Nirmo̠l atore Timothi Ṭuḍu ńutuman gidrạ do daka aloe hạrijte̠ kạṭićre̠ lạṭu gamlare̠ dakako emaekan tahẽ̠kante̠, atore̠n landa sạgại ho̠ṛ do̠, Ḍo̠gra kate̠ko metaekan tahẽ̠kana. Lạṭu ńõ̠ḱen khan uni do̠ oṛaḱre̠n ho̠ṛ pạṭ kạmiko lagao kedea, atorege.

Mit́ serma bạrsạre Ḍo̠gra do̠ kisạ̃ṛaḱ hoṛo ro̠ho̠e lạgit́e̠ siạḱkan tahẽ̠na. Paṛa pạṛi si lo̠so̠t́ lạgit́ murukte̠ ḍaṅgrae lagae̠t́kinạ ar ać latar kando̠rre̠ do̠ atore̠n ho̠ṛte̠ pereć. E̠he̠n okte̠re̠ pathar pe̠re̠ć ho̠ṛ talare̠ oka kho̠ć co̠ mit́ṭen toyoe upelena goṭa patharre̠n ho̠ṛe̠ bilbilạu cabake̠t́koa. Hante̠ hõ̠ ko dho̠r dho̠re kana no̠te̠ye̠ dạṛeda, no̠te̠ko hại hạiae kana hante̠ye̠ dạṛeda goṭa pathare̠ manḍrao baṛaekana, cokoḱ jaegage bae ńameda.

Hante̠ khoćko lagakede khan uni toyo do̠ Ḍo̠gra aṛe latar pinḍhạ se̠ć lekate̠ dạṛ ạgue̠t́ kane̠ ńe̠lte̠ ar bae sambṛaolena, soja pãeṛã ṭheṅgawante̠ nahe̠l si bạgikate toyo lagae do̠n calaoena. Barea pea pinḍhại do̠n paro̠m go̠t́keda tesar pinḍhạre do̠ luṅgire̠ chanda kate̠ latar goḍa lo̠so̠t́re̠ye̠ bit́ena ar aćaḱ luṅgite̠ aćgeye̠ hạruṕena. Uni ńe̠lte̠ goṭa patharre̠n ho̠ṛ lać ho̠bo̠r ho̠bo̠r te̠ko landawadea. Dayage uni do maṭar muṭure̠ beret́ he̠će̠na. Note̠ siạḱ ḍaṅgra ma toyo ńe̠lte̠ bo̠to̠rte̠ nahel niạge canḍbo̠l kuṭuṅ kate̠kin dạṛke̠t́, ḍaṅga pinḍhạre̠ badhao kate̠ nahel makin rạput́ke̠t́. Inạ tayo̠m Ḍo̠gra do̠ toyo lagageye̠ bạgikeda.

Sedaere Ram tako oṛaḱ pheḍre mit́ṭen Baṛe darere ạḍi maraṅ ḍonḍhor tahẽkana. Ona ḍonḍhor redo mit́ṭen toyoye tahẽkana. Ar uni toyo do ńindạ jokheć ḍonḍhor khone oḍokoḱa. Oḍokkate Ramtakoaḱ ato jom sendrae calaḱa. Mit́din uni toyo do Ram takoaḱ sim gudṛi ṭhene lambet́ akan tahẽkana. Sujuk ńamtora uni do Ram ren lạṭu araḱ sim sạnḍi gerkate ḍonḍhor seće dạṛkeda. Ḍonḍhor re bolokate raṭpaṭ sime jomkedea. Ar rạskạte ạḍire uni toyo do hukka huạ hukka huạe sereń keda.

Kocle ghuṭu atore̠ ạd kho̠nge so̠hrae po̠ro̠b do̠ ạḍi jo̠mo̠k ar rạskạwante̠ko manao ạguet́kana. So̠hrae re do̠ nawa nawa kicrićko horok bandea. Unre̠ do̠ peṛa-pạruạko nẽota bạṛtikoa. Niạ so̠hrae re do̠ Chitạ mạ̃i do̠ ạḍi ãṭe rạskạḱ kana. Cedaḱ je ać didi teńaṅ takoko se̠ṭe̠re̠n khan Chitạ mạ̃i do̠ hako pako ganḍoe bilat́koa. Ado̠ loṭare daḱ ar thạri ạgukate jaṅgae ạruṕket́koa, ar ać teńaṅ do̠ jaṅgae kaṭko̠m kedea. Ać teńaṅ do̠ eṛeye lạgit́e bokṛo kedea ar Chitạ ṭhen kho̠n aṛago̠ḱ lạgit́e kurumuṭukeda. Bae daṛeat́te ać teńaṅ do̠ paesa te̠ye̠ chinḍạuena. Paesa ńamke̠t́te Chitạ mạ̃i do̠ ạḍie rạskạena. Ać go̠go̠ do̠ ḍoboḱ jo̠har kate oṛaḱ te̠ye̠ ader ke̠t́koa.

