Mit́din Somraṭ Akbor ar Birbol kin gapalmaraoeda, mit́ okte ackage Birbole kuklikedea- Ma se̠ lạitalaṅme, Dhạrtire jo̠to̠ kho̠n maraṅ hạtiạr cet́ kana me̠nte? Birbole roṛ ruạṛadea, Jo̠to̠ kho̠n maraṅaḱ hạtiạr do̠ Biswạs metaḱme mo̠nre biswạs tahẽn jạruṛa.

Birbol aḱ nonkan roṛ ruạṛte Abbar ạḍigan bae uput́lena. Onate mo̠nrey gathao do̠ho̠kada. Are hudiskeda okte nạpitreń bidạu legaea nahaḱ.

Mit́din Akbor ren hạti pal kho̠n mit́ṭen hạti paglayena. Hạtitko pagla lekhan khańcareko do̠hokakoa, je̠no okoeaḱ hõ aloe laksan. Ado̠ Akbor hõ noa ạt se̠ opso̠rrege Birbol aḱ keṭeć biswạs bidạue kurumuṭukeda, Cet́lekate nui hạti kho̠n rukhiại ńama honaṅ. Onate Raj sabhate hạjiroḱe metawadea.

Ar note Maharaj Somraṭ aćren kạmiạkoe batlaoket́koa, Birbole he̠ćlen khan khańca jhićkaḱpe nahaḱ. Inạkate menwana, ńel maṛaṅlegeń cet́ leka biswạsge maraṅ hạtiạr kana me̠nte.

Birbol do̠ Raj sabhate seṭeren torage, uni hạtiaḱ khańcako jhićkeda. Uni pagla hạti ma Birbol ńelte e̠kal aḍrao aḍraote uni se̠ngey dạdạṛ kan. Me̠nkhan hạtiaḱ nonkan dạr hijuḱ ńelte Birbol do̠ mo̠netey hudiskeda, pase̠ć Somraṭaḱ batlao kangea. Ińaḱ biswạs bidạu lạgit́ege nonkae kạmikana. Birbol sạrige ạḍi calak-cạtur ar kajaḱ biswạs monan hoṛ kanae. Ado̠ oka sećge bae dạṛleda. Ente dạrkate jahan porho bạnuḱanaṅ.

Ar hạti ma birbol ṭhene he̠ć so̠rena. Ackage Birbol mit́ṭen seta hạti laha lahate dạdạr kane ńel ńamkedea. Ado̠ Birbol ạḍi harephare setawaḱ tayom jaṅga saṕkate hạti se̠ne capat́kedea. Pagla Hạti ma e̠kal uni setawaḱ bhuḱ ańjo̠mte tharbasaoena. Onate laha se̠n baṅkate tayo̠m se̠ngeye pạclạ ruạṛena. Note Akbor sanamaḱe ńeńel kan tahẽkana. Ar nõḱõe nonkate porman keda, Dhạrtire jo̠to̠ kho̠n maraṅ hạtiạr do̠ Biswạs kana. Ente jahan dhiri tạnićtey capat́lekhan sạrige hạti arhõ bạṛti raṅgaokoḱa. Me̠nkhan ạḍi bud salaḱ hạti bo̠to̠re uduḱadea. Ar hạti uni ṭhen senoḱe bo̠to̠rena. Birbol aḱ mo̠nre diṛho biswạs tahẽkantaete hạti kho̠n rukhiại ńamkeda. Enḍete bujhạuḱ kana, sạrige Dhạrtire jo̠to̠ kho̠n maraṅ hạtiạr do̠ Biswạs kana mente.

Mit́din mit́ gạ̃ṛĩ mo̠n asketkate gaḍa ḍhipteye taṛamet́ tahẽkana. Gaḍa ḍhipre mit́ṭen Horo do̠ setoṅrey duṛuṕ akan tahẽkana. Ado̠e kulikedea, Cedaḱ boeha mo̠nem asket́ akat́tama? Ona kathage alo̠m mena, casa ko sanam kaera dareko tot́ giḍiakada, jo̠maḱ cet́ge bạnuḱanaṅ, Onate gaḍa ḍhipteń taṛam kana, ar Gạ̃ṛĩ aḱ mẽtdaḱ ṭhoṕ ṭhoṕ jo̠ro̠ḱ kantaea.

Ado̠ gạ̃ṛi aḱ duk ńelte Horo mãyã he̠ćadea, “ are metaekana haere boeha cedaḱem raraḱkana. Dela alaṅ pạri kaeralaṅ cas-abadjoṅa. EnḍekhanThoṛadin tayom alaṅaḱ pho̠so̠l alaṅgelaṅ jo̠ma nahaḱ. Dela enḍekhan.

