Mit́din mit́ṭen Hunḍạr bir-gajaṛre hante nahteye dãṛã baṛae kan tahẽkana. Mit́ okte ackage mit́ṭen bhiḍi eskargeye ńel ńamkedea. Uni bhiḍi saṕ lahare thoṛa eṭaḱ kathakoe hudis maṛaṅkeda. Hudisket́ae saṕ lekhange tho̠ń jo̠mea nahaḱ. Onate uni do̠ mo̠ne̠ mo̠ne̠tey menwana thoṛa nui ṭhen mõńjiń uduḱ ńõḱlenge.

Bhiḍi cetanre jãhãn dhawa baṅ kate thoṛań ridkhid baṛalenge hape̠n. Ar nonkategeń bujhạu ocoea, je̠, bhiḍi jo̠m do̠ Hunḍạraḱ kạmi kange co̠. Hunḍạr do̠ uni bhiḍiye metadea, dinkalo̠m ạḍi murukem e̠ge̠rledińa. Bhiḍi do̠ raḱ ńõḱ kateće ro̠ṛ ruạṛadea- dinkalo̠m ma baco̠ń janam akan tahẽ! Hunḍạr do̠e me̠nkeda, pase̠ć hoe daṛeaḱa. Me̠nkhan ińaḱ bạihạr reaḱ ghasem jo̠m akat́ tińa. Bhiḍi do̠ e̠kkal arhõ raḱ ńõḱ kateće ro̠ṛ ruạrkeda, ghas jo̠m legaere oka leka se̠be̠la ona hõ baco̠n baḍae iń ma.

Hundạr do̠ e̠kkal ạuriaḱtey reṭe-peṭeḱ kana bhiḍi são bae aṛagea mente. Onate uni são dhurạurege menaea. Ado̠e metaekana, inaḱ kũi khon daḱem ńũiet́ do̠. Bhiḍi do̠e ro̠ṛ ruạṛadea nit́ hạbić daḱgema ạuriń ńũi legae. Nit dhạbić iń gogowaḱ toa geco̠ń jo̠met́ kan!

Hunḍạr do̠e arhõe menkeda, ińaḱ jo̠to̠waḱ katha reaḱge mõ̠ńjem ro̠ṛ ruạṛ akada. Me̠nkhan ona menkateć do̠ o̠ho̠ge hoelentińa ar ińaḱ lać hõ o̠ho̠ bilentińa. Ona men torage bhiḍiye saṕkedea are  jo̠mkedea.

Mit́ dhao Maharaj Akbor aḱ rajosṭire mit́ṭen kisãṛ sodago̠raḱ jo̠to̠waḱ do̠ kombṛo akan tahẽkana. Un okte uni hirdạni akan Sodago̠r do̠ go̠ṛo̠ ńam lạgit́ raj dorbar teye he̠ćena. Un jo̠khe̠n Akbor Birbol do̠ uni kombṛo sendra ńame babotre sodago̠r goṛoae lạgit́e nehõradea.

Uni calaḱ-cạtur Birbol maharajaḱ hukumte kombṛo sendrae dhurạuena. Uni do̠ pạhilre sodago̠r são gapalmaraoe po̠rto̠nkeda. Sodago̠r do̠ un okte Birbole baḍae ocokedea je̠, noa babotre aćren mit́ boehae saebotae kana mente. Thoṛa cinhạ ńamkate Birbol do̠ sodago̠rren sanam boeha ko̠e ho̠ho̠ jarwaket́koa ar e̠kkal sanamko pantete gente geteć teṅgoḱe metat́koa.

Tin okte onko sanamko ona kombṛo kan babotrey lạiat́ko khan, sanamko baṅkeda. Ar noa ma onkakange. Inạ kate Birbol do̠ mit́ map reaḱ mit́ṭen kate sạjại hisạbte ṭheṅgae hạṭiń baṛawat́koa. Inạ tayom calaḱ okte sanamko̠e metat́koa, Ape modre o̠ko̠e do̠ uni mạlikaḱ dhon-dạulạte kombṛo akat́ uniaḱ sạjại do̠ darakan metaḱme gapa bhitrire bar (2) inchi ḍheroktaea.

Inạ dosar hiloḱ tin okte Birbol do̠ sanamkoaḱ ṭheṅga bidạu lạgit́ uni sodago̠r se̠ mạliki ren sanam boehakoe ho̠ho̠wat́koa, un okte ńelena mit́ boehawaḱ ṭheṅga do̠ bar inchi kạṭić macha.

Ona tạṅkhi katećge Birbol do̠e aṭkarkeda sạri kombṛo okoeṭaḱ kanae mente. Inạ tayom uni kombṛo do̠ raj dorbarteko idi maṛaṅkedea. Ar Maharaj do̠ kombṛo lạgit́ niṭ akat́ sạjại hõe emadea. Ado̠ uni Sodago̠r do̠ Birbol ṭhen baḍae hatao lạgit́e kulikedea, cet́ lekate kombṛoe saṕ ńamkedea mente. Uni Birbol do̠e roṛ ruạṛadea, ạḍi algatege noa do̠ń kạmikeda. O̠ko̠e do̠e kombṛo akat́, uni do̠ aćaḱ ṭheṅga bar inchi mae ge̠t́ kạṭićlet́, noa hudis kate baṅma aćaḱ ṭheṅga do̠ nahaḱ bar inchi lạtu ńõgo̠ḱa.

Tayan ar Toyo bana hoṛte cas-bas kin ehoṕ lạgit́. Ado̠ cet́kin cas abada, bana hoṛ guni-bhabiḱkin dhurạuena. Ackage ạlu cas reaḱ disạ hećat́ kin bo̠ho̠ḱre. To̠be Tayan do̠ nonḍe thoṛa bude khemaokeda. Ạlu do̠ hasa latar reaḱ jo̠ kana. Ona reaḱ dare do̠ hasa cetanre, onate do̠ jãhãn kạmi baṅ hoyogoḱa. Noa do̠ lelha Tayan baḍaege bae baḍaea.

Uni do̠e hudisket́a ạlu do̠ paseć dare reaḱ jo̠ kana. Onate Toyo e̠ḱreye lạgit́e menkeda, dare cetan seć do̠ ińaḱ ar re̠he̠t́ se̠ć do̠ amaḱ. Ańjo̠m kate Toyo do̠ muluć muluć landawanteye menkeda, acha. Inạ tayom tin okte ạlu hoyena, Tayan do̠ un okte ạlu dare get́ kate oṛaḱe ạgu samṭao keda. Ạgukateće ńellet́ kan mit́ṭen jo̠ hõ bạnuḱ. Un okte bạihạṛ calao kateće ńellet́ kana Toyo do̠ jo̠to̠ ạlu samṭa sạmtiye idi cabao akada. Tayan do̠e hudis ket́a, sạrige tho̠, ạḍi kajakiń eḱṛe ocoakana. Acha, ar mit́ dhao iń ńela hãḱ.