Ạyuṕen khan atoren jo̠to̠ mạndạṛiạ naconiạ do̠ kulhire enejo̠ḱko onḍoṅena. Chitạ mạ̃i tako hõ ona e̠ne̠ćreko se̠le̠t́ena. Mõṛẽ siń mõṛẽ ńindạko rạskạena. Mucạt́ hilạḱ do̠ barhere kaera dareko bida ar ona cetanre sunum piṭhạ do̠ho̠ kateko tuńa. Ona ńel lạgit́ durum durum ho̠ṛko jarwaena. Pạri pạrite jo̠to̠ ho̠ṛ ona sunum piṭhạko tuńkeda. O̠ko̠e hõ bako jo̠s daṛeada. Chitạ mạ̃i ać teńaṅ do̠ ạḍi kajak sikạriại tahẽ̠kana, ti ạḍi jo̠s getaea, uni do̠ mit́ tuń rege ona sunum piṭhại tuń ńurhạkeda. Chitạ mạ̃i sãote arhõ aema gidrạko dạṛ idikeda, Chitạ mạ̃i ge ona sunum piṭhại halaṅ go̠t́keda ar jo̠to̠ ho̠ṛteko jo̠m keda. Ar ać teńaṅ do̠ rạskạteko ghõṛã kedea ar do̠n do̠nte oṛaḱteko calaoena.

Tumạl: Aṅjo̠m jo̠ṅ jạṛ

Bahamoni Supen ar Upen tako ato do̠ kaṛbaṭola. Onko atore do̠ eṭaḱ ato hoṛ hijuḱ bako mena. Cedaḱje ako ato ho̠ṛ do̠ ạḍi lisṭigeko tahẽ̠na. Kićrić khạnḍuạḱ oṛaḱ duạr ar ako hõ sapha sạphi bako tahẽ̠na. Bahamuni, Supen ar Upen do̠ MLE iskulre̠ko paṛhaoḱa. Didimuni Ańjoli do̠ onko sapha sạphiye cet́ akoa ar atore̠n ho̠ṛko hõ sapha sạphi tahẽ̠ne metakoa. Me̠nkhan o̠ko̠e hõ uniaḱ katha ańjo̠m hõ bako ańjo̠mtaea ar bujhạu hõ bako bujhạutaea. Supen, Upen ar Bahamuni, goṛomba mamago̠ tako ṭhen calao kateko bujhạuakoa. Me̠nkhan onko o̠ko̠e hõ bako bujhạua, menako unạḱ din kho̠n no̠nkage menaḱlea cet́ hõ baṅ hoyakantalea ar cet́ leka baṅ mo̠ńjle tahẽn?

Bako bujhạulet́te onko do̠ ạḍi kạ̃hĩsko ạikạukeda.Cet́ko cekaea bako bujhạu daṛeaḱkan tahẽkana.Niạ babo̠t didimuni sãoteko galmaraokeda. Didimuni sãote oṛaḱ oṛaḱko calaoena arko lại jạhirat́koa. Ona atore Munṭu ńutuman mit́ ho̠ṛ kajak ruạ ńamkedete Hospiṭal teko idikedea. Onḍe cikitsa kate̠t́e mo̠ńjen khan oṛaḱteye ruạṛ he̠će̠na. Didimuni sãote onko do Munṭutako ṭhe̠nko calaoena ar sapha sạphi tahẽ̠nko metadea karo̠n lisṭigeye tahẽ̠kante unạḱ ãṭe ruạlena. Ona tayo̠m ato ho̠ṛko hõ sapha sạphiko tahẽ̠na. Nito̠ḱ Upen, Supen ar Bahamuniaḱ ar jahan mo̠n duk bạnuḱa. Onko do̠ ạḍi rạskạteko tahẽ̠na.

