Sedae re kathae, mit́ṭen Raje tahẽkana. Uni Raj do̠ mit́din ḍahar re maraṅ utạr dhiri do̠holeda ar ać do̠ ona dhiri danaṅre oko akan tahẽkana. Ado̠ ona danaṅ khonge ńeńele dhurạuena jahae ona dhiri ḍahar khon ko ocoga se baṅ. Raj ren mit́ bar bạnij bepar ar karbạriạko ona ho̠rteko taṛam idikeda. Ḍahar re noa dhiri menaḱte adom hoṛ do̠ Rajako dusi kedea. Ente ḍahar do̠ eset́ akana.

Menkhan enrehõ onko modre mit́ hoṛ hõ noa dhiri ocog reaḱ bako cintạlena. Unre mit́ṭen casa sạbji bojha dipil kateće hijuḱkan tahẽna. Ona dhiri ńelte onḍe heć sorena ar dipil akat́ bojha gidiket́te dhiri ocog lạgit́ ạḍitet́e kurumuṭukeda.

Ạḍi ghạṛić kurumuṭu kurumuṭute mit́ okte onḍe khon ona dhiri ṭhelao ocoḱkeda. Khan casa do̠ ona sạbji ạgui senenre tạṅkhikeda , okare dhiri tahẽkan onḍe mit́ṭen ṭaka do̠ho aḱ (purse) do̠ ńurho akana. Uni casa hoṛ do̠ ona purse-e jhićket́re ạḍi utạr sona reaḱ jinise ńamkeda ar ona sãote mit́ kuṭrạ kagoj hõ tahẽkana. Ona kagojre nonka ol tahẽkana, noa sona reaḱ jinis do̠ uni lạgit́ge, okoe do̠ noa dhiri ḍahar khone ocoḱ akat́.

Sikhạuna: Dhạrti ṭunḍạṅre noa jionre abo hõ nonkanaḱ aema lekan tạkićaḱ rebon paṛaoḱa. Unre lahanti reaḱ ạtbon ńam daṛeaḱa, ar asketiạ se kuṛhiạ hoṛ do̠ hana nawa ko ạnḍuṅ baṛaea, menkhan eṭaḱ ko do̠ ạḍi gakhuṛ ar kurumuṭu salaḱ akoaḱ kukmu purạu talate lahanti lạgit́ horko tearjoṅa.

Mit́ṭen Pusi ar Toyo kin galmaraoḱ kana, cet́lekate seta ko khon rukhiạ ńamoḱa.   “Ado Pusi mengot́keda seta do thoṛa hõ bạń botorakoa. Cedaḱje bańcaoḱ reaḱ mit́ṭen bhańj se dhara do baḍae menaḱtińa. Khange Toyo hõe menkeda, eken inạ mit́ṭen bhańjte cekate setako khonem rukhiạ daṛeaḱa? Iń ma nonkanaḱ eyae gel (70) goṭen dhara baḍae menaḱtiń.

Tinre nonkakin ropoṛkan tahẽkana inạ oktege ona horte mit́ dol sikạri akoren setako soṅge kate bir sendrako senoḱ kan tahẽkana. Unre botorte Pusi do eken inạ mit́ bhańj se dharage beoharkeda. Uni do mit́ṭen dare re dećena ar seta bako tioḱ daṛeadea. Menkhan note Toyo do aćaḱ baḍae aḱ eyae gel goṭen upạige kạmire lagaoe kurumuṭukeda menkhan okaṭaḱge aćaḱ kạmire baṅ lagaolena. Nonka baṛaetege seta ko heć sorena ar Toyo ko saṕkedea

Mit́ dhao mit́ṭen hoṛ sadom kombṛo sen kateće saṕ ńamena. Ado Sadom ren mạlik do uni kombṛoe metadea, kombṛom heć akante maraṅ sạjại iń em daṛeama, menkhan eken mit́ sortote iń khonem bańcao daṛeaḱa.

