Meskoć

Ḍigiṭal nisạ-

Mit́din mit́ṭen gidrạ dinman mobile phone-e ńeńelkan tahẽkana. Ado ać babae metadea-

Baba: Cedaḱ dinman phonem ńeńel kana? Thoṛa puthi paṛhaome, bud ạkil hameṭme.

Gidrạ: E ba, puthi mań paṛhaoḱkange!

Baba: Okor tinrem paṛhaoḱ kana?

Gidrạ: Tinre mobile re charge cabaḱa ar charger sendrate bạń ńama!

Baba: Enḍekhan ạkil do baṅ, amaḱ do eken betạri reaḱ charge-ge ḍheroḱkantama!

Kanṭhaṛiń joma

Kaerań joma

Arhõń joma ul,

Sanamko mit́kate

Jomabon niạbar

Kamraṅga ar jamrul.

Jojoń joma, pipiạ̃ń joma

Arhõń joma sińjạ,

Sanamko mit́kate jomabon niạbar

Anaros ar nạrkol.

Mit́din Ṭoni aćren gateko são birte daṛane calaoena. Bir reaḱ darekore aema cẽṛẽ ciprut́ko aṕ akan tahẽkana. Ṭoni ren gateko do khilạḍoḱ okte ackage cẽṛẽ sećge bạṭulko tuńkeda. Khange bạṭulte mit́ṭen cẽṛẽ josente ńurena. Uni cẽṛẽ do hasote beret́ hõ bae beret́ daṛeaḱkan tahẽkana.

Ṭoni ar aćren gateko usạra uni cẽṛẽ Ṭoni takoaḱ oṛaḱko ạgukedea. Ṭoni ać baba do uni cẽṛẽ josakan jaegare molhome lagaoadea. Ado Ṭoni ar uniren gateko metat́koa, “Abo lekage jib janwaraḱ hõ jiwi menaḱa. Onko hõ duk kosṭo ko ńama. Abo do aboaḱ duk kosṭo reaḱ kathabon lại sodor daṛeaḱa, menkhan onko do bako lại sodor daṛeaḱa, inạge onko ar abo talare begartet́ do”.

Ṭoni ar uniren gateko akoaḱ bhul ko aṭkarkeda. Onko do Ṭoni ać babako kathawadea tis hõ ar cele cẽṛẽ hõ bako hạnkoa.

Moli do ul jom ạḍi kusiaḱkan tahẽkana. Mit́din Moli ać baba hạṭiạ khon ule ạgukeda. Rạskạte Moli do ona ule jomkeda. Ul jom tayom Moli do raḱe ańjomkeda. Raḱ ańjomte hahaṛayena. Ado ńelkeda aćaḱ ti reaḱ jaṅge raḱeda.

Moli jaṅe metadea, “Cedaḱem raḱeda?” Jaṅe menkeda, “Amaḱ bagwanre topakạńme, am cet́em koea onageń emama.” Moli menkeda, “Sạrige!” Onate Moli do guli koekedea. Ado ṭhoḱ ṭhoḱ saḍeyena ar aema guli ńelte ạḍi ãṭe kusiyena. Jaṅe menkeda, “Amaḱ gunṭhi somaniń haralen khan pea sok iń purạutama.

Moli do iskulte calaoena. Iskul khon hećkate jaṅ ńelte disạkeda ar usạra bagwanre topakeda. Thoṛa din tayom Moli ńelkeda darere barea sakam akana, kusite dare beṛha eset́keda ar daḱe dulada.

Ar mit́dine ńelkeda ul dare do gunṭhi soman harayena. Ado dare Moli metadea, “Amaḱ sok lạime.”

Moli menkeda, “Ạḍi lạṭu dare hoyoḱma”. Ar dare do lạṭuyena.

Dare menkeda, “Sok lạime.”

Moli menkeda, “Dare pereć ul jo hoyoḱma.” Ar darere aema ul joyena.

Dare menkeda, “Amaḱ tesar sok purạu lekhange, iń doń senjoṅa.”

Moli menkeda, “Am do ińren gate tahẽnme.” Ar dare do Moliaḱ bagwanrege tahẽyena.

Kạṭić kạṭić gidrạ pidrạ

Paṛhaoḱako joto.

Iskul calaḱako dinạmdin

Midoḱako joto.