Tumạl: Ańjo̠m jo̠ṅ jạṛ

Mit́ṭen kisạ̃ṛ hoṛaḱ oṛaḱre ạḍi utạr cuṭiạko tahẽkana. Onko do kisạ̃ṛaḱ oṛaḱ ṭhenko bhugạḱ keda, ar hoṛo caole hõ bebạṛićko berbad keda. Uni kisạ̃ṛ hoṛ do onkae ńelket́ khan, mit́ṭen ạḍi maraṅ bhonḍa pusiye ạsul kedea. Uni pusi do jaoge mit́ bar cuṭiại saṕ jom koa. Ḍher din tayom Cuṭiạ doko marao ńoḱena. Menkhan onko do pusi botorte bhugạḱ khon bako oḍok daṛeaḱ kan tahẽkana, ar reṅgećte ạḍi ãṭ harkhetoḱko ehoṕena.

Bhạg leka mit́din pusi do oka sen coṅe sen akan tahẽkana. Ṭhik inạ takre bebaḱ Cuṭiạ oḍok jarwayente bạisiko duṛuṕena. Unre noako solha keda baṅma nui pusi do aboren ạḍi maraṅ bạiri kanae. Nui pusi menaete aboaḱ oka sukge bạnuḱa. Ona iạte nonkanaḱbon upạia jemon mit́ṭeć hõ aloe jom daṛeabon.

Mit́ṭen cuṭiạ doe mengot́keda nui pusi do cet́ jom hõ bae ńamet́te aboe jomet́bona. Onate jom lạgit́ dinạm hiloḱ toa dahe bon emae khan beskoḱa.

Dosariće mengot́ket́a noa do oho hoe daṛelena, ente pusi ma coṅ toa celaṅ pheḍregeye duṛuṕkoḱ.

Tesariće menkeda abo sanamko te mit́ dhao gan unibon otale khane botorkoḱa ar tis hõ ohoe heć baṛalena.  

Poniće menket́a, noa ma ṭhik ma ṭhikge menkhan jãhãe bon ger ocole khan se abo cetanreye bindạṛlen khan coṅe goć utạr bon ente lać hõ lać ḍhobo ḍhobo. Inạkate mit́ṭen kạṭić cuṭiại menket́a ona do baṅ mit́ṭeć jhunkạ hoṭoḱ rebon akawae khan beskoḱa. Ado jãhãtinrege uniye hijuḱ bon baḍae daṛeaḱa, ar bańcaoḱ reaḱbon ạt daṛeaḱa. Noa ańjomkate mit́ṭen cuṭiạ haṛam doe menket́a hẽ menkhan okoe jhunkạ doe tolaea? Nonkako galmarao kan ona takrege miuṅ miuṅ ate pusi hijuḱ kanko ańjomkedea. Khan am iń phać phoć hante nhateko ńir paskaoena ar hako pako apan ạpin bhugạḱre ko ńir boloyena. Ar jãhãnaḱ ạuriko goṭae rege bạisi bhaṅgaoentakoa.

Cạt bạisạk lolo setoṅ

Ạḍi gorom ạikạuḱ,

Hoe begorte kuńḍi miru

Raḱet́ ńum halaṅ.

Pus mag mas poyoṛ hoe te

Oṭaṅ hijuḱ kuṛhạ,

Ona reaṛte reṅgeć oreć

Joroḱ ako seṅgel kote.

Goḍo ar biji do ạḍi gatekin tahẽkana. Goḍo doe tahẽna bugạḱre ar biji doe tahẽna bir gajaṛre. Din hilạḱ goḍo do setaḱ ạyuṕ biji ṭhen senkate suk duk reaḱkin gapal maraoa. Mit́din biji do goḍ̣oe metae kana, E ya gate din hilạḱ am do iń ṭhenem hijuḱ kana. Iń são suk duk reaḱ katha ko gapal marao lạgit́ menkhan iń do mit́din hõ amaḱ oṛaḱ daṛan bạń calaḱ kana. Onate gate iń do ạḍi kosṭoń bujhạueda. Goḍo doe menkeda, E ya gate kosṭo alom bujhạua. Bhabna reaḱ katha cet́ iń mena, ińaḱ oṛaḱ pase rege menaea mit́ṭen jom raj biń. Namliń khange jomeńa. Onate din hilạḱ am seć reń tahẽn kana. Biji menkeda, E ya gate cet́ reaḱ botor mase? Iń menạń rehõ bhorsa bam ạikạueda? Unạḱ din khon iń ṭhenem hijuḱ calaḱ kana bacom lạiạń kan.

