Mit́ṭe̠n bir re mit́ṭe̠n kạhũi tahẽkana. Uni do̠ jo̠maḱ sendrae lạgit́ niạ bir kho̠n hana bir, niạ ato kho̠n hana ato, niạ haṭ kho̠n hana haṭe̠ daṛan kan tahẽna. Mit́din mit́ṭe̠ć haṭre̠ ạḍi maraṅ ḍaṅgrako jabeledea ar jelko ge̠ge̠t́ jo̠khe̠ć uni do̠ mit́ṭe̠ć jel kuṭrạ kombṛo kate̠ birte̠ye̠ ruạṛ he̠ćena. Uni kạhũ do̠ ḍạrre̠ duṛuṕkate̠ rạskạte̠ jel jo̠jo̠me eho̠bo̠ḱa, un jo̠khe̠ć ona dare latarre̠ mit́ṭe̠n toyoe paro̠moḱkan tahẽkana. Kạhũ ṭhe̠n ona jel ńe̠lte̠ toyo do̠ ạḍiye laloce̠na ar kạhũ ṭhe̠n kho̠n ona jel cekate̠ye̠ hataoa onae mo̠tlo̠bkeda. Ar kạhũi metadea, “E̠ kạhũ am do̠ ạḍim cerhagea, amaḱ sereń rạṛ hõ ạḍi so̠ṛo̠mgetama. Ma se̠ mit́ṭe̠n sereńme̠, ạḍi ãṭ ańjo̠m sanaedińạ.”

Toyoaḱ mo̠tlo̠b bae bujhạule̠t́te̠ kạhũ do̠ kã-kã-kã sereńe̠ eho̠ṕ go̠t́ena ar aćaḱ moca kho̠n ona jel kuṭrạ do̠ o̠tre̠ ńure̠na. Jel ńur tora Toyo do̠ onae lako̠ṕkeda ar birte̠ye̠ dạṛkeda. Kạhũ do̠e bujhạukeda Toyo ṭhe̠ne̠ e̠ṛe̠ ocoakana. Uni do̠ dayage arhõ jo̠maḱ sendrae uḍạu calaoena.

Tumạl:Ańjo̠m jo̠ṅ jạṛ-pạhil kilạs

Mit́ okte mit́ṭen ato aṛere mit́ṭen darere mit́ dol gạ̃ṛĩko tahẽkana. Mit́din onko gạ̃ṛĩ do mit́ṭen ghonṭako sendra ńamkeda. Ado onko gạ̃ṛĩ do ạḍi rạskạ salaḱ ghonṭa ruruko lagaoena. Ar ona ghonṭa saḍe ańjomte ato hoṛ ạḍi ãṭko botorena. Adoko hudiskeda, paseć noa do jãhãn muhim se mũhĩn reaḱ cinhạ kana. 

Menkhan atoren mit́ṭen maejiu do bae botorlena. Uni maejiu do mit́ jhuṛi phol ante ghonṭa saḍe aten atente ona dare ṭhene senena. Ado sen soren khan ona dare latarre phol jhuṛi dohokeda.

Khange phol jhuṛi ńelte onko gạ̃ṛĩ do ghonṭa giḍikate phol jom lạgit́ko dạṛ ạgukeda. Ona okte uni maejiu do ghonṭa saṕkate atote ruạṛena. Ado atoren hoṛko uni maejiuwaḱ sạhũs ńelte ạḍi ãṭko rạskạyena arko sarhaokedea.

Mit́din mit́ṭen bạdạian sikṛĩć do kule metadea, “joto hoṛ amko botoram rehõ, iń do tis hõ bạń botorama. Amaḱ ḍaṭa ar rama do ạḍi lasera enrehõ iń são do ohogem daṛeaḱa. Am khon hõ iń doń daṛeangea. Ạḍi pạtiạu salaḱ noa kathań men daṛeaḱa.”

Khange sikṛĩć acaḱ dil ar daṛe uduḱ lạgit́ kul aḱ mũre ger bit́ena. Kul doe bujhạukeda sikṛĩć do aćaḱ mũre aṕ akana onate uni sabe reaḱe kurumuṭukeda. Menkhan bae saṕ daṛeadea. Sikrĩć saṕ baṅkate aćaḱ laser ramate aćge mũre raboṛ josena. Khange kul aḱ mũ khon mãyãm joroḱ ehoṕena. Kul ać são bae daṛelente sikṛĩć do kajake rạskạyena. Rạskạte enejoḱe ehoṕena.

