Rajaḱ Golpo

Rupnogorren mit́ṭen Raje tahẽkana. Uniaḱ aema raj prasad, dhon-sompod, sona-dana emanteaḱ jinisko tahẽkantaea. Enrehõ Raje cintạḱkan tahẽkana. Cintạ kate Raje ńelkeda teheńiń goćlen khan ińaḱ raj prasad, dhon-sompod, sona-dana, jumi jaega okoe rạkhi jogaotińa?Noa katha raje cintạkeda.

Ado cintạ cintạte ackage mit́din mit́ṭen babaji hećena. Uni babaji doe metaekana, “Raj alom cintạḱa, mit́ṭen kathań metamkana. Iń ṭhen ạsirbad daḱ menaḱa. Noa ạsirbad daḱ amren bạhu ńu ocoyem. Amren bạhu noa daḱe ńu lekhan mit́ṭeć kuṛi gidrại hoyoḱtaea. Uni kuṛi gidrạ hoelen khan uniaḱ ńutumem dohoetaea Tusar Konna. Ar uni Tusar Konna amaḱ raj prasad, dhon-sompod, jumi jaega jotowaḱe rạkhi jogaotama”.

RẠSKẠ

Sereń rãwãḱ Tirio sạḍe,
Sogoe koṛama liḍa laḍe.
Ṭamak ḍubu, tumdaḱ dhạtiń,
Sạntal hoṛaḱ rạskạ seteń.

Baha bạgwanre bhãwãr leka,
Santal rạskạm huṛiń ceka.
Tirio oroń rughuṛ sạḍe,
Mon do hilạuḱ dulạṛ gate.

Disom ato sãota tala,
Sanam hoṛge rạskạ jhola.
Reṇgeć tetaṅ duk bhabna,
Rạskạ ṭhen ma hiṛińena.

Baṇ do be-jom baṅ do jomte

Enhõ rạskại orme onte,

Rạskạ tege sanam ghuṛi

Tahen kanabon juri pạri.

Alobon hiṛiń abonaḱ dosa

Menaḱ bona nit be bhorsa,

Beṇ̇gedabon nit dhạrti puri

Lahaḱ kan ko sanam hara hạri.

Oloḱ ạkil hameṭ sãote

Marsalabon santal gãota,

Rạskạ dobon rạskaḱ jãhãe

Sãota sagaṛ debon lahae.

Boḍa Biń Ar Muć

Mit́ṭen birre boḍa bińe basoḱkan tahẽkana. Boḍa biń do ạḍi bisane tahẽkante uni pheḍ calaḱ okoege bako rebenkan tahẽkana. Onate biń do ạḍi gorobe aṭkaret́ tahẽkana. Apnarte ạḍi dil ar daṛeane hudisoḱkan tahẽkana.

Mit́din boḍa bińe tạṅkhikeda, aćaḱ bhugạḱ pheḍre mit́ dol mućko bhugạḱ akada. Ona ńelte ạḍi ãṭe edreyena. Adoe menkeda, muć aḱ nunạḱ maraṅ sạhũs, ińaḱ bhugạḱ pheḍreko bhugạḱ akada! Ado onko muć laga ocoḱko lạgit́ boḍa biń do onko upạrte dhawakeda. Mit́ okte muć do akoaḱ jiwi bańcao lạgit́te boḍa bińaḱ hoṛmoreko ger bit́ena. Khange boḍa biń do hasote kiriṛ kiriṛ kikiạue dhurạuena. Enrehõ onko muć do bako aṛaḱledea. Mucạt́ dhạbićte boḍa biń do muć khon bańcaoḱ khạtirte bir khone dạṛkeda.

Meskoć

Meskoć

Mit́din mit́ṭen Joj ar Asamikin galmaraoḱ kana-

Joj: Am dom baḍaea eṛe katha roṛ lekhan cet́ hoyoḱa?

Asami: Hẽ sir, iń do norok reń calaḱa.