Goḍo doe menkeda, E ya gate am lạiam sạhũs bạń ńamet́ tahẽna. Nit amaḱ katha ańjom kate monre ạḍi daṛeń bujhạueda. Biji menkeda, bejae gate mase beret́ me ar dela idiyiń me uni jom raj bińaḱ oṛaḱ. Adokin calaoena menkhan biń do ḍerare bae tahẽkana. Biń do jomaḱ sendrae calaoakan tahẽna. Adi biji ar goḍo duṛuṕ akan oktege biń do sikạr jom kate ḍerate boloḱ oktege biń ar biji do lạṛhại kin lagaoena. Ḍher okto lạṛhai tayom bińe laṅgayen khan biji do bińe ger goć kedea.

Hola tikin khon Bạblu eṅgat Miru Kisku do dhãoṛa dhạ̃oṛi goṭa ṭola daṛa daṛate sanam hoṛko ṭhen goṛo lạgit́e nehõroḱ kana ar jao ghuṛigey homor halaṅeda. Miru Kisku tako oṛaḱ do parwa bir cetan ṭola re, sanamko lekage uni hõ mit́ṭen mońj sajao akan baha bagwan lekan mit́ gharońj ge tahẽkantaea. Bạblu apat Sona Murmu do eṭaḱ hoṛaḱ khet re kạmi kate aćaḱ huḍiń gharońje sajaoleda. Ar ona iạte uni do ạkin juri pạriaḱ dulạṛ ren jo Bạblu Murmu lạgit́ aćaḱ rojgar reaḱ thoṛa thoṛate doko jarwa kate mit́ bighạ jumi hõe kirińkeda. Ar dulạṛiạ hopontae oloḱ paṛhaoḱ cet́ ocoye reaḱ sanam lekan bebostha lạgit́ hõ saṕṛaogeye tahẽkana. Onatege uni do sur School re paṛhaoḱe ehoṕket́te bhage result salat́ jao serma ge cetan class te rakaṕ calaḱe ehoṕena. Ar nonkatege mit́din do high school pas kate thoṛa sạṅgiń reaḱ bajar college reye bhurtikedea.

Monre ạḍi as tahẽkantaea beṭa tae do mit́din ạḍi maraṅ lek manan hoṛe hoyoḱte ona ṭoṭharen sanam hoṛko do uniko Manot arko sarhaoea, netar khonge ato ṭola ar aḍe paseren hoṛ kodo hạṭiạ kore ńapam kateko metaea, am doya Sona ạḍi bhage moloṅ tam, amren koṛa do nãhãḱ ạḍi maraṅ daman hoṛgeye hoyoḱa. Onako katha ańjomte Sonawaḱ koṛam do rạskạte cehel cepeloḱ kantaea. Ṭhik onkage Bạblu hõ sohor college re aćaḱ oloḱ hõe calao idiyet́ kan tahẽkana, college reaḱ hostel re tahẽn khạtir te netar do Bạblu khoroc kohõ bạṛtigeye khojogoḱ kana, ona iạte ać baba do nalha kạmite gharońj ar Bạbluwaḱ oloḱ khoroc ar bae kulạu daṛeaḱ kana, onate Sona do nit do aḍe ṭolare mit́ṭen kisạ̃ṛ ṭhen gutiye boloyena.

Menkhan uni do umer sećte ḍhere lahaḱ kan tahẽnte laha leka do ar bae kạmi daṛeaḱ kana. Jaoge hana nawa ruạko ńam gode kana, enrehõ Bạbluwaḱ darakan jion napaete benao rakaṕ lạgit́ do ãṭ kurumuṭu do bae thiroḱ kana. Onka onkate din, mạhnạ, cando parom calaḱte bochor mucạt́ hõ heć seṭeren khan Maraṅ din reaḱ chuṭi hõ hećena, ar Bạblu hõ chuṭi bikạua mente thoṛa din lạgit́ oṛaḱteye hećena. Bạblu ać go-baba do hopon tạkin jemon oṛaḱre tahẽn bhor jãhãlekan eṭkeṭõṛẽ alo hoyoḱtae ona reaḱge jao gekin bhạbitoḱ kana. Thoṛa din paromen tayom mit́din setaḱre Bạblu eṅgat do Bạbluwaḱ aṭet́ samṭao jokheć aṭet́re mit́ṭen araḱge khạli botole ńamkeda. Benet́ jhićkateye ji laga keda bogete jhãj ar ran-ran machage so kana. Ado baskeaḱ ko jom oktere Bạbluye kulikedea, henda bạbu aṭet́re cet́ botol coń ńam akat́a ekal ran range so kana. Bạbluye roṛ ruạṛkeda, “hẽ go rankangea. Hola mander khan ceka coṅ bohoḱ hasu hasuń ạikạuet́kan tahẽkana to, onateń kiriń leda”. Nonḍe lại tora ganoḱa je netar do Bạblu college hostel re tahẽte mit́bar bạṛić gateko são ona botol reaḱ do ạḍi ãṭe sẽṛãwakada. Jao ńindạge ona baṅ khan jạpit́ge baṅ hoyoḱtaea. Eken ona moto do baṅ aćren gateko são sanam lekan bạṛić kạmikore hõe seledoḱ kana.

