Sedaere mit́ṭen kisạ̃ṛ hoṛren mit́ṭen ạsul setae tahẽkana. Jaoge mońj jomaḱe ńamte ạḍi moṭa ar daṛeye tearena. Uni oṛaḱren gidrạko hõ ạḍiko dulạṛea. Ńutumtae do Jhạṭu. Jãhãtinre Jhạṭu ńumkateko hoholekhan riạt́ riạt́e dạṛ ạguia. Ar bebạṛiće khilḍua.

Uni seta do oktere kombṛo ar janwarkoe laga ńirakat́koa. Mit́din do onkoren caco-gidrạ ackage daḱreye ńurena. Are unumoḱkan tahẽkana. Uni seta do daḱreye don boloena. Ar gidrạ ańgropre gerkate ghuṭuteye oḍok ạgukedea.

Tumạl: Baḍaejoṅ Hor

Sedae kathae mit́ṭen buḍhi hoṛe tahẽkana. Uniren mit́ hoponerae tahẽkana. Mit́din uni buḍhi do birte sahan sendrae senena. Ạḍi utạr sahane ńamkeda. Ado sahane bojhaket́ khan bae dipil daṛeaḱ kana. Adoe hohoeda jãhãe menaḱpea noa bir re? mase noa sahan bojha dipil oṭoạńpe. Khan uniaḱ hohote okoege bako hećlena. Inạkate arhõe hohokeda jãhãe noa sahan bojhae dipilạń uni são ińren hoponerań baplakaea. Ona katha ańjomte mit́ṭen Tạruṕe hećena are metae kana, iń dipilama amren hoponeram imạńa tho? Uni buḍhi menkeda, emamgeạń ma dipilạńme. Khange Tạruṕ do sahan bojhae dipiladea are metadea, Sombar din ale oṛaḱ hijuḱme.

Uni buḍhi do Tạruṕ eṛe reaḱe hudisleda. Menkhan sạrige disạkate Sombar din Tạruṕ do onko ṭhene hećena. Ado uni buḍhi do botorte uni Tạruṕ aḱ katha bae giḍi daṛeaḱte aćren hoponerae metadea, ma biṭi sapṛaoḱme nui são calaḱ hoyokḱtama. Ado ać gogoaḱ katha bae giḍilet́te uni kuṛi do Tạruṕ sãoe calaoena. Khan unkin do ạḍi sạṅgińkin calao idiyena. Calaḱ calaḱte mit́ṭen ḍonḍhorkin ńamkeda ar onarekin boloyena. Ona kangea Tạruṕ aḱ oṛaḱ do. Ado oṛaḱ tioḱkate thoṛa duṛuṕ jirạukate Tạruṕe menkeda, teheń do ińren gate ko hijuḱa ma am do geć gurić kate isin basaṅ hataṛme. Inạ menkate uni do aćren gate darame calaoena. Tạruṕ aḱ katha lekage uni kuṛi do bogete oṛaḱ duạre geć gurić saphaeda. Ona oktere mit́ṭen buḍhi hoṛ onḍe hećena are metadea, E mạ̃i, cedaḱem geć gurićeda, men am do dạṛjoṅme. Ente teheń doko jommea. Onate Tạruṕ do gateko ạgui sen akana.

Ona katha ańjomte uni kuṛi do usạra mit́ṭen pusi dal goć kedete culhạre luihạ condakeda ar uni pusi ona luihạ sojhere akakedea. Inạkate seṅgele jol keda ado uni pusi aḱ mãyãm luihạre ṭhoṕ ṭhoṕ joroḱ kana ar choṅ choṅ saḍe kana. Ado uni kuṛi doe dạṛkeda. Inạ mit́ ghạṛi tạyomge Tạruṕ ar uniren gateko heć seṭerena. Ado Tạruṕ doe hohokeda ma hijuḱme noko peṛako hećena. Ghane ghane ona choṅ choṅ ańjomte hohoeda are meneda inạge piṭhạime heć lahaḱme. Menkhan bhitri khon jãhãn aṛaṅge baṅ ańjomlena.

