MARAṄ DIN

Maraṅ DIN baṅ maraṅa ghonṭa saḍe rãwaḱ

Baṅ kana din do maraṅ porob reaḱ hewaḱ.

Manwa rupe hatawana abon Isor Baba

Maraṅ hoyen din do noa soetan daṛe caba.

Noa din ge dhạrti tala maraṅ mạhimate

Seṭerenae jisu mạsi manwa jonom kate.

Abo khonaḱ hiskạ bạḍại hiṛiń cabae hoyoḱ

Tobe aneć sanam kore rạskạ seṅgel joloḱ.

Babon tahen sanam koge dos ar bhinạ bhini

Ente nitoḱ seṭerenae babańcaoić uni.

Sanam koaḱ mone ontor saphae abon teheń

Maraṅ DIN re rạskạ jion jemon hoyoḱ jeleń.

Ontor mundil sajao abon jisu mạsi lạgit́

Boeha dulạṛ urgum dohoe tahenabon mit́

Huḍiń maraṅ sanam koge ISOR ṭhen do soman

Pạtiạr jion khemao lekhan ńamoḱ serma dolan.

Reṅgeć kisạṛ ṭuạr amar rạnḍi ṭhunṭạ dukhi

Sohot́ kobon goṛokote sanambon tahen sukhi.

Sanam koaḱ oṛaḱ hoyoḱ nãwã Jerusalem

Dulạṛ jisu MARAṄ DIN re rạskạ seteńalem.

MARAṄ DIN RẠSKẠ

Ń́́́́ut cabayen marsal hećen

Botor bạnuḱ tabon

Duk dạndi sanam hiṛiń kate

Rạskạ hulạs abon.

Huḍiń mone maraṅabon

Maraṅ DIN lạgit́

Ńindạ tayom setaḱ hoyen

Babon tahen jạpit́.

Goṭa serma tahẽ kana

Kạima hende rimil,

Sanam koaḱ jion hoyoḱ

Sapha riṛim ipil.

Sanam koaḱ hoṛmo rege

Horoḱ bande Nawa,

Onka leka mone ontor

Jạruṛ dewa sewa.

Sapha reaṛ setaḱ hijuḱ

Kiṛit́ raskạ hulạs,

Sunum piṭhạ sãote guṛ ca

Ńuabon gilạs gilạs.

Ontor reaḱ sanam mạilạ

Ạruṕ sapha kate,

Hulạsoḱ bon rạskạ abon

Girjạ maṛaṅ kate

Sereń

Bagwanre banda nạ̃ṛĩ sarjom bir re saṅ nãṛĩ

Dạkhin bihạr redo kadam dare (2)

Saṅ nạ̃ṛĩ banda nãṛĩ alom joton ạdibạsi

Amaḱ jonom disạm jogaome

Amaḱ jonom jạti ma jotontam.(2)

HO̠ṚMO̠ JO̠TO̠N

Lo̠kho̠n do̠ saradinman dhuṛire̠ye̠ gate baṛaea. Paera hõ kisni leka ce̠ṭe̠ ce̠ṭe̠ye̠ paeraḱa, mo̠jte̠ bae iskir saphaḱa. Rabaṅ se̠ṭe̠re̠n khan ho̠ṛmo̠ ro̠do̠t́entaea ar luṭi jaṅgako paṛaḱentaea. Onate̠ taṛamte̠ do̠ jaṅga hasoye ar ro̠ṛ landa te̠do̠ moca hasoye.

Mit́din iskulre̠ mahaso̠eye̠ kulikedea, “Teheń setaḱ ce̠t́e̠m jo̠m ạgukeda? Ar uni do̠ moca hasokedete̠ moca coelo kate̠ye̠ me̠nkeda, Pu—pu—pu—puṭhu”ar ańjo̠mkate̠ jo̠to̠ko landaoadea. Ado̠ mahaso̠eye̠ metat́koa sapha sạphi bape̠ tahẽ̠le̠nkhan nonkage hoyoḱtapea.

Rakas Ar Kạṭić Gidrạ

Sedae jugre̠ mit́ disạmre̠ ạḍi maraṅ mit́ṭe̠n Rakkase tahẽ̠kana. Uniaḱ ạḍi maraṅ mit́ṭe̠n bagan tahẽ̠kantea. Ona baganre̠do̠ celehõ bae bo̠lo̠ ocoakokan tahẽna. Onate̠ uniaḱ baganre̠do̠ ce̠t́ baha hõ baṅ bahaḱkantae tahẽna.

Mit́din uni do̠ peṛaho̠ṛo̠ḱe̠ calaoena. Ona okte̠re̠ gidrạko do̠ gateḱko bo̠lo̠ena. Rakkas do̠ raḱ ańjo̠mte̠ uni gidrạ ṭhe̠ne̠ calaoena. Uni gidrạ ńe̠lte̠ daya he̠ćadea are̠ metadea teheń kho̠n dinạm nonḍe̠ gateḱ pe̠ hijuḱa.

