Daḱ Do Dhone Ạtu Idiet́ Kana (Paṭh-5)

Rạskạ do puthi paṛhaokateye landayet́ tahẽkana. Sumie kulikedea, “ Am cedaḱem landayet́ kana? Rạskạe menkeda, “ Noa puthire olakana: Daḱ do dhone ạtu idiet́ kana.” Sumi hõe landakeda. Uni doe kulikedea, “ Oka lekate daḱ do dhone ạtu idiet́ kana?” Rạskạe menkeda, “ Daḱ do ińaḱ has aye ạtu idiet́ kana. Phosol do hasare hoyoḱ kana. Hasa do iń dhone emạń kana.” Noa lekare daḱ do dhone ạtu idiet́ kana.” Sumie kulikedea, “ Alaṅ do hasa ạtuḱ khon cekatelaṅ rukhiạya?” Rạskạ do ar hõ puthiye paṛhaokeda. Puthire olakan tahẽkana: Tinre ot do darsãṛge tahẽna unre hasa do ạtuḱ kana. Darsãṛ otre do nala benaoḱ kana.

Sumie menkeda, “ Alaṅaḱ mit́ṭen khetre nala benao akana.” Rạskạe menkeda, “ Judi daḱ do alaṅaḱ dhone ạtu idikeda. Iń doń paṛhaoa nala cekateń meṭao daṛekea.” Rạskạ do ar hõ puthiye paṛhaokeda. Puthire olakan tahẽkana: Judi ot darsãṛge khan ona do pinḍhạte aṛeme. Pinḍhạ reaḱ goṛote darsãṛ do meṭaoḱa. Pinḍhạ reaḱ goṛote hasa baṅ ạtuḱa. Darsãṛ ot do teraṅte si me. Enḍekhan daḱ do hasa bae ạtu daṛeaḱa. Enḍekhan daḱ do nala bae benao daṛeaḱa. Itạ do pantere rohoeme. Itạ do teraṅ teraṅ pantere rohoeme. Rạskạe menkeda, “ Abo do adomaḱ itạ pantere bo rohoeda. Menkhan abo do joto itạ pantere rohoe jạruṛkan tabona. Iń do niạ bochor darsãṛ otre son iń rohoea. Pinḍhạ reaḱ goṛote darsãṛ meṭaoḱa. Iń do darsãṛ ot teraṅ teraṅ iń siya. Enḍekhan iń do son itạ pantereń rohoea. Enḍekhan daḱ ińaḱ hasa bae ạtu daṛeaḱa.” Sumi do landawateye menkeda, “ Enḍekhan daḱ do alaṅaḱ dhon bae ạtu daṛeaḱa.” Rạskạ do darsãṛ ot pinḍhạteye aṛekeda. Rạskạ do khet teraṅ teraṅte sikeda.

Rạskạ do sone rohoekeda. Rạskạ do son teraṅ teraṅe rohoekeda. Enḍekhan daḱ do hasa bae ạtu daṛeada. Ar daḱte hasa do cet́ge baṅ ạtulena. Ar daḱte nala baṅ benaolena. Jạṛi daḱ do khetre tahẽyena. Aḍepaseren hoṛko do Rạskạwaḱ khet ko ńelkeda. Rạskạe menkeda, “ Jạṛi daḱte aboaḱ dhon do ạtuḱkan tahẽkana. Iń do puthiń paṛhaokeda. Puthire olakan tahẽkana: Darsãṛ ot do pinḍhạte goṛo emaḱme. Pinḍhạ reaḱ goṛo te darsãṛ meṭaoḱa. Khet do teraṅ teraṅ si me. Son do pantere rohoeme. Ona iạte iń do khet pinḍhạ reaḱ goṛoń emat́a. Ona iạte iń do khet teraṅ machań sikeda, Ona iạte iń do son pantereń rohoekeda. Nitoḱ daḱ do ińaḱ hasa bae ạtu daṛeaḱa. Aḍepaserenko landakeda. Aḍepaseren menkeda, “ Rạskạ do husiạr hoṛ kanae. Uni doe paṛhao daṛeaḱ kana. Uni do dhone arjaoet́ kana. Abobo kusigea uni do aboren sarpońc kanae.” Rạskạ doe landakeda.

Uni doe menkeda, “ Am do amaḱ darsãṛ khet pinḍhạte goṛo emaḱme. Pinḍhạ reaḱ goṛote darsãṛ meṭaoḱa. Khet do teraṅte si me. Itạ pantere rohoeme. Enḍekhan amaḱ dhon bae ạtu daṛeaḱa.”

Rạskạ Do Sahan Lạgit́ Dareye Rohoeda (Ponaḱ Porbo)

Rạskạ do khobor kagoje paṛhaoḱ kan tahẽkana. Sumi doe kulikedea, “ Am do khobor kaojre cet́em paṛhaoeda?” Rạskạ doe menkeda, “ Khobor kagojre olakana: Sahan lạgit́ dare rohoe jạruṛa. Judi am ṭhen aema sahan menaḱ khan. Tobe khan am do gurić reaḱ khot otrem giḍi daṛeaḱa. Gurić reaḱ khot do phosol lạgit́ ạḍi besa. Sahan lạgit́ dare rohoe me.” Rạskạe menkeda, “ Alaṅ ṭhen ot menaḱa. Ona khet do baṅ gobrawa.” Khobor kagojre olakana: Kom gobrao otre sahan lạgit́ dare rohoeme. Abo do sahan lạgit́ darebon rohoe daṛeaḱa. Khobor kagojre noa hõ olakana: Gabla do sahan lạgit́ ạḍi bhage dare kana. Gabla do ạḍi usạra dareḱa. Ona iạte sahan lạgit́ gabla rohoeme.