Inạ tayom do̠ hoṛo̠ kin cas keda. Nia dhao Tayan do̠ mon montey hudiskeda, jãhã lekatege ar bạń eḱṛe ocoḱa. Onate laha laha Toyo ye metadea, niạ dhao iń do̠ cetan se̠ć do̠ o̠ho̠n hataoa, niạ dhao iń do̠ gonḍa se̠ćge emạńme. Ańjo̠m kate Toyo do̠ ekkal muluć macha landa ńõḱ kateće menkeda, acha, onage hoekoḱ ma.

Ado̠ tin okte hoṛo̠ hoyena, Toyo do̠ sanam hoṛo̠ ge̠t́ samṭao idikeda. Tayan do̠ niạ dhao ạḍitet́e rạskạḱ kana. Mon montey hudisoḱ kana are landayet́ kana, hasa la kateć jo̠to̠ hoṛo̠ do̠e hạr samṭaoa mente. Me̠nkhan hasa la kateće ńellet́ kana onḍe do̠ cet́ge bạnuḱanaṅ. Eken budạ se̠ busuṕ koe ńam baṛakeda. Un okte Tayan do̠e menkeda am tuluć do̠ ar o̠ho̠geń caslea. Ạḍitet́em e̠ḱṛeyediń kan do̠!

Tayan do̠e ńelkeda, uni do̠ Toyo são baṅgey daṛeḱ kana. Un oktey hudiskeda, uni do̠ ḍher paṛhaoḱe baḍaea, onate khạli ińe e̠ḱṛeyediń kana. Iń do̠ o̠lo̠ḱ paṛhaoḱ bạń baḍaete,uni são bạń daṛeaḱ kana. Aema ghạṛić hudis-bhabna kateće niṭ keda je̠, aćren eyae goṭen koṛa ho̠po̠n do̠ Toyo ṭhene sikhạu paṛhao ocokoa. Onate dosar hiloḱge aćren gidrạko Toyo oṛaḱe ạguket́koa. Toyo do̠ un okte bhugạḱ bhitrire duṛuṕkate kaṭkome jo̠met́ ko tahẽkana. Tayan do̠ he̠ć seṭer kate hohoye e̠hoṕena, Henda, gate Toyo menama se̠ baṅa?

Toyo do̠ bahre he̠ć kateće menkeda, cet́ kana boeha? Tayan do̠e menkeda, henda boeha, ińren koṛako am ṭheniń ạgu akat́koa. Thoṛa sikhạu paṛhakotińme se. Ona do̠ alom mena, eyae dinre eyae goṭen gidrạ kotam do̠ń e̠kaleń cet́ ocokoa. Ańjomte Tayan do̠ ạdi ãṭe kusiyena. Onate Toyo hirlạ reye do̠ho baṛa oṭokat́koa.

Un okte Toyo do̠ onko modre mit́ṭen danaṅ se̠će idikedea, are metae kana mase̠ paṛhaome, jo̠maṅ jomạń, cet́ leka ikạuḱa Tayan ho̠po̠n? noa menkate, uniaḱ dạbi peṭeć kuṭrạ kateće jo̠mkedea. Dosar hiloḱ tin okte Tayan do̠ aćren gidrạko ńeńele he̠ćena, Toyo do̠ mit́ mit́te bhugạḱ bhitri kho̠ne oḍoḱkate uduḱadea. Turui goṭen do̠ turui dhaorey uduḱadea, mucạt́ dhaoić do̠ bar dhaoe uduḱadea. Lelha Tayan do̠ bae bujạu daṛeada,eyae goṭene uduḱadea mente. Arhõ Tayan do̠e ruạṛ calaoena, ar Toyo do̠ enkage onko ho̠po̠nko modre mit́ṭen danaṅ se̠ć idikate roṛe metadea, jo̠mạń jomạń cet́leka ikạuḱa Tayan ho̠po̠n?

Noa katha menkate, uniaḱ hõ dạbi rạput́kate jo̠m go̠lkedea. Inạ dosar hiloḱ hõ Tayan do̠ ho̠po̠n ńeńele he̠ćena. Nonkage mit́ṭen ho̠po̠nge mõṛẽ dhao kateće uduḱadea, ar mucạt́ utạrić do̠ pe̠ dhaoe uduḱadea. Ar ona ńelte Tayan do̠ ạḍitet́e kusiyena are ruạṛ calaoena. Un okte hõ Toyo do̠ onkage ar mit́ṭen ho̠po̠ne jo̠mkedea. Onkage mit́ mit́te jo̠to̠ hopo̠ne jo̠m ujạṛ cabaket́koa. Mit́ṭen hõ sareć bae do̠holet́ koa.

Un okte Toyo ren oṛaḱ hoṛ do̠e menkeda, nit do̠ cet́laṅ cekaea, upại okor? Tayaṅe he̠ćlen khan celelaṅ uduḱaea? Ho̠po̠n bae ńel ńamleko khan alaṅgeye jo̠mlaṅa nahaḱ. Toyo do̠e me̠nkeda, ńamlaṅae to̠be tho̠e jo̠mlaṅa. Gaḍa hana aṛere ạḍi maraṅ bir gajaṛ menaḱa, dela onḍegelaṅ senjoṅa. Enḍekhan Tayan do̠ bae sendra ńamlaṅa. Ona menkate Toyo do̠ aćren oṛaḱ hoṛ soṅge kateć mare bhugạḱ bạgi oṭokatećkin calaojoṅna. Inạ mit́ ghạṛi tayom khange Tayan do̠ he̠ćkate hohoye dhurạuena, E boeha Toyo okayenam? Okoege bako goṅleda. Un okte bhugạḱ bhitri sendra kateće ńelkeda, Toyo ar ać oṛaḱ hoṛ okoege bạnuḱkina. Eken aćren ho̠po̠n koaḱ jaṅ ńurhạ baṛa akana. Un okte ạḍi kajak raṅgao he̠ćadea. Hante nahte koyoḱ baṛa kate ackageye ńel ńamket́kin gaḍakin paromjoṅ kana.

Ado̠ hohoye ehoṕkeda, teṅgonben! Menkate daḱreye dongot́ kada. Daḱ latarre dạdạr do̠ Tayan leka celege bako daṛeaḱa, ńel ńeltege Toyo ṭhen senkate Toyo waḱ tayom jaṅgae gerket́taea. Toyo do̠ aćaḱ banar jaṅa ghuṭu se̠ćreye do̠ho akat́ tahẽkana. Toyo ren oṛaḱ hoṛ metaḱme ać bạhu do̠ laharegeye rakaṕ he̠ćakan tahẽkana. Tayan he̠ćkate Toyo aḱ jaṅga saṕ torage ać bạhu hoho kateće metae kana, ńeleme se̠ okoe ińaḱ ṭheṅga do̠e saṕ urić akada, mase̠ ṭheṅga do̠ idijoṅme! Noa katha ańjo̠m kate Tayan do̠e hudis ket́a, sạrige tho̠, jaṅga baṅ saṕ kate ṭheṅga geń saṕ akada. Aṛaḱkat́geń jaṅgage saṕ urić lagaoạńa.

