Cẽṛẽ Ar Gạ̃ṛĩ

Mit́ṭen dare tahẽkana. Ona darere mit́ṭen cẽṛẽ aḱ tukạ tahẽkana ar tukạre cẽṛẽ hoponko tahẽkana. Mit́din ona dare latarte mit́ṭen gạ̃ṛĩ parom calaḱkan tahẽkana. Khange dare seće koyoḱket́ khan cẽṛẽ tukại ńelkeda. Ado tukại ńelket́ khan cẽṛẽ hopon tioḱ reaḱe goṭakeda.

Ado onkae hudisket́ lekage gạ̃ṛĩ do dare dejoḱe kurumuṭukeda. Dare sorre mit́ṭen ãṛgom tahẽkana. Ona ãṛgomtege gạ̃ṛĩ do dare dećena ar cẽṛẽ hopone halo ket́koa.

Luṛu Kạhũ

Mit́ṭe̠n bir re mit́ṭe̠n kạhũi tahẽkana. Uni do̠ jo̠maḱ sendrae lạgit́ niạ bir kho̠n hana bir, niạ ato kho̠n hana ato, niạ haṭ kho̠n hana haṭe̠ daṛan kan tahẽna. Mit́din mit́ṭe̠ć haṭre̠ ạḍi maraṅ ḍaṅgrako jabeledea ar jelko ge̠ge̠t́ jo̠khe̠ć uni do̠ mit́ṭe̠ć jel kuṭrạ kombṛo kate̠ birte̠ye̠ ruạṛ he̠ćena. Uni kạhũ do̠ ḍạrre̠ duṛuṕkate̠ rạskạte̠ jel jo̠jo̠me eho̠bo̠ḱa, un jo̠khe̠ć ona dare latarre̠ mit́ṭe̠n toyoe paro̠moḱkan tahẽkana. Kạhũ ṭhe̠n ona jel ńe̠lte̠ toyo do̠ ạḍiye laloce̠na ar kạhũ ṭhe̠n kho̠n ona jel cekate̠ye̠ hataoa onae mo̠tlo̠bkeda. Ar kạhũi metadea, “E̠ kạhũ am do̠ ạḍim cerhagea, amaḱ sereń rạṛ hõ ạḍi so̠ṛo̠mgetama. Ma se̠ mit́ṭe̠n sereńme̠, ạḍi ãṭ ańjo̠m sanaedińạ.”

Toyoaḱ mo̠tlo̠b bae bujhạule̠t́te̠ kạhũ do̠ kã-kã-kã sereńe̠ eho̠ṕ go̠t́ena ar aćaḱ moca kho̠n ona jel kuṭrạ do̠ o̠tre̠ ńure̠na. Jel ńur tora Toyo do̠ onae lako̠ṕkeda ar birte̠ye̠ dạṛkeda. Kạhũ do̠e bujhạukeda Toyo ṭhe̠ne̠ e̠ṛe̠ ocoakana. Uni do̠ dayage arhõ jo̠maḱ sendrae uḍạu calaoena.

Tumạl:Ańjo̠m jo̠ṅ jạṛ-pạhil kilạs

MẠNDẠṚIẠ

Baṅ do sohrae baṅ do lãgṛe doṅ

Tumdaḱ saḍe tiń daṅ chop coṅ,

Eneć kuṛiwaḱ bidlại kaso kolsa

Sogoe koṛawaḱ juri kortal talsa.

Jemon tumdaḱ saḍe rãwaḱ

Temon naconiạ ko jarwaḱ,

Akhṛa do unrege jomkaoḱ

Tinre ru ar eneć milạuḱ.

Jãhãń ańjom jomok ru ar saḍe

Maḍwa latar bolokạń liḍa laḍe,

Ti thayo thayo pajheṛ ho ho

Thoṛa khange bujoḱ ạdi lo lo.