Khobor kagojre noa hõ olakana: Nim hõ sahan lagit́ ạḍi bhage dare kana. Nim dare hõ ạḍi usạra dareḱa. Nim dare do umul lạgit́ hõ besgea. Ni mar gabla dare rohoeme. Ul dare rohoeme. Ul dare te hõ ạḍi bes umul hoyoḱ kana. Ona reaḱ jo hõ ạḍi besa. Rạskạ do khobor kagijreye paṛhaokeda. Khobor kagojre olakan tahẽkana: Gel din tayom dare rohoe reaḱ mit́ din hoyoḱa. Nim, gabla ar ul dare rohoeme. Enḍekhan Rạskạ do aḍepaseren hoṛko lạgit́ khobor kagoje paṛhaokeda. Khobor kagojre olakan tahẽkana: Gabla nim sahan lạgit́ ạḍi besa. Nim ar ul umul lạgit́ ạḍi besa. Dare rohoe lạgit́ mit́ din hoyoḱa. Gel din tayom dare rohoe din hoyoḱa.

Rạskạ do ać aḍepaseren hoṛe metat́koa, “ Abo joto hoṛ dare rohoe dinre dare bon rohoea.” Khobor kagoje menet́ kana, Sahan lạgit́ dare hoyoḱ jạruṛ kana. Enḍekhan am do khetre gurić reaḱ khotem giḍi daṛeaḱa. Gurić reaḱ khot khetre lạgit́ ạḍi besa. Kom gobrao otre abo do dare bon rohoea. Dare khon abo do sahan bo ńama. Khobor kagoj noa hõe menet́ kana, Gabla dare khon ạḍi mońj sahan hoyoḱ kana. Nim dare khon ạḍi mońj sahan hoyoḱ kana. Nim umul do ạḍi juḍạsiya. Ul umul do ạḍi juḍạsiya. Ul jo hõ ạḍi bhagea. Aḍepaseren renko menkeda, “ Abo do dare rohoe dinre nim darebon rohoea. Abo do dare rohoe dinre ul darebon rohoea. Abo do dare rohoe dinre gabla darebon rohoea.”

Dare rohoe dinre Rạskạ do sahan lạgit́ dareye rohoekeda. Uni do sahan lạgit́ kom gobrao otre dareye rohoekeda. Uni do bar moka osar ar bar moka khạndri ghaḍlaḱe lakeda. Uni do gabla, nim ar ul dareye rohoekeda. Rạskạ ar uni aḍepaseren hoṛko do ul dare ko rohoekeda. Onko do hor aṛere ul dareko rohoekeda. Rạskạ ar uni aḍepaseren hoṛko do nim dareko rohoekeda. Onko do hor aṛere nim dareko rohoekeda. Onko do nim ar ul dare atoreko rohoekeda. Gel bochorte dare do haraena. Gel bochor tayom hor aṛere umul hõ juḍạsi hoena. Gel bochor tayom atore umul do juḍạsi hoena. Gel bochor tayom atore sahan hoena. Gel bochor tayom ato do ạḍi mońj hoena. Rạskạ doe menkeda, “ Nitoḱ abo do gurić reaḱ khotbon benao daṛeaḱa. Gurić reaḱ khot ot lạgit́ bhagea.” Aḍepaseren hoṛko menkeda, “ Rạskạ do ạḍi husiạr hoṛ kanae. Uni doe paṛhao daṛeaḱa.

Gel bochor tayom uni do ato ạḍi mońje benaokeda. Gel bochor tayom atore umul do juḍạsi hoena. Gel bochor tayom atore sahan dare hoena. Kạṭić dare harakate dare hoena.” Onko doko menkeda, “ Abo do Rạskạ sarpońc ko benaokedea.” Joto hoṛ ko menkeda, “ Rạskạ do husiạr sarpońc kanae.” Uni doe paṛhao daṛeaḱa. Uni do aboaḱ ato ạḍi mońje benaokeda.

Rạskạ Do Jo Dareye Rohoyet́ Kana (Tesar Porbo)

Rạskạ do aema dare rohoe iń menet́ kana. Iń do aema jo dareko rohoe iń menet́ kana. Enḍekhan alaṅ ṭhen aema joko hoyoḱa. Alaṅ do daḱ oka khonlaṅ ńama?” Rạskạ aćaḱ puthi arhõe paṛhaokeda. Puthire olakan tahẽkana: Daḱ do pe lekate ńam daṛeaḱa. Mit́ lekate daḱ do kũi khon ńam daṛeaḱa. Dosar lekate daḱ do nohor khon ńam daṛeaḱa. Tesar lekate daḱ do bijli reaḱ kũi khon ńam daṛeaḱa.

Rạskạ do Sumie metadea, “ Abo atore do kũi khonge daḱ bon ńameda. Abo do nohor khon daḱ baṅbo hatao daṛeaḱa. Abo atore do nohor bạnuḱa. Abo atore do bijli reaḱ kũi bạnuḱa. Abo do cet́bon cekaea?” Rạskạ do ar hõ puthiye paṛhaokeda.

Puthire olakan tahẽkana: Judi oka atore nohor bạnuḱ khan, enḍekhan kũi khon daḱ pe ńam daṛeaḱa. Mit́ lekan kũi bijli reaḱ kũi menaḱa. Noa kũi reaḱ daḱ do bijli te oḍokoḱ kana. Sarkar hotete bijli reaḱ kũi benao ocoepe. Ape atore sarkar hotete bijli reaḱ kũi benao ocoepe. Rạskạe menkeda, “ Abo ato sorre nohor bạnuḱa. Abo ato sarkar hotete bijli reaḱ kũi bon benao ocoeya.” Ona iạte Rạskạ do sarkari apis tey calaoena. Rạskạ do ạpis bạbuye metadea, “ Ale do bijli reaḱ kũi jạruṛale kana.” Ạpis bạbu doe menkeda, “ Noa kũi lạgit́ bijli jạruṛa. Ape ato sorre bijli bạnuḱa. Ḍher bochor tayom bijli ko ạguya. Bijli ạguire ḍher bochor lagaoḱa.” Rạskạ do sumie metadea, “ Ạpis bạbuye menet́ kana. Noa kũi lạgit́ bijli jạruṛa. Ape ato pheḍre do bijli bạnuḱa. Ḍher bochor tayom bijli ko ạguya.