Ado̠ Gạ̃ṛĩ ar Horo mit́ sãote birkin monhḍayena, one dhaṅgladhas akat́ kaera dare samṭaokate ar mit́ ṭoṭhare ro̠ho̠ekin goṭakeda. Me̠nkhan Gạ̃ṛĩ do̠e bhạbit́ena, ać ma ente alagatege jahan daregey de̠ć daṛeaḱ, ar jãhãn usul dare muthnire kaera dare ro̠ho̠e lekhan Horo ar bae tioḱ daṛeaḱa. Ado̠ sạrige Gạ̃ṛĩ do̠ kaera dare nạrko̠ṛ dare co̠t́rey do̠ho̠ oṭokada.

Me̠nkhan Horo do̠ ạḍi jo̠to̠nte kaera dare bit́keda. Thoṛadin tayom unkin do̠ dare ńeńelkin he̠ćena. Ado̠ Gạ̃ṛĩ aḱ do̠ baṅ o̠mo̠n akantaea, dare cetanre tis hõ jahan dare hoyoḱa? Ar Horo aḱ dare mońjge hara akantae ar dare pe̠re̠ć kaera jo̠ beleakana. Ado̠ Gạ̃ṛĩ ma ekkal darere de̠ćkate kaera jo̠mem dhurạuen. Dayage bacha dare latarre duṛuṕ akan Horo do̠e menet́kana, “ De̠se̠ boeha thoṛa emạńme, nase̠tege hoyoḱtińa.

Me̠nkhan Gạ̃ṛĩ do̠ cet́ ar Horoaḱ kathae disạea? Uniaḱ kạmigema eṭaḱko e̠ḱṛeko. Ado̠ Gạ̃ṛĩ aḱ nonkan beohar ńelte Horo do̠ edre ńõḱena. Ado̠e hudiskeda, cekateń ucrạuea. Nonka men jo̠khenge disạ he̠ćdea.

Gạ̃ṛĩ tin okte jo̠m bhagaokate dare co̠ṭregey jạpit́ akat́ tahẽkana, un okte Horo do̠ ạḍi utạr ro̠ho̠ṛ maḱko dare gonḍarey bit́keda. Ar ackage kikiạuena, “ Tayaṅe hijuḱkana boeha. Horo aḱ kikiạu ańjo̠mte Gạ̃ṛĩ do̠e ebhenena, ar ekkal ona do̠ho̠ akat́ maḱregey ńurena. Ado̠ uni Horo do̠ Gạ̃ṛĩ kaṭra kuṭrạ kateć ako jạt ṭhene ạkhrińkedea. Ar hijuḱ okte memen hõ bae hiṛińleda, Ape jạtiaḱ je̠lpe jo̠jo̠m kana.

Horo aḱ nonkan dil ńelte Gạ̃ṛĩ Raj ekkale raṅgaoena, onko do̠ akoaḱ ṭheṅgakote dadalko ńir he̠ćena. Pạhilte Horo dadalko he̠ćen khan Horo do̠ landau dhurạuena are menkeda, Ińaḱ noa ṭhapra rạput́kate dadal okoege bape daṛeaḱa. Un okte budgạṛiạ Gạ̃ṛĩ do̠e metat́koa, delabon daḱrebo giḍikaea. Onkoaḱ katha anjo̠mte dayage bacha Horo do̠e raḱ mẽt́hakeda. Are memenkana alope giḍińa, baṅkhaniń gujuḱa honaṅ. Ado̠ okoe hõ uniaḱ katha bako hetaowada. Sạrige daḱreko giḍikedea. Inạ thoṛa ghạṛi khange maraṅ utạr lobster antey buhelena. Ado̠ uni lobster ńelte Gạ̃ṛĩkoaḱ uli daḱ sarsaoentakoa. Ado̠ko kuliede kana, cekam saṕkedea nun maraṅ lobster do̠? Ạḍi sibil so̠ṛo̠mko kulikedea. Cedaḱiń lạiapea? Ado̠ko mit́julteko kulikana, ma lạime, jao hiloḱge mit́ṭenkate lobster saṕkatećle jo̠m ocomea nahaḱ. Ar amaḱ jiṅgire jãhãnaḱge bam haronoḱa. Nunạḱpe nehõrạń kana,enḍkhaniń lạia, menkhan biswạs alope at́tińa. Baṅa, Baṅa, lạime boeha. Ma ańjo̠mtabonpe, pheḍoḱ okte ińaḱ jaṅgare dhiriko toljoṅ katećiń unumena, un oktege lobster iń jo̠jo̠me he̠ćena, ar saṕkateń rakaṕena.

Ar ona katha leka sạrige Gạ̃ṛĩko hõ akoaḱ jaṅgare dhiri tolkateć daḱreko donkeda. Menkhan dayage ar bako rakaṕ daṛeada. Nonkage ańjo̠moḱa, Gạ̃ṛĩ koaḱ nonkan hewa menaḱtakoa. Onko do̠ hoṛko birudre ghạṛi ghạṛi nonka kathako cala ar akote akoko bhagao ocoḱa.