Eneć enećte tinre coṅ sikṛĩć do bindi ganaḱre jhạliyena, bae disạleda. Ar jhạliyen são sãote bindi do sikṛĩće jomkedea.

Setoṅ din tahẽkana. Ado mit́din setaḱre horo ar sãk gaḍareko paeraḱkan tahẽkana. Ackage onko do gaḍa hanasa paera paromoḱ reaḱko hudiskeda. Ado hudisket́ lekageko kạmikeda.

“Adoko ropoṛ kana, gaḍa hanasabon calao daṛeaḱ khan ạḍi boge hoyoḱa. Menkhan iń do ape leka usạra bạń calao daṛeaḱa. Iń do ạḍi tayomreń tahẽna.” Horo do sãk noa kathae metat́koa.

Khange onko sãk do cet́ lekate gaḍako paromoḱa onako hudis ganḍonkeda. Onate onko do mit́ṭen ṭheṅgako jogaṛkeda.

Barea sãk do ona ṭheṅga ạkinaḱ ṭhonṭatekin ger keda, ar horo do ona ṭheṅga talare ger urićkeda. Ado sãk do uni horoe metadea, “calaḱ okte am do cet́ katha hõ alom roṛa. Ente roṛ lekhange gaḍa daḱrem ńuroḱa.” Khange horo do onako kathae hẽḱada. Menkhan thoṛa sạṅgińko calaoenre horo do roroṛe ehoṕen khan gaḍa daḱre ńurena.

Mit́din mit́ṭen banḍhej suṅkạl cẽṛẽ lil roṅ hakoe saṕkedea. Hako do ạḍiye botorena. Aćaḱ jiwi bańcao iạte lil hako do suṅkạl cẽṛẽ metadea, “Daya kate aṛaḱkạń baṛe.” Baṅkhan iń do dareń benaomea. Unre do ar cele hako hõ bam jom daṛeakoa.

Menkhan ona kathate cet́ kạ̣mige baṅ hoelena. Suṅkạl cẽṛẽ do lil roṅ hako jome lạgit́te hudiskeda.

Lil hako doe menkeda, “am do bam baḍaea amaḱ aṛaṅ do liṭhur aṛaṅ kana? Amaḱ aṛaṅte sereń ańjom lekhan ạḍi bhage hoyoḱa. Mit́ṭen sereń me! Sereń ańjomte enḍekhan pukhriren joto hako ko hijuḱa ar mit́ dhaote ạḍi utạr hakom saṕ daṛeakoa.”

Ona katha ańjomte suṅkạl cẽṛẽ doe kusiyena. Khange suṅkạl cẽṛẽ do sereń lạgit́ mocae jhićket́ torage, budan hako do uniaḱ moca khon pukhrire donkeda ar paera paerate ạḍi sạṅgińe calaoena. 

Mit́ṭen bir re kule tahẽkana. Uni do din hiloḱ mit́ṭen kate janware sikạret́ ko tahẽkana. Enhiloḱ do mit́ṭen calak se budan kulại sikạr reaḱ katha tahẽnkantaea. Kul ṭhen hećen tora kulại do mit́ṭene hudis ńamkeda. Uni do ạḍi ãṭ aṛaṅ ar kajakte sahẽt́e dhurạuena. Khange kulại aḱ sahẽt́ ńelte kul doe hudiskeda, nui do paseće dạṛ ạgukeda. Adoe kulikedea, “Cekayenam? Amaḱ oṛaḱ ma sorre, enḍekhan cedaḱ bam taṛam ạguleda.”

Kulại doe menkeda, “E raj, thoṛa laha iń do mit́ṭen kul aḱ phãndreń paṛaolena. Onḍe khon jãlãlekateń bańcao ruạṛena. Uni kul do aćge noa bir ren raj mente dạbi kana. Menkhan iń do am tahẽn tuluć eṭaḱ hoṛ ren sikạr do tis hõ bạń hoyoḱa.

Khange kul doe menkeda, “Iń nonḍe tahẽn tuluć okoe do noa bir ren raje dạbi kan, den saṕ ạguyepe. Ado kulại do uni kul mit́ṭen kuń ṭhene idikedea are metadea, noa kuń re uni kul do menaea. Kulại aḱ katha lekage kul do kuń bhitri oyoṅ ket́ khan aćaḱ mẽt́ muṭhạne ńel ńamkeda.