Nãhãḱ mandạṛiạ ḍije pańja

Sedae mandạṛiạ ru ge mońja,

Oka do juriḱ tako oka do baṅ

Enhõn rạskạ tako komao do baṅ.

Sedae mandạṛiạ tumdaḱ ceṭaḱ

Hoṛmoe rugum bạgiam eṭaḱ,

Judim tahen sor akhṛa asrại

Tin recom hilạuḱ baṅem disại.

Doṅ Sereń

Abo dobon mena ạḍibạsi ạdibạsi

Ạdibạsi mane do cet́ kana,

Ḍoboḱ johar menaḱtabon

Pạńci bande menaḱtabon,

Dhuti deṅga menaḱtabon

Riti rewaj menaḱtabon

Ạdibạsi mane do noakange.

TOROĆ BUDBAR

Teheń do Toroć budbar noa toroć budbar do goṭa dhạrtiren sanam khristan dhoromren hoṛko lạgit́ mit́ṭen bises din kangea, teheń khonge khristan dhoromre patiạ́u akan sanam boeha miserako do upạs ko saṕ se lekhayeda, babańcaoić jisu mạsi do aćaḱ kạmi etohoṕ lahare atma jion sećte noa upạs talategeye sapṛaolena, uni do dhạrti re tahen oktere harkhet saset sahao hoelen taea ar onkatedhạrti ren sanam khristan ko lạgit́ apnar baṅoḱ, apnar hoṛmo reaḱ sanam rij roṅ, baṛić hãs rạskạ goj ar harkhet saset sahao talate ISOR soṅge mońj sombond doho kate sanam ko apnar leka dulạṛko te jion kemao reaḱ sikhnạte cet́ abon kana, Jisu do aćaḱ joto lekan duk kosṭo ar gujuḱ hoelen taea. Ar noako sanamaḱ bhagaoket́te Paska se senparom porobre gujuḱ suṅgạ rạput́ket́te jitane jiwet́ beret́ena, ado delabon sanamko noa upạs sandore aboaḱ dhạrti duk bon bhagaoa ar atma jion rebon diṛho aroḱa.

Ḍomboḱ

Ḍambaḱ ḍomboḱ ḍomboḱ piṭhạ

Ce̠re̠ pe̠ṭe̠ khạjạṛi ata

Go̠ḍ go̠ḍ go̠ḍ sunum piṭhạ

Rạskạ te̠ń jo̠mket́ sibilgeń ạikạuke̠t́.

Mit́ Dol Gạ̃ṛĩ Ar Mit́ṭen Ghonṭa

Mit́ okte mit́ṭen ato aṛere mit́ṭen darere mit́ dol gạ̃ṛĩko tahẽkana. Mit́din onko gạ̃ṛĩ do mit́ṭen ghonṭako sendra ńamkeda. Ado onko gạ̃ṛĩ do ạḍi rạskạ salaḱ ghonṭa ruruko lagaoena. Ar ona ghonṭa saḍe ańjomte ato hoṛ ạḍi ãṭko botorena. Adoko hudiskeda, paseć noa do jãhãn muhim se mũhĩn reaḱ cinhạ kana.

Menkhan atoren mit́ṭen maejiu do bae botorlena. Uni maejiu do mit́ jhuṛi phol ante ghonṭa saḍe aten atente ona dare ṭhene senena. Ado sen soren khan ona dare latarre phol jhuṛi dohokeda.

Khange phol jhuṛi ńelte onko gạ̃ṛĩ do ghonṭa giḍikate phol jom lạgit́ko dạṛ ạgukeda. Ona okte uni maejiu do ghonṭa saṕkate atote ruạṛena. Ado atoren hoṛko uni maejiuwaḱ sạhũs ńelte ạḍi ãṭko rạskạyena arko sarhaokedea.

DULẠṚ

Baba-gogo boeha misera

Topol menaḱbon sirjon tora.

Kạṭić khonaḱ mit́ sãote

Nit menaḱbon hante-note

Hameṭ lạgit́ oloḱ-paṛhaoḱ

