Moli do ul jom ạḍi kusiaḱkan tahẽkana. Mit́din Moli ać baba hạṭiạ khon ule ạgukeda. Rạskạte Moli do ona ule jomkeda. Ul jom tayom Moli do raḱe ańjomkeda. Raḱ ańjomte hahaṛayena. Ado ńelkeda aćaḱ ti reaḱ jaṅge raḱeda.

Moli jaṅe metadea, “Cedaḱem raḱeda?” Jaṅe menkeda, “Amaḱ bagwanre topakạńme, am cet́em koea onageń emama.” Moli menkeda, “Sạrige!” Onate Moli do guli koekedea. Ado ṭhoḱ ṭhoḱ saḍeyena ar aema guli ńelte ạḍi ãṭe kusiyena. Jaṅe menkeda, “Amaḱ gunṭhi somaniń haralen khan pea sok iń purạutama.

Moli do iskulte calaoena. Iskul khon hećkate jaṅ ńelte disạkeda ar usạra bagwanre topakeda. Thoṛa din tayom Moli ńelkeda darere barea sakam akana, kusite dare beṛha eset́keda ar daḱe dulada.

Ar mit́dine ńelkeda ul dare do gunṭhi soman harayena. Ado dare Moli metadea, “Amaḱ sok lạime.”

Moli menkeda, “Ạḍi lạṭu dare hoyoḱma”. Ar dare do lạṭuyena.

Dare menkeda, “Sok lạime.”

Moli menkeda, “Dare pereć ul jo hoyoḱma.” Ar darere aema ul joyena.

Dare menkeda, “Amaḱ tesar sok purạu lekhange, iń doń senjoṅa.”

Moli menkeda, “Am do ińren gate tahẽnme.” Ar dare do Moliaḱ bagwanrege tahẽyena.

Mit́ atore barea gate koṛakin tahẽkana. Raju do ạḍi coṭkare tahẽkana ar jaoge sapha sạphi tahẽne kusiaḱkan tahẽkana. Ar Joni do ạḍi kuṛhiại tahẽkana. Nunạḱ kuṛhiạ tahẽnkana je tin dhạbić eṅgattet́ ḍạbrạḱ bae metaea un dhạbić bae ḍạbraḱkan tahẽkana.

Mit́din onkinaḱ iskulre piknik ko bondoboskeda. Piknik calaḱ lạgit́ joto hoṛ ạḍi kusi rạskạreko tahẽkana. Onate laha ńindạre piknik reaḱ jotowaḱ kạmi sạitạukateko jạpit́keda. Setaḱre Raju do Joni ṭhene senenre ńelkedea, Joni do lać hasote kạhilakana.

Raju ar Joni eṅgat do usạra harephare ḍaktar ṭhenkin idikedea. Ḍaktar bidạu baṛakateće menkeda, Joni do sapha sạphi bae tahẽnte nonkan ruạre jạbunena.

Ado ḍaktar Joni rane emadea ar sapha sạphi tahẽne metadea. Sãote arhõ pe din jirạure tahẽne metadea. Onate Joni do piknik calaḱ hõ baṅ hoelentaea.

Meskoć

Kuṛhiạ Hoṛ Doe Okoe Kana?

Mit́ hoṛren pea hoponko tahẽkana. Mit́din onko pea hopon ać ṭhene hohoat́koa are metat́koa, “ape modre asol utạr kuṛhiạ okoe kane, uni mit́ sae (100) ṭakań emaea.”

Khange maraṅ koṛa doe mengot́keda, “E ba ṭaka do ińge emạńme, gublireń bolokaḱa.”

Tala koṛa doe menkeda, “E ba, ona ṭaka do ińaḱ aṭet́re doho oṭokam, ti tiạr kate ṭaka ohogeń hatao daṛekea.

Onka leka huḍiń utạrić koṛa hõe menkeda, “E ba, dayakate ona ṭaka ińaḱ gublire bolo oṭokam.

Sikhnạt: Asketiạ do hoṛ nonkae leḍha koa je aćaḱ bhạlại reaḱ kạmite hõe ạṛisoḱa.