Noa hudis kate Tayan do̠ ạḍi usạrage jaṅgaye aṛaḱket́taea, Ar Toyo ma mit́ do̠nte coṭ ghuṭu se̠ćem ńir rakaṕen. Rakaṕ torage ạḍi muruk dạdạṛe dhurạuena. Inạ tayom bir gajaṛ se̠će bo̠lo̠ rophayena. Nit okoeaḱ daṛe menaḱa je̠ Toyo sabea me̠nte. Inạ kho̠nge Tayan do̠ jaoge Toyo ye sendra baṛayede kana. Menkhan Toyo ma ạḍi calak-cạtur kane, ona iạte bae saṕ daṛeae kana.

Ato-paṛare bogete aema hoṛaḱ gharońjkore hopoera-jãwãe go̠mket́ peṛaḱ ko he̠ć akana. Ona ńelte Gopal ren oṛaḱ hoṛ do̠ Gopale metadea, Am do̠ cet́ lekan hoṛ kanam! Jãwãe ạguge bam roṛ baṛaeda. Bar serma hoyena, e̠nre hõ mit́ dhao gan hõ jãwãe do̠ bam ạgu legaledea?

Ać bạhuaḱ katha ańjo̠m kate Gopal do̠e me̠nkeda, Jãwãe ạgu do̠ ko̠m katha kana! Tinạḱ kho̠ro̠c lagaḱa lạime se̠? Gopal aḱ katha ańjo̠mte ać bạhu do̠e  me̠nkeda, ńelet́meạń am do̠ bhage hisạbiạ hoṛ kanam tho̠. Raj oṛaḱ kho̠n unạḱ kạuḍi -poesam ạguyeda, iń do̠ cet́ katha hõ ar bạń ańjo̠ma. Teheń-gapa bhitrire jãwãe bam ạgulekhan iń do̠ baba oṛaḱiń calao joṅa.

Gopal do̠e hudis baṛaket́a, niạ dhao do̠ jãwãe baṅ ạgukate upạige bạnuḱanaṅ. Ona iạte ạyuṕ bela do̠ jãwãe ante oṛaḱteye he̠ćena. Jãwãe ạgu tayom amdaj mit́ cando hoyoḱ kana. Jãwãe do̠ ho̠ńhar oṛaḱ bạgikate calaḱge bae re̠be̠n kana. E̠nte duṛuṕ duṛuṕ nonkan bhage bhage jo̠maḱ do̠ okarey ńamkea?

Jãwãe koṛa do̠ hanhartet́e metae kana, nonḍe he̠ćkate ạlińaḱ hoṛmo do̠ jaoge mońj akantạlińa, onateleń menet́kana ar thoṛa gan dinliń tahẽ nõḱlenge. Jãwãe aḱ katha ańjo̠m kate hanhartet́ do̠ ạḍitet́e kusiyena. Uni do̠e menkeda, tinạḱ din monama unạḱ dinge tahẽnoḱme. Ho̠ńharme ma nit banar tite kạuḍiye ạguyet́ kan. Henda baba, ma am do̠ tahẽnme.

Hanharea waḱ gapalmarao ańjo̠mte Gopal do̠ mon monte e̠kkale edreyena. Baṅ ar baṅ. Jãhã lekatege, jãwãe do̠ kol kae hoyoḱa, baṅkhan puńji jarwa akat́ kạuḍi hõ bhaṅgao hoyoḱtińa. Jãwãe ạsul se̠ hạti ạsul!

Mon monte bud khaṭao kate jãwãeye metadea, henda jãwãe noa atore ạḍi kajak kombṛo ko upel akana. Nõḱõe limu darem ńelet́ kan, noare hajar hajar limu jo̠ḱ rehõ iń do̠ okte nạpit́re o̠ho̠n ńe̠l ńama. Ạkhriń lekhan jaoge poesa hoekoḱa honaṅ.

Am do̠ baba noa limu dare se̠n nońjoraḱme hãḱ. Jo̠to̠ okte nońjor baṅ kate, cando hạsur tayom thoṛa nońjoraḱme hãḱ hại. Marsal ko ạ̃ṛićkate bar-pe din onte dare sećem nońjor lekhange sạrige kombṛo do̠m saṕ daṛeaea.

Ho̠ńhartet́a katha ańjo̠mte jãwãe do̠e menkeda, am do̠ cet́ge alom bhabnaḱa baba, ińge hãḱ kombṛo do̠ń sabegea. Un hiloḱ cando hạsur okte Gopal do̠ oṛaḱ bhitri bo̠lo̠kateće menkeda okayenam, teheń do̠ e̠kkal lać mońge bạń ạikạuda. Okaleka co̠ jut bạń ạikạuda, bogete bhaṭbhuṭ saḍe kantińa. Dare kho̠n barea limu go̠t́ ạgukate so̠rbo̠t́ benao go̠lạńme se̠. Oṛaḱre ar jãhãn marsalaḱ baṅ tahẽkante Gopal ać bạhu do̠ kãṛãṅ kãṛãṅ ńutrege limu ạgui senena. Uni jãwãe koṛa do̠ kombṛo saṕ lạgit́ tạṅireye tahẽkana. Kombṛo me̠nte hanhartet́e hạṛub go̠lkedea.

Kikiạu ańjo̠mte Gopal do̠ soṅge soṅgeteye bạti marsal ante dạṛ ạgukeda. Un okte hõ e̠kkal jãwãe koṛa ma hanhartet́e hạṛub akadea. Gopal ona ńelltey menkeda, Nõḱõe noa amaḱ monre tahẽkana jãwãe. Mucạtre hanharmegem hạṛubkedea.

Gopal ren bạhu do̠ lajaote dakae oṛaḱ se̠će mohnḍayena, jãwãe koṛa hõ ạḍitet́e lajao paṛayena ar ńindạge hońhartet́aḱ oṛaḱe bạgiada. Gopal do̠ raskạte pinḍạre duṛuṕ kate thamakur jo̠jo̠me ehoṕena.