Kombṛoe menkeda: Ma enḍekhan cet́ sorto emoḱ hoyoḱ tińa thoṛa lại saḍe me, asoḱ kạnạń onań manao daṛeaḱa. Ado uni Sadom mạlik doe menkeda, cet́ lekate Sadom ko kombṛo koa ona cet́ạń me khaniń aṛaḱkama. Noa katha ańjomte uni kombṛo do ạḍi algate hẽḱ got́keda ar ona bhańj uduḱe ehoṕena. Pạhilte uni daṛean Sadom ṭhen senente goṭa hoṛmo thoṛae iskir baṛakedea are menkeda, pạhil dhap kạmi do mucạt́ena. Ente amren Sadomaḱ biswạs doń hameṭkeda. Nit enḍekhan lebet́ se don reaḱ jãhãn sombhabge bạnuḱanaṅ. Ado ma ńelme nit do Sadomaḱ hoṭoḱ baberiń laṛaetaea-inạkate gạkhuṛ tite jhin baber se lagam harephare horoḱae hoyoḱa. Noḱoe noa hõ algateń purạukeda. Niạ dhao ekal thoṛa sontorate Sadomre dejoḱ hoyoḱa. Dećkate nit do banar jaṅgate Sadomaḱ lać lebet́ hoyoḱa jemone raṅgaoḱ are dạṛ. Khange uni Sadom do riạḱ riạḱ dadạṛe ehoṕena.

Kombṛo doe menkeda, Noḱoe nonkate Sadom ko kombṛo koa. Menkhan Sadom mạlik samaṅte Sadom kombṛo do sạrige hahaṛa. Kombṛo lạgit́ nunạḱ mońj ạt́em emadiń ńutumte aema johariń emamkana. Khange uni kombṛo nonka memen tulućge usạrae danaṅ got́ena. Ado uni Mạlik hõ eṭaḱ Sadom re dećkate kombṛoe sabea mente lagakede rehõ ohoge tioḱ daṛeadea.

Mit́ṭen lạpite tahẽkana. Uni lạpit́ do̠ ạḍi mońj hoṛe kạpci daṛeako kan tahẽkana. Mit́din mit́ṭen officer kạpciḱ lạgit́ uni lạpitaḱ dokane hećena. Ado kạpciḱ jokhene metaekana, sir am do̠ ghũs ṭakate amaḱ gharońjem calaoeda, hoṛko baḍae keda arko raṅgao akana, paseć amaḱ khobor hoyoḱa. Khange officer-e menkeda, thiroḱme beṭa!

Arhõ onkage mit́din mit́ṭen sarkari officer uṕ kạpci lạgit́e hećena. Ado̠ uni lạpit́ roroṛe ehoṕena, Sir am do̠ ạḍi lạṭu fạkibạji hoṛ kanam. Ente am do̠ hoṛem eṛe baṛakoa. Uni officer do̠e menkeda, lạpit́ moca bond tam, ar baṅ khanem ńela. Khange thoṛa din tayom polis ona dokan ko gherao eset́keda ar uni lạpit́ jerako ehoṕena, E beṭa nonkan baṅ ganoḱ ạuri katha hoṛko cedaḱem metako kana? Uni Lạpit́ do̠ bo̠to̠r bo̠to̠rte menkeda, Sir nonkan kathań metako khan bohoḱ reaḱ uṕ algate usạra teṅgoḱtakoa ar ińaḱ kạpci kạmi hõ mońj hoyoḱtińa. Nonkate mit́ ghạṛite hoṛkoń kạpci daṛeakoa.

Lopsa kakaren ạḍi utạr gại ḍaṅgra menaḱkoa, Merom bhiḍi hõ menaḱkoa. Mit́ṭen gupiyiće tahẽkantaea. Uni do beste bae gupiyet́ko tahẽkana, Lopsa kaka do ạḍitet́e ạḍi ãṭe ạṛisena, ar uni gupi koṛae metadea, “ am do ado bạń dohomea, jomaḱ ńuiaḱ lać perećiń emam kana; menkhan ińren gại ḍaṅgra lać pereć do bam ạtiń biyet́koa. Ạḍi diniń sahaoket́mea. Ar gại ḍaṅgra hõko ososgoḱ kantińa.