Ona iạte ạḍi bochor dhạbić abo do bijli reaḱ kũi baṅbo ńam daṛeaḱa. Abo do kũi nitoḱ jạruṛabon kana. “ Iń do dare rohoe iń menet́ kana. Iń do cet́ iń cekaea?” Rạskạ do ar hõ puthiye paṛhaokeda. Puthire olakan tahẽkana: Judi bijli bạnuḱ khan, enḍekhan kũi laeme. Judi nohor bạnuḱ khan, kũi laeme. Rạskạ doe menkeda, “ Iń do kũi iń laya. Kũi la ocoe lạgit́ iń ṭhen paesa menaḱa.” Rạskạ do kũie lakeda. Enḍekhan baganre jo dare ko lạgit́ aema daḱ daḱ hoena. Uni do sarkari ạpis ṭhen khon kạṭić dareye ạgukeda. Uni do pạpita reaḱ mõṛe gel kạṭić dareye ạgukeda. Uni do ul reaḱ mõṛe gel kạṭić dareye ạgukeda. Uni do amsopori reaḱ mõṛe gel kạṭić dareye ạgukeda. Uni do bar moka osar ar bar moka khạndri ghaḍlaḱe lakeda.

Uni do ghaḍlaḱre sea akan khote uṕkeda. Uni do pạpita reaḱ mõṛe gel kạṭić dareye rohoekeda. Uni do ul reaḱ mõṛe gel kạṭić dareye rohoekeda. Uni do mõṛe gel amsopori dareye rohoekeda. Rạskạwaḱ bagan do ạḍi mońj hoena. Rạskạwaḱ baganre ạḍi mońj jo dare ko hoena. Rạskạ aḍepaseren hoṛko menkeda, “ Rạskạwaḱ bagan do ạḍi mońja. Rạskạwaḱ baganre aema amsopori, ul ar pạpita dare ko menaḱa. Rạskạ do ạḍi husiạr hoṛ kanae. Rạskạ ṭhen do aema paesa menaḱa. Rạskạ ṭhen do mońj kũi menaḱa. Rạskạ doe paṛhao daṛeaḱa.

Rạskạ do husiạr hoṛ kanae.” Aḍepaseren hoṛko do Rạskạ ko metadea, Rạskạ do ale bagan lagao cet́ aleme. Ale do dare rohoe cet́ aleme. Ale do, ul ar pạpita dare ko rohoe cet́ aleme.”

Rạskạ doe menkeda, “ Iń do ape bagan lagao iń cet́apea. Iń do ape paṛhaoḱ iń cet́apea. Paṛhao lekhan ape hõ pe husiạroḱa.

Rạskạ Do Mońj Bagane Lagaokeda ( Dosar Porbo)

Daḱ kedae, Ạḍi ãṭe daḱ keda. Tinrey daḱ keda unre Rạskạ do itạ ko baganrey erkeda. Daḱ iạte uniaḱ cas do haraentaea. Rạskạ do bagan babotre puthiye paṛhaokeda. Puthire olakan tahẽkana:

Lembo ar papita bhage jo kana. Am do lembo ar papita reaḱ gạchi sarkari bagan khonem hatao daṛeaḱa. Sumie menkeda, “ Alaṅ do lembo ar papita jạriṛalaṅ kana. Alaṅ do daḱlere lembo ar papitalaṅ rohoea. Alaṅ do apnaraḱ baganre lembo ar papitalaṅ rohoea. Am do sarkari godam khon lembo ar papita ạguime.” Rạskạ do sarkari baganteye calaoena. Rạskạ do baganren bạbuye metadea, “ Iń do mit́ṭen lembo ar pea papita reaḱ gachi jạruṛạń kana. Iń do daḱ lekhan lembo ar papita rohoe iń menet́ kana.”

Rạskạ do sarkari bagan khon lembo ar papita reaḱ gạchie kiriń ạgukeda. Sumie menkeda, “ Iń do oṛaḱ pheḍre lembo reaḱ dareń rohoea.” Rạskạ do ar hõ puthiye paṛhaokeda. Puthire ol akan tahẽkana:

Lembo reaḱ dare oṛaḱ pheḍre rohoeme. Oṛaḱ reaḱ mạilạ daḱ lembo darere dulme. Lembo dare lạgit́ do mạilạ daḱ ạḍi bhagea. Bar moka osar ar bar moka khạndri ghaḍlaḱ laeme. Joto dare lạgit́ bar moka khạndri ar bar moka osar ghaḍlaḱ besa. Jote dare lạgit́ bar moka khạndri ar bar moka osar ghaḍlaḱ benaome. Noako ghaḍlaḱre sea akan khot ar hasa ubme. Ghaḍlaḱre dare rohoeme. Ona iạte Rạskạ do bar moka osar ar bar moka khạndri ghaḍlaḱe lakeda. Uni do oṛaḱ sorre ghaḍlaḱe benaokeda. Uni do ghaḍlaḱre sea akan khot ar hasae uṕkeda. Uni do ghaḍlaḱre lembo reaḱ dareye rohoekeda. Uni do lembo darere mạilạ daḱe dulkeda. Uniye menkeda, “ Oṛaḱ reaḱ’ mạilạ daḱte noa lembo dare haraḱa.”