Khange lelha kul aćaḱ mẽt́ muṭhạn ńelte eṭaḱ kul menaea mente hudiskeda. Onate kul do uni são lạṛhại lạgit́ kuń re don khańjoyena. Nonkate uni calak ar budan kulại do banḍhej kul aḱ phañd khon eken ać eskar do baṅ, bickom bir ren joto jib-janware bańcaoket́koa.

Ińaḱ ńutum do̠ Jo̠bamuni, aleaḱ ato ńutum do̠ Mirjạ. iń do̠ kuṛi gidrạ kạnạń, ińaḱ umer do̠ pon (4) serma. Ińren bar boeha menaḱkina ńutum tạkin do̠ Asa ar Bhorsa. Unkin dinạm setaḱ to̠ra jo̠maḱ lạgit́kin raga.

Ale oṛaḱre̠ aema bhiḍi me̠naḱkoa. Ar iń do̠ jo̠to̠ bhiḍi ńutum iń do̠ho̠ akat́takoa ar ńutum ńumkate iń ho̠ho̠ lekhan iń ṭhenko dạṛ ạguia ariń coḱakoa. Ar iń baba do̠ dinạm cẽṛẽ ṭuṭi goćkoa ar iń do̠ jel utu ạḍiń kusiaḱa.

Iń do̠ MLE  isulreń paṛhaoḱa ar dinạm iskulteń calaḱa. Iń do ińaḱ iskul ạ̣ḍi aṭiń kusiaḱa. O̠lo̠ḱ paṛhao do̠ ạḍi mojiń ạikạua, lạṭu kate didi muniń hoyoḱa.

Ol Toṅgeaḱ.

Ado̠ onkoko me̠n go̠da, Ale se̠n do̠, baba, teṅgo ruạge tho̠ ạḍiye jạbun akat́lea. Ado̠ unkinkin me̠n ruạṛket́a, Ona ruạ do ale se̠n hõ̠ onkage ạḍiye jạbun akat́legea. Khange ado̠ko landa baṛawana. Ado̠ jaṅga daḱko oḍokket́a, ado̠ jaṅgako ạbuḱket́kina. Ado̠ inạkate thamakurko benaoket́a, ado̠ko jo̠m baṛaket́a. Ado̠ unkin peṛa ho̠ṛ do̠ bạrsiń din o̠nḍe̠gekin tahẽ̠yena.

Ado̠ Arhõ̠ o̠nḍe̠ khonkin ruạṛ kana. Arhõ̠ onkage uni jãwãe gomket do̠ daḱre do̠e panahiḱa ar ghuṭure do̠e bo̠ja; ar dare buṭạre do̠e chataroḱa ar setoṅre do̠e ạsit́kataea. Ado̠ onka onkatege oṛaḱtekin he̠ć se̠ṭe̠rena. Ado̠ uni ho̠po̠nerat do̠e lạiae kana, E̠ mạ̃i, uni jãwãe do̠ eṅgate, cet́ baṅ se̠ ạḍi bạṛiće lelhagea. Ado̠ uni ho̠po̠nerat do̠e me̠net́a, Cekate, baba? Lelha leka ma ba co̠e ạikạuḱ.

Ado̠ uni haṛame me̠nket́a, Baṅa, mạ̃i, ạḍi lelhań ạikạukedea. E̠nte no̠nḍe̠ khon peṛa ho̠ṛo̠ḱliń calaḱ kana, unreń ńe̠le kana, baṅma, daḱreliń paro̠moḱ jo̠khe̠ćgeye panahiḱ kana ar ghuṭure do̠e teweńkaḱ kana; ar dare buṭareliń umuloḱ jo̠khe̠ćgeye chataroḱ kana, arhõ̠ o̠nḍe̠ khonliń beret́ calaḱ khan do̠e ạsit́kataea. Onate uni do̠ ạḍi lelha iń do̠ń metae kana.