Lopsa kaka do uni kuṛhiyạ gupi koṛa aćaḱ oṛaḱteye kol kadea. Ar mit́ṭen boge gupi koṛa ńame lạgit́e oḍokena. Mit́ṭen ato teye senena, ona atore mit́ṭen huḍiń koṛae sendra ńam kedea. Uni koṛaren apate kulikedea, ar uni hoṛ hõe rebenena. Ado bana hoṛte koṛa hõkin kuli kedea, Uni koṛa hõe rạskạyena, are hẽḱ got́keda. Uni koṛawaḱ kuṛại reaḱ hõkin galmarao goṭakeda. Uni koṛa do baskeaḱe jom keda ar aćaḱ pãera saṕkate Lopsa kaka sãoteye hećena.

Lopsa kaka do uni koṛawaḱ kạmi ńelte ạḍi ãṭe rạskạyena. Uni koṛa do setaḱ hõe beret́ godoḱa, ar gại ḍaṅgraye aṛaḱkoa. Baskeaḱ jom lạgit́ oṛaḱteye senoḱ khan, eṭaḱ gupi koṛa ṭhene bạgiakoa. Arhõe sen ruạṛ godoḱa, ar eṭaḱ koko senoḱ khan, unre ać hõe horho hataṛ koa. Okare mońj daḱ ńamoḱa, onḍege daḱ ńui laga idikoa. Ạtiń bilen khanko tikin doe aḍakoa, ar baṅ khan oṛaḱteye idikoa, ar goṛare aderkoa. Jom kateye jirạuḱa, ar gại ḍaṅgra hõko jirạuḱa. Tarasiń do arhõe aṛaḱkoa. Ar ạyuṕ do goṛare aderko jokheće lekha koa. Ona atoren do uni gupi koṛawaḱ kurumuṭu ńelte ạḍiko rạskạyena. Lopsa kaka hõ uni koṛa ạḍiye kusi ocoyede kan tahẽkana.

Mit́ okte Mit́ṭen Raje tahẽkana. Uni Raj do birre kaṭ mamaḱ lạgit́ thoṛa hoṛe hataoket́koa. Onko modre mit́ hoṛ do eṭaḱko mod khon mit́ ghạṛite ḍher kaṭe maḱkeda. Ona ńelte Raj do bogete rạskạyente uni kaṭ mamaḱić hoṛ maraṅić mente bachaokedete kuṛạie emadea. Khan uni hoṛ do arhõ rạskạte ạḍi jhũk monte kạmi ehoṕena. Pạhil candoge gel irạl (18) goṭen kaṭe maḱkeda, arhõ Raj do ạḍige kusi rạskạyena. Onkage dosar cando hõ gelmõṛẽ (15) goṭen ar tesar cando do gelbar (12( goṭen kaṭ-e maḱkeda.

Raj do pe cando tayom ńeńele hećenre uniaḱ kạmi ńelte hahaṛayena. Ente noa lahare uniaḱ kạmi ar kurumuṭu do judạge tahẽkana. Onate uni hoṛ ṭhen nonkan kạmi reaḱ karontet́e kulikedea. Kaṭ mamaḱić uni hoṛ doe roṛ ruạṛadea, E maharaj, jaoge jhũk ar kurumuṭuteń kạmikana, enrehõ cedaḱ je, kạmire thoṛań ḍhilạu akana ohogeń bujhạu daṛeaḱ kana. Pasećre umerte lahakante nonka kạmi hoyoḱ kana. Unre Raj uni hoṛe metadea, ṭhikgea, ṭeńgoć ạguitam se ńellege. Khan ona ńelket́ tayom uni hoṛe kulikedea, mase enḍekhan lạime noa candore mucạt́ dhao tis noa ṭeṅgoćem laser leda? Kaṭ mamaḱić oka roṛ ruạṛe emket́ ona ańjomte Raj arhõ ạḍi ãṭe hahaṛayena. Uni hoṛe menkeda, E maharaj jao hiloḱge thoṛa ḍher kaṭ maḱ iạte pe cando khon ṭeṅgoć laser reaḱ ạt se opsorge bạń ńam akada. Ado nit Raj ar uni hoṛ bana hoṛge kaṭ kom maḱ reaḱ karontet́kin bujhạu daṛeada.