Uni do pea papita dare hõe rohoekeda. Uni do pea ghaḍlaḱe lakeda. Noako ghaḍlaḱ do bar moka osar ar bar moka khạndri tahẽkana. Uni do ghaḍlaḱre sea akan khot ar hasae uṕkeda. Ona tayom uni do dareye rohoekeda. Uni do darere mạilạ daḱe dulkeda. Uni do papita darere oṛaḱ reaḱ mạilạ daḱe dulada. Ona do haraena. Daḱte papita dare do ạḍi haraena. Rạskạwaḱ baganre mońj lembo ar papita tahẽkana. Rạskạ ar Sumi do ạḍi ḍher papita ar ḍher lembokin jomkeda. Aḍepaseren hoṛko Rạskạwaḱ mońj bagan ko ńelkeda. Aḍepaseren hoṛko lembo ar papita reaḱ dare ko ńelkeda. Aḍepaseren hoṛko menkeda,

Rạskạwaḱ bagan do ạḍi mońja.

Uniaḱ lembo dare do ạḍi mońja.

Uniaḱ papita dare do ạḍi mońja.

Uniaḱ bagan do mońjgea.

Rạskạ doe husiạr gea.

Uni doe paṛhao daṛeaḱ kana.

Paṛhaote uni do mońj kathae cet́keda. Abo hõ bon paṛhaoḱa. Abo hõ husiạr hoṛbon hoyoḱa.

Source: Husiạr Rạskạ, tesar puthi

Rạskạ Do Bagane Lagaoeda ( Pạhil porbo)

Rạskạ do ato re husiạr hoṛe tahẽkana. Uni do puthikoe paṛhaoet́ tahẽkana. Uni do aḍepase ren hoṛko aema kathae cet́ at́koa. Unie ńel keda atore ḍher utu jinisko bạnuḱa. Rạskạe menkeda, “ Nitok ale ṭhen kom gại menaḱkoa. Nitoḱ ale do aleren gại le gupiet́ko kana. Nitoḱ aḍepase ren hoṛko ṭhen hõ kom gại menaḱkoa. Nitoḱ onko do gạiko gupiet́ko kana. Nitoḱ ale ren gạiko do cas bako joma. Nitoḱ ale ren gạiko do utu jinis bako joma”. Sumie menkeda, “ Puthire ol akana aema utu jinis baṅ bon lagaoa. Enḍekhan abo do aema utu jinis baṅ bon kiriń daṛeaḱ kana. Abo do apnaraḱ bagan bon lagaoa. Abo do apnaraḱ bagan bon lagaoa. Abo do utu jinis bon lagaoa”.

Rạskạ do bagan babote paṛhao keda. Puthire olakan tahẽkana: Apnaraḱ bagan lagaome. Bagan beṛhae mat́me eṭedme. Eṭet́ akat́ bagan do janwar bako jom daṛeaḱa. Eṭet́ akat́ bagwan aḍepase hoṛren janwar bako jom daṛeaḱa. Ona iạte Rạskạ do bagan beṛhae teye eṭet́ keda. Ona iạte Rạskạ do bagan beṛhae te mat́teye eṭet́ keda. Rạskạ do arhõ puthiye paṛhao keda. Puthire olakan tahẽkana:

Bagwanre sea akan khot lagaome.

Enḍekhan hạsa do bes khotoḱa.

Utu jinisko lạgit́ do khotaḱ ot jạruṛoḱa. Sarkari godam khon bhage itạ kirińme. Palon aṛaḱ do ạḍi bhage aṛaḱ kana. Mithi do ạḍi bhage aṛaḱ kana. Beṅgaṛ do ạḍi bhage utu jinis kana. Hotot́ hõ ạḍi bhage utu jinis kana. Peaj do ạḍi bhageaḱ kana. Kuṛcạ beṅgaṛ ạḍi bhagea. Rạskạe menkeda,

“ Iń do palon aṛaḱ reaḱ itạń kirińa.

Iń do dhạniạ reaḱ itạń kirińa.

Iń do mithi reaḱ itạń kirińa.

Iń do beṅgaṛ itạń kirińa.

Iń do hotot́ itạń kirińa.

Iń do peaj itạń kirińa.

Iń do kuṛcạ beṅgaṛ itạń kirińa.”

Sumie menkeda, “ Alaṅ do palon, dhạniạ ar mithilaṅ rohoya. Alaṅ do kuṛcạ beṅgaṛ hõ laṅ rohoya. Alaṅ do beṅgaṛ, hotot́ ar peajlaṅ rohoya”. Puthire noa hõ olakan tahẽkana:

Sarkari godam khon itạ kirińme. Itạ beste ńelme. Itạ do botolre dohoeme. Rạskạ do botole kiriń keda. Rạskạ do ạḍi mońj botole kiriń keda. Rạskạ do itạ botolreye dohokeda. Bar cando tayom Rạskạ do botolreye doho akat́ itại erkeda. Rạskạ do baganre beṅgaṛ, hotot́ ar peaj itại erkeda.Rạskạ dobaganre palon, dhạniạ ar mithi reaḱ itại erkeda. Rạska do baganre kuṛcạ beṅgaṛ itại erkeda. Rạskạ do baganre palon, dhạniạ mithi beṅgaṛ, hotot́, pea jar kuṛcạ beṅgaṛe erleda. Rạskạ ren aḍepase hoṛdoe menkeda, “ Am do bagan beṛhaete cedaḱ em eṭet́ keda”. Rạskạe menkeda, “ Iń do bhage utu jinis rohoe iń menet́ kana kana”. Aḍepase ren hoṛe menkeda,

“Rạskạ am do ạḍi husiạr hoṛ kanam. Am do ạḍi mońj baganem lagaokeda. Am do bagan beṛhaetem eṭet́ keda. Am do ạḍi mońj jinis cask edam. Iń hõ baganiń lagaoa. Iń hõ bagan beṛhaeteń eṭeda. Iń hõ mońj utu jinis iń rohoya.