Joj: Ạḍi bhage! Ar sạri katha roṛ lekhan cet́ hoyoḱa?

Asami: Mamlareń hirạuḱa.

SASAṄ SẠṚI

Esel kuṛi sasaṅ sạṛi

Bandere ma alak jạ̃ṛi,

Ńeloḱ rema serma rạni

Jhalkaoedae sorog puri.

Juạn kuṛi bapla umer

Seṭeren taea juri duạr,

Pạhil ńapam juri sãote

Ato gãota somaj sãota.

Dạuṛa cetan juri jota

Jog mạńjhiaḱ sonot loṭa,

Ul sakamte chiṭkạu jạṛi

Bande kate sasaṅ sạṛi.

Sasaṅ gedo utui soṛom

jel utu karahire doṛom,

Sasaṅ gedo sanam okte

Nãwã aroe hoṛmo mone.

Sasaṅ roṅma sạgun cinhạ

Sasaṅ cẽṛẽ peṛa piạ,

Sunum sasaṅ ojoḱ orońj

̕Ehoṕedae nãwã gharoń.

SIM SẠNḌI

Setaḱ́ Simraḱ Kisni cẽṛẽ

Mat́ darere cero bero,

Tahen kanko Sãota sote

Joṛa joṛage horo boro.

Gudṛi cetan busuṕ kạnḍi

Menae take araḱ sạnḍi,

Maraṅ simraḱ auri aṅgaḱ

Araḱ sạnḍimae jạpit́ laṅgaḱ.

Disạ torage kukṛicut́te

Jạpit́ hoṛe jagwar mete,

Ańjom tora aṭet́ rege

Beret́ lạgit́ onte note.

Araḱ simaḱ nunạḱ aṛaṅ

Kukṛu idiay ekal haraṅ,

Maraṅ simraḱ huḍiń simraḱ

Kukṛu tege marsal setaḱ.

Meskoć

Meskoć

Oloḱ Paṛhaoḱ Okoye Cet́ Unige Gạḍi-Ghõṛãre Dejoḱa.

Mit́ṭen gidrạ private paṛhaoe lạgit́ mahasoe din hiloḱ oṛaḱe hijuḱa. Ado mit́din doe paṛhaoede kana-

Mahasoe: Iń sãote roṛme, oloḱ paṛhaoḱ okoye cet́ unige gạḍi-ghõṛãre dejoḱa.

Gidrạ: Mahasoe noa katha do baṅ ṭhik kana.

Mahasoe: Cedaḱ?

Gidrạ: Cedaḱje, Mahasoe am ma ạḍi aemam paṛhao akat́! Enḍekhan cedaḱ din hiloḱ taṛamtem hijuḱa?

Kaṭ Baḍohi Ar Mit́ṭen Pajhaṛ Cẽṛẽ Reaḱ Golpo

Mit́din mit́ṭen kaṭ baḍohi kaṭ mamaḱe calaḱkan tahẽkana. Horre ńelkeda, banḍhej hoṛkoaḱ phãndre mit́ṭen Pajhaṛe aṭkao akana. Kaṭ baḍohi do uni pajhaṛe bańcao kedea.

Inạkate kaṭ maḱ lạgit́ mit́ṭen burureye dećena. Kaṭ maḱ tayom tinre latare phedoḱ lạgit́ unre oka sećte latare phedoḱa ona hore hiṛińkeda. Jãhãn upại baṅ ńamkate, uni hoṛ do maraṅ utạr dhirire duṛuṕena ar goṛo ńam lạgit́e koyoḱ horkeda. Ackage uni Pajhaṛ do uni hoṛ ṭhene hećena, one okoe do buru dejoḱ lahae bańcaokede. Khange Pajhaṛ do uni hoṛaḱ ṭupṛi gerkeda are uḍạuena. Onate kaṭ baḍohi doe raṅgaoena.