Sikhạuna: Dhạrti jionre kamkaj são são jirạuḱ reaḱ hõ jạruṛ menaḱa. Enḍekhan kạmire kurumuṭu ar jhũk mon hijuḱa.

Mit́ṭen bir gajaṛre Siṅgho̠e tahẽkana. Ado mit́ okte uni Siṅgho do̠ bir gajaṛrege jạpit́ akat́ tahẽkana, unre mit́ṭen Goḍo do̠ uniaḱ ho̠ṛmo̠re dećkateć rạskạte khencer baṛae kana. Khange Siṅgho̠ do̠e ebhen got́ena are raṅgaoen Khan saṕkedete jome reaḱe kurumuṭukeda. Unre Toyo do̠ nehõrate Siṅgho̠e metaekana aṛaḱkạńme baṛe. Enḍekhan kathań emamkana mit́din nahaḱiń goṛo rehõń goṛowama.

Sạrige mit́din sikạriạ ko ona birteko hećente Siṅgho̠ ko saṕ idikedea. Ado̠ darere tol kate kajaḱko dalkedea. Uni Siṅgho̠ do̠ onḍe khon bańcaoḱ reaḱ jahan horge bae ńamet́ tahẽkante ãṭ aṛaṅte kikiạuate raraḱkan tahẽkana. Menkhan Goḍo do̠ uniaḱ aḍrao se raḱ aṅjomte harephare hećena ar tolakade ona babere ger kuṭrạkeda. Nonkate Siṅghoe bańcao kedea ar usạra ona bir gajaṛ khonkin dạṛ pharaḱkeda.

Mit́ṭen bir gajaṛ aṛere bar boeha koṛakin basoḱkan tahẽkana. Ado̠ maraṅić koṛa do̠ aćren huḍiń boeha ạḍi ãṭe nisrạuede tahẽkana ar uniaḱ jo̠to̠ jomaḱe jomet́ tahẽkana ar uniaḱ jo̠to̠ mońj ho̠ro̠ḱ bandenaḱe hataojoṅoḱ kan tahẽkana. Mit́din uni maraṅ koṛa do̠ hạṭiạre ạkhriń bakhra birte kaṭ mamaḱe senlena. Uni do̠ aema lekan dare dạrko mat́mat́te dãṛã dãṛãte, mit́ṭen gunidar dare ṭhene hećena. Khange ona dare ro̠ṛ go̠t́keda E boeha, dayakate alom mageńa. Aṛaḱkạń khanem, sona reaḱ apple jo̠ń emama.

Ado̠ uni koṛae rạjiyen torage darere apple jo̠ go̠t́ena. Menkhan uni koṛa do̠ monre lob-laloć hećadea. Ado̠ ona dare metaḱkana arhõ thoṛa apple den baṅkhan re̠he̠t́ sudhạń maḱ bhindạra. Uniaḱ onkan beohar ńelte jo̠ bo̠do̠lte uni koṛa cetanre sae ke sae sui-e ńurhoket́a. Tinre cando hạsuroḱ ehoṕena, uni koṛa do̠ haso jalate bhindạrena. Oṛaḱ bae ruạroḱkante huḍiń boeha do̠ bhabnate dadat́tet́ sendra senena.

Ackage tạńkhikeda dadat́tet́ aḱ hoṛmo do̠ suite pereć akana, ar duk-jala sahaokatet́ rehõ uniaḱ hoṛmo khonaḱ mit́ mit́te sanam sui-e chaḍao cabakeda. Uniaḱ ona daya mãyã ńelte maraṅ koṛa aćaḱ dos gunạḱte huḍiń boeha ṭhen ikại khojkeda. Are bo̠do̠lo̠ḱa mente ekṛaṛkeda. Ona dare do̠ maraṅ koṛawaḱ bo̠do̠lo̠ḱ ńelte kusiyena ar jạruṛ bhor sona reaḱ apple jo-e emat́kina.

Sikhạuna:

Daya Mãyãwan hoyoḱ do̠ jạruṛgea ente noa lạgit́te jaoge kuṛaiyem ńama.