Source: Husiạr Rạskạ, Tesar Puthi

Sạri Roṛoić Washiṅṭon Gidrạ

Jorj Washiṅṭon ńutuman turui serma umer ren mit́ṭen huḍiń gidrại tahẽkana. Apat do Jorj ạḍiye dulạṛede kan tahẽkana, ar uniaḱ janam dinre rṣskạḱ lạgit́ mit́ṭen hopon ṭeṅgoće emadea. Jorj do onae ńamket́te ạḍiye rạskạyena. Enhiloḱ do skulre hõ mit́ talao ṭeṅgoćrege mon tahẽkantaea. Skul chuṭi torage uni do riạḱ riạḱ oṛaḱteye ńir hećena, ar aćaḱ hopon ṭeṅgoć saṕ rakaṕ kateye menwana, “Ạḍi laser ar jhak jhak mõńj ṭeṅgoćtiń! Noate do jãhãnaḱgeń mone onage magoḱa. Acha, enhõ jãhãnaḱreń biḍạu legaletińge.” Khange uni huḍiń koṛa do bagwanteye dạṛ idiket́a. Onḍe uni do mit́ṭeć mõńj hopon dareye ńel ńamket́a. Ar ona ṭeṅgoćte ona reaḱ baklaḱ maḱ chaḍaoe nandhaoena. Uni do bae hudislet́a, nonkate do dareń bạṛićet́a. Ar aćaḱ sana leka jãhãtinạḱ coṭ hạbiće dạreat́, beṛhaeteaḱ baklaḱ doe maḱ chaḍaoket́a. Ar ạḍi ãṭe rạskạyena oṛaḱteye ruạṛ calaoena.

Mańjan baṛayenako. Mańjan baṛayen tayomge apattet́ do bagwante dãṛã baṛaye calaoena. Ar Jorj hõ uniye pańja idikedea. Jorj okaṭaḱ dare reaḱ baklaḱe maḱ chaḍaolet́ ona dareye ńel ńamket́ khan bebạṛiće edreyena. Ar ạḍi garteye men got́ket́a. “Okoe noa dare nonka akat́a? Noa ańjomkate Jorj do ạḍi ãṭe botorena ar thar tharaoḱe ehopena. Apat do Jorje kulikedea, “ Henda beṭa! Baḍaeam, okoe noa doe nonka akat́a?” Jorj doe menket́a. “ Ińge baba, ińaḱ nawa ṭeṅgoćteń nonka akat́a.”

Apat do Jorj cet́e cekakedea? Am do cet́em hudiset́a? Cet́ uni do aćren hopone sạjạikedea? Baṅ, uni do aćren hopone heokedea. Are coḱadea, are metadea, “ E beṭa iń do ạḍiń rạskạḱ kana, am do sạriaḱem roṛ akat́a. Mit́ṭen eṛe katha roṛlere tinạḱiń bhabnaḱoḱa, bebak dare goć cabalenre hõ unạḱ do ohoń bhabnalena.” Jorj doe sẽṛãyena, ar dilgạriạ ar ạḍi boge gunan hoṛe hoyena. Ar jotoko ṭhen pạtiạr hoṛe hoyena. Uni do aćaḱ disom metaḱme Amerikare lạṛhại phạdkoren Subedar ar mukhiại bahalena. Uni reaṅ roṛ akana, baṅma uni do lạṛhạire soroić ar eṭaḱko tuluć sulukoḱre pạhiliće tahẽkana.

Gune Baḍae Haṛam Reaḱ

Sedaere, kathae, mit́ atore bar haṛam buḍhikin tahẽkana: uni haṛam do̠ jaejugge kicriće teńa. Mit́ din do̠ uni buḍhi piṭhạwạkin lạgit́ge ho̠lo̠ṅket́a; ado̠ un jo̠khe̠n uni haṛam hõ kicriće teńoḱ kan tahẽkana. Buḍhi do̠e piṭhạyet́a oṛaḱ bhitrire, me̠nkhan tinạḱ dhaoe dulet́a piṭhạ, unạḱ dhaoge saḍe do̠ haṛame ańjo̠met́gea, uni haṛam hõ o̠tre mạkuteye daget́ kana. Khange uni buḍhi do̠e piṭhạ bhagaoena, ado̠e ganḍaket́a pe̠ ganḍa pe̠a piṭhạ hoeyena. Ado̠ buḍhi haṛame lạiae kana, metae kanae, piṭhạ do̠ pe̠ ganḍa ge hoelena, ado̠ turui go̠ṭe̠n kate hạṭiń do̠ hoyoḱtalaṅa. Khange uni haṛame me̠nket́a, Baṅ, piṭhạ do̠ ar hõ pea bạṛtigea.

Ado̠ uni buḍhiye me̠nket́a, Ińren haṛam do̠e jan guruḱa nãhãḱ. Ado̠ ạimại ạimạiko galmaraore uni buḍhiye lạiakoa, Ale he̠re̠l ma bhalae janoḱge! Sanamaḱge bin ńe̠lteye lại daṛeaḱ kana. Khange tahẽn tahẽnte ḍher din hoeyena. Khange mit́ṭen raj do̠ lạṛhạikogeye ńam baṛayet́koa. Khangeko lạiadea, Phalna jaegare lạṛhại lek ho̠ṛ menaea. Khange raj do̠ sipạhi ho̠ṛe̠ kolket́koa, metat́koae, Do calaḱpe, hạni ho̠ṛ saṕ ạguyepe. Khange uni sasaṕ sipạhiko calaoena, arko metae kana, Dela se̠, raj cet́ lạgit́ co̠ṅe kho̠j akat́mea. Khange uni ho̠ṛe̠ me̠nket́a, Baṅ, Raj do̠ cet́ lạgit́e kho̠jeń kana? Ạkil hõ bạnuḱtińa, lelha utạrgeạń. Khange onko sipạhiko me̠nket́a, Baṅ, am do̠ calaḱtege hoyoḱtama.