Mit́ ho̠ṛren mit́ṭen ạsul Geḍey tahẽkana. Uniren barea ho̠po̠nkin tahẽkantaea. Uni eṅgat Geḍe do̠ jao hiloḱge ho̠po̠nkin sãotey dãṛã baṛae, jo̠m ńu are e̠ne̠ć khilạḍoḱ kan tahẽkana. Ar ńuhum torage ho̠po̠nkin oṛaḱteye ạguyet́kin tahẽkana. Ado̠ nonkage ạḍi boge dinko khemaoet́ tahẽkana.

Jao hiloḱ lekage uni Geḍe ar ho̠po̠nkin oṛaḱteko he̠ć samṭaoena. Ackage enhiloḱ mit́ṭen Toyo onḍey he̠ćena are Eṅgat Geḍey metaekana, ho̠po̠nkin do̠ń jo̠mkintama. Ma dinkin e̠m maṛaṅạńme. Toyo aḱ nonkan kathate Geḍe do̠ bo̠to̠rtey tharbasaoena ar e̠kkal kajakte raraḱe dhurạuena. Pẽḱ pẽḱ pẽḱ… Pẽḱ pẽḱ pẽḱ… Pẽḱ pẽḱ pẽḱ… Pẽḱ pẽḱ pẽḱ… Pẽḱ pẽḱ pẽḱ…

Ado̠ Geḍeren mạlik raḱe ańjo̠m ńamkeda. Ado̠e hudisket́a, sạrige pase̠n jãhãn mũskilrey paṛaoakana. Ado̠ uni ho̠ṛ do̠ maṛaṅ o̠kho̠ć ṭheṅgawantey calaoena. Ṭheṅgawantey laha hijuḱkan ho̠ṛ ńelte Toyo do̠ jiwi ṭonṭa bo̠to̠rtey dạṛjo̠ṅana. Enkatege eṅgat Geḍe ar ho̠po̠nkin bańcaoena, ado̠ kusi ar rawal mo̠nanteko japit́ maṛaṅkeda.

Gaḍate beṛhae ạcurakan mit́ bir gajaṛre mit́ṭen Tạruṕ ho̠po̠ne baso̠k kan tahẽkana. Ńeloḱte huḍińe tahẽkanre hõ ạḍi budane tahẽkana. Aćaḱ jo̠maḱ aćtegeye tumạljoṅa. Me̠nkhan jao hiloḱge goḍo ar hako bạṛite jo̠met́ko tahẽkana. Din hiloḱ cet́ tejo̠ ar hako jo̠m mońj ạukạuḱa? E̠ṭakaḱ hõ jo̠m jạruṛa.

Mit́din ackage jel (Deer) jo̠m sanakedea. Unạḱ Kul Jel sendrayet́ko! E̠nrehõ mẽt́ mũṭhạn thoṛa Tạruṕ lekage. Onate birren ado̠mko do̠ Tạruṕ re̠n kạki menteko manotea. Noa do̠ ko̠m katha kana? Me̠nkhan uni Jel ma goć kate bae jo̠m daṛeae. Arhõ ać ṭhene ho̠ho̠ae rehõ bae so̠ro̠ḱa. Ado̠ onate mo̠ne mo̠nete ganḍonena, cet́iń cekaea mente?

Ado̠ mit́din huḍiń macha mit́ṭen Jele ńam maṛaṅkedea. Ho̠po̠n Tạruṕe kulikedea, Oprom kadińgeam? Jel do̠ bo̠to̠r salaḱe roṛ ruạṛkeda opromge. Ạte ńam baṛaet́kan Tạruṕ do̠ Jele metaekana, Baḍaeam iń do̠ Sundorbon re menae Royel Bengol Tiger ren huḍiń mama kạnạń.

Onḍegeń tahẽkana. Me̠nkhan ho̠r hiṛiń khạtir iń gogo são nonḍege menańa. Ạpuń arhõ mit́ṭene bạhujoṅ akante raṅgaote sạńgińre menaḱ hataṛlińa. To̠be ạḍi usạra onḍeliń ruạṛa. Nitiń menlekhangeń jo̠m daṛeama. Menkhan jãhãeak bạń laksana. Onate bạń jo̠m akat́mea. Me̠nkhan iń são jãhãe bạṛiće beoharle khan sạjại hisạbteń jo̠megea. E̠kkal Jel bo̠to̠rtey tharbasao cabayena. Ado̠ ńelme uni Tạruṕ do̠e bujhạukeda sạrige Jel do̠e bo̠to̠roḱ kana mente. Onatey metadea, cet́iń metama onage kạmime enḍekhaniń aṛaḱ kama honaṅ. Jel tharbasaoateye menkeda, jo̠to̠waḱgeń ańjo̠ma. E̠nrehõ alom jo̠meńa.

Tạruṕ ma ạḍi ãṭe rạskạyena! ado̠e metadea, ma e̠kkal sojhete teńgonme, jo̠hań jal tama. Jel do̠ sojhetey teṅgoyena ar Tạruṕ do̠ uniaḱ joha jajale dhurạuena. Ạḍi kajake heseć sekrećjoṅana, ente nonkatege toa jo̠m sana do̠e meṭaoket́a. Tạruṕ mo̠n mo̠ntey hudisana tinạḱ bebuj Jel kanae nit hõ bae oprom daṛeadińa. Jel bạń jo̠mledea menkhan joha toń jalket́taea. Nonkae hudiskeda.