Lo̠lo̠ setoṅ din. Aḍepase ekal nisunge muć hõ muć bako ńeloḱ kana. Lo̠lo̠ setoṅ din setoṅ reaḱ ãć se elaṅ hoṛmore bạṛtige aṭkaroḱa. Ado setoṅte mit́ṭen Tạruṕ do̠ daḱ tetaṅte kạluṅ dạbuṅe daṛa baṛaekan tahẽkana. Nunạḱ maraṅ bir gajaṛ okare daḱge banuḱa, jo̠to̠ pukhri ar nala ko ro̠ho̠ṛ caba akana. Khange disạ got́keda noa bir gajaṛre mit́ṭen pukhri menaḱa mente. Nonkan lo̠lo̠ setoṅ jokhen ona pukhri senlenre paseć daḱe ńama honaṅ.

Ado pukhri ṭhene senenre maraṅ utạr bir Sukri daḱ ńũi lạgit́ pukhri pheḍoḱe ńel ńamkedea. Tạruṕ do̠ pukhri seće koyoḱket́re cehel cepel ạḍigan daḱe ńel ńamkeda. Khange Tạruṕ ạḍi gaṛte aḍraoena. Uniạḱ aḍrao ańjomte bir Sukri do̠e hape got́ena, menkhan bae bo̠to̠rlena. Tạruṕ do̠ riạuḱ riạuḱ pukhri ṭhene dạr idiket́te memenkana, noa birren Raj kạnạṅ. Enḍekhan noa daḱ do̠ pạhilte ińgeń ńam lek kana. Bir Sukri hõe mengot́keda, am khonaḱ lahageń pheḍ akana. Nonkate rapṭha rạpṭhikin ḍhurạuena. Thoṛa ghạṛitege lạṛhại kin sạrdiyena. Lạṛhại lạṛhạite mit́ okte Sukri aḱ sunḍạ ḍaṭa do̠ Tạruṕ aḱ hoṛmore bo̠lo̠yena. Ar Tạruṕ aḱ gerte bir sukri hõ sahẽt́ bondentaea. Khan thoṛa ghạṛi tayom bana hoṛaḱ hoṛmo khon mãyãm jo̠ro̠ḱ ehoṕena arkin goć hapeyena. Noa ghoṭna mit́ ghạṛi badre daḱ sendra sendrate mit́ṭen Toyo nonḍe heć seṭerena. Inạkate Tạruṕ ar bir Sukri goć akane ńel ńamket́kina. Unkin ńelte bogete kusiyena ente nonkan maraṅ maraṅ jib janwar aḱ jel tisre hõ bae jom akada. Ado uni Toyo do̠ heseć sekreć lać pereć jomkate daḱe ńũkeda are mohnḍayena.

Sikhạuna: Ạuṛiaḱ kạphạriạu baṅkate apnarte muskilaḱ ko mimaṅsae hoyoḱa. Ente Tạruṕ ar Sukri mit́ sãote daḱkin ńũ lekhan nonka gujuḱ dosare o̠ho̠kin paṛaokoḱa ar Toyo hõ o̠ho̠ge jom daṛeakinkea. Onate huḍiń hapṛaḱ muskilaḱ ko apnarte mimaṅsa se phanḍ̣ao jạruṛ kana.

Aḍi din laha reaḱ katha. Mit́ṭen Toyo ar Ũṭ ạḍikin gatelena. Jao ghuṛige mit́ sãorekin tahẽnkan tahẽkana. Ar Jom ńu daṛa baṛae, gitić sanamaḱ mit́re. Bochor ke bochor nonkage parom calaḱkan tahẽkana. Onkage mit́ din hiloḱ jomaḱ sendrakin oḍokena. Ado ackage mit́ṭen tormuj bagwan re nońjor paṛaoentạkina. Onḍe mit́ṭen casa pahra se hohorhoić tahẽkan iạte bakin sen daṛeada.  Ado̠ unkin do̠ ona tormuj bagwan aṛere gajaṛrekin oko tahẽyena ar ńindạ koyoḱ horrekin tahẽkana. Ńuhum hijuḱkan re uni casa do̠ oṛaḱ sene mohnḍayena. Uni casa hoṛaḱ oṛaḱ do̠ khet́ pheḍrege tahẽkana. Ado̠kin hudisena jãhãnaḱge ạḍi nirạitekin cekaea mente. Enka menkateć banar gate mit́te ona tormuj bagwankin bo̠lo̠yena. Bo̠lo̠ torage ạḍi heseć sekreć rạskạte tormuj jojomkin dhurạuena. Bakin jom bhagaoḱ kana, arhõ jojom sanayet́kina. Menkhan lać do̠ perećentakina ar mit́ aṛe hõ phaka bạnuḱanaṅ.