Ṭupṛi ńam ruạṛ lạgit́te Pajhaṛ tayom tayomte dạṛkeda. Nonkate thoṛa ghạṛić dạṛ tayom latar pheḍoḱ reaḱ hore ńamkeda.

Noa karonte ińaḱ ṭuprim idikeda. “Am dom khojoḱ kan tahẽkana iń do am tayom tayomteń calaḱa ar latar pheḍoḱ horiń ńam ruạṛ daṛeaḱ! Adi aema sarhao, gate.” Kaṭ baḍohi noa katha Pajhaṛe metadea.

Sikhnạt: Bhage kạmi reaḱ jo do jaoge mońjge hoyoḱa.

Bapla Sogoy

Bapla din do nenḍayena

Ato koṛako umjhạuena,

Tinre hijuḱ ona ghạṛi

Sogoy sanakan ghane ghạṛi.

Tumdaḱ ṭamak jomkạo saḍe

Mạndạṛiạ ma jaṅga laḍe,

Tirio murli ar phet́ banam

Manḍwa latarre koṛa haṛam.

Tumdaḱ saḍekan tińdạṇ chop

Eneć kuṛiaḱ hilạuḱ ehoṕ,

Kaṛba ḍabaṅ ḍobe ṭamak

Kuṛiko kosae chamak chamak.

Tayom mucạt́re sogoy koṛa

Tiriạu akanko hanko tora,

Ti thayo ar ḍanḍa hilạu

Ńeloḱ kanko ekal milạu.

Santal somajre bapla sogoy

Mone jiwiye romoj rijạu,

Akhṛa ehoṕre sereń rãwãḱ

Sogoy koṛawaḱ jhãwãḱ.

Bapla sogoyre santal rạskạ

Duk bhabna sanam ikạḱ,

Bul hoṛma thayo ghaňjeṛ

Rạgạu mente hoho pajheṛ.

Baṅgla Nãwã Serma 1433

Teheń do Baṅgla serma reaḱ pạhil din kana. Nãwã serma reaḱ mane do nãwã as, nãwã kukmu ar nãwã jion reaḱ taṛam ḍahar. Calaoen serma reaḱ joto lekan laṅga haron, duk-kosṭo bạgikate Baṅgali do teheń nãwã serma nãwã dinko ataṅ daramkeda.

Baṅgla nãwã serma do Baṅgali hoṛ ko lạgit́ maraṅ din kana. Baṅgladisom ren joto hoṛ hoponko lạgit́ge miduḱ reaḱ maraṅ din kana. Darakan din reaḱ aema lekan bhageaḱ kodo noa talare jopoṛao menaḱa.

Candoe rakaṕen são sãote aḍepase ṭoṭha ar disomre porob reaḱ roṅ pasnaoena. Araḱ-ponḍ roṅan kicrić horoḱ bande kate joto hoṛaḱ mẽt́ muṭhạnre baṅgla nãwã serma reaḱ rạskạ sodoroḱ kana. Hor ḍahar, park, ạri-cạli reaḱ jaegakore aema lekan mela hoyoḱ kana. Okare do ańjomoḱa ‘Eso he boisak’ sereń reaḱ rạṛ, arhõ okare do ḍhol, ḍhak reaḱ saḍe. Rajdhạni reaḱ Romna Boṭomul khon ehoṕ kate disom reaḱ goṭa ṭạnḍirege baṅgla nãwã serma reaḱ rạskạ bamberoḱ kana.

Baṅgla nãwã serma do eken mit́ṭen din do baṅ kana, noa do baṅgali koaḱ leg-acar, ạri-cạli reaḱ maraṅ cinhạ kana. Jạt, dhorom bạgikate joto hoṛ miduḱte nãwã serma reaḱ rạskạko hạṭiń joṅa. Aema jaegare aema lekate noa dinko manaoeda. Bạṛtikaete Baṅgaliko do nana hunạr mela, sobhajatra, eneć khilạḍ ar rạskạjoṅ akhṛako talate baṅgla nãwã sermako ataṅ darameda.