Mit́ hoṛ aćaḱ kạmire tisge bae jitạu daṛeaḱkan tahẽkana. Mit́din ganḍon ganḍonte gaḍa aṛe aṛete taṛam idikan jokhen ackage mit́ṭen sạdhu duṛuṕkane ńelkedea. Khange uni do sạdhu ṭhene senena are metadea, sạdhu jionre jit ar lahanti lạgit́ cetiń cekaea?

Sạdhu do uni hoṛ daḱre unumoḱe metadea. Daḱre unumen são sãote sạ̣dhu uni hoṛaḱ bohoḱe ota urućkeda jemon bohoḱ aloe rakaṕ daṛeaḱ. Khange sahẽt́ bondoḱ lekae ạikạuet́te bogete chaṭpaṭaḱ kana. Daḱ khon rakaboḱ lạgit́ kajakte kurumuṭueda.Thoṛa ghạṛić tayom sạdhu uni hoṛe aṛaḱkedea.

Inạkate sạdhu uni kulikedea, daḱre bohoḱiń saṕ urićlet́tam, unre cet́ cekam menleda? Adoe menkeda rakaboḱ reaḱiń kurumuṭukeda.

Sạdhu do arhõe kulikedea, un jokhen dhạrti reaḱ kathakom disạyet́ tahẽkana. Adoe roṛkeda, baṅ cet́ge bạń disạyet́ tahẽna. Mit́ṭenge cintạ tahẽkana, cekate noa daḱ khon cetanteń rakaboḱa. Unre sạdhu hoṛe menkeda, cet́leka daḱ khon rakaboḱem kurumuṭuket́, onkage jionre lahanti ar jitạuḱ lạgit́ hõ kurumuṭui hoyoḱa. Enḍekhan dhạrti reaḱ cet́ge bohoḱre disạ baṅ tahẽntama. Eken Mit́ṭenge kukmu tahẽntama cekateń jitạuḱa, enḍekhan sạrige amaḱ jionrem jitạuḱa arem lahanti daṛeaḱa.

Mit́ṭen nagrahare ạḍi mãyãyan ar mạhir monan dạrji tahẽkana. Jaoge dạrji do mit́ṭen hạti jome emaekan tahẽkana. Jomaḱ lạgit́ mit́din hạti dạrji ṭhene hećena. Un okte dạrji do eṭaḱ mit́ hoṛ sãoe ropoṛkan tahẽkana. Ado mit́ okte onkin do jhogṛaḱkin ehoṕena. Khange dạrji do ạḍi ãṭe raṅgaoena ar aćaḱ tire tahẽkan suite hạti sunḍe gutu joskedea.

Ackage gutu josente hạti do ạḍi kajak hasokedea. Ado mon ạṛiskate gaḍa aṛe seće calaoena ar onḍe khon losot́ daḱ ạgukate dạrji goṭa hoṛmoe chitạuadea.

Ona losot́ daḱte dạrji aḱ hoṛmo mạilạentaea. Ona sãote dạrji oṛaḱre tahẽkan thoṛa nawa kićrić kohõ mạilạ cabayena. Khange dạrji do aćaḱ bhule aṭkarkeda ar hạti ṭhen ikại khojkeda.

Rupnogorren mit́ṭen Raje tahẽkana. Uniaḱ aema raj prasad, dhon-sompod, sona-dana emanteaḱ jinisko tahẽkantaea. Enrehõ Raje cintạḱkan tahẽkana. Cintạ kate Raje ńelkeda teheńiń goćlen khan ińaḱ raj prasad, dhon-sompod, sona-dana, jumi jaega okoe rạkhi jogaotińa?Noa katha raje cintạkeda.

Ado cintạ cintạte ackage mit́din mit́ṭen babaji hećena. Uni babaji doe metaekana, “Raj alom cintạḱa, mit́ṭen kathań metamkana. Iń ṭhen ạsirbad daḱ menaḱa. Noa ạsirbad daḱ amren bạhu ńu ocoyem. Amren bạhu noa daḱe ńu lekhan mit́ṭeć kuṛi gidrại hoyoḱtaea. Uni kuṛi gidrạ hoelen khan uniaḱ ńutumem dohoetaea Tusar Konna. Ar uni Tusar Konna amaḱ raj prasad, dhon-sompod, jumi jaega jotowaḱe rạkhi jogaotama”.