Unkho̠n onko gidrạko do̠ ona baganre̠ gateḱko e̠ho̠ṕe̠na. Ar baganre̠hõ nana hunạr bahakote̠ baha pe̠rećena. Ar uni Rakkas hõ gidrạko são gateḱe̠ e̠ho̠ṕe̠na.

Tumạl: MLE Pạhil Kilạs

Munuaḱ Janam Din Reaḱ Sandes

Munuaḱ janam dinre baba do̠ bajar kho̠n mit́ṭen putul ạgukate munu ać go̠go̠e emadea. Go̠go̠ do̠ munu hahaṛa ocoe lạgit́ parko̠m latarre putule oko kadea. Munu jạpit́ kho̠ne ebhenen khan go̠go̠ ar baba do̠ uniaḱ janam din ńutumtekin sarhao kedea ar janam din reaḱ sandes sendra ńutumtekin metadea. Munu pạhile mo̠nekeda go̠go̠ paseć ać lạgit́e khir dakawakada. Cedaḱje uni khir daka ạḍi ãṭe kusiaḱa, menkhan khir daka so̠ to̠ baṅ ńamoḱ kana.

Munu do̠ mit́ oṛaḱ kho̠n ar mit́ oṛaḱe dạṛ idikeda are dạṛ ạgueda, menkhan tho̠ṛa hõ aćaḱ janam din reaḱ sandes do̠ bae ńel ńameda. Uni do̠ aćaḱ parko̠m ar bạlis latare sendrakeda menkhan okare hõ sandes do̠ bạnuḱa. Okare menaḱa sandes? Uni do̠ parko̠m latare uyuṅ keda, ar mẽt́ do̠ ulḍhạ lekayentaea. Parko̠m latarre uni do̠e ńelkeda aćaḱ janam din ńutumte maraṅ o̠kho̠ć putul.

KUṚHẠ

Kuṛhạ Cador oyo kate seṭerena rabaṅ

Nãwã saje sajaoena dare nạṛi laphaṅ.

Hũhũ hũhũ ańjomoḱa rabaṅ reaḱ sereń

Sisir daḱte lohot́ cabaḱ ạtiń kaḍa dereṅ.

Piṭhạ ḍomboḱ khir daka heṛem khijur tạṛi

Rạskạ teko bul cabaen gidrạ koṛa kuṛi,

Nãwã hoṛo nãwã caole jom rema napae,

Utạr khonaḱ hoe hijuḱa hiạ ritić halae.

Bilạn bạihạṛ sanam ṭạnḍi bele hoṛo ńelok

Ato ḍihạt sanam hoṛaḱ hoṛo bạndi toloḱ,

Lạṭu kạṭić joto koge rạskạ reko tahen

kosṭo reaḱ kuṛại tege perećena bhajan.

Jao bochor rabaṅ hijuḱ nãwã asa kate

Joroḱ ako seṅgel aṅgra duṛuṕ ạcurate,

Kantha gadle oyo kate rabaṅ laga cesṭa

Adom kodo goṭa hapta tahenako gesṭa.

Kuṛha tege eset́ ạcur hor ghaṭ ar ḍahar

Jãhãm koyog joto geco dhũnd reaḱ bahar,

En rehõ sanam hoṛaḱ monre menaḱ Asa

Bochor mucạt́ tahenako rạskạ joto casa.

Kạpurmuli

E kạpurmuli,

Amge anarkoli,

Bagan tala phuṭạḱ baha,

Hoṛko cerej khạli.

Jãhãege pe cerej peṛa,

Alope joṭet́ okoe koṛa,

Bagan tala phuṭạḱ baha,

Mońj ńeloḱ din mãhã.

Phuṭạḱ baha talare,

Kạpurmuli dulạṛme,

Dulạṛiạ mãhãre,

Iń do kạpurmulire.

Doṅ Sereń

Umin maraṅ dhạrti

Carkona prithibi

Cekate dhạrti sajaoakan

Buru sajaoakan dare nạ̃ṛĩ sakamkote

Dhạrti sajaoakan manwakote.

Maraṅ Din Ar Nãwã Aṅgro̠ṕ

Mit́ serma do̠ kajak bạrsạte hoṛoko sanam ḍubạ cabaena ar go̠ćena. Ona iạte Jhunkạ tako do̠ ạḍiko haro̠nena. Maraṅ din hõ seṭerena ar atoren jo̠to̠ gidrạko baba go̠go̠ sãote nãwã kicrić kiriń hạtteko calaḱkana.

Jhunkạ do̠ mo̠n bạṛić kate oṛaḱreye duṛuṕ akana. Ayuṕ bela Jhunkạ do̠ ać baba akoren pea geḍe saṕkate hạtteye calaoena. Uni do̠ geḍe ạkhriń kate Jhunkạ lạgit́ aṅgroṕe kiriń keda.

Maraṅ din setaḱre go̠go̠ do̠ Jhunkạ ho̠ho̠ beret́kate hutum saphaḱe metadea. Jhunkạ do̠ mo̠n bạṛić kateye beret́ena are hutum saphaena. Ona o̠kte go̠go̠ do̠ nãwã aṅgroṕe ạgukeda are metadea, no̠ḱo̠e tam nãwã aṅgroṕ.