Khange uni ho̠ṛ rajaḱ humum lekate adoe calaoena; khange raje metae kana, Am do̠ khub gunan ho̠ṛ kanam? Khangeye me̠nket́a, Baṅ, raja, ạḍi do̠ bạń baḍea, thoṛa thuṛi do̠ń baḍaegea. Ado̠ raje me̠nket́a, E̠nḍe̠ khan am do̠ lạṛhại calaḱ hoyoḱtama; am mo̠to̠ do̠ baṅ, am sãote aema sipạhiko tahẽna, ar sado̠m cetanteń kolpea. Khange aema sipạhi ar uni hõ sado̠mreye de̠ćkedea; khange de̠ćkede khan uni do̠ ạḍi bo̠to̠rgeye ạikạuket́a; e̠nte uni do̠ tisre hõ sado̠mre do̠ bae de̠ćlena; e̠ne̠ utạrgeye de̠ć lagaḱ kana. Khangeko mohnḍayena. Khange aswariạko do̠ khub leka sado̠mko kamsaoket́koa, ar nui hõ onko sãote aćren sado̠me kamsaokedea; ado̠ kathae, uni do̠ bo̠to̠rte e̠kkalteye ke̠kle̠se̠t́ena, ar mit́ṭen darereye hạṛuṕena; uni sado̠m mae ńir paro̠men, ar ho̠ṛ ma ona dareregeye hạṛuṕ tahẽyen.

Ado̠ ona ńe̠lte uni raj do̠ ạḍiye hahaṛayena, me̠nket́ae, Nonka do̠ bań ńe̠l akawana. Onate uni raj do̠ thoṛage boksis ṭakae emadea, are kol ruạṛkedea ać oṛaḱte. Khange oṛaḱre he̠ćkate aćren erae metae kana, Ńe̠lme, iń do̠ thoṛa dintege aema utạr ṭakań rojgar ạguket́ talaṅa.

Erate̠t́ do̠e me̠nket́a, Jorãeyiń kollet́mete.

Tumạl: Santal Folk Tales

Kaera

Kaera do noa disomre ḍher jaegareko rohoe akat́a. Kaera bele do jomjoṅ sad, sebel hõ ạḍi mõńj heṛemge sebela. Kaera do bar pe lekateko joma. Mit́ ma belekatege; kaenḍe machawaḱ do setoṅre rohoṛ caṭ caṭkateko gunḍạia ar holoṅkateko piṭhạia. Ar rugi lạgit́ hõ ạḍi mõńj jomaḱ kana. Berel jo doko utuia.

Daretet́ do cikạ̃ṛ baklaḱ kana. Ạḍi hahaṛa, dạriạ kagoj guṛhe keṭeć akan leka daphãṛ dophãṛ baklaḱ menaḱa. Cetanrem capo baṛale khan ạḍi mõńj cikạ̃ṛ ar leńjerge ạikạuḱa. Cetan baklaḱem chaḍaole khan, bhitri utạrre mutạk leka ponḍge bale majem ńama, ona doko utuia. Jom pạrkạu hoṛ doko ńam baṛaea. Sakamtet́ do jeleń jeleń, ar ḍhalkagea. Thoṛa baṅkhan dare unạḱge jhạla. Sakam do jeleńte usạra baṅ cirạḱa. Menkhan ganḍete do Mạdwạri kicrićko cirại leka nasenaḱtege char mente sojhete cirạḱa. Jãhãtis hoete hõ onkage aema ṭhen sojhetege siṛaḱa. Bapla se porobkore hõ kaera sakamre dakako joma. Berel jel se piṭhạko kaera sakamte ret́ idi ạḍi jutoḱa.

Kaera do mit́ darere eken mit́ kạndhige joḱa, are ken mit́ dhaoge. Menkhan laha khonge arhõ eṭaḱ poha do phoṛ oḍokoḱa. Tinre hara sạtoḱa, unre geleḱa, ar ona gele khon bahaḱte joḱa. Thok thok jo ạcuroḱa. Mimit́ thok do mimit́ nạkić se chimbṛi kana.

Tumạl- Ạkil ḍahar, pạhil hạṭiń

Haṛam Buḍhi Reaḱ Jhogṛa

Sedae jo̠khe̠n, kathae, mit́ṭen ạḍi khacaṛ ho̠ṛe tahẽkana, siń sạṭuṕge ạimại do̠e dik dikạu cabakoa. Jãhã khongeye hijuḱ, se̠ kạmi ṭhen khongeye hijuḱ, e̠kkalte dakageye kho̠jkoa. Me̠nae, De̠n daka daḱ mạnḍi e̠m go̠t́ańpe. Ado̠ khojket́ torako e̠m go̠t́aere ma bogege, ar baṅkhan e̠kkalteye dhum utạrkoa. Me̠nae, Nit́ hõ ạuripe isina? Cet́pe kạmi kana nun hạbić? Cet́pe cekayet́ tahẽkana? Bela do̠ bape ńe̠le kana, se̠ re̠ṅge̠ć bela do̠ bape baḍaea? Ado̠ko metaea, E̠ se̠, onka do̠ alo se̠m ro̠ṛlea. Kạmi kangeale, ado̠ kạmi kạmitege belaḱ kan khan, cet́e me̠na? Ar baṅkhan enan sim raḱ khongele kạmi kana. Ado̠e me̠n go̠t́ket́a, Cet́kope kạmiket́a? De̠n se̠ bhala hisạb uduḱạńpe, ar iń cet́koń kạmi akat́a dela hisạb iń uduḱapea. Ado̠ ạimạitaeye me̠nket́a, Onka hisạb tisạb do̠m alo ro̠ṛa. O̠ho̠m daṛelena, e̠nte amaḱ kạmi do̠ mit́ go̠ṭe̠ngete ńe̠l ńamoḱ kana, onate hisạb hõ̠m uduḱ daṛeaḱa. Ar aleaḱ do̠ aemaḱa ar khucrạ kạmi kantalea. Ar aleaḱ kạmi do̠bon jo̠m horayet́a. Oka khon hisạb do̠le lại daṛeama? Acha besge, gapalaṅ biḍạutalaṅa. Am hõ̠ gapa setaḱ sim raḱ khonaḱ tinạḱem kạmia, ona re̠t́ jarwaeme, ar iń hõ̠ tinạḱ iń kạmia, onań re̠t́ jarwakaḱa. Ado̠ daka jo̠mem hijuḱa, unre onako hisạb re̠t́ do̠ ạgu daraeme.