Daharte calaḱ okte bạihạṛ ren goḍo são so̠ho̠r-bajar kho̠ne he̠ćakan mit́ṭen gate são ńapam hoeyentaea. So̠ho̠r ren gate ńelkate bạṛhạṛ goḍo ạḍi ãṭe kusiyena. So̠ho̠r ren gate do̠ ạḍi napae ar hoṛmoangey ńeloḱ kana. Uniaḱ acar beohar, roṛ-landa hõ e̠kkal judạge. Aema din tayomkin ńapam akanate bạihạṛ goḍo do̠ so̠ho̠r ren gate aćaḱ oṛaḱ peṛaḱe nẽota kedea. Bạihạṛ goḍo do̠ e̠kkal bạihạṛrege mit́ bhugạḱrey basoḱ kan tahẽkana. Niṭ akat́ dinre so̠ho̠r ren goḍo do̠ uni bạihạṛ ren goḍo ṭhen peṛaḱe calaoena.  

Bạihạṛ ren goḍo do̠ aćren gate peṛaye lạgit́ jo̠to̠waḱe toenat akat́ tahẽkana. Uni do̠ aćren gate moṭor ar guhum anaje jo̠m ocokedea. Ạḍi haron-kosṭo salaḱ noakoe joara akada. Nonkan mońj jomaḱ uni bae jo̠m ńama. Me̠nkhan cet́e cekaea aćren gate nẽota akadea. Arhõ so̠ho̠r ren gate kanae. Onḍe do̠ tinạḱ bhage bhage jo̠maḱ co̠e jo̠m baṛae. Uni ńelrege bujhạuḱ kana.

So̠ho̠r ren goḍo do̠ thoṛa jo̠m kate thotnae gotekeda. Noa ńelkate bạihạṛ goḍo do̠e kulikedea cekayema gate? So̠ho̠r ren goḍo do̠e roṛ ruạṛadea, amaḱ jo̠maḱ do̠ oho̠ge sebel kana, onatege am do̠m rohoṛgea. Dela iń sãote so̠ho̠r. Onḍe sen katećem ńela cet́lekale jo̠m ńũia. Aćren gate ṭhen nẽota ńam kate bạihạṛ goḍo ạḍitet́e rạskạyena. Rạskạ monantege un okte uni goḍo sãoe calaoena so̠ho̠rte. Thoṛa din calaḱ calaḱte kin seṭerena. Ạḍi maraṅ oṛaḱrey tahẽna gatetae. Ona ńelte bạihạṛ goḍowaḱ mẽt́ ma jalaḱ-juluḱ cabayentae.

Mo̠n mo̠nte bạihạṛ ren goḍo do̠e kurudade rehõ nonḍey ạgukede khạtir sarhaoe emadea. Nia dhao do̠ bạihạṛ ren goḍo peṛa se̠ jo̠m ocoye reaḱ pạli. Ńindạ lạgit́ onkin do̠ o̠t regekin tạṅgikeda. Hoṛko he̠ćkateć ko jo̠m idikeda. Ar inạ tayo̠m so̠ho̠r ren goḍo do̠ mit́ bhugạḱte jo̠maḱ oṛaḱe idikedea gatetae. Unkin bana hoṛge table cetanrekin duṛuṕena. Uni bạihạṛ ren goḍo do̠ tis hõ nonkanaḱ jo̠maḱ mẽttege bae ńelakat́ tahẽkana. Uni do̠e menkeda, Am do̠ sạri kathagem menakada, aleaḱ jion reaḱ dosa ma ạḍi bạṛić. Iń hõ noa so̠ho̠r-bajarrege baṅkhan tahẽn lạgit́iń hijuḱa. Noa katha auri roṛ mucạtrege table ma laṛaoḱ lagaoen. Ar duạr khonaḱ mombạti tire saṕkate goḍo saṕ lạgit́ hoṛ ma oṛaḱko boloyen. Unkin do̠ jãhã lekate bhugạḱre bolokate kin bańcaoena.

Noa dosa ńelte bạihạṛ goḍo do̠e menkeda, Baṅ, so̠ho̠r reaḱ mońj se̠ bhage bhage jo̠maḱ reaḱ ińaḱ jạruṛ bạnuḱa. Jiwi ṭonṭa reaḱ bo̠to̠r re baṅ tahẽkate bạihạṛre tahẽnge bogea. Onḍe do̠ nonkan mońj jo̠maḱ bạnuḱa sạrige, me̠nkhan bo̠to̠r reaḱ hõ jahan karon bạnuḱa.

Mit́din hiloḱ albudạha metaḱme be̠buj Sujon mit́ṭen Be̠le khạclạḱ bo̠ho̠ḱre dipil kate oṛaḱ se̠ne calaḱkan tahẽkana. Oṛaḱ calaḱ okte mo̠ne mo̠netey hudiset́ tahẽkana, Noa bele ạkhriń kateć ạḍi kisạ̃ṛ se̠ daman hoṛe hoyoḱa me̠nte.

Uni do̠ arhõe hudiset́ tahẽkana, Oṛaḱ idi tayo̠m noa be̠le kho̠n sim ho̠po̠nko hoyoḱa, onko ho̠po̠n ko haraḱa. Onko sim arhõ aema ko be̠lea. Un okte ona bele ko ạkhriń kateć ạḍi kisạ̃ṛ ho̠riń hoyoḱa. Inạ tayo̠m ạḍi maraṅ oṛakiń benao rakaba. Onḍe do̠ aema golam-golamini ko tahẽnoḱa. Okoe do̠ aćaḱ oṛaḱ reaḱ sanamaḱ ko kạmia arko ńel juta. Inạ tayo̠m jãhã maraṅ oṛaḱ ren kuṛi ńelte rajan-bajane baplayenge nahaḱ.  

Be̠le ạkhriń koṛa Sujon do̠ arhõe hudisket́a, bapla tayo̠m uni do̠ ponea gidrạren babae hoyoḱa. Inạ tayo̠m onko gidrạ koe hara-burukoa. Oloḱ-paṛhaoḱe cet́ ocokoa. Onko do̠ lạtu lạṭu ko cạkri-bạkriya. Inạ tay̠om onko aćren gidrạko do̠ maraṅ cato̠r se̠ oṛaḱ ren kuṛiye bạnij ạguakoa. Onko ren mit́ okte gidrạko hoyoḱtakoa. Un okte uni do̠ onko gidrạkoren go̠ro̠m babaye hoyoḱa. Aćaḱ ho̠bo̠rre duṛuṕ kate go̠ṛo̠m gidrạkoe jo̠m ocokoa. Un okte uniaḱ do̠ ạḍi rạskạwanaḱ jion hoyoḱtaea.

Noako hudis hudisteye calaḱ kan tahẽkana. Mit́ okte ackage ḍahar lo̠so̠t́re jaṅga ma leńjet́entae. Uni ma e̠kkale bhindạṛ go̠t́ena. Bhindạṛ são sãote aćaḱ bo̠ho̠ḱre dipil akat́ khạlạḱ reaḱ be̠le ma ńurhạ rạput́ metaḱme e̠kkal ge̠je̠r cabayena. Bele ạkhrińić Sujonaḱ kukmu hõ rạput́ cabayentaea.   