Bạblu chuṭi cabakate college te ruạṛoḱ okte re ać go-baba takine men oṭowaḱkina, niạ bar do hãḱ ḍhir ńoḱge ṭaka lagawạńa ba, usạraben jogaṛạńa. Bạblu college te calaoen tayom khonge Bạblu apat Sonawaḱ hoṛmo reaḱ ruạ do bại bạite ḍher idiyentaea, mit́din do setaḱre pukhri khon ruạṛ oktere chaṭka tiog tora ackage bohoḱ gul male ạikạuket́ te bhindạṛ got́ena, Bạblu ać gogo Miru do raca regeye jojoḱkan tahẽkana, jãhãnaḱ ńurhạḱ lekae ańjomket́ khan hare phare bahre teye ńir oḍokena. Oḍok torae ńelkede haere Bạblu apatmae bhindạṛ akan, ene ado kạumạu onte note hoṛko hohoakoteye jarwaket́ koa, one ado sanamko mit́ kate oṛaḱ sećko tul idi kedea ar bohoḱ re daḱ ko duladea, mit́ ghạṛi tayom disạ ạcurentaea menkhan mit́ jaṅga ar ti do bae laṛao daṛeaḱ kana. Note Bạblu hõ noa khobor ńamkate ńuhum oktege oṛaḱteye seṭerena, uni ńelte ać baba do arhõ kạumạue raḱateye daram kedea are metadea beṭa gapa ge bajar reaḱ haspatal te idiyińme boge godoḱạń nãhãḱ.

Dosar hiloḱ Bạblu ar ać gogo do setaḱre ać baba bajarte haspatal tekin idi kedea, onḍe ḍaktor hana nawa biḍạu kateye menkeda nui do usạrate inḍia reaḱ bhelor haspatalte idiye hoyoḱa. Bạblu do Ḍaktore kuli kedea ado ḍaktor saheb onḍe do tinạḱ paesa lagaoḱa, ḍaktore lại keda hoe daṛeaḱa amdaj bar lakh lagao daṛeaḱa. Ańjom kate Bạbluwaḱ bohoḱre paseć serma ńurhạ wade lekae bujhạu keda, ente unạḱ ṭaka do okareye ńama. Bạblu apat Sona do noa katha ańjomkate ạḍi ãṭe andesale cabayena, cedaḱ ente bae bhabnaḱa aćaḱ judi jãhãnaḱ hoelen khan tahle Bạbluwaḱ oloḱ do onḍege teṅgo hapeḱ taea, ona iạte sanam bhabna togoć ḍaṭate sahao kate hopon taye metadea, E beṭa do oṛaḱte sen kate ona aboaḱ mit́ bighạ jumi ạkhriń kate paesa ạguime ar inḍiate ran ocoḱ lạgit́ idiyińme. Ṭhik ona katha lekage Bạblu do oṛaḱte senente ako aḍe paseren ṭhen jumi ạkhriń reaḱe lại ket́ khan ṭhik oktere jumi do bar lakh ṭakateye ạkhriń keda. Ar dosar hiloḱ ge ona bar lakh ṭakawante uni do bajar reaḱ haspatalteye monḍayena, calaḱ okterege gạḍi isṭisonreye seṭeren khan aćren mit́ bar gate kodoye ńamket́koa, onko são mit́ bar boge judạ galmarao tege thanaren mit́ bhen pulis hećkate gateko sãote Bạblu Murmu hõko tol idi kedea. Ar onḍe khon do hajot reko bhorao ket́koa.