Noa oktere Toyo aḱ bo̠ho̠ḱre mit́ṭen cintạ hećena, are kikiạuate huka hũa-huka-hũa raraḱe ehoṕena. Toyo aḱ ona raḱ ańjomte Ũṭ-e menkeda, E gate cedaḱem raraḱ kana. Amaḱ raḱ ańjomte Casa do̠e ebhenoḱa, are ebhenlen re alaṅaḱ ạḍi bạṛić dosa hoyoḱa honaṅ. Toyo do̠ landawate mengot́keda-alom bo̠to̠ro̠ḱa uni casa do̠ kạmite laṅga akana unạḱ algate ohoge ebhenlena. Baḍaeam ińaḱ mit́ṭen rog hoe akana-jom tayom huka-hũa-huka-hũa baṅ sereń lekhan jom baṅ hajamoḱtińa. Ona men torage arhõ kikiạue dhurạuena. Note Toyo aḱ onkan kikiạu ańjomte casa do̠e ebhen got́ena. Ar maraṅ utạr ṭheṅga saṕ kateć unkin sećge dạṛ hećena. Toyo ma mon monte noage khojoḱ kan tahẽkana. Khange uni casa ńelte Toyo do̠ jhạnṭi phãkte riạḱ riạḱe dạṛkeda. Menkhan becariạ Ũṭ do̠ unạḱ maraṅ hamal ho̠ṛmo̠ ante bae dạṛ daṛeada. Casa do̠ uni Ũṭge saṕkedete ạḍi ãṭe dalkedea. Ado̠ dal akhamakade dosare enkatege aćaḱ tahẽn ṭhạ̃ite calaoena. Khange Toyo do Ũṭ ńelte mengot́keda haere gate iń karonaḱte nonka dalem jomkeda. Ar emanteaḱko—

Ado Ũṭ hõ Toyo aḱ calaḱ cạtur bude aṭkar daṛeada. Onate onkan ạt ńańam horare tahẽyena. Mit́din ạḍi lolo din tahẽkana. Aḍepase ekal nisun jãhãn hoege banuḱa.Ado Ũṭ do Toyo metadea E gate dela hana jalapuri ritić reaṛ daḱre hoṛmolaṅ reaṛ ńõḱlege. Enḍekhan hoṛmo ko thoṛa Mońjge reaṛoḱa. Khange Toyo do ạḍi usạrae hẽḱ got́keda. Are menkeda, E gate paeraḱ man bạń baḍae cekateń paeraḱa? Ũṭe mengot́keda, alom bhabnaḱa iń nahaḱiń goṛowama. Inạkate banar gate tala daḱrekin pheḍena. Ũṭ aḱ katha leka Toyo hõ uniaḱ dea re deć hapeyena. Ar note Ũṭ do̠ khạndriń sećge mohnḍa calaoena. Ona ńelte Toyo do̠e memenkana, E gate cedaḱ nunạḱ bhitri sećem sen idiḱ kana nonka macoń unum gujuḱ.

Ado Ũṭ do̠ nonkae roṛ ruạṛadea, ińaḱ rog hoe akana, bhitri sećre bạń unumlen khan paeraḱ lekage bạń ạikạua. Inạkate tinre daḱ khonkin rakaṕena un jokhen Toyo aḱ do̠ ạḍi bạṛić dosa hoe akan tahẽkana. Enhiloḱ khonaḱ Toyo do̠ Ũṭ são ar bae khilḍuḱa. Ar nonkage Ũṭ do Toyo ṭhen badla hataoleda.