Onate Tạruṕ do jaṅga ạruṕ baṛakate oṛaḱe boloyena. Khane ńelkeda oṛaḱre okoege bạnuḱkoa ar pusi aḱ mãyãm joroḱ kante onka choṅ choṅ saḍe kana. Ado usạrae onḍonėna ar aćren gatekoe metako kana delabon sendraea ente uni do oṛaḱre bạnuia dạṛkedae. Ado jotoko harephare sendrako mohnḍayena. Sendra sendrateko laṅgayen khan tale umulreko jirạuena. Khange onko modre mit́ hoṛ do cetan seće koyoḱ rakaṕket́re uni kuṛi ńel ńamkedea. Ente uni kuṛi do jiwi botorte dare cetane deć akan tahẽkana. Cedaḱje samaṅre maraṅ okoć doreão tahẽkana, ona bae parom daṛeat́te darere asraye hataokeda.

Uni kuṛiko ńam ruạṛkedete Tạruṕ do ạḍi ãṭko kusiena. Ente nit do lać perećko jom ńama. Ado onate uni pheḍe reaḱ bogeteko kurumuṭukeda. Mit́ hoṛ cetanre ar mit́ hoṛe dejoḱkana enrehõ bako deć daṛeaḱ kana. Ado uni kuṛi do raraḱe ehoṕena are menkeda jemon cẽṛẽ leka phạ̃ḱṛạ̃ḱ hoyoḱtińma, enḍekhan noa doreãń uḍạu paroma. Ar sạrige uni kuṛiaḱ do barea phạ̃ḱṛạ̃ḱ hoyentaea are uḍạu calaoena. Nonkate onko Tạruṕ aḱ ti khone rukhiạyena.

Ado uḍạu calaokate ako oṛaḱ sạṛimre duṛuṕena ar bogete raḱeda. Ado ać gogo doe meneda cekate nui cẽṛẽ do unạḱe raḱeda. E cẽṛẽ, ma pheḍoḱme noḱoe thoṛa jomme. Adoe pheḍen khane ńelkedea aćren hoponera kangeae. Ado raḱate ać gogoe metadea cedaḱ go Tạruṕ sãotem kolkedeńa? Onko do iń jomeń reaḱko kurumuṭuleda. Menkhan jãhã lekate onḍe khoniń bańcao ruạṛena. Ado uni buḍhi do hoponerae ńamkedete bogete kusiyena.

Mit́ṭen Toyo do sikạriaḱ phãndre paṛaoena. Jãhã lekate sikạriaḱ phãnd khone bańcaoen rehõ aćaḱ jeleń canḍbol do kuṭrạyentaea. Canḍbol begor uni Toyo judạge ńeloḱkan tahẽkana. Eṭaḱ janwarko uni ńelte bogeteko landayet́ tahẽkana, ar Toyo do aćaḱ mẽt́ãhã hoṛko samaṅre uduḱe lajaḱkan tahẽkana.

Ado mit́din uni calak Toyo doe hudiskeda. Joto Toyo canḍbol ko get́ giḍi lekhan enḍekhan ać eskar judạ bae ńeloḱa ar eṭaḱ janwarko hõ bako landaea. Enḍekhan joto mit́geko ńeloḱa. Onate uni do mit́din bir ren joto Toyo hoho jarwaket́koa. Ado joto hoṛ samaṅre teṅgoyente menkeda, gateko nunạḱ din khon abo do ạuṛiaḱte hamal ar jeleń canḍbol bon asen baṛaeda. Noare jãhãn lab bạnuḱa, bickom eken bạṛti muskil. Calaḱ hor re jạnum jhạuạkore bon jhạliḱ kana, dhuṛire, hasare nonkanaḱ emanteaḱ muskilaḱ re jaoge bon paṛaoḱ kana, ar sikạri hõ algateko saṕ daṛeabon kana. Ado ạḍigan hudis ganḍon katet́ iń aṭkarkeda, canḍbol baṅ tahẽnge boega. Onate ińtege ińaḱ canḍbol doń get́ kuṭrạ keda. Ape hõ nonkage kạmi pe.

Khange joto Toyo hante nateko koyoḱ joṅkana arko hudiseda, sạrige noa kạmi lekan ṭhikoḱa se banȧ? Adom ko do canḍbol get́ reaḱ ko hudiset́ tahẽkana. Inạ okterege onko mod khon mit́ṭen bud ạkil ar umerte laha akan haṛam Toyo beret́ena, are menkeda, am do ale sanamko bhulem sikhạuet́lea. Sạriaḱ do noa kana, sikạriaḱ phañd re paṛaokate amaḱ canḍbolem at́ keda. Nit am lajaote ale joto Toyo canḍbolem get́ kuṭrạ ocoet́lea. Uni  haṛam Toyo aḱ katha ańjomte joto Toyo ko bujhạukeda. Ado arhõ khaḱ khaḱ ko landagot́keda ar akoaḱ canḍbol bako get́ kuṭrạleda. Nonkate uni canḍbol bạnuḱ Toyo do lajaote onḍe khone calao pharakena.