Nit́ hõ Tạruṕ sanamko ṭhene lại daṛeaḱa, Jel ńamkate hõ: enhõ bạń jo̠m akadea. Jelaḱ johań jal akada khạli! Ado̠e bujhạukeda, ńeloḱte huḍińre hõ Jel iń tioḱ daṛeaegea.

Ạḍi sedae reaḱ katha. Mit́ bir gajaṛre mit́ṭen budgạriạ Toyo basoḱ kan tahẽkana. Jo̠maḱ tumạl lạgit́ mit́din do̠e oḍokena. Dãṛã dãṛãte ackage tạńkhiket́a, e̠kkal ạḍi maraṅ hạtie go̠ć akana. Reṅgeć tirpido̠ḱ aste hạti ṭhene he̠ć sorena. Ado̠ ḍaṭate hạtiaḱ harta ge̠r chạḍao lạgit́ bogetey kurumuṭukeda, enrehõ baṅgeye daṛeada. Onate hạti je̠l bae jo̠m daṛeada. Ado̠e loraoen khan go̠ć hạti aṛeregeye duruṕ hapeyena.

Thoṛa ghạri tayo̠m ackage dhạcri kule raraḱkane ańjo̠m ńamkeda. Uni dhạcri Kul do̠ Toyo se̠ne hijuḱ kana. Ado̠ bo̠to̠r salaḱ Toyo do̠e menkeda, Ma hijuḱme Maharaj. Am lạgit́ge nui hạti enan kho̠niń ho̠rho̠ akadea. Ma jo̠me talaṅme. Kul do̠ e̠kkal kajaḱteye aḍraoena. Uni do̠e menkeda, ińaḱ jo̠maḱ integeń tumạla. Jãhãeaḱ emaḱ do̠ o̠ho̠ń jo̠mkea.

Ado̠ Kul do̠ onḍe kho̠ne se̠n maṛaṅena. Inạ mit́ ghạṛi tayo̠m khange seṭerena mit́ṭen Tạruṕ. Toyo do̠ muluć mạchi landawante Tạruṕe ataṅ daramkedea. Menkedae, ma hijuḱme! Hạti je̠l thoṛa cakha ạikạume. Nui do̠ Kule tumạl akadea.

Tạruṕ do̠e menkeda, Kule tumạl akat́ jo̠maḱ do̠ cekań jo̠makea? Toyo do̠e menkeda, am do̠ e̠kkal cet́ge alo̠m bhạbiḱa. Kule hećlen khangeń baḍae ocomea nahãḱ. Un okte dạṛ go̠lme nahãḱ.   Tạruṕ do̠e guni-bhạbiyena, ado̠e menkeda sạri kathage co̠ṅe metạńkana. Ado̠ jo̠jo̠me dhurạuena. Tạruṕ do̠ aćaḱ laser ḍaṭate ạḍi usạra hạti harta ge̠r chaḍao kate je̠le oḍoḱkeda.

Un ghạrić Toyo do̠ e̠kkale hape akan tahẽkana. Tin oktey ńelkeda Tạruṕ do̠ hạtiaḱ sanam je̠l do̠e ge̠r oḍoḱkeda, ado̠ ackagey aḍraoena, E boeha ma se̠njoṅ talaṅme, Ente̠ Kule he̠ć seṭerena. Toyo aḱ katha ańjo̠mte Tạruṕ do̠ onḍe kho̠ne dạṛ pharakena. Ado̠ ma ńelme uni budgạriạ Toyo ma ạḍi ãṭe rạskạyena. E̠nte hạtiaḱ je̠l jo̠mre jãhãn eṭkeṭõṛẽ baṅ hoeletaea ạḍi algateye jo̠mkeda.

Jãhã mit́ atore mit́ṭen re̠ṅge̠ć casa hoṛe girobasoḱ kan tahẽkana. Pe̠a gidạr-pidạr ar bạhuante ạḍi muskil ar haro̠n salaḱ dine khemaoet́ kan tahẽkana. Mit́ din oṛaḱ racare duṛuṕ kateće ganḍo̠no̠ḱ kana, mit́ṭen gunidar se̠ guni Geḍeye kirińea mente. Uni Geḍe tin oktey bele ehoṕa, un okte casa do̠ ona bele hạtiạrey ạkhrińa ar kạudi sõćjoṅa.

Inạ tayo̠m dosar hiloḱ mit́ṭen kạṭić macha ho̠po̠n Geḍe hạtiạ kho̠ne kiriń ạgukedea ar oṛaḱ ạgukateć ạḍi ãṭe jogao jo̠to̠nkedea. Nonka ńel ńeltege Geḍe do̠e harayena. Ackage mit́ din casa do̠e ńelkeda Geḍe do̠ mit́ṭene bele akada. Ona bele ńelte casa hoṛ do̠ aćren bạhutaeye ho̠ho̠wadea. Unkin Bana ho̠ṛge Bele kin saṕ legaket́ ma sona reaḱ bele kan! Noa ńelte bana ho̠ṛ kusite rạskate e̠kkal e̠ne̠joḱkin lagaoena.