Ado̠e me̠nket́a, Acha besge, gapa ocoaḱ. De̠n teheńte̠t́ e̠m ho̠t́ạńpe. Ne̠tar do̠ Aghãṛ din, oka hõ̠ baṅ ṭhikạnoḱ kana. Mit́ ghạṛitege ạyuboḱ kana. E̠ne̠ge je̠ḍe̠r akan lekam ạikạua, ayo̠go̠! Tikin go̠t́enge. Ado̠ erateye me̠nket́a, Inạ baṛe me̠nme se̠. Ado̠ cedaḱ hisạb do̠m khoj kana? De̠n ona reaḱ hisạb batlaoańpe ar ińaḱ kạmi ńe̠lpe. Ado̠ amge tho̠m tokraṛ kana. Ado̠e me̠nket́a, Acha besge, gapanoḱ hisạbbo milạutabona. Ado̠ sạri dosar hiloḱ uni he̠re̠l ho̠ṛ do̠ sim raḱre kaḍae aṛaḱ idiket́kote e̠noḱe joṛaoket́koa. Ado̠ manḍae lạhut́ket́te busuṕe gidiket́a, te ṭạnḍiket́ae, hạr samṭaoket́ae. Ado̠ tikinen khan, oṛaḱte daka jo̠me he̠ćena. Ado̠ pạhil leka onkageye ruhet́et́koa. Ado̠ erataeye me̠nket́a, Hape̠, ạuriń dakaea. Ar holam me̠n akat́a, Gapa do̠ hisạbbon uduga. Ado̠ de̠n udugme ar iń hõ̠ń uduḱama. Ado̠e metadea, Ma hisạbtińme. Sim raḱ kaḍań aṛaḱ idiket́koa. Ado̠ inạ reaḱ mit́ go̠ṭe̠ne re̠t́ket́a. Ado̠ hoṛo chiṭạukateń e̠nket́a. Ado̠ inạ reaḱ mit́ go̠ṭe̠ne re̠t́ket́a. Ado̠ busuṕ iń giḍi giḍiket́a. Ado̠ inạ reaḱ mit́ go̠ṭe̠ne re̠t́ket́a. Ado̠ ho̠ṛo̠ń teket́a. Ado̠ inạ reaḱ mit́ go̠ṭe̠ne re̠t́ket́a. Ado̠ ho̠ro̠ń hạr puńjiket́a, ado̠, oṛaḱteń he̠ćena. Inạ reaḱ mit́ go̠ṭe̠ne re̠t́ket́a. Ado̠e metadea, ma lekhae-tińme, tinạḱ re̠t́ hoeyena me̠nte. Ado̠e lekha baṛaket́tae do̠ turui go̠ṭe̠nge. Ado̠e me̠n go̠t́ket́a, Ma ńe̠lme, samani utạr iń kạmiket́.

Ado̠e metadea, Ona ma e̠ke̠n mit́ lekan kạmi kange, judạ tho̠ bam kạmi akat́a. Ona ma e̠ke̠n hoṛo reaḱ kange. Ado̠ uni he̠re̠l ho̠ṛ ạḍi garteye ro̠ṛ go̠t́ket́a, Am do̠ okor cet́ko judạm kạmiket́a. De̠n se̠ bhala hisạb uduḱańme. Ado̠e re̠t́ jarwa akat́ tahẽ̠kana. Onako re̠t́ uni samaṅre ạgukateye giḍi go̠t́kat́a. Are metadea, Ma lekhaetińme. Ado̠ he̠re̠l ho̠ṛe me̠nket́a, Baṅa, e̠ke̠ e̠ke̠te hisạb lại pạhilạńme, e̠nkhanteń lekhaetama.

Ado̠e me̠nket́a, Acha besge; ma nãhãḱ mimit́ go̠ṭe̠n pharak horaeme. Sim raḱ hoṛoń huṛuńket́a – mit́. Racaṅ jo̠ḱket́a- mit́. Gurić iń giḍiket́a – mit́. Daḱ iń ạguket́a – mit́. Thạri bạṭikoń mańjao sapha ạguket́a- mit́. Gidrạko daḱ mạnḍiteń bodhaoket́koa- mit́. Gupiko ar sẽ̠ṛã ho̠ṛko baskeaḱ iń e̠m baṛawat́koa – mit́. Culhạń chõ̠cket́a – mit́. Se̠ṅge̠l iń jolket́a – mit́. Daḱ iń basaṅ ket́a – mit́. Dakań ạ̃ṛĩć ãṛgoket́a – mit́. Tuṛi aṛaḱ iń sit́ ạguket́a – mit́. Utuket́ań – mit́. Daka utukoń hạṭińket́a – mit́. Ado̠ nẽ̠ḱẽ̠ń e̠m baṛawako kana – mit́. Ado̠ ma bujme, mit́ lekan kạmi kantińa se̠ judạ judạge? Arhõ rel gumko renaḱ ma bạń lạiet́ kan. Ado̠ ma lekhaeme. Am do̠ onkatem metań kana, cet́kom kạmi kana me̠nte. E̠nte bhala ạimạiaḱ kạmi do̠ kho̠ro̠ć horaḱ kana se̠ jo̠m horaḱ kana. Ado̠ oka ṭhen hisạb do̠m uduḱ daṛeaḱa? Daḱem lo ạguket́ge, inạ hõ̠ mit́ ghạṛitege caba baṛayena. Muńjrạ tho̠ bạnuḱan. Ma ado̠ lekhaeme.