Bir-gajaṛ ren Raj Dhạcri kul do̠e tahẽkana ạḍi lelha ar asaṅ poḍa. Jo̠to̠waḱrege ạḍitet́e ạṛisoḱa. Mit́ din hiloḱ do̠ jo̠maḱ sendrae oḍoḱena. Ackage mit́ okte uni do̠ mit́ṭen kulạiye ńel ńamkedea. Ar note kulại ma kul ńelte dạdạṛe dhurạuena. Mit́ ghạṛite dare aṛe se̠ aḍepasey dạṛ ạcuroḱ kana, arhõ mit́ ghạṛi do̠ e̠kkal sojhe dạdạṛe ehoṕena. Kulại tin okte dare aṛete dạdạṛe dhurạuen un okte Kul do̠e hudisket́a iń do̠ ạuṛiaḱte kulại tayomte dạṛ se̠ khudạu baṅkate dare danaṅreń okoḱ khan enḍkhan kulại ekkal iń tayomgey dạṛ ạguya nahaḱ. E̠nḍekhan ạḍi algeteń saṕ daṛekea.

Kul do̠ onkageye kạmikeda. Mit́ṭen ạḍi maraṅ dare danaṅrey teṅgo tahẽyena. Ma ńelme kulại sạrige uni Kul ṭhengey dạṛ hećen. Ar ạḍi algateye saṕgolkedea ar aćaḱ oṛaḱteye idi kedea. Oṛaḱ calao tayom kulại do̠ ạḍi kajak hudis-ganḍon kateće menkeda, E̠ boeha Kul, iń ma e̠nte ạḍitet́geń huḍińge.

Iń jo̠m kate amaḱ lać hõ paseć o̠ho̠ bilentama. Onate am do̠ iń jo̠m lahare ar mit́ṭen kulại sendra ńam ạguyem. Inạ tayom mit́ tulućem jo̠mket́lińge. Un ghạṛić iń do̠ nonḍegeń tahẽ hataṛoḱa. Kul do̠e hudisket́a, kulại ma sạri kathage co̠ṅe metạń kan. Calaolengeń arhõ mit́ṭen kulại do̠ń saṕ ạguyea. Uni kulại oṛaḱre do̠ho oṭokate Kul ma arhõ sendrae mohnḍayena. Me̠nkhan sendra sendrate ạḍitet́e laṅga cabayena. E̠nre hõ sendrate o̠ho̠gey ńamledea. Ado̠ oṛakteye ruạṛ hećena. Hudiskedae, teheń do̠ mit́ṭengeń jo̠m hataṛea. Inạ tayom eṭaḱaḱ sendra katećiń joma nahaḱ. Noa hudis kate Kul do̠ oṛaḱteye calao maṛaṅena. Me̠nkhan oṛaḱ sen kateće ńelket́ celege bạnuḱ ko! Kulại mae dạṛ akat́.

Sikhạuna: Bạṛti Laloc do̠ e̠kkal baṅ bhagea.

Abo santal ho̠ṛaḱ do̠ ạḍi napae ar daman ạricạli, le̠k acarko menaḱtabona. Noako do̠ hapṛamko bidạl kho̠nge ạḍi man ar mano̠t se̠le̠t́bon manao ạguieda. Ạricạli do̠ ạrsi leka, Ạrsire̠ ap apnar met́ muṭhạn cet́leka saphate ńe̠lo̠ḱa onkage ạricạli ho̠te̠tege manwakoaḱ boge bạṛić aso̠l muṭhạn do̠ so̠do̠ro̠ḱa. Am iń okabon cekae̠t́, pạtiạu se̠le̠t́ okabon pańjae̠t́ arbon so̠do̠ret́ ona kangea Ạricạli do̠. Ạricạli babo̠t ạḍi aema daman kathage ro̠ṛo̠go̠ḱa. To̠be̠ ạḍi khato̠te̠ me̠no̠go̠ḱa, Aboaḱ jo̠m, ńũ, ho̠ro̠ḱ bande, ro̠ṛ landa, duṛuṕ teṅgon, ḍo̠bo̠ḱ johar, e̠ne̠ć sereń, khạṭuạ, pujạ, po̠ro̠b, acar bicạr, jaman, gujuḱ, bapla, bhanḍan noṅkaleka jingi khemaore jo̠to̠aḱge Ạricạli do̠. Mimit́ jạtren manwakoaḱ mimit́ leka Ạricạli. Abo santalko aboaḱ ạricạliko sedae kho̠nbon manao ạguet́rehõ̠ nahaḱ do̠ ạḍi aema karo̠nte kho̠d bhe̠d do̠ babon manaoeda se̠ babon pańjaeda. Aboaḱ ạricạli babo̠t aboaḱge pustạute baḍae bạnuḱtabona, baḍaejoṅ hõ̠ babon mo̠neaḱ kana.

Aboaḱ gharońjre ar ato ṭolare ńe̠l ńe̠lte ạricạlibon pańjaeda, manaoeda. Ạricạli reaḱ le̠k, bhe̠d, babo̠t baḍae bạnuḱte andha pạtiạu ar bud ạkil be̠go̠rte ona reaḱ khạndri ar aso̠laḱ do̠ babon tolaseda. Onkaleka okako abo jạti ar somaj lạgit́ jạruṛaḱ se̠ bogeaḱ baṅkan nonkanaḱrebon ge̠r biduḱ kana. Ado̠ nonkaleka mit́ kạhinige Ạnḍiạ Pusi do̠. Mano̠tanko, ne̠ho̠riń do̠ho̠ea, noate mo̠n alope ạṛisa, bicko̠m thoṛa ganḍo̠no̠ḱte sạriaḱ ar bogeaḱko bujhạute pańjae tabonpe̠ baṛe̠. Pusi do̠ ạsul janowar kanako. Ạḍi aema ho̠ṛge pusiko ạsulkoa. Oṛaḱre pusiko tahẽ̠n aema ho̠ṛge bako kusiaḱa. O̠ko̠eko pusi ạsulko kusiaḱ onkoko me̠na oṛaḱre pusiko tahẽ̠le̠nkhan goḍoaḱ utpat baṅ tahẽ̠na. Goḍo oṛaḱ reaḱ anaj pho̠so̠l se̠ jo̠maḱko bako no̠sto̠ daṛeaḱa, oṛaḱre bako bhugạḱ daṛeaḱa, biń oṛaḱ bako bo̠lo̠ḱa. Onate oṛaḱ duạr ar anajko napaege tahẽ̠na. Ar o̠ko̠eko pusi ạsul bako kusiaḱ onkoko me̠na pusi oṛaḱreko tahẽ̠n khan ạḍi chiṭkạlge aṭkaro̠ḱa. Pusi oṛaḱ kocakoreko ija, ro̠ho̠ṛ caole cetanko̠re̠ko ić aḍoya, jel daka towako jo̠m kombṛoea, thạri, bạṭi, ṭukuć, celaṅ ḍhan ḍhunteko rạpuda. Noṅka de̠ne̠ banar ạḍi lekan jukti do̠ menaḱgea sạrige. Abo santal ho̠po̠nge Bhanḍanre jib daṛẽ̠bo idikoa. Onko jib daṛẽ̠ko boṅga talaoaakanićaḱ atma bhạlại lạgit́ko daṛẽ̠koa. Sim, Sukri, Bhiḍi, Mero̠m, Parowa jib daṛẽ̠ko reká katha do̠bon baḍaea, ańjo̠makada se̠ bon ńe̠leda, ńe̠lakada. Bhanḍanre jib daṛẽ̠ko sãote̠ aema lekan anaj do̠ jạruṛa, aema lekan le̠k acar manao ganao hoyoḱa. To̠be̠ bhanḍanre mit́ṭen Ạnḍiạ pusi lagaoḱa se̠ jạruṛa noa do̠ pase̠ć aema ho̠ṛge babon ańjo̠makada, se̠ bon ńe̠lakada. Hẽ̠, bhaṇanre Ạnḍiạ pusi lagaḱa noa reaḱ kạhni do̠ noṅkaleka.