Mit́ṭen birre boḍa bińe basoḱkan tahẽkana. Boḍa biń do ạḍi bisane tahẽkante uni pheḍ calaḱ okoege bako rebenkan tahẽkana. Onate biń do ạḍi gorobe aṭkaret́ tahẽkana. Apnarte ạḍi dil ar daṛeane hudisoḱkan tahẽkana.

Mit́din boḍa bińe tạṅkhikeda, aćaḱ bhugạḱ pheḍre mit́ dol mućko bhugạḱ akada. Ona ńelte ạḍi ãṭe edreyena. Adoe menkeda, muć aḱ nunạḱ maraṅ sạhũs, ińaḱ bhugạḱ pheḍreko bhugạḱ akada! Ado onko muć laga ocoḱko lạgit́ boḍa biń do onko upạrte dhawakeda. Mit́ okte muć do akoaḱ jiwi bańcao lạgit́te boḍa bińaḱ hoṛmoreko ger bit́ena. Khange boḍa biń do hasote kiriṛ kiriṛ kikiạue dhurạuena. Enrehõ onko muć do bako aṛaḱledea. Mucạt́ dhạbićte boḍa biń do muć khon bańcaoḱ khạtirte bir khone dạṛkeda.

Mit́din mit́ṭen kaṭ baḍohi kaṭ mamaḱe calaḱkan tahẽkana. Horre ńelkeda, banḍhej hoṛkoaḱ phãndre mit́ṭen Pajhaṛe aṭkao akana. Kaṭ baḍohi do uni pajhaṛe bańcao kedea.

Inạkate kaṭ maḱ lạgit́ mit́ṭen burureye dećena. Kaṭ maḱ tayom tinre latare phedoḱ lạgit́ unre oka sećte latare phedoḱa ona hore hiṛińkeda. Jãhãn upại baṅ ńamkate, uni hoṛ do maraṅ utạr dhirire duṛuṕena ar goṛo ńam lạgit́e koyoḱ horkeda. Ackage uni Pajhaṛ do uni hoṛ ṭhene hećena, one okoe do buru dejoḱ lahae bańcaokede. Khange Pajhaṛ do uni hoṛaḱ ṭupṛi gerkeda are uḍạuena. Onate kaṭ baḍohi doe raṅgaoena.

Ṭupṛi ńam ruạṛ lạgit́te Pajhaṛ tayom tayomte dạṛkeda. Nonkate thoṛa ghạṛić dạṛ tayom latar pheḍoḱ reaḱ hore ńamkeda.

Noa karonte ińaḱ ṭuprim idikeda. “Am dom khojoḱ kan tahẽkana iń do am tayom tayomteń calaḱa ar latar pheḍoḱ horiń ńam ruạṛ daṛeaḱ! Adi aema sarhao, gate.” Kaṭ baḍohi noa katha Pajhaṛe metadea.

Sikhnạt: Bhage kạmi reaḱ jo do jaoge mońjge hoyoḱa.

Mit́din tạruṕ raj do toyoe metadea, “jomaḱ jogaṛ ạguạńme.” Tạruṕ raj lạgit́ jomaḱ sendra sendrate mit́ṭen gadhae ńamkedea. Ado gadha ṭhen sen sorkate metadea, “gate, teheń ńindạ raj do ame nẽota akat́mea. Onate am idiń heć akana.

Toyo aḱ kathate gadha doe pạtiạuente calaoena. Jomaḱ ńelte tạruṕ kajake kusiyena. Uniaḱ raḱ se kikiạu ańjomte gadha doe botorente dạṛkeda. Gadhae dạṛket́te tạruṕ doe raṅgaoena. Ado toyoe metadea, “nitge gadha saṕ ạguyem. Reṅgeć bạń sahao daṛeaḱ kana.

Toyo do arhõ gadha ṭhene calaoena ar uni bujhạuadete ruạṛ ạgukedea. Ar usạra tạruṕ do gadhae saṕkedete jojome dhurạuena. Ona oktere toyo do gadhawaḱ bohoḱ hataṅe kombṛo keda.