Ado̠e lekhaket́ do̠ pe̠ ganḍa pea hoyena. Khange cet́ hõ̠ bae ro̠ṛlet́a, tiruṕ hapeyenae. Ado̠ e̠n hiloḱ khon ạimại dhomkaoko do̠e bạgi utạrket́a. Ado̠ erataeye me̠nket́a, Alo se̠ e̠kkalte saegat katha do̠ ạimại hũyãte alope metalea. Ale hõ̠ jo̠to̠aḱgele kạmi kana. Ado̠ sedaere oka lekate co̠ṅ niạ sioḱ ar oṛaḱ daṕ ar rumoḱ, niạ do̠e baro̠nkat́lete bale jo̠ṭe̠t́et́a, ar baṅkhan jo̠to̠ge tho̠le kạmi go̠ṛo̠ape kangea. Ado̠ e̠nre hõ̠ oka lekate co̠ṅ siń sạṭuṕge iạ ạimại, iạ ạimạipe ruhet́ akale tahena. Ado̠ mase̠ bhala aleaḱ kạmige ńe̠ltalepe. Ar baṅkhan e̠nte niạ sioḱ chaḍakate kạmikaḱre do̠bon pherao hataṛoḱa se̠ cet́a? Ado̠ eratae unạḱ hạbiće ro̠ṛ idiket́re hõ̠ nui he̠re̠l ho̠ṛ do̠ cet́ge bar ro̠ṛlet́a. Ado̠ o̠ne̠ onkate uni khacaṛ he̠re̠l ho̠ṛ do̠e bhagao ocoyena, ado̠ e̠kkalteye seta baragena. Seta o̠ne̠bon le̠hakoa, to̠be̠ko jo̠ma. Ado̠ onkage abo he̠re̠l ho̠ṛ do̠ ạimạiren seta kanabo. Tinre ạbukoḱko metabona, un utạrbon jo̠met́a.

Source: Santal Folk Tales

Hạti

Janwar do celeko metakoa? E gidrạko! Mimit́ hoṛ oṛaḱre ek do gại ḍaṅgra, ekk do merom bhiḍi, ek do sukri menaḱkotaoea. Ar bạnuḱkotapere hõ atore tho menaḱkogea! Ponea jaṅga menaḱtakote pon jaṅgawan janwarko metakoa. Hạtipe ńel akat́koa? Uni naksarey ńeloḱ kan uni doe hạti kana. Hạti do pon jaṅgawan janwar kanako. Hạti do gại ḍaṅgrako khon do ạḍitet́ko lạṭua. Napṛaḱ hạti do gel moka hạbićko usula.

Hoṭoḱ do ạḍi khaṭogetakoa, ar sunḍtako ma tawar tawar jeleńge. Sunḍ mucạt́re do ạḍi mońj khuipạḱgetakoa. Hạti do sanaleko khan, sunḍ do onte note lawaḱ lạtińko hurlạ daṛeaḱa, ar jãhãnaḱ saṕkateko lebda daṛeaḱa. Sunḍre ạḍi daṛe menaḱtakoa. Lạṭu lạṭu dare ḍạrko or cagat́ daṛeaḱa ar moṭa moṭa munḍhạt́ hõko tul idi daṛeaḱa. Hoṭoḱ khaṭogetakote sunḍtege jomaḱko rakaba. Sunḍte daḱ ńũi jokhećem ńelleko khan dom mạluṅ utạrḱoḱa. Sunḍ mucạt́e bhugạḱ menaḱa, ar ona do mũ kana. Mũtege daḱ hõko surkạu adera, ar sunḍ kuṛbạṅkate mocareko soloṅ got́kaḱa. Onkage sunḍtege hoṛmore hõ daḱko phurkạujoṅa, ar baberko reaḱ tonolkoko raṛa daṛeaḱa. Napṛaḱ napṛaḱ barea sonḍa ḍaṭa menaḱtakoa, ona do ạḍitet́ keṭećtakoa. Onakin ḍaṭate do akoren bạiri tạruṕ emanko soboḱ cagaṛkoa.

Lutur do ḍhalkagetakoa. Onatege hoṛ hopon dobon mena, “ Hạti do haṭaḱ leka lutur menaḱtakoa”. Ar mẽt́kin do hoṛmo hisạb ạḍi kạṭićgetakoa. Hạti do saḍe ańjom ạḍiko kusiḱa. Jãhãnaḱ mõńj saḍeko ańjomle khan, ạḍi rạskạko taṛama; baṅkhan eṭaḱ okte do gaṛdham guṛdhumko taṛama, ar roṛ hõko bujhạua.

Hạti do daḱre hõko paera daṛeaḱa. Paeraḱ jokheć sunḍtet́ do coṭteko tulkaḱa. Ạsul hạtiren mit́ṭen joḱtonić menaea. Uni doko metaea “ mạhut”. Unige jomaḱ doe ṭalaoea. Mạhutaḱ hukum lekae calaḱa. Sedae do lạṭu lạṭu raj hoṛ hạtiko dohoyet́ko tahẽkana. Hạti do ḍạr baklaḱ ar sakamko joma.