱ lạlại sana, ińgeń lại lahaea

Ińaḱ gabam katha ate amem sereń rahaya.

Oka ińiń uihạra onage caḱem kukmuya

Sạńgiń khonaḱ amaḱ sãhet́ ińaḱ hoṛmoe rumuya

Ińiń bujhạu sebel soṛom, oka amem cakhaea

Sạriaḱ do amgem bachao iń doń tulạ jokhaea.

Amaḱ ontor dulạṛ darha, iń do unum pạuṛia

Ogom dõrea dhoṅga am do, iń do onḍeń soroḱa.

Amaḱ man bhorom nasaḱ, ińge ạḍiń boroḱa

Ińaḱ duk muhimre caḱ, amaḱ mẽt́ daḱ joroḱa

Ińaḱ kusi rạskạ rema, amem suk bujhạua

Amaḱ muluć mẽt́ãhãte, ińaḱ monem rijạua.

Ontor amaḱ heḍejoḱkan, ińaḱ koṛam kecagoḱ

Mone ińaḱ taral basal, amaḱ jiwi tawagoḱ

Amre iń ińre am, monere mon milonen

Hoṛmo begor jiwi sohag dulạṛ topolen.

Baṅladisom

Baṅladisom ạḍi mońja

Ńaloḱ bagan leka

Ona talare menaḱbona

Abo baha leka.

Menaḱbona hindu camar

Arhõ muslạ ar hõ kamar

Arhõ aema jạti.

Hiskạ bạḍại bạgikate

Tahẽnabon mit́ sate

Mońjge milạuate

Jomabon ńuyabon

Disạm talarege

Disạm tabon dulạṛtabon

Mone jiwitege.

Am Dulạṛgeń goṭa akada

Gate cedaḱ co amgeń uihạrme

Siń ńindạ amgeń disạme

Setaḱre kuhuli aṛaṅ

Ańjomte amem hohoạń

Kan lekań bujhạua

Siń candowaḱ setaḱ

Marsal ńelte amem

Landayet́ lekań ạikạua.

Baḍaeam ińaḱ mone bhitrire

Amgeń tunum ńamet́mea.

Am são ńapam lạgit́

Ṭhạ̃i mãhã ińaḱ mone

regeń goṭa ạcura.

Am samaṅre oka lekań

Teṅgona, oka lekań roṛa

Mone moneteń goṭa doho kaḱa.

Paṛhao ar bam paṛhao

Amaḱ muṭhạn ińaḱ

Monereń thapon akada

Jaejug am dulạṛgeń goṭa akada.

MIT́ MONOḰ

Pukhri jalapuri gaḍako eman daḱ

Kạṭić kạṭić ṭhoṕ midoḱte ạtu jarwaḱ

Mimit́ goṭeć akhor koge jaoṛaole khan,

Hajar hajar puthiko cet́ baṅ benaoḱ kan!

Mimit́ goṭeć itạko gathao mit́kate

Hapṛaḱ hapṛaḱ dolan hõ benaoḱ kajakte;

Sutạm lekan sobot́ son ḍherao pãk kate

Moṭa moṭa barahi ạḍi keṭećge.

Manwa hoṛmo jaṅ jel mãyãm ar sirkote

Muṭhạn akante onako mit́ akante.

Uć phạnṭillenre oka eskar bam dhej,

Gel hoṛ mit́te do algatem leṭej.

E gidrạko mit́ monoḱ de kurumuṭuipe,

Mit́ mon hạr joṅ lạgit́ ma jhũkoḱpe.

Halaṅ Ńam Baha

Janamenam am do bạbu

Reṅgeć nacar gharońjre

Duk kosṭo harhet sanam

Paṛaoena am cetanre.

Gogo baba dulạṛ khonem

Chiṭkạu ńurena

Dhạrtiren dhukhi ko modre

Amgem tahẽna.

Duk kosṭo harkhet talare

Halaṅ kedam ạkil

Hoe koḱam mente am do

Somajre marsal ipil.

Somaj reaḱ bhạlại lạgit́

Amgem tahẽn laha

Somaj talare am dom hoyen

Halaṅ ńam baha.

Janam Disom

Janam disom Baṅgladisom

Ạḍi sohag dulạṛ reaḱ janam disom,

Ạḍi leka jạti menaḱbon

Ạḍi leka ạri-cạli tabon.

Pereć akat́bon disom goḍako

Judạ getabon horoḱ bande ko,

Judạ getabon jomaḱ ńũ aḱ

Enhõ janam disomre mit́ge menaḱbon.

Nana hunạr cẽṛẽ raha

Nana hunạr baha joḱ,

Setaḱ sińgạṛ andoṛakan sarhao akan do.

Jo bahate pereć akan,

Tinạḱ sebel soṛom

Bir gajaṛ dare nạṛĩte sajao akan,

Mońjge Janam disom.