Mit́din mit́ṭen kaṭ baḍohi kaṭ mamaḱe calaḱkan tahẽkana. Horre ńelkeda, banḍhej hoṛkoaḱ phãndre mit́ṭen Pajhaṛe aṭkao akana. Kaṭ baḍohi do uni pajhaṛe bańcao kedea.

Inạkate kaṭ maḱ lạgit́ mit́ṭen burureye dećena. Kaṭ maḱ tayom tinre latare phedoḱ lạgit́ unre oka sećte latare phedoḱa ona hore hiṛińkeda. Jãhãn upại baṅ ńamkate, uni hoṛ do maraṅ utạr dhirire duṛuṕena ar goṛo ńam lạgit́e koyoḱ horkeda. Ackage uni Pajhaṛ do uni hoṛ ṭhene hećena, one okoe do buru dejoḱ lahae bańcaokede. Khange Pajhaṛ do uni hoṛaḱ ṭupṛi gerkeda are uḍạuena. Onate kaṭ baḍohi doe raṅgaoena.

Ṭupṛi ńam ruạṛ lạgit́te Pajhaṛ tayom tayomte dạṛkeda. Nonkate thoṛa ghạṛić dạṛ tayom latar pheḍoḱ reaḱ hore ńamkeda.

Noa karonte ińaḱ ṭuprim idikeda. “Am dom khojoḱ kan tahẽkana iń do am tayom tayomteń calaḱa ar latar pheḍoḱ horiń ńam ruạṛ daṛeaḱ! Adi aema sarhao, gate.” Kaṭ baḍohi noa katha Pajhaṛe metadea.

Sikhnạt: Bhage kạmi reaḱ jo do jaoge mońjge hoyoḱa.

Mit́din tạruṕ raj do toyoe metadea, “jomaḱ jogaṛ ạguạńme.” Tạruṕ raj lạgit́ jomaḱ sendra sendrate mit́ṭen gadhae ńamkedea. Ado gadha ṭhen sen sorkate metadea, “gate, teheń ńindạ raj do ame nẽota akat́mea. Onate am idiń heć akana.

Toyo aḱ kathate gadha doe pạtiạuente calaoena. Jomaḱ ńelte tạruṕ kajake kusiyena. Uniaḱ raḱ se kikiạu ańjomte gadha doe botorente dạṛkeda. Gadhae dạṛket́te tạruṕ doe raṅgaoena. Ado toyoe metadea, “nitge gadha saṕ ạguyem. Reṅgeć bạń sahao daṛeaḱ kana.

Toyo do arhõ gadha ṭhene calaoena ar uni bujhạuadete ruạṛ ạgukedea. Ar usạra tạruṕ do gadhae saṕkedete jojome dhurạuena. Ona oktere toyo do gadhawaḱ bohoḱ hataṅe kombṛo keda.

Tinre tạruṕ do mit́ leka gadhae jom cabakedea adoe ńelkeda hataṅ do bạnuḱtaea. Arhõ raṅgaote kikiạuḱ kana, okayena gadhawaḱ hataṅ do?

“Toyo doe menkeda, gadhawaḱ hataṅ do baṅ tahẽna.” Noa katha ańjomte tạruṕ do arhõe raṅgaoena. Adoe menkeda, cedaḱ ạuṛiaḱ katha dom roṛeda!?Gadhawaḱ hataṅ tahẽn khan ińaḱ kathate nonḍe am ṭhene hećkoḱa?” toyo do tạruṕe metadea.

Sạri kathagem meneda, gadhawaḱ bohoḱre hataṅ tahẽn khan thoṛagan rehõ bud akel tahẽkoḱtaea, Tạruṕ do toyo noa kathae metadea. Ma enḍekhan calaḱme.

Khange toyo do aćaḱ oṛaḱe ruạṛ senena ar oko dohoakat́ hataṅ rạskạ salaḱe jomkeda.