Tinre tạruṕ do mit́ leka gadhae jom cabakedea adoe ńelkeda hataṅ do bạnuḱtaea. Arhõ raṅgaote kikiạuḱ kana, okayena gadhawaḱ hataṅ do?

“Toyo doe menkeda, gadhawaḱ hataṅ do baṅ tahẽna.” Noa katha ańjomte tạruṕ do arhõe raṅgaoena. Adoe menkeda, cedaḱ ạuṛiaḱ katha dom roṛeda!?Gadhawaḱ hataṅ tahẽn khan ińaḱ kathate nonḍe am ṭhene hećkoḱa?” toyo do tạruṕe metadea.

Sạri kathagem meneda, gadhawaḱ bohoḱre hataṅ tahẽn khan thoṛagan rehõ bud akel tahẽkoḱtaea, Tạruṕ do toyo noa kathae metadea. Ma enḍekhan calaḱme.

Khange toyo do aćaḱ oṛaḱe ruạṛ senena ar oko dohoakat́ hataṅ rạskạ salaḱe jomkeda.

-Ol Toṅgeaḱ

Inạ tayom uni koṛa do raj dorbare calaoena. Raj dorbar calaokate uni koṛa do raj mit́ṭen thạri koekedea. Ṭin reaḱ thạri. Ar ṭin reaḱ thạrire mit́ṭen baber biń cet́leka pẽckoḱ onkae dohokeda. Ona doho tayom onare seṅgele jolkeda. Baber re seṅgel jol cabaena. Inạkate ona do toroć reaḱ baber hoyena. Ado rajae metadea, ‘Ne raja toroć reaḱ baber.’ Raja ona ńelte khube kusiyena.

Inạ tayom dosar kukli reaḱ roṛ ruạṛ. Ado uni koṛa do rajae metadea, amaḱ jãhãn pukhri menaḱkhan onḍe idiyińme. Uniaḱ katha leka raja do aćaḱ pukhri idikedea.Pukhri calaokate uni koṛa do ona mat́ pukhri daḱre caḍokeda. Oka seć agal kana onte do campelena ar oka seć gonḍa kana onte do unumena. Ado rajae metadea, nõḱõe raj oka seć unumena ona do gonḍa ar oka seć campelena onte do agal kana.

Khange raja do uni koṛawaḱ bud akel ńelte ạḍiye kusiyena ar uni aćaḱ kuṛại emae lạgit́ raj dorbarre sanamkoe hoho jarwaket́koa kuṛại emaye ghosonakeda. Ado uni koṛa raje metadea, E raj ińaḱ mit́ṭen katha menaḱa.’Metadeae cet́ katha? Niạ kuṛại ńam lek iń doń baṅ kana. Enḍekhan okoe kanae?’ Raja uni koṛae kulikedea, okoe kanae?

Ado uni koṛae menkeda, ‘Noa kuṛại do iń baba ńam lek kana. Am baba? Am do nit hõ am baba bam goć akadea? Baṅ raj! Iń baba ạḍi ãṭiń dulạṛea. Noa karonte iń baba ot la kate baṅkar benaokateń dohoakadea. Do am baba ạguiem, Rajae hukumkeda. Khange uni koṛa calaokate ać babae ạgukedea.

Ado rajae menkeda, iń nonkan bạṛićiń kạmikeda je joto buḍhi haṛam goćko reaḱiń hukumkeda. Amren mit́ṭen babawaḱ judi nunạḱ bud enḍekhan arhõ unạḱ haṛam buḍhiaḱ unạḱ unạḱ bud tahẽkana. Teheń khoniń ghosonakeda, ar mit́ṭen haṛam buḍhi hõ bạń goć ocokoa. Onko lạgit́ nawa bebostha hoyoḱa noa raj bakhol khon jomaḱ idikate buḍhi haṛam hoṛ jom ocokope.Tayom daram mit́ṭen haṛam buḍhi hõ begor jomte bako tahẽna. Ar onko ṭhen bud akel hameṭ hoyoḱa enḍekhan disomre lahanti hoyoḱa.

Ado aćaḱ katha lekage aćren hoponera são uni koṛa baplakedea ar aćaḱ sompot reaḱ mit́ hạṭińe emadea. Noa ńelte raj dorbarre jarwa akan sanamko ạḍi ãṭko rạskạyena.