Ado̠ uni ho̠po̠nerate me̠nket́a, Baṅa, baba, bae lelhawa, amgem lelhagea. Ado̠ ona kathage ạkin apa ho̠ngekin e̠pe̠se̠t́ kana. Ado̠ ho̠po̠nerate me̠nket́a, Baṅa, baba, ńe̠lme, ona reaḱ bhe̠d nãhãḱ iń lạiama. Ṭạnḍire do̠ cedaḱ bae panahiḱ kana? E̠nte ṭạnḍire ma ńe̠lkateye taṛamet́ kan, onate bae panahiḱ kana; ar daḱre tho̠ bam ńe̠let́a, daḱ bhitrire cet́ co̠ṅ menaḱ-jaṅ co̠ṅ, jạnum co̠ṅ, dhiri co̠ṅ-ona iạte uni do̠ daḱre do̠e panahiḱ kana. Ar dare dare buṭạre do̠ caḱe chataroḱ kana? E̠nte ḍạr alo ńũraea me̠nte, se̠ darere do̠ cẽ̠ṛẽ̠ emanko tahe̠na, onko do̠ aloko moelawaea me̠nteye chataroḱ kana, ar phãkre mae ńe̠l daramge; onate phãkre do̠ bae chatarlena.

Khange ado̠ uni haṛame me̠nket́a, Baṅa, mạ̃i, sạrige tho̠ thikgem roṛket́a! Ińge e̠nḍe̠khan iń lelhayena. Ado̠ uni kuṛiye me̠nket́a, Hẽ̠ baba, amgem lelhagea. Ado̠ko inạḱ hạbićkat́gea, ado̠ko thir baṛayena Ado̠ uni haṛam do̠ dosar hiloḱ ako oṛaḱteye calaoena. Ado̠ arhõ̠ hana Mag cando jo̠khe̠ć unkin ho̠po̠nerat jãwãe gomket ṭhenge peṛa ho̠ṛo̠ḱe calaoena. Ado̠ unre bạndikoe ńe̠l baṛayet́takoa, are metako kana, Okorko, tinạḱpe ader akat́a? Ado̠ uni jãwãe gomkete me̠net́a, ne̠ḱe̠ko baba, ninạḱgele aderlet́a.

Ado̠ uni haṛame me̠nket́a, Henda jãwãe, ninạḱge hoelena? Khe̠tre ma ạḍi utạrliń ńe̠llet́. Ado̠ uni jãwãe gomkete me̠nket́a, Hoe do̠ ḍherge hoelena, baba, ado̠ laharegeliń kại akat́ khan, ado̠ onkogeliń e̠m baṛawat́koa, arliń khajna baṛaket́a; onkate jo̠to̠ cabayena.

Ado̠ unrege uni haṛame me̠nket́a, O̠ne̠ jãwãe, e̠n betarrege co̠ṅ ạliń do̠liń metaben kan tahẽ̠kan, He̠nda jãwãe, pãeṛẽ do̠ben e̠se̠t́ akat́a se̠ baṅ? Ado̠ben me̠nket́a, E̠se̠t́ akat́gealiń. Me̠nkhan pãeṛẽ reaḱ bhe̠d do noa kana: pãeṛẽte daḱ ạtu calaḱ leka noa dho̠n calaoentabena. Ado̠ mase̠ bujhạuben, ṭhik kana se̠ baṅ. Ado̠ uni jãwãe gomkete me̠nketa, Baṅa, baba ṭhikgeben metat́lińa; me̠nkhan do̠ ạlińge baliń bujhạulet́a, pãeṛẽte daḱ ạtu calaḱ leka ạlińaḱ dho̠n cabayena.

Ado̠ in maraṅgea katha do̠; cabayena.

Tumạl: Santal Folk Tales 

Ol Toṅgeaḱ.

Ado̠ peṛa oṛaḱkin tioḱket́a. Khange ado̠ parko̠mko belat́kina, ado̠ onarekin duṛuṕena. Ado̠ daḱ taṅkateko ḍo̠bo̠ḱ baṛawat́kina; Ado̠ko kuli baṛayet́kina, cele baba, aben do̠ oka se̠ć khonben hijuḱ kana?

Ado̠kin me̠nket́a, Oṛaḱ se̠n khonge, ape hiḱrigeliń he̠ć akana; ado̠liń me̠nket́a, Delaṅ, nokolaṅ hiri baṛa ạgukoa; ḍher din khon noko do̠ babon hiri akat́koa. Ado̠ onka me̠nkate teheń do̠liń taṛam go̠t́ akat́a.