-Ol Toṅgeaḱ

Inạ tayom uni koṛa do raj dorbare calaoena. Raj dorbar calaokate uni koṛa do raj mit́ṭen thạri koekedea. Ṭin reaḱ thạri. Ar ṭin reaḱ thạrire mit́ṭen baber biń cet́leka pẽckoḱ onkae dohokeda. Ona doho tayom onare seṅgele jolkeda. Baber re seṅgel jol cabaena. Inạkate ona do toroć reaḱ baber hoyena. Ado rajae metadea, ‘Ne raja toroć reaḱ baber.’ Raja ona ńelte khube kusiyena.

Inạ tayom dosar kukli reaḱ roṛ ruạṛ. Ado uni koṛa do rajae metadea, amaḱ jãhãn pukhri menaḱkhan onḍe idiyińme. Uniaḱ katha leka raja do aćaḱ pukhri idikedea.Pukhri calaokate uni koṛa do ona mat́ pukhri daḱre caḍokeda. Oka seć agal kana onte do campelena ar oka seć gonḍa kana onte do unumena. Ado rajae metadea, nõḱõe raj oka seć unumena ona do gonḍa ar oka seć campelena onte do agal kana.

Khange raja do uni koṛawaḱ bud akel ńelte ạḍiye kusiyena ar uni aćaḱ kuṛại emae lạgit́ raj dorbarre sanamkoe hoho jarwaket́koa kuṛại emaye ghosonakeda. Ado uni koṛa raje metadea, E raj ińaḱ mit́ṭen katha menaḱa.’Metadeae cet́ katha? Niạ kuṛại ńam lek iń doń baṅ kana. Enḍekhan okoe kanae?’ Raja uni koṛae kulikedea, okoe kanae?

Ado uni koṛae menkeda, ‘Noa kuṛại do iń baba ńam lek kana. Am baba? Am do nit hõ am baba bam goć akadea? Baṅ raj! Iń baba ạḍi ãṭiń dulạṛea. Noa karonte iń baba ot la kate baṅkar benaokateń dohoakadea. Do am baba ạguiem, Rajae hukumkeda. Khange uni koṛa calaokate ać babae ạgukedea.

Ado rajae menkeda, iń nonkan bạṛićiń kạmikeda je joto buḍhi haṛam goćko reaḱiń hukumkeda. Amren mit́ṭen babawaḱ judi nunạḱ bud enḍekhan arhõ unạḱ haṛam buḍhiaḱ unạḱ unạḱ bud tahẽkana. Teheń khoniń ghosonakeda, ar mit́ṭen haṛam buḍhi hõ bạń goć ocokoa. Onko lạgit́ nawa bebostha hoyoḱa noa raj bakhol khon jomaḱ idikate buḍhi haṛam hoṛ jom ocokope.Tayom daram mit́ṭen haṛam buḍhi hõ begor jomte bako tahẽna. Ar onko ṭhen bud akel hameṭ hoyoḱa enḍekhan disomre lahanti hoyoḱa.

Ado aćaḱ katha lekage aćren hoponera são uni koṛa baplakedea ar aćaḱ sompot reaḱ mit́ hạṭińe emadea. Noa ńelte raj dorbarre jarwa akan sanamko ạḍi ãṭko rạskạyena.   

Mit́ disomre mit́ṭen lelha rajae tahẽkana. Uni raja do acaḱ disomren hoṛko ạḍi ãṭe dulạṛet́ko tahẽkana. Unre uniren mit́ṭen montri do raja bude emadea je, aboaḱ disom calaote ạḍi muskil hoyoḱkana.Nit aboaḱ disomre oka phosol hoyoḱkana, abad hoyoḱkana niạkote aboren hoṛkoaḱ lać baṅ biḱtakoa, obhab onṭon hõ baṅ cabaḱa. Enḍekhan noa disomre tinạḱ buḍhi haṛam hoṛ menaḱko onko do goćko hoyoḱa, ente onko do jãhãn kạmire bako lagaoḱa. Ado rajae hudiskeda, sạrige tho ińren montri doe meneda, onate uni do sanam buḍhi haṛam goćko reaḱe ghosonakeda. Khange aema hoṛko menkeda, raja aleren gogo baba alom goćkoa. Menkhan raja do jãhãn kathage bae ańjomleda. Ado rajawaḱ hukum lekage disomren joto haṛam buḍhiko goćket́koa.