Ạḍi sedae reaḱ katha kana. Un o̠kte̠ do̠ ho̠ṛko o̠lo̠ḱ paṛhaḱ hõ̠ bako baḍaekan tahẽ̠kana. Mare ar mano̠tan ho̠ṛkoaḱ kathage so̠maj reaḱ ạn ạri, onkoaḱ hukum ar kathaleka kạmi purạuge dho̠ro̠m ar ạricạli do̠. Ado̠ mit́ṭen ho̠ṛ ać babae bhanḍanede kana. Oṛaḱ pe̠re̠ć peṛako he̠ćakana. O̠ko̠e okalekako daṛeaḱ daṛẽ̠ko ạguakat́koa. Ado̠ ạyuṕ bela jaṅ baha buhạl lahare oṛaḱ mạlik do̠ ṭikaḱ sindur, pujạ kạmirey duṛuṕena. Pujạ kho̠nḍre duṛuṕkate ać babawaḱ atma bhạlại lạgit́te ṭikaḱ sindureda, cinibatasa, kaerako sipikatey curućeda. Uni ho̠ṛren mit́ṭen ạsul ạnḍiạ pusie tahẽ̠kana. Uni pusi do̠ uni ho̠ṛ ṭhengeye gạsur mạnḍur baṛaekana, cãnḍbo̠l kuṭuṅ are ghiriạ baṛaeda. Uni ho̠ṛ kaerako curue̠t́ sãote pusi do̠ onae jo̠me̠t́ kana. Ado̠ uni ho̠ṛ do̠ pusie saṕkedea ar babe̠rte ho̠ṭo̠ḱre to̠le̠te o̠nḍe̠ge tahẽ̠kan mit́ṭen khunṭireye to̠lkedea. Ado̠ aćaḱ eṭaḱ eṭaḱ le̠k acar ar pujạ kạmiko purạuen tayo̠m uni pusie do̠e aṛaḱ kedea. Uni ho̠ṛren mit́ṭen lanṭa gidrạe tahẽ̠kana. Uni lanṭa do̠ ać baba ṭhe̠n ge̠nḍhe̠rkate ać babawaḱ pujạ kạmiko ạḍi mo̠ne̠te̠ye̠ ạribạndhikeda. Ado̠ mit́din nui ho̠ṛ hõ̠e go̠ćena. No̠te uni lanṭa gidrạ hõ̠e hara buruena, Gharo̠ńjre aćge mạlik. Enḍe̠ khan nit́ do̠ aćaḱ maraṅ dạyik ạć babae bhanḍanea. Bhanḍan dinre arhõ̠ oṛaḱ pe̠re̠ć peṛako he̠ćena. Ado̠ ać hõ̠ pujạ kạmire̠y duṛuṕena. Pujạe lạgit́ okako jạruṛ sanamaḱge ać samaṅre. Pujạ kạmie ehoba un okte aćkae disạkeda jo̠to̠aḱge menaḱa me̠nkhan ạnḍiạ pusige bạnuya. Pujạ kạmi baṅ eho̠ṕkate uni ho̠ṛ do̠e kuḍbur hapeyena. Khan  jarwaakan  ho̠ṛko do̠ uniko kulikedea ce̠t́ jahan muskilanaḱ hoyena se̠ ce̠ta. Uni ho̠ṛ do̠ onkoaḱ katha reaḱ ro̠ṛ ruạṛ bae e̠meda, e̠kale̠ thir hapeakana. Ado̠ ạḍi jo̠rteko kạjiạkedete̠ aso̠l boṅga katha do̠e lại posaḱkeda, baṅma mit́ṭen ạnḍiạ pusi be̠go̠r pujạ kạmi do̠ o̠ho̠geye eho̠ṕlea.

Ho̠ṛko do̠ uniaḱ katha ańjo̠mte̠ am iń khaḱ khaḱko landakeda. Metadeako cele ya bạbu, acka ado̠m cekayena, ar ạnḍiạ pusido̠m cekayea? Aema ho̠ṛ aema lekateko bujadea, me̠nkhan uniaḱ do̠ mit́ joban, do calaḱpe ar mit́ṭen he̠nde̠ ạnḍiạ pusi saṕ ạguyepe. Tin hạbić pusi bape saṕ ạgueye un hạbić pujạ kạmi do̠ baṅ e̠ho̠ba. Ać babaren ma ạsul he̠nde̠ pusiye tahe̠kan. Ać ma pusi ạsul bae kusiaḱ. Ạḍi muskilre sanamko paṛaoena. Jo̠to̠ ho̠ṛko tharbasao cabayena nit ado̠ ce̠t́ko cekaeya me̠nte̠. Uni ho̠ṛ kuli mako kuliede cedaḱ ado̠ ạnḍiạ pusi do̠ lagaḱa me̠nte̠. Me̠nkhan uniaḱ mit́ katha, karo̠n baḍae do̠ alope kho̠ja. O̠ko̠eaḱ katha hõ̠ bae ańjo̠meda. Me̠nkedae iń babań bhanḍanedea, judi go̠ṛo̠ reaḱ boge mo̠nsubạ menaḱ tape̠khan enḍe̠khan be̠go̠r bilo̠mte mit́ṭen he̠nde̠ ạnḍiạ pusi saṕ ạguye reaḱ usạra kurumuṭuipe. Ado̠ e̠ne̠ ṭo̠laren koṛako jarwaena ar ṭheṅga jhạliante̠ he̠nde̠ pusi se̠ndrako oḍokena. Mit́ṭen diạṛ bathanre sạrige he̠nde̠ ạnḍiạ pusiko ńamkeda. Ado̠ sabe̠ lạgit́ jhạliko oḍaokeda. O̠ko̠eko do̠ ṭheṅgateko capat́kede khanpusi do̠ ricạm po̠ṭ dạdạṛe lagaoena. Koṛako do̠ pusiko khudạu kedea. Pusi do̠ jiwi bo̠to̠rte hante nate̠ dạṛ dạṛte mit́ṭen amaraṅ jhạpṛạ jo̠jo̠ darerey ńir dećena. Koṛako do̠ ḍhelkate am iń capat́ko dhurạuena.