Sapha sạphi tahẽnako

Mońj dohoeako joto.

Paṛhaokate bodolako

Santal somaj joto.

Mit́ atore barea gate koṛakin tahẽkana. Raju do ạḍi coṭkare tahẽkana ar jaoge sapha sạphi tahẽne kusiaḱkan tahẽkana. Ar Joni do ạḍi kuṛhiại tahẽkana. Nunạḱ kuṛhiạ tahẽnkana je tin dhạbić eṅgattet́ ḍạbrạḱ bae metaea un dhạbić bae ḍạbraḱkan tahẽkana.

Mit́din onkinaḱ iskulre piknik ko bondoboskeda. Piknik calaḱ lạgit́ joto hoṛ ạḍi kusi rạskạreko tahẽkana. Onate laha ńindạre piknik reaḱ jotowaḱ kạmi sạitạukateko jạpit́keda. Setaḱre Raju do Joni ṭhene senenre ńelkedea, Joni do lać hasote kạhilakana.

Raju ar Joni eṅgat do usạra harephare ḍaktar ṭhenkin idikedea. Ḍaktar bidạu baṛakateće menkeda, Joni do sapha sạphi bae tahẽnte nonkan ruạre jạbunena.

Ado ḍaktar Joni rane emadea ar sapha sạphi tahẽne metadea. Sãote arhõ pe din jirạure tahẽne metadea. Onate Joni do piknik calaḱ hõ baṅ hoelentaea.

Gaḍa aṛe aṛete

Kaḍa dada gupi kan,

Kaḍa gupi kan dada

Ranem lala kan,

Ceka tenam baḍaekeda

Dada rane lala kan,

Hạni gegoe landaket́

Heho kha jare.

• Jãhãe bạṛić horteye ḍarhaoaḱ khan uniaḱ mucạt́ halot ńel hạbić alom tạṅgikaḱa. Jạruṛ oktere uni goṛoae lạgit́ laha hijuḱme.
• Judi jãhãeaḱ bhạlại hoe ocoem menjoṅ kan khan, maṛaṅre uniaḱ mon ńamtae lạgit́ kurumuṭuime.
• Mit́ hoṛ samaṅre oka katha roroṛ bam dila, uni khon danaṅre ona katha do alogem ucrạna.
• Okoe dane emoḱa, uni do tis hõ reṅgećte do bae gujuḱa.
• Eṭaḱko haron ocoko khon boroṅ amge ona haron reaḱ hamal do gogme.
• Okoe tinạḱ ‘here chi baṅoḱa, uni do unạḱgeye ńama.
• Siropate do baṅ, menek haparaore ge sorosić doe bachaoḱa.
• Jãhãn lạṭu kạmi reaḱ ponthako do maṛaṅte ame dhupuc ocomea, menkhan kạmi ehobme, ńelam amaḱ monre dil-daṛe sahreḱa.
• Okoeaḱ apnar-kobojoḱ reaḱ daṛe bạnuḱtaea, uni do jãhãn boge gun hõ bạnuḱtaea.
• Haḱtao khon dadanrege bạṛti rạskạ do menaḱa.

Hạni ńeloḱkan

Pagla hạti,

Hijuḱ kane abo seć

Delabon dạṛa oṛaḱ seć,

Dada hećkate dal kedea

Ńir calaonae pathar seć.

Meskoć

Kuṛhiạ Hoṛ Doe Okoe Kana?

Mit́ hoṛren pea hoponko tahẽkana. Mit́din onko pea hopon ać ṭhene hohoat́koa are metat́koa, “ape modre asol utạr kuṛhiạ okoe kane, uni mit́ sae (100) ṭakań emaea.”

Khange maraṅ koṛa doe mengot́keda, “E ba ṭaka do ińge emạńme, gublireń bolokaḱa.”

Tala koṛa doe menkeda, “E ba, ona ṭaka do ińaḱ aṭet́re doho oṭokam, ti tiạr kate ṭaka ohogeń hatao daṛekea.

Onka leka huḍiń utạrić koṛa hõe menkeda, “E ba, dayakate ona ṭaka ińaḱ gublire bolo oṭokam.

Sikhnạt: Asketiạ do hoṛ nonkae leḍha koa je aćaḱ bhạlại reaḱ kạmite hõe ạṛisoḱa.