Arkin menet́ kana niạ dhao do̠laṅ kisãro̠ḱa nahãḱ. Nonkage jao hiloḱ uni Geḍe do̠ mit́ṭen kateće belea. Ar ona bele uni reṅgeć casa ho̠ṛ do̠ hạtiạre ạkhriń kateć gharońj reaḱ jo̠to̠ lekan okolạnaḱ ko̠e kulạu anṭaoet́ kan tahẽkana. Me̠nkhan mit́ okte uni casa ar ać bạhuaḱ lob-laloć do̠ ḍher idiyentạkina. Jao hiloḱ nonka mit́ṭen kateć bele baṅ ạkhriń kateć uni Geḍeaḱ laćre tinạḱ bele menaḱ onako jo̠to̠ get́ oḍok kateć mit́ dhaore ạkhriń lekhan aema kạuḍiren mạlik kin hoyoḱa mente nonkakin hudiskeda.

Ado̠ nonka me̠nkate dosar din do̠ casa ar ać bạhu uni Geḍa aḱ laćkin get́ paṛaḱket́taea. Ar ma ńelme Geḍe aḱ laćre ma cet́ belege bạnuḱ. Ona ńelte casa do̠ ạḍi ãṭe bhabnayena ar duṛuṕ hape kateć raraḱe dhurạuena.

Mit́din ackage Gopal do̠ ruạ ńamkedete raj sabhate bae se̠n daṛeada. Maharaj sabha ren eṭaḱ hoṛkoante nana parkan gapalmarao jo̠khe̠n ackagey me̠n go̠t́ket́a, ińaḱ noa sabha re jãhãe onkanić bạnuikadea je̠, Gopal aḱ oṛaḱ khon jãhãnaḱe kombṛo ạgu daṛeaḱa? Ape modre jãhãe noae kạmi daṛeaḱ khan, e̠nḍekhan thoṛagan re hõ uni do̠ ona kạmi ńutumte kuṛại iń emaea. Ape modre jãhãepe re̠be̠n kana se̠ cet́ ma lại tabonpe.

Maharajaḱ kuṛai (puruskar) reaḱ lalcate Gopal aḱ oṛaḱ kombṛo calaḱ me̠nte bako re̠be̠nlena. E̠nte uni do̠ ạḍi husiạr ar calak-cạtur hoṛ kanae. Uniaḱ mẽt́ kho̠n eṛaṅoḱ  alga katha do̠ baṅ kana. Saṕ ńamlen khan do̠ rukhiạ bạnuḱa me̠nteko baḍae kan tahẽkana. Uni do̠ mit́ din baṅ mit́ din badla do̠e hataogea honaṅ ar un hiloḱ uni then kho̠n bańcaoḱ reaḱ jãhãn ho̠r baṅ tahẽna.

Me̠nkhan thoṛa din tayo̠m Bhupal ńutuman mit́ hoṛ do̠ kurại reaḱ katha ańjo̠mte e̠kkalteye re̠be̠n baṛago̠lena. Inạ tayo̠m mit́ din nijhum tala ńindạ Gopal aḱ oṛaḱ kombṛoe lạgit́e bo̠lo̠yena. Me̠nkhan Gopal do̠ laha khonaḱge Raj sabha reaḱ kathae baḍae ńam akat́ tahẽkana. Onate Gopal do̠ uni lubhiạ hoṛ ghuṛmucạue lạgit́e sapṛao akan tahẽkana.

Gopal do̠ laha kho̠naḱ sapṛao akan leka mit́ṭen kanḍare hoṛkoaḱ mạilạte (pạikhana) pereć kate ona cetanre  thoṛa kạuḍi do̠ho kate ać hõ ona aṛeregeye oko akan tahẽkana. Uni hoṛ do̠ tin okte Gopalaḱ oṛaḱe bo̠lo̠yena, ńel kedea kanḍa pereć kạuḍi ko do̠ho akada. Ar bilo̠m baṅkate ạḍi usạra ona pereć kanḍa dipilkate mohnḍayen torage Gopal do̠ ḍhikate oney dipil akat́ kanḍae capat́ rạput́keda. Ar ona kanḍare tahẽkan sanam mạilạ do̠ uni ho̠ṛaḱ hoṛmore pasnao cabayena. Un okte do̠ aṅga marsal akan tahẽkana. Ado̠ Gopal do̠ oṛaḱ kho̠n oḍok kateć uni hoṛe kuliede kana, Henda ho, kombṛo do̠ hoyentama se̠ baṅa!

Maharaj do̠ Gopalaḱ katha ańjo̠mte ạḍitet́e rạskạyena. Ente ar mit́ dhao Gopalaḱ bud-ạkil reaḱ oprom do̠e ńamkeda. Metaḱme rạskạte Maharaj do̠ uni hõ mit́ sãe (100) mo̠ho̠r sandese emadea.