Becara Bạblu eṅgat apat do haspatal re hopontạkin lạgit́ koyoḱ koyoḱtekin laṅga cabayen rehõ Bạblu do bae seṭerlena. Ar unkin do Bạbluwaḱ jãhãn khoj khobor hõ bạkin ńamleda. Note din dinte Sonawaḱ ruạ hõ ḍher idiyentaea. Khange mit́din do tarasiń okte Bạblu apat Sona Murmu ren khańca miru do hana puritey pharkaoena. Bạblu eṅgat Miru Kisku do haspatalre koṛam oṛejoḱ leka raḱ homorate goṭa haspatal oṛaḱe anduṛ cabakeda. Eskar maejiu nit do cet́e cekaea? Bae bujhạu daṛeaḱ kana. Dhạrtire okoe hõ bạnuḱ kotaea. Jãhã sećgeye koyoḱet́kan sanam sećge ńutge ńelet́a. Note haspatalren calaoić hõ Miru Kiskui metadea, “ E mạ̃i ma nit do mạ̃ṛi idiytam” dukhạli Miru nit cekate aćren dulạṛiạ juriaḱ mạ̃ṛi nonḍe khone iditaya onage maraṅ bhabnatae nit do. Hudis kedae nit do oṛaḱte senkate atoren hoṛko ać goṛowae lạgit́e nehõr akoa. Ṭhik ona lekage mone goṭa kate oṛaḱ seć doe monḍayena, hijuḱ hijuḱte siń cadso do bohoḱ cetan seće gargarao rakaṕ calaoena.

(Ol toṅgeḱa)   

Binod ar Binoe do mit́ atoren cetan ṭola ar latar ṭola ren kanakin. Unkin mit́ atoren kan re hõkin eṭaḱ ko leka dulạṛ epemoḱ reaḱ jãhãn somoe ar ạt ko do baṅ milạu akawat́kina. Tobe unkinaḱ jãhã tinre ge ńapamoḱ tege khạndri dulạṛ reaḱ kin kurumuṭuyet́ tahẽkana. Lukkibar khon mit́din laharege Binod do oṛaḱteye seṭerena. Enhiloḱ ge uni do Baha tuluć ńapamoḱ reaḱe kurumuṭu keda. Menkhan hara juạn akan kuṛi Baha mạ̃i do jãhãtin rege sana leka oṛaḱ khon bae oḍoḱ daṛeaḱa. Binod do Baha takoaḱ oṛaḱ seć calao calao kate cet́ko hudis baṛa kate coṅ ar hõ tala kulhi khon geye ruạṛena. Gapa ạyuṕ seć sunum sasaṅ ojoḱ okte Baha tuluć ńapamoḱ reaḱe goṭa keda.

Lukhibar ạyuṕ bela khange ona rạsi atoren kuṛi koṛa ar bahre atoren aema peṛa kote bapla oṛaḱ do bhan bhanaoḱ ehoṕena. Bela tahẽnrege Binod do mit́ dhao bapla oṛaḱ seć khone ạcur hećente aema gate ko sãoteye ńapam hećena. Binod hõ bạriạtoḱe calaḱa ańjom kate gateko do ạḍi rạskạ ko sodor keda. Menkhan Binodaḱ monge ạḍi ṭhik do bạnuḱtaea. Ente uniaḱ mẽt́ do jaoge Baha geye sendra baṛayede tahẽkana. Ńuhum tora khonge tundaḱ ṭamaḱ aḱ litur aṛaṅ ar kuṛi koṛawaḱ ńohor sereń te atoren kuṛi koṛa ko do hoe bharḍo leka joto ko ghurlạu hećena bapla oṛaḱ seć Binod hõ usạrage Baha sãote ńapamoḱ as te bapla oṛaḱ seć gate Binoe soṅge kateće mohnḍayena. Sunum sasaṅ ojoḱ enege ehoṕ akana, hoṛ ko do nit hõ hijuḱtege menaḱkoa. Oṛaḱ pereć hoṛ bako sahaboḱ kana. Binod ar Binoe do hana pinḍạ noa pinḍạ elecṭạri marsalte ḍig ḍig ńel ńamoḱ rehõ ona koreć kona ar koca sećte kin sendra ạcur keda. Menkhan Bahawaḱ jãhãn tiwan ge bạkin ńam daṛeada.

Inạ mit́ ghạṛi tayom khange Baha do ać gogo sãote bapla oṛaḱ teye boloyena. Binod do ńel kateye ạṛis ńoḱengea. Ente nit hõ Baha do kạṭić gidrạ leka ać gogowaḱ ti saṕ kateye ạcur baṛae kana! Sunum sasaṅ ojoḱ okte re Binod do Binoe bạhuwaḱ goṛote eken mit́ ghạṛi bahre seć oḍok kate khạli boge judạ glamarao chaḍa cet́ge baṅ hoelentạkina. Ente mit́ ghạṛi tayom khange Baha ać gogo do khoḱ kharaḱ ate bahre seće oḍokente Baha arhõ bhitriteye ader kedea. Binod doe bujhạu keda nonka te nui tuluć nonḍe do jãhãn gal marao baṅ hoyoḱa. Uni do Binoe bạhuye saṕ kedea jateć jãhã lekatege Baha gapa ḍuli bibiḱe idiye.