Menkhan mit́ṭen koṛa do ać baba ạḍige dulạṛedekan tahẽkana ar uniaḱ hukum bataoe tahẽkana. Uni koṛa do ać baba upạr tis hõ katha bae roṛa ar bae calaḱa, onate ać baba hõ aćren koṛa ạḍi ãṭe dulạṛea. Unre uni koṛae menkeda, ińaḱ moloṅre oka menaḱ ona do hoyoḱa, enhõ iń baba do bạń gojea. Ot la kate baṅkar benaokate onḍe ać baba dohokedea. Inạkate uni do raj dorbar khone hećena. Onḍe khon jage sareć bareć jomaḱe ạguia onage ać babae jom ocoea. Nonka nonkate aema din calao idiyena enhõ disomre obhab onṭon baṅ cabalena. Haṛam buḍhi hoṛ khon jãhãn solha bako ńamet́ tahẽkana. Disom bại bạite arhõ dhaṅdhaserena.Ar lahanti baṅ hoyoḱa, obhab hõ baṅ cabaḱa.

Mit́ okte rajae ghosonakeda ińaḱ barea kukli reaḱe roṛ ruạṛ daṛeaḱa ińren hoponera sãoteń baplakaea ar mit́ hạṭiń sompotiń emaea. Noa katha goṭa disom ḍamḍaheyena. Menkhan rajawaḱ kukli reaḱ roṛ ruạṛ bako em daṛeada. Ado rajae menkeda, nun maraṅ rajosṭire ińaḱ kukli reaḱ roṛ ruạṛ emoḱ lekan mit́ hoṛ hõ bako janam akana? Ona katha ańjomte uni koṛa do oṛaḱe hećena ar ạḍi cintạre paṛaoena.Ado ać babae metadea.” Noa kukli do cet́ kana beṭa? Cedaḱ unạḱem ganḍoḱkana? Unre uni koṛae menkeda, rajae menkeda barea kukli. Pạhilaḱ do kana toroćte baber uń lagaḱa. Ar dosaraḱ do kana, mit́ṭen mat́ husit́ saphagea, menkhan baṅ bujhạuḱ kana oka seć gonḍa ar oka seć agal do.

Ona katha ańjomte ać baba doe menkeda, noa do jãhãn bepar kana se cet́? Am do teheń napaete jạpit́me. Iń gapa noa reaḱiń lạiama, ar onkage raj dorbarrem lạia. Khange ona katha lekage kạmi keda. Dosar hiloḱ ać baba do koṛatae bud akele emadea.

-Ol Toṅgeḱa

Mit́ṭen darere ghaṛwa cẽṛẽ aḱ tukạ tahẽkana. Ona tukạre ghaṛwa doe bele keda. Mit́din mit́ṭen hạti do ona dare reaḱ sakam jom lạgit́e calaoenre tukạ doe rạput́keda. Ghaṛwa bele hõ rạput́ena, onate ghaṛwa do ạḍi ãṭe mon dukena. Khan hạti sikhnạt emae lạgit́te akoren gate rõ, roṭe ar kạhũ ṭhen goṛoe khojkeda.