Menkhan pusi do̠ coṭ laphaṅ ḍạrre rabo̠ṛ kajakoḱte̠y lambe̠t́ hapeyena. Koṛako do̠ ona jo̠jo̠ darereko de̠ćena ar pusi ko laga phe̠ḍ kedea. Ado̠ e̠ne̠ laga lagateko saṕ kedete oṛaḱ ko ạgu kede khan uni ho̠ṛ e̠ne̠ ado̠ bhanḍan kạmie e̠ho̠ṕket́a. Ganḍo̠n reaḱ: Abo santalko ce̠t́ nit́ hõ̠ ạnḍiạ pusi tayo̠mtebon ńir baṛaya se̠ aboaḱ aso̠l daman ạricạli rạkhi jogao ar lahanti lạgit́bon kurumuṭuya? Reaḱ ạ̃t́ko ńemet̠́kana, asraeko ńameda, oka doko ol aṅgan kana: me̠nako nokoaḱ no̠ńjor ko bạṛićgea, ar hudis cintạ hõ̠ jhạlgea, ado bir nạṛite dare to̠lo̠ḱ lekae kirḍhumket́a. Ado̠ oṛaḱ reaḱ jumi jaega kuṛi era chạmki chaḱ, maraṅ kuṛi tala kuṛi, ho̠po̠n mại bại bạitey sibạṛmea. Ar noṅkatege juripạri bapag ḍheroḱ kana, bin baplate ko̠ler sonako ho̠bo̠rjoṅ kan, apaṅgir, mit́ pạrsire baplaḱ, caco bapla, khicạ umạrre ṭhạ̃oḱ se̠ ṭhạ̃okako. Aema pạlkuṛi mo̠nean kuṛi gidrạko oḍoṅ calaḱ kana. Bardin tayom copoć siṭạ ocokate e̠ke̠n jaṅko ruạṛ hijuḱkana. Oka do̠ apa bare ṭhen ot baṛgeko dabiet́ kana, noṅkate jumi bon atet́ kana, ạkhriń ar bho̠ro̠n ma menaḱge. Nijaḱ se̠ somaj gharo̠ńj reaḱ oko kathako bhin jạt ṭhen ḍamḍahe, Dho̠ro̠m ko̠ro̠mte dhilisili ar andha pạtiạukate somaj do̠ jạbun akante geraṅ are̠ ho̠mo̠re̠t́ kana. Kisku raja do̠ man ijjo̠t rukhiại lạgit́ cae campa gaṛe̠ bạgiada.

Menek abo do̠ nij ṭhạire teṅgo keṭeć katege, ho̠ṛ ho̠po̠naḱ ijjo̠t rukhiại, Jạt baṅcao, sepeṅ rakab, ar lahae lạgit́ ce̠t́ babon ti jaṅgawaḱa? Ce̠t́ hapṛam koaḱ mãyãm ho̠ṛ ho̠po̠naḱ ho̠ṛmo̠re heḍejoḱ kana? Nahaḱ bidạl muskil muhunre ato gãota bandoa urić, sạdhin ar rukhiại do̠ho̠e lạgit́ aboren ạyurko ar mukhiạkoge Haṛma, Gurbhu Cạmpại ar Sam pargana do; ce̠t́ noko aboren hapṛam koaḱ ạyur gun do̠ e̠bhen se̠ jạpit́gea? Ho̠ṛmo̠ daṛe bo̠do̠l bo̠ho̠ḱ hataṅte hulgạriạ Sidạ Kanhu leka dela orbonpe. Ar gharo̠ńre, ato ṭolare ar somajre jạt leka jiwedo̠ḱ reaḱ ar ar marsal reaḱ rãt jhalkoaḱ arbon ńe̠l ocoema.

Sedae jo̠khe̠n mit́ṭen atore mo̠lo̠ṅre ḍoho koṛae tahẽkana. Ar uni koṛaren bạhu do̠ khub mońj kuṛi kanae. Ado̠ o̠ne̠ mo̠lo̠ṅreye ḍohogete jãhãkote dãṛã baṛae uni so̠ṅge̠te do̠ bae khusiḱa. Apan ạpingekin daṛana. Metaḱme hạṭiạ, bạṭiạ, peṛa ho̠ṛo̠ḱ, ńe̠l buru ńe̠l karam, uni jãwãete̠t́ so̠ṅge̠ do̠ bae khusiḱa, Jãhãte calaḱ jo̠khe̠n uni jãwãete̠t́ hõ̠e calaḱ khan, bạhutte̠t́  do̠e usạt́  go̠doḱa. Are metaea, Aćge laha lahae camdaṛaḱ baṛaea. Am so̠ṅge̠te do̠ o̠ko̠e ba tuloḱ lagat́?

Onkae metae khan, uni do̠e siṭi siṭi baṛaea. Khange arhõ̠e e̠gge̠r go̠dea. Siṭko̠ć cudi!E̠ge̠rede khane isiṛ isiṛ baṛae kana. Ado̠ onkae e̠ge̠re khan, uni do̠ arte̠t́geye bartao kana. Ado̠ onkakin phukṭi baṛajoṅa. Ar oka do̠e haso ocoyegea; ado̠ e̠nre hõ bae usạt́a, sahaokaḱgeae. Mo̠ne̠reye bujjoṅa, Iń do̠ no̠nḍe̠ń ḍohoyentegeye dusạuediń kana. Ado̠ onkae dusạuea, arhõ̠e mãyãwaegea.

Ado̠ kathae, mit́ dhao do̠ atoren kuṛi koṛa pata ńe̠lko calaḱ kana. Ado̠ uni ḍoho koṛaren bạhu hõ̠e me̠nket́a, Iń hõ̠ pata ńe̠l do̠ń calaḱgea. Ado̠ uni koṛae me̠nket́a, Iń hõ̠ to̠be̠ń calaḱgea. Ado̠ bạhutaeye me̠nket́a, Am do̠ alom calaḱa. Nui soṭa cudi iń calaḱ iń me̠n khange ać hõ̠e ruhu ṭuhu baṛaea. Ao̠ koṛae me̠nket́a, Am eskarge eṅgate ńe̠ńe̠l sad do̠, ho̠ṛ do̠ alo se̠nlen khange.