Molhan atore̠ mit́ ho̠ṛ ạḍi gạkhuṛ mạndạṛiại tahẽ̠kana. Ạdepase̠ atore̠ uni lekan mạndạṛiạ do̠ ar o̠ko̠e hõ̠ bako tahẽ̠kana. Jãhãregeko baplaḱ uni doko o̠ho̠aea. Bapla ar po̠ro̠bkore̠ unigeko ho̠ho̠aekan tahẽ̠kana. ̄Uni tumdaḱe̠ ceṭaḱ lekhange naco̠niạko bujhạua je o̠ko̠e rueda. Unạḱge jo̠mkaoe̠ ru daṛeaḱkan tahẽ̠kana, do̠n kucuṛko e̠ne̠joḱkan tahẽ̠kana.

Ato ṭolaren koṛako jaogeye metakokan tahẽ̠kana je “tumdaḱ ru cet́kaḱpe̠ ya! Jãhãtispe̠ ru baṛaea! Noa do̠ aboaḱ ạricạli kantabona! Uniaḱ katha do̠ o̠ko̠ege bako luturataekan tahẽ̠kana.

Haṛame̠n khan uni do̠ ruạ haso te̠ye̠ jaṛaoena are̠ boṅga talaena.

Netar uni be̠go̠rte̠ jãhãn acar ạricạlire̠ jomkaoge baṅ bujhạuḱ kana. Cedaḱ je o̠ko̠ege uni lekan ruru ho̠ṛ bạnuḱkoa.

Nito̠ḱ jo̠to̠ ho̠ṛgeko aṭkara arko me̠na je uni bańcao tahẽ̠kanre̠ abo hõ̠ cet́ do̠ho̠ do̠ jạruṛ tahẽ̠kan tabona. Cedaḱ co̠ babon cet́le̠t́.

Tumạl: Ańjo̠m jo̠ṅ jạṛ

Mit́ṭen casa hoṛe tahẽkana. Uni hoṛaḱ do jonḍra khet tahẽkana. Ado mit́ dol gạ̃ṛĩ ona jonḍra khet khon din hiloḱ jonḍra ko kombṛoet́ tahẽkana. Onate uni khet mạlik do gạ̃ṛĩ nél ńamleko khange ṭheṅgawante lagaet́ko tahẽkana. Nonkate gạ̃ṛĩ do akoaḱ khusi sana leka jonḍra bako jom ńamet́ tahẽkana.

Mit́din ackage khet mạlik doe goćena. Tinre ona khobor gạ̃ṛĩ ko ańjomkeda, unre onko do rạskạte enejoḱko ehoṕena.

Menkhan casa bạnuite inạ tayom bochor do jonḍra baṅ hoelena. Khange onko gạ̃ṛĩ ko bujhạukeda, okoe do akoren bạiri menteko hudisede tahẽn, uni casa hoṛge akoaḱ jomaḱe upjạnet́ tahẽkana. Ar nit uni bạnuite joto gạ̃ṛĩ reṅgećteko jalat́ japat́ baṛaekana.

Sikhnạt: Teheń okoe hoṛ am bam moneae kan ar dam bam emaekan, tinre uni amaḱ jion khone adoḱa unre khạṭige uniaḱ jaruṛem bujhạu ńama.

Bạrsạ jạput́ dinre mit́ṭen cẽṛẽ aćren gidrạko dohoko lạgit́ asraeye sendra kana. Uni do nonkan dare khojoḱ kana okare uni ar aćren gidrạko nirạiko tahẽn. Sendra sendrate gaḍa aṛere barea lạṭu dare ńamkeda.

Khange uni cẽṛẽ do mit́ṭen dare metadea, amaḱ ḍạrre oṛaḱ benaoiń menjoṅ kana, ado cet́em meneda? Noa laha cele cẽṛẽ hõ ḍạrre oṛaḱ bae benao oco akat́koa. Menkhan teheń ona dare uni cẽṛẽ lại bhoṅadea, cedaḱ ińaḱ ḍạrre oṛaḱiń benao ocomea?