Dosar hiloḱ jog mạńjhi do maraṅ sim raḱ khon goṭa kulhi bạriạt daka jojome hoho purạu keda. Bad gạḍi hõ laha hioḱ rege heć tahẽkana. Binod do laharege bas re sen kate ḍabol siṭ eset́ kateye duṛuṕ akana bạibạite bas do bạriạt kote perejoḱ ehoṕena. Menkhan Binoe tạkin ar Bahawaḱ jãhãn cet́ge baṅ bujhạuḱ kana. Joto ko heć cabaḱ kan rehõ onkoaḱ hijuḱ reaḱ jãhãn katha ge bạnuḱa. Tobe cet́! Baha bae calaḱa? Aema lekan hudis cintạ te Binod doe thar basao cabayena. Un hạbić hõ ona joṛa siṭ re okoe ge bae duṛuṕ oco akat́koa. Ekkalte mucạt́ okte re Binoe tạkin ar Baha do ạḍi hare phare bas reko dećena. Jãhã lekate Binoe barea gidrạ beret́ oco kate onḍe Baha tạkine duṛuṕket́ kinạ. Ar Binoe do Binod ṭhen sen kateye duṛuṕena. Binodaḱ ạḍi as tahẽkanataea Baha ać sãote duṛuṕ kate mit́te galmarao galmarao tekin calaḱa. Menkhan Binoe luṛu Baha bad kate ać geye duṛuṕena. Mit́ sećte do ṭhik geye bujhạu keda Binod, ente aema murubbi ko do bas reko tahẽkana.

11 baja okte seć bạriạt ko do kuṛi oṛaḱ ko seṭerena. Daram ar ca ńu baṛa katege ạḍi usạra bapla lạgit́ ko sapṛaoena. Bapla tayom bapla bhoj jom baṛa kate bạhu jãwãe tạkin do giḍi cimạuṛa lạgit́ ko duṛuṕket́ kinạ. Note kuṛi koṛa ko hõ mucạt́re ạḍi ãṭ rạskạ reko cape akana. Ona oktege Binod do Baha ar Binoe bạhu bahre seće hohoat́ kinte ato reaḱ kulhi mucạt́ seć jhạṛpạ jojo buṭạ ṭhen ko calaoena. Binod ar Baha mit́ ṭhen pantete duṛuṕ oṭo kate Binoe bạhu do thoṛa pharaḱ ńoḱ reye duṛuṕena. Note Binod tạkin duṛuṕ gekin duṛuṕ thir akana, menkhan okoe ṭaḱge katha bạkin ehoṕ daṛeaḱ́ kana. Baha doye hudiseda Binod ge jạnić kathaye roṛ lahaea note Binod hõye hudiseda Bahawaḱ aema katha menaḱtae rehõ cekate cet́ge nit hõ bae roṛeda! Nukin bana hoṛaḱ mocage khora din gạḍiạ rohoṛoḱ leka sanam ulidaḱ ko rohoṛ caba akan tạkina. Mucạt́ re Binod ge kathae ehoṕ ket́te ạḍi okoć gekin galmarao keda. Baha Binode badae oco kedea je, peṛa ạḍi ãṭ ko oḍokoḱ kana. Ać gogo baba tạkin hõkin rạjigea. Menkhan Baha do Binod chaḍa eṭaḱ re bae baplaḱa menteye baḍae oco kedea. Binod do jãhã lekate thoṛa din tạṅgi hataṛe metadea. Jãhã lekate mit́ṭen cạkri ńam lekhan gekin baplaḱa mentekin goṭa keda.