Gateaḱ nonkan dukre onko sanamko hećena. Ado rõ do hạtiaḱ luturre bolokate bhan bhane lagaoena. Ar onkage kạhũ do hạtiaḱ mẽt́ ṭhoṭrao ṭhoṭraote mit́ lekae kãṛã keda. Onate hạti do mẽt́re daḱe lagaoa mente mit́ṭen ghaḍluḱ seće senena. Menkhan onḍe hõ mit́ṭen roṭe raḱ got́keda. Roṭe aḱ raḱ ańjomte hạti doe hudiskeda paseć noa aḍepasege pukhri menaḱa.

Roṭe aḱ raḱ aten atente hạti doe calao idiyena. Khange hạti do ona ghạḍluḱre ńurena. Nonkate uni ghaṛwa cẽṛẽ do muskil dosa khone bańcao ruạṛena.

Sikhnạt: Bạṛić kạmi reaḱ jo do bạṛićge hoyoḱa.

Bulbuli tako ato ńutum do̠ Cho̠ghạṭi. Ape̠ do̠ ce̠t́pe̠ baḍaea ale ato do̠ cedaḱ ńutumakana? Jao serma pạhilạ bạishạkre̠ no̠nḍe̠ pạṭi pata mela hoyoḱa. Niạ mela ńe̠l lạgit́ sạṅgiń sạṅgiń kho̠n ho̠ṛko hijuḱa. O̠ko̠e do̠ bhe̠nte̠, o̠ko̠e do̠ riskạte̠, o̠ko̠e do̠ ḍuluṅ gạḍite̠, o̠ko̠e do̠ re̠l gạḍi, arhõ̠ ado̠mko do̠ taṛam taṛamte̠ko hijuḱa.

Am do̠ ce̠t́e̠m baḍaea melare̠ ce̠t́ ce̠t́ko ńamo̠ḱa? Aema mo̠ńj mo̠ńj jinis ńamo̠ḱa. No̠nḍe̠ lo̠lo̠ jilạpi, khạjạṛi, muṛki, jo̠nḍra ata jo̠m ạḍi mo̠ńj ạikạuḱa. Melare̠ gidrạ gateḱ lạgit́ ro̠ṅ be̠ro̠ṅ reaḱ bilun ar lako̠ṛbanḍoḱ ho̠ro̠ḱaḱ hõ ńamoḱa. Ale ato aṛete̠ re̠l gạḍi lain calao akana, siń ńindạ re̠l gạḍi do̠ calaḱ hijuḱa. Jho̠ṅko̠ṛ jho̠ṅko̠ṛ saḍe ańjo̠moḱa. Dinạm ạyuṕ bela gate kuṛiko sãote̠ lain aṛete̠ duṛuṕkate̠le̠ go̠lpo̠ea.

Mit́ṭen casa hoṛe tahẽkana. Uniren do goṛa pereć gại ḍaṅgrako tahẽkantaea. Casa hoṛ jaoge cas abada ar toa ạkhriń kate gharońje calaoet́ tahẽkana. Mit́din mit́ṭen tạruṕ do casa hoṛaḱ goṛare boloyena.

Ado tạruṕ sabe lạgit́ casa hoṛ do ḍaṅgra goṛae sińkeda. Note duạr siń ńelte tạruṕ do khube botorena, ente onḍoṅoḱ reaḱ jãhãn hor bae ńamleda. Onate tạruṕ do kajakte aḍraoḱe lagaoena ar mit́ṭen kate ḍaṅgra jojome dhurạuena. Tinre casa hoṛe bujhạukeda je, tạruṕ do ar bae saṕ daṛeaea ado usạra duạre jhićkeda. Duạr jhićket́ torage tạruṕ doe dạṛkeda.

Khange casa ren bạhui hećena are metaekana, cekate nunạḱ kạumạu do ańjomoḱ kana? Ado ona sanamaḱ kathae lạiadea. Onako katha ańjomkate casa ren bạhu doe menkeda, okoe janwar ńelte joto hoṛ botorteko dạṛa ar am do uni janwar sabe reaḱem kurumuṭueda. Ńelkedam tinạḱgan ḍaṅgrako goćena. Duạr jhić tahẽlen khan nonka dosa do baṅ hoekoḱa.