Inạkate cẽṛẽ do eṭaḱ dare ṭhene senena ar uni hõe kulikedea, amaḱ ḍạrre oṛaḱiń benao daṛeaḱa se baṅ! Menkhan eṭaḱ dare doe rebenena. Khange cẽṛẽ do dare ḍạrre oṛaḱe benaokeda.

Note bạrsạ din hõ ehoṕena. Bạrsạ reaḱ pạhil daḱte goṭae gaḍa athantar daḱte perećena. Ackage eṭaḱ dare do gaḍare rạput́ bhindạṛena.

Ona ńelte cẽṛẽ doe menkeda, noa do amaḱ bạḍại reaḱ karon kana. Ente am do oṛaḱ bam benao ocoạdińạ. Ńelkedam ona reaḱ kuṛại dom ńamkeda.  

Khange ona katha ańjomte uni dare doe roṛ ruạṛkeda, ińaḱ gonḍa rehet́ do baṅ keṭeća ạḍi algagea. Ar pusṭạuteń baḍaea bạrsạ hećlen khangiń bhinḍạṛ rạpudoḱa. Onate ińaḱ ḍạrre oṛaḱ bạń benao ocoat́mea. Ente am ar amren gidrạ muskilrepe paṛaoḱ noa do bạń khoj kana. Ona lạgit́geń baronket́mea. Am são onkan beohar khạtir ikạń khoj kana. Menkhan ape bańcaope lạgit́ge nonkań beohar keda.

Ona katha ańjomte cẽṛẽ doe thir hapeyena, ar lajaote aćaḱ oṛaḱe boloyena.

Sikhạuna: Begor bujte okoeaḱ kạmi hõ eṛe se ạuṛiaḱ baṅ moneaḱge bogea. Ente joto kạmirege jãhãn karon menaḱa, ar ona reaḱ jo do okte nạpitre bujhạu ńamoḱa.

Mit́ disomre mit́ṭaṅ sạri katha roṛ Raje tahẽkana. Uni Raj do tishõ eṛe katha bae roṛet́ tahẽkana. Mit́ṭen bạidạ mit́ṭen ạḍi maraṅ bińe lagaede tahẽkana. Uni biń do Raj ṭhen hećkate metadea bańcaoińme. Raj do usạrate cokoe lạgit́ jaega bae námlet́e aćaḱ laćre boloḱe metadea, ar coṭ seće cahaṕkeda ar biń doe boloyena. Bạidạ hećkate Raje kulikedea Raj bińem ńel akadea? Raj do ti coṭ sećkate lać seće uduḱadea. Bạidạ do bae bujhạulet́te onḍe khone calaoena.

Ona tayom bińe metadea ma nitoḱ do onḍoṅme bạidạ doe calaoena. Biń doe roṛ ruạṛkeda nonḍe mońj mońj jomiń ńameda ariń onḍoṅa? Un khon Raj jãhãnaḱge jom biń do jotoe jomet́ tahẽkana. Raj doe rohoṛ cabaena ar pagla leka kalaṅ ḍulaṅe daṛana, daṛa daṛate mit́ disome calaoena. Ona disomre Raj ren hoponera aḱ bapla do hạtiaḱ kusite hoyoḱa mente ṭamak ru kateko ḍhulaikeda, arhõ ko menkeda hạti okoe koṛae kusiae ar baha malae horoḱaea uni koṛa sãotege Raj ren hoponera aḱ bapla hoyoḱa.

Ona disomren aema koṛa saj sapṛaokate hạti laha lahateko daṛa baṛae kana. Onḍege hạni Raj okoe pagla lekae ńeloḱ kan uni hõe tahẽkana. Pagla mente jotokoge ko lagakedea ar uni do kulhi mucạt́ calaokate duṛuṕ akana, hạti do uni ṭhen senkate unige baha malae horoḱadea.