Thoṛa din tayom ge akoaḱ church reaḱ mit́ṭen project re hoṛ hatao lạgit́ ko dhạrwạḱ keda. Baha do ạḍi usạra Binode baḍae ocokedea. Ente Binod do aema din khon bahre reye tahẽnte Mission ko reaḱ jãhãn khoj khobor do bae baḍae daṛeaḱ kan se bae dohoyet́ kan tahẽkana. Binod do ona posṭre jojaoḱ lạgit́ joto lekanaḱ ge tahẽkantaea. Ar ona iạte uni do ạḍi usạra ardase joma keda. Ato oṛaḱ koren aema hoṛ ko Mission ren mit́ bar liḍar ko hõ  Binoe ge kạmie ńama menteko roṛ baṛaet́ tahẽkana, Inṭar bhiu karḍ ńamkate ạḍi aema moṭa moṭa gayiḍ puthi ko paṛhaoḱe dhurạuena. Inṭar bhiu oka leka hoyoḱ reaḱe hudiset́ tahẽkan ṭhik onka leka purạ do baṅ hoe lente Binod do aema roṛ ruạṛ ge bae em daṛeda. Ente uni do Mission reaḱ ar dhorom se baibel ar girjạ reaḱ aema aema bisoe ko thoṛa gan hõ bae baḍae kan tahẽkana. Baha noa ko baḍae kate ạḍi ãṭe mon dukena. Enhõ Binod do arhõ tạṅgi lạgit́e nehõr adea.

Thoṛa din tayom khange Binodaḱ masṭar ḍigri reaḱ resalṭ oḍokentaea. Unkin do bana hoṛ gekin hudiskeda niạ dhao do jãhã lekatege mit́ṭen cạkrie ńamet́ kangea.

Ol toṅgeyena;

Paitapukur atore̠n mit́ṭe̠n kạṭić gidrạ kanae ho̠po̠n bạbu. Ho̠po̠n bạbu do̠ dinạme ńe̠lkoa ako atore̠n gidrạko do̠ dinạm iskul teko calaḱa. Onko ńe̠lte̠ ać hõ iskul calaḱ sanakedea. Uni do̠ ać go̠go̠-babatạkine metat́kina, iń hõ iskulteń calaḱa. Uniaḱ sana lekage ho̠po̠n bạbu iskulreko bhurti kadea.

Pạhil pạhil ać go̠go̠ iskulte̠ye̠ ạgu oṭo kadea. Iskul ạgukate̠ jo̠to̠ ạnạṛi ho̠ṛ ńe̠lte ać go̠go̠waḱ ańcar saṕkate bhẽ-bhẽ raraḱe eho̠ṕena aṛaḱge bae aṛago̠ḱkana. Ho̠po̠n bạbure̠n nawa didimuni sorre̠ he̠ćkate̠t́e metadea, ho̠po̠n bạbu hijuḱme̠ amaḱ kelasteń idimea, o̠nḍe̠ aema gatekom ńamkoa. Didimiaḱ dulạṛ salaḱ kathate ho̠po̠n bạbu go̠go̠aḱ ańcar aṛaḱkate̠ kelaste̠ye̠ calaoena.

Didimuni do̠ uni kelasre̠ye̠ duṛuṕkedea are metadea-“ńe̠lkom am lekan tinạḱ gidrạ niạ kelasre̠ko paṛhaoḱkana. Onko jo̠to̠ge amre̠n gate kanako. Jo̠to̠ am sãote̠ choṛako me̠na, sereńako, e̠ne̠ćako tinạḱ rạskạ hoyoḱa”. Pạhil hilạḱ didimuni do̠ Ḍiṅ Ḍo̠ṅ cho̠ṛae cet́at́koa. Uni sãote jo̠to̠ ho̠ṛ Ḍiṅ Ḍo̠ṅ cho̠ṛako me̠nkeda. Me̠nkhan ho̠po̠n bạbu do̠ lajaote̠ ar bo̠to̠rte cho̠ṛa bae lại daṛeada, arhõ bhẽ bhẽ raraḱe dhurạuena. Raḱ ańjo̠mte eṭaḱ gidrạko do̠ cho̠ṛa lại thirkate̠ cahaṕkate̠ unigeko ko̠yo̠ḱkadea. Alo̠m raga am hõ bại bạite̠m ceda, are̠m me̠na. Didimuni do̠ ho̠po̠n bạbu sorre̠ bại bạite̠ lạikate̠ jo̠to̠koe cet́at́koa. Nonkate̠ din dintege uni hõ cho̠ṛae cet́keda ar lại hõe lại daṛekeda. Nito̠ḱ uni do̠ gateko sãote dinạm iskulte̠ye̠ calaḱa ar cho̠ṛa, sereń, e̠ne̠ćte̠ ạḍi ãṭe rạskạḱa. Ho̠po̠n bạbu ṭhe̠n iskul do̠ nito̠ḱ ạḍi rạskạwanaḱ jaega kana.

Tumạl: Ańjo̠m jo̠ṅ jạṛ