Mit́din lać ar jaṅgakin reṭepeṭeḱ kana, okoeaḱ daṛe ḍher menaḱa mente.Jaṅga do laće metadea,“okoe am doe asenet́mea? Ińge! Enḍekhan lạime, ińge ḍheriń daṛeangea.

Lać doe menkeda, Hẽ?Menkhan iń doń lać kạnạń, jomaḱ jom kateń hajameda, ar amiń jom ocoyet́mea, onatem taṛam daṛeaḱ kana, ar baṅkhan?”

Jaṅga doe menkeda iń taṛam kate jomaḱiń jogaṛ ạguyeda, onate am hõm jom ńameda.” Laće menkeda,“Iń do taṛam reaḱ daṛeń emam kana. Iń do daṛe bạń em lekhan cekatem taṛamkea?”

Sikhạuna: Okoe hõ eskar do bae calao daṛeaḱa. Bańcao lạgit́ aema hoṛaḱ goṛo jạruṛa.

Fashion se sajoni kuṛi se maejiukoaḱ apnaraḱ lạbit́ kaṭa reaḱ joton do ạḍige hewa menaḱtakoa. Ńelkeabon kaṭa reaḱ panahi do ạḍige jạruṛ jinis kana. Ar niạ kaṭare horoḱ panahi jokhon apnar hoṛmo reaḱ sajko são mit́kate mońjge horogoḱa un oktege ona do hoyena niạ jug reaṅ fashion. Ar niạ jug reaṅ nonkan ńeloḱ lekan panahi hõ amaḱ hoṛmo lạgit́ muskil hoe daṛeaḱa. Jodi am ṭhik map ar usul reaḱ panahi baṅ hoelen khan hoṛmo lạgit́ mit́ maraṅ khoti hoedaṛeaḱa.

Hi-Hil re tinạḱ muskil: Okoeko kuṛi se maejiuko sajoḱko kusiaḱ onko lạgit́ do maraṅ mit́ṭen oṅso do hoyoḱ kana niạ hil senḍel. Onko do noạ usul senḍel ạḍiko bachao joṅoḱa. Niạ usul panahi modre menaḱa pencil hil, platform hil, semi hil ar hõ nonkan nanan ńutuman hil panahiko. Ar kuṛi hoṛ hõ niạko sokh kateko kirińa. Ar ritimoto ona horoḱ kate taṛamko prakṭisa. Cet́ lekakate aćaḱ taṛam hoelenre ona senḍel se hil niạ ḍaharre baṅe bhindạṛoḱ. Menkhan niạ usul hil horoḱte ạḍi maraṅ muhim hoedaṛeaḱa. Jaoge Hi-hil horoḱ lekhan hoṛmo reaḱ bisi jaṅ hasoa. Ona eskar do baṅ menkhan ạḍi jaoge bebohar lekhan bisi jaṅ reaḱ haso khon ehoṕkate hoṛmo ạḍi ạṛis ạikạuḱa ar jaṅ reaḱ khoe do bại bạite hoyoḱa. Ar aema din dea haso khon Arthritis ńutuman rog hõ hoedaṛeaḱa niạ usul senḍel se hil horoḱ iạte. Oka okte taṛam jokhen hõ haṛaḱ bhindạṛ reaḱ sombhobona tahena. 2 inci usul hil jaṅgare sabhabik khon 50 percent bạṛti cape teara.

Muskil Flat Senḍelre hõ: Bhạbitoḱ kanabo je usulaḱ panahirege joto somossa, menkhan baṅ flat senḍel rehõ hoṛmo reaḱe khotiegea. Hi-hil jemon dea hasoe ehoṕa onkage flat senḍel tehõ kaṭa reaḱ iḍi hasoa. Pạhil re flat se soman senḍel mońj aramge ạikạuḱ rehõ ạḍi aema din horoḱ lekhan thoṛa thoṛa iḍi hasoge tayomte lạṭukate bisi jaṅ hasore mucạdoḱa. Ona iạte jaoge usul senḍel baṅ horoḱkate okte okte flat senḍel ar hõ okte okte flat se soman senḍel horoḱ horoḱ usul senḍel hõ horoḱ jạruṛa.