Ona disomren Raj hõe mon dukengea. Adoe cekaea! Katha menaḱa hoponerae baplakaea hạti kusite. Uni Raj do bae baḍaea uni pagla lekanić doe okoe kana! Enhõ uni são aćren hoponerae bapla kedea ar ạṛiste kulhi mucạt́re tale ḍhạṅguạte oṛaḱ at́kinạ. Jãwãe goṅket́ do mit́din ńuhum jokheć pukhri aṛe ṭạnḍiteye senakana, uni Raj ńelte roṭe roṭe ko menjoṅ kana are biń kanae baro mas reaṅ jojo rit́kate ńu lekhangem gojoḱa ar uniaḱ tinạḱ bahaduritae. Uni pagla Raj doe ańjom ṭhik keda. Oṛaḱre hećkate ać bạhui metadea baro mas reaṅ jojo ạgukate rit́ạńmese. Ado bạhut́tet́ do ạgukate rit́adea ar jãwãetet́ doe ńukeda. Biń doe goćena ar ṭạnḍite sãoteye onḍokena. Ar uni do bại bạite thoṛa din tayome mońjena. Ar hońhartet́ ṭhen calaokate jotoe lạikeda ać doe okoe kana ar cekate onka akana. Hońhartet́ do ańjom kateće rạskạena, ar aema man dan emkate bidạ kạt́kina. Ar uni Raj do aćren Rạni soṅgekate aćaḱ disomte senena, ar rạskạte jion khemaokin ehoṕena.

Sedae mit́ṭen sim sạnḍi ar kulại ạḍi gatekin tahẽkana. Ado unkin do birrekin gateḱ kan tahẽkana. Sim sạnḍi do dare coṭre jạpida, ar kulại do dare latarre jạpida. Ado mit́din oka seć khon co mit́ṭen toyo hećena. Uni do kulại jom sanayedikan tahẽkana. Inạḱtege sim sạnḍi doe ebhenena ar Toyo hijuk kane ńel ńamkedea. Aćren gate kulại jome lạgit́.

Khange sim sạnḍi doe uihạr baṛa got́ket́a cekate aćren gate bańcaoea mente. Khange sim sạnḍi doe kukṛucut́ got́keda. Ar ona kukṛucut́ ańjomte hạ̃ṛũ hõe beret́ena,Tạruṕ hõe beret́ena. Ar birren sanam cẽṛẽ ciprut́ko ebhenena. Khange toyo do botorte dạṛkeda ar ạḍi sạṅgińe calaoena. Nonkate sim sạnḍi do aćren gate bańcao kedea.

Mit́din barea gate, Kạhũ ar Gunḍri mit́ sãotekin uḍau baṛaekan tahẽkana. Uḍạuḱ jokhećkin ńelkeda, mit́ṭen hoṛ dahe ṭukuć dipil katet́e calaḱ kana. “Dahe do ạḍi heṛem ńeloḱ kana. Delalaṅ jomlege.” Nonka menkate Kạhũ do uḍạu calaoente dahe ṭukućre duṛuṕena ar dahe jojome lagaoena.

Kạhũ do dahe jojomkan jokheć hante nate hạrić pạsiroḱ kan tahẽkana.  Uni hoṛ do cedaḱ nonka hoyoḱ kana ńel lạgit́ dahe ṭukuće pheḍkeda. Kạhũ do nit muskil dosare paṛaoḱa bujhạuket́te ạḍi sạṅgińe uḍạu calaoena. Menkhan Gunḍri cẽṛẽ do usạra bae uḍạu daṛeaḱa, onate tayomre paṛaoena.

Uni hoṛ do cetan seće koyoḱket́re Gunḍri cẽṛẽ ńel ńamkedea. Adoe hudiskeda, Uni Gunḍri cẽṛẽ un khon ṭukuć reaḱ dahe jomet́ tahẽkana.

Onate uni do Gunḍri cẽṛẽ seć iṭạ capat́e dhurạuena. Gunḍri cẽṛẽ aḱ noa dosa ńelte Kạhũ do sạṅgiń khon ạḍi ãṭe landa keda.

Sikhnạt: Bạṛić gate ko sãote tahẽn khon ekla tahẽn do bhagea.

Nimghuṭu atore setaḱ kho̠n koṛa kodo̠ sokol takoaḱ racare manḍwae lạgit́ ḍạrko ạguko lagaoena. Sokol hõ onko so̠ṅge ạḍi rạskạte kạmie lagaoena. Gapa do̠ Sokol ać dadawaḱ bapla. Ạyuṕ bela Nimghuṭu atoren kuṛi koṛa kodo̠ tumdaḱ ṭamak ru ar manḍwa latarre eneć sereńko lagaoena. Ạḍi sạṅgiń kho̠n Tumdaḱ Ṭamak sạde gubuḍ gubuḍ ańjo̠mo̠ḱ kana.

Do̠sar hiloḱ bạriạt kodo̠ bạhu ạguko calaoena. Ạyuṕ jo̠kheć nãwã bạhu so̠ṅge kateko ruạṛ hećena. Ona rạskạte Sokol do̠ naconiạko talare sogoeye lagaoena.