Mit́din mit́ṭen Hunḍạr bir-gajaṛre hante nahteye dãṛã baṛae kan tahẽkana. Mit́ okte ackage mit́ṭen bhiḍi eskargeye ńel ńamkedea. Uni bhiḍi saṕ lahare thoṛa eṭaḱ kathakoe hudis maṛaṅkeda. Hudisket́ae saṕ lekhange tho̠ń jo̠mea nahaḱ. Onate uni do̠ mo̠ne̠ mo̠ne̠tey menwana thoṛa nui ṭhen mõńjiń uduḱ ńõḱlenge.

Bhiḍi cetanre jãhãn dhawa baṅ kate thoṛań ridkhid baṛalenge hape̠n. Ar nonkategeń bujhạu ocoea, je̠, bhiḍi jo̠m do̠ Hunḍạraḱ kạmi kange co̠. Hunḍạr do̠ uni bhiḍiye metadea, dinkalo̠m ạḍi murukem e̠ge̠rledińa. Bhiḍi do̠ raḱ ńõḱ kateće ro̠ṛ ruạṛadea- dinkalo̠m ma baco̠ń janam akan tahẽ! Hunḍạr do̠e me̠nkeda, pase̠ć hoe daṛeaḱa. Me̠nkhan ińaḱ bạihạr reaḱ ghasem jo̠m akat́ tińa. Bhiḍi do̠ e̠kkal arhõ raḱ ńõḱ kateće ro̠ṛ ruạrkeda, ghas jo̠m legaere oka leka se̠be̠la ona hõ baco̠n baḍae iń ma.

Hundạr do̠ e̠kkal ạuriaḱtey reṭe-peṭeḱ kana bhiḍi são bae aṛagea mente. Onate uni são dhurạurege menaea. Ado̠e metaekana, inaḱ kũi khon daḱem ńũiet́ do̠. Bhiḍi do̠e ro̠ṛ ruạṛadea nit́ hạbić daḱgema ạuriń ńũi legae. Nit dhạbić iń gogowaḱ toa geco̠ń jo̠met́ kan!

Hunḍạr do̠e arhõe menkeda, ińaḱ jo̠to̠waḱ katha reaḱge mõ̠ńjem ro̠ṛ ruạṛ akada. Me̠nkhan ona menkateć do̠ o̠ho̠ge hoelentińa ar ińaḱ lać hõ o̠ho̠ bilentińa. Ona men torage bhiḍiye saṕkedea are  jo̠mkedea.

Mit́ dhao Maharaj Akbor aḱ rajosṭire mit́ṭen kisãṛ sodago̠raḱ jo̠to̠waḱ do̠ kombṛo akan tahẽkana. Un okte uni hirdạni akan Sodago̠r do̠ go̠ṛo̠ ńam lạgit́ raj dorbar teye he̠ćena. Un jo̠khe̠n Akbor Birbol do̠ uni kombṛo sendra ńame babotre sodago̠r goṛoae lạgit́e nehõradea.

Uni calaḱ-cạtur Birbol maharajaḱ hukumte kombṛo sendrae dhurạuena. Uni do̠ pạhilre sodago̠r são gapalmaraoe po̠rto̠nkeda. Sodago̠r do̠ un okte Birbole baḍae ocokedea je̠, noa babotre aćren mit́ boehae saebotae kana mente. Thoṛa cinhạ ńamkate Birbol do̠ sodago̠rren sanam boeha ko̠e ho̠ho̠ jarwaket́koa ar e̠kkal sanamko pantete gente geteć teṅgoḱe metat́koa.

Tin okte onko sanamko ona kombṛo kan babotrey lạiat́ko khan, sanamko baṅkeda. Ar noa ma onkakange. Inạ kate Birbol do̠ mit́ map reaḱ mit́ṭen kate sạjại hisạbte ṭheṅgae hạṭiń baṛawat́koa. Inạ tayom calaḱ okte sanamko̠e metat́koa, Ape modre o̠ko̠e do̠ uni mạlikaḱ dhon-dạulạte kombṛo akat́ uniaḱ sạjại do̠ darakan metaḱme gapa bhitrire bar (2) inchi ḍheroktaea.

Inạ dosar hiloḱ tin okte Birbol do̠ sanamkoaḱ ṭheṅga bidạu lạgit́ uni sodago̠r se̠ mạliki ren sanam boehakoe ho̠ho̠wat́koa, un okte ńelena mit́ boehawaḱ ṭheṅga do̠ bar inchi kạṭić macha.