Tobe tinạḱ usul se cet́lekan senḍel (panahi) horoḱa: University  of Calofornia Bio-medical labrotary reaḱ mit́ gobesona re ńelakana, mit́ṭen hoṛ dinre goṛre 60 hajar khon 1 lakh bar taṛam lạgit́ jaṅga dohoea ar e rakaba. Jãhãe Jodi 70 serma bańcaoḱ khan sabhabik bhabege uni do tinạḱ bar kaṭatae taṛam lạgit́e tul are dohoea ona do bo aṭkar daṛeaḱ kangea. Onate nunạḱ bar kaṭa taṛam lạgit́ mońj panahi horoḱ reaḱ jạruṛ menaḱa mente doctor ko meneda. Hoṛmo reaḱ jaṅ se iḍi, ḍanḍa, gunṭhi ṭhik dohoe ar jaṅko reaḱ khoe ko khon mońj dohoe lạgit́ jạruṛa pamp shoe se naseaḱ usul senḍel. Din hiloḱ kaṭare beohar lạgit́ senḍel se panahi reaḱ usul 1 1/2 inci khon usul jemon baṅ hoyoḱ. Ar nanha hil bodol moṭa cạrkona payawaḱ hil senḍel horoḱ lekhan hoṛmore  jhuki kom tahena.

Pe pon se mõṛẽ bochor umerren kaṭić gidrạko bulạuko reaḱ eneć kana. Asokaete ạyuṕ jokhen goṛom buḍhi hoṛ do kạṭić gidrạkoye eneć baṛakoa. Eṅga apako kạmireko dhurạu akan tahẽkan jokhen hoṛ do gidrạye bulạukakoa.

Eneć-Eke ekete gidrạko do akoaḱ tiko haraṛa leṅga ti reaḱ uduḱ kạṭuṕ eneć ocoḱkan gidrạ doye uduḱkaḱa ar eṭaḱ kạṭuṕ doye sikuṕkaḱa.

Jojom ti reaḱ uduḱ kạṭuṕ do leṅga ti reaḱ sikuṕ akan kạṭuṕreye haraṛkaḱa seye gotokaḱa, ar onkage sareć kạṭuṕko doye sikuṕ okokaḱa. Buḍhi do eke ekete, nonka bãkhẽṛate gidrạwaḱ uduḱ akan ti kạṭuṕ aćaḱ jojom ti reaḱ uduḱ kạṭuṕteye pheda

Haraṛ kanṭhaṛ maṅgar jaṅ

Pạrni pat, pạrni pat

Jham, jham ḍhela ḍhili ḍhela ḍhili

Hãsguṭi didiram didiram

Birạm do daḱ loye dukạna,

Kạri hạnḍi beker benḍaṅ chorwaṅ

Chorwaṅ roṛ tora uni gidrạ do aćaḱ leṅga ti aćaḱ jojom hatlaḱreye okokaḱa. Ado dosar ti kạṭuṕe phet́ ocoḱa. Unre uni buḍhi do ạḍi mońj lagṛẽ golwari baha ar chạṭiạr sereń reaḱ sal mesal rạṛate kạṭuṕe phedtaea noḱoe nonka sereńate,

Kit kite kitạ buṭạre

Tala tala ralsa buṭạre

Ja hedelsiń jo sae burure,

Gindir gidić gindir rase

Toṛma rase torma rase

Lemko leṅgor leṅgoṛase lem do

Jaba merom bheo bhạri

Bheo Bhạri khetlaoḱ

(Ol toṅgeḱa)