Ado̠ bạhutaeye me̠nket́a, Sad do̠ e̠nte sanam ho̠ṛge. Ado̠ o̠nḍe̠m ḍohoyenteń manayet́mea. Ho̠ṛ nãhãḱ bako landawańa? Me̠nako, Durre! Kuṛi ma napae o̠ko̠ć, jãwãege tho̠e ḍohogetaea. Bejãe nonkan kuṛi unireye khusiyen do̠! Iń khan, o̠ho̠ń re̠be̠n atarlena. Onkako landawań iạte am do̠ń manayet́mea. Khange uni koṛa hõ̠e bataoket́a. Metadeae, Acha, ma e̠nḍe̠khan am eskar baṛe ̠ calaḱme, kahelae iń salaḱre do̠m khe̠ndo̠ḱ kana. Ma, bań calaḱ kana.

Ado̠ kathae, uni do̠e calaoena. Ado̠ atoren so̠ṅge̠te uniye ńe̠l go̠t́kadea. Ado̠ ać hõ̠ dosra oṛaḱ reaḱ kicriće ko̠eket́koa, ar onate khube dhuti dạhṛi sajena. Ńe̠l ho̠ṛ hõ̠ko ńe̠l erkaḱ kana. Ạḍi hạbićem be̠ṅge̠t́ae ena, kathayem orom daṛeaea. E̠nte ti jaṅga bo̠ho̠ḱ, goṭae e̠se̠t́ akana; inạ ḍoho ar mẽ̠t́ge ńe̠loḱ kantaea, baṅkhan go̠ṭae e̠se̠t́ caba akana. Ado̠ kathae, pata ṭạnḍire ać eskargeye dãṛã baṛae kana, ako atoren ho̠ṛ tuluć do̠ mesao ho̠doḱ kana. Ado̠ setaḱ jo̠khe̠n, kathaye ńe̠lkede do̠, ać bạhu e̠ne̠ć saṕ akan. Khange ado̠ bae metat́koa, De̠ se̠ ya, tumdaḱ emańpe, mit́ kho̠ṛ gan iń rulege. Ado̠ sạriko emade khan, kathae, ać bạhu samaṅrege ḍher do̠e ruyet́a are do̠net́ kana. Ar oka ghuṛi do̠ uni samaṅ se̠ngeye lạṭić calao go̠doḱ kana. Ado̠ onka do̠n baṛae ńe̠lte ạḍiye be̠ṅge̠t́ae kangea. Mo̠lo̠ṅre ḍoho hõ̠e ńe̠let́getaea, me̠nkhan bae orom daṛeadea. Ado̠ kathae, bạhutae e̠ne̠će aṛaḱen khan, uni hõ̠ tumdaḱ do̠e emat́koa. Ado̠ okako se̠n uniye dãṛã baṛae kana, ado̠ uni ṭhen ńe̠l ocoḱ leka ghạṛi hõ̠ ghạṛi uni laha lahageye tahẽna, ar ro̠ṛ do̠ cet́ hõ̠  bakin ro̠ṛana. Ado̠ uni hijuḱ lekae ạikạulede khan, aćge hako pako lahateye he̠ć go̠t́ente onako kicrić do̠ jo̠to̠e bhạnduṛ baṛakat́teye idi baṛakat́koa; ado̠ gupiye calaoena. Ado̠ ńe̠ńe̠l khon bạhutte̠t́e he̠ć laha ocoadea, to̠be̠ ene ać hõ̠ gupi khone hijuḱ kana, me̠n baṛe̠ gupigeye se̠nlena me̠nte.Ado̠ he̠ćkate bạhutte̠t́e kuli baṛayede kana, Cele cet́ lekam ńe̠l ạguket́koa? Bam se̠n ocoadińa,ma lại baṛawạńme.

Ado̠ unreye me̠nket́a, Cedaḱ co̠ṅ am hõ̠ bam se̠nlen? Ńe̠l ạgukekoam huṭe̠ć. Ado̠ uniye me̠nket́a, Amge tho̠m manakidińa, baṅkhan iń do̠ calaḱgeń me̠nlet́a. Bam calao ocoadińte ạḍi mo̠n khaṭo̠ń ạikạuket́a. Ado̠ bạhutte̠t́e me̠nket́a, Ḍoho iạte e̠nte bań se̠n ocoat́mea. Ado̠ pata ṭạnḍireń ńe̠lket́ko do̠, bogete am lekan ḍohoko. Mit́ṭen onkan ḍohoićge bhala abo akhṛare bogete tumdaḱe ruru kan are do̠net́ kana. Ado̠ uni ńe̠lteń me̠nket́a, Noko co̠ṅ goṭa disạmrenko ḍohoge. O̠ho̠ huṭe̠ćko dusạulińa. Cedaḱ co̠ṅ aleyić hõ̠ń manakede? Rạskạ ho̠ṛ huṭe̠će idikekoa. Ado̠ń ńe̠lket́ko goṭa disạm ḍoho. Amge hale ḍoho, goṭa disạm ḍoho. Ado̠ e̠ne̠ in khonaḱ mit́tekin daṛana  ar ńe̠ńe̠l eman hõ̠ mit́ge. Un khon dusạu ro̠ṛ do̠ cabayentaea. Ado̠ e̠ne̠kin bhuńjạuket́gea, baṅkhan huṭeć ḍoho iạte dosrareye ucạṛkoḱ co̠ṅ cet́ co̠ṅ. Ado̠ e̠ne̠ niạ katha do̠ń purạuket́a.

Kandontako do mit́ṭen bagwan menaḱtakoa. Ona bagwanre do aema lekan jo ar baha dareko rohoeakada. Taher, beṅgaṛ, kohnḍa, hotot́ ar emanteaḱ bogete lạṭu lạṭu jo akantakoa. Onate kandon ar ać go – baba do ạḍiko kusiḱa. Ać go – baba dokin mena ạḍi kajer gidrạkantalaṅae. Haṛam – buḍhilenre hõ nãhãḱ mońjteye ạsullaṅa. Sombar Sunḍlạre hạṭiạ duṛuṕa. Noa haṭ do ako ato khon adha kosgan sạṅgińre menaḱa.

Kandon do jao hạtiạ anajko hạṭiạte ṭebe ṭebeye goḱ idia. Ar ạkhrińlenre aema poesa hoyoḱtaea. Tire poesa calakinre go – baba ạḍikin kusiḱa. Kandontako do noa bagwanre baha dare hõko rohoe akada. Golap baha, Joba baha, Kusbi baha ar eṭaḱ baha hõko rohoeakada. Jaoge kusi – rạskạ reko tahẽna.