Ona tạṅkhi katećge Birbol do̠e aṭkarkeda sạri kombṛo okoeṭaḱ kanae mente. Inạ tayom uni kombṛo do̠ raj dorbarteko idi maṛaṅkedea. Ar Maharaj do̠ kombṛo lạgit́ niṭ akat́ sạjại hõe emadea. Ado̠ uni Sodago̠r do̠ Birbol ṭhen baḍae hatao lạgit́e kulikedea, cet́ lekate kombṛoe saṕ ńamkedea mente. Uni Birbol do̠e roṛ ruạṛadea, ạḍi algatege noa do̠ń kạmikeda. O̠ko̠e do̠e kombṛo akat́, uni do̠ aćaḱ ṭheṅga bar inchi mae ge̠t́ kạṭićlet́, noa hudis kate baṅma aćaḱ ṭheṅga do̠ nahaḱ bar inchi lạtu ńõgo̠ḱa.

Tayan ar Toyo bana hoṛte cas-bas kin ehoṕ lạgit́. Ado̠ cet́kin cas abada, bana hoṛ guni-bhabiḱkin dhurạuena. Ackage ạlu cas reaḱ disạ hećat́ kin bo̠ho̠ḱre. To̠be Tayan do̠ nonḍe thoṛa bude khemaokeda. Ạlu do̠ hasa latar reaḱ jo̠ kana. Ona reaḱ dare do̠ hasa cetanre, onate do̠ jãhãn kạmi baṅ hoyogoḱa. Noa do̠ lelha Tayan baḍaege bae baḍaea.

Uni do̠e hudisket́a ạlu do̠ paseć dare reaḱ jo̠ kana. Onate Toyo e̠ḱreye lạgit́e menkeda, dare cetan seć do̠ ińaḱ ar re̠he̠t́ se̠ć do̠ amaḱ. Ańjo̠m kate Toyo do̠ muluć muluć landawanteye menkeda, acha. Inạ tayom tin okte ạlu hoyena, Tayan do̠ un okte ạlu dare get́ kate oṛaḱe ạgu samṭao keda. Ạgukateće ńellet́ kan mit́ṭen jo̠ hõ bạnuḱ. Un okte bạihạṛ calao kateće ńellet́ kana Toyo do̠ jo̠to̠ ạlu samṭa sạmtiye idi cabao akada. Tayan do̠e hudis ket́a, sạrige tho̠, ạḍi kajakiń eḱṛe ocoakana. Acha, ar mit́ dhao iń ńela hãḱ.

Inạ tayom do̠ hoṛo̠ kin cas keda. Nia dhao Tayan do̠ mon montey hudiskeda, jãhã lekatege ar bạń eḱṛe ocoḱa. Onate laha laha Toyo ye metadea, niạ dhao iń do̠ cetan se̠ć do̠ o̠ho̠n hataoa, niạ dhao iń do̠ gonḍa se̠ćge emạńme. Ańjo̠m kate Toyo do̠ ekkal muluć macha landa ńõḱ kateće menkeda, acha, onage hoekoḱ ma.

Ado̠ tin okte hoṛo̠ hoyena, Toyo do̠ sanam hoṛo̠ ge̠t́ samṭao idikeda. Tayan do̠ niạ dhao ạḍitet́e rạskạḱ kana. Mon montey hudisoḱ kana are landayet́ kana, hasa la kateć jo̠to̠ hoṛo̠ do̠e hạr samṭaoa mente. Me̠nkhan hasa la kateće ńellet́ kana onḍe do̠ cet́ge bạnuḱanaṅ. Eken budạ se̠ busuṕ koe ńam baṛakeda. Un okte Tayan do̠e menkeda am tuluć do̠ ar o̠ho̠geń caslea. Ạḍitet́em e̠ḱṛeyediń kan do̠!

Tayan do̠e ńelkeda, uni do̠ Toyo são baṅgey daṛeḱ kana. Un oktey hudiskeda, uni do̠ ḍher paṛhaoḱe baḍaea, onate khạli ińe e̠ḱṛeyediń kana. Iń do̠ o̠lo̠ḱ paṛhaoḱ bạń baḍaete,uni são bạń daṛeaḱ kana. Aema ghạṛić hudis-bhabna kateće niṭ keda je̠, aćren eyae goṭen koṛa ho̠po̠n do̠ Toyo ṭhene sikhạu paṛhao ocokoa. Onate dosar hiloḱge aćren gidrạko Toyo oṛaḱe ạguket́koa. Toyo do̠ un okte bhugạḱ bhitrire duṛuṕkate kaṭkome jo̠met́ ko tahẽkana. Tayan do̠ he̠ć seṭer kate hohoye e̠hoṕena, Henda, gate Toyo menama se̠ baṅa?

Toyo do̠ bahre he̠ć kateće menkeda, cet́ kana boeha? Tayan do̠e menkeda, henda boeha, ińren koṛako am ṭheniń ạgu akat́koa. Thoṛa sikhạu paṛhakotińme se. Ona do̠ alom mena, eyae dinre eyae goṭen gidrạ kotam do̠ń e̠kaleń cet́ ocokoa. Ańjomte Tayan do̠ ạdi ãṭe kusiyena. Onate Toyo hirlạ reye do̠ho baṛa oṭokat́koa.