Ado̠ko me̠nket́a, Bogege e̠nḍe̠khan, ale hõ̠ jaogele kho̠jpea; me̠nale, Phalnaren babateko do̠ ne̠s do̠ bako he̠ć baṛawabon kana. Ado̠ nõ̠ḱõ̠eben he̠ćente ale hõ̠ ạḍile rạskạyena; baṅkhan noko gidrạko do̠liń metakoa, Ne̠s do̠ ya nui phalna go̠ṛo̠m baba do̠e hiṛińket́bona. Abo do̠ okorko hiriyet́bona? Onkaliń metakoa. Ado̠ unkinkin me̠n ruạṛa, Hẽ̠, jaoge hijuḱ do̠le me̠na, me̠nkhan o̠pso̠rge bale ńam: hinạ khon hinạ kạmitege hinạ khon hinạ kạmitege, teheń hijuḱ gapa hijuḱ, enkategele tahẽ̠yena, bale he̠ć daṛeat́a. Oka ma hijuḱ lạgit́ sapṛao baṛakatege arhõ̠le thirenge. Ado̠ noko jãwãeteko ṭhen iń he̠ćlena, ado̠ nokoń hiri baṛaket́koa; ado̠ nui jãwãegeń ḍoḍekede e̠nkathae, Oḍok akan sik delaṅ noko peṛa hõ̠laṅ hiri baṛa ạgukoa. Oṛaḱ khon sapṛao hijuḱte do̠, e̠nkathae, muskilgea. Onka me̠nkate ado̠ nõ̠ḱõ̠e ape se̠n dhạbić geliń he̠ć idi akana.

Ado̠ arhõ̠ onkoko ro̠ṛ ruạṛa, E̠ baba, ado̠ eṭaḱ eṭaḱaḱgebon galmarao kana. Ado̠ cet́ leka jivi jạti do̠, boge baṛageape?

Ado̠ unkinkin me̠n ruạṛ, Hẽ̠, ado̠ niạ ghạṛi do̠ Cando baba dayate ar apeko dohaete go̠ć sare̠ćko do̠ sanam ho̠ṛ besge ne̠s do̠ menaḱlea. Ini phalṭaḱ thoṛa dine ruạ ńõ̠ḱlen tahẽ̠kana; ado̠ ini hõ̠ ran baṛa ocoade khan do̠, ado̠ ṭamak ṭumuke phạriyạyengea. Ado̠ Cando dohaete ne̠s do̠le bes baṛagea. Ado̠ apege cet́ leka menaḱpetabona? Ado̠ de̠ne̠ banar bupujhạulen khan, ạḍi beskoḱtabona.

Ado̠ onka peṛako ro̠ṛ ruạṛa, Hẽ̠, ado̠ niạ ursin bạrsiń do̠ ape dohaete ar Cando dayate, o̠ne̠ko me̠n leka, e̠r sare̠ć itạ ar go̠ć sare̠ć jivi, ado̠ je sare̠ć ho̠ṛ do̠, baba, ape dohaete nin din do̠ jivi jạti, ho̠ṛmo̠ harta bes baṛageale. Ado̠ onkoko me̠n ruạṛa, Cando dayate besgebon ńam kana, je jive̠t́ tahe̠n khan do̠ nẽ̠ḱẽ̠ nenkabo ńe̠pe̠l kana; ar go̠ćlen khan tho̠ sanam cabayena; ado̠ ghuriạ̃ babo ńe̠pe̠l kana. Ado̠ko me̠na, Hẽ̠ sạriaḱge, ona do̠ katha kangea.

Ol Toṅgeḱa-

Gam Gam kudum kudum

Okate pusim calaǩkan,

Gurić halaṅiń calaḱ kan

Okrtam pusi  jhuṛi do,

Mĩhũ gecoe lebet́ rạput́ket́

Cedaḱ mĩhũm lebet́ rạput́ket́

Gại geco bae towayet́

Cedaḱ gại bam towayet́,

Ghãs geco baṅ ghasõḱkan

Cedaḱ ghãs bam ghãsoḱkan

Daḱ geco bae daḱet́

Cedaḱ daḱ bam daḱet́

Roṭe geco bako raḱet́

Cedaḱ roṭe bape raḱet́

Ḍuluḍuṅ biň gecoko jiomet́le

Inạge hedoḱ inạge mańjan kĩṛĩyạt́ kõṛyõṭ́.