Un okte Toyo do̠ onko modre mit́ṭen danaṅ se̠će idikedea, are metae kana mase̠ paṛhaome, jo̠maṅ jomạń, cet́ leka ikạuḱa Tayan ho̠po̠n? noa menkate, uniaḱ dạbi peṭeć kuṭrạ kateće jo̠mkedea. Dosar hiloḱ tin okte Tayan do̠ aćren gidrạko ńeńele he̠ćena, Toyo do̠ mit́ mit́te bhugạḱ bhitri kho̠ne oḍoḱkate uduḱadea. Turui goṭen do̠ turui dhaorey uduḱadea, mucạt́ dhaoić do̠ bar dhaoe uduḱadea. Lelha Tayan do̠ bae bujạu daṛeada,eyae goṭene uduḱadea mente. Arhõ Tayan do̠e ruạṛ calaoena, ar Toyo do̠ enkage onko ho̠po̠nko modre mit́ṭen danaṅ se̠ć idikate roṛe metadea, jo̠mạń jomạń cet́leka ikạuḱa Tayan ho̠po̠n?

Noa katha menkate, uniaḱ hõ dạbi rạput́kate jo̠m go̠lkedea. Inạ dosar hiloḱ hõ Tayan do̠ ho̠po̠n ńeńele he̠ćena. Nonkage mit́ṭen ho̠po̠nge mõṛẽ dhao kateće uduḱadea, ar mucạt́ utạrić do̠ pe̠ dhaoe uduḱadea. Ar ona ńelte Tayan do̠ ạḍitet́e kusiyena are ruạṛ calaoena. Un okte hõ Toyo do̠ onkage ar mit́ṭen ho̠po̠ne jo̠mkedea. Onkage mit́ mit́te jo̠to̠ hopo̠ne jo̠m ujạṛ cabaket́koa. Mit́ṭen hõ sareć bae do̠holet́ koa.

Un okte Toyo ren oṛaḱ hoṛ do̠e menkeda, nit do̠ cet́laṅ cekaea, upại okor? Tayaṅe he̠ćlen khan celelaṅ uduḱaea? Ho̠po̠n bae ńel ńamleko khan alaṅgeye jo̠mlaṅa nahaḱ. Toyo do̠e me̠nkeda, ńamlaṅae to̠be tho̠e jo̠mlaṅa. Gaḍa hana aṛere ạḍi maraṅ bir gajaṛ menaḱa, dela onḍegelaṅ senjoṅa. Enḍekhan Tayan do̠ bae sendra ńamlaṅa. Ona menkate Toyo do̠ aćren oṛaḱ hoṛ soṅge kateć mare bhugạḱ bạgi oṭokatećkin calaojoṅna. Inạ mit́ ghạṛi tayom khange Tayan do̠ he̠ćkate hohoye dhurạuena, E boeha Toyo okayenam? Okoege bako goṅleda. Un okte bhugạḱ bhitri sendra kateće ńelkeda, Toyo ar ać oṛaḱ hoṛ okoege bạnuḱkina. Eken aćren ho̠po̠n koaḱ jaṅ ńurhạ baṛa akana. Un okte ạḍi kajak raṅgao he̠ćadea. Hante nahte koyoḱ baṛa kate ackageye ńel ńamket́kin gaḍakin paromjoṅ kana.

Ado̠ hohoye ehoṕkeda, teṅgonben! Menkate daḱreye dongot́ kada. Daḱ latarre dạdạr do̠ Tayan leka celege bako daṛeaḱa, ńel ńeltege Toyo ṭhen senkate Toyo waḱ tayom jaṅgae gerket́taea. Toyo do̠ aćaḱ banar jaṅa ghuṭu se̠ćreye do̠ho akat́ tahẽkana. Toyo ren oṛaḱ hoṛ metaḱme ać bạhu do̠ laharegeye rakaṕ he̠ćakan tahẽkana. Tayan he̠ćkate Toyo aḱ jaṅga saṕ torage ać bạhu hoho kateće metae kana, ńeleme se̠ okoe ińaḱ ṭheṅga do̠e saṕ urić akada, mase̠ ṭheṅga do̠ idijoṅme! Noa katha ańjo̠m kate Tayan do̠e hudis ket́a, sạrige tho̠, jaṅga baṅ saṕ kate ṭheṅga geń saṕ akada. Aṛaḱkat́geń jaṅgage saṕ urić lagaoạńa.

Noa hudis kate Tayan do̠ ạḍi usạrage jaṅgaye aṛaḱket́taea, Ar Toyo ma mit́ do̠nte coṭ ghuṭu se̠ćem ńir rakaṕen. Rakaṕ torage ạḍi muruk dạdạṛe dhurạuena. Inạ tayom bir gajaṛ se̠će bo̠lo̠ rophayena. Nit okoeaḱ daṛe menaḱa je̠ Toyo sabea me̠nte. Inạ kho̠nge Tayan do̠ jaoge Toyo ye sendra baṛayede kana. Menkhan Toyo ma ạḍi calak-cạtur kane, ona iạte bae saṕ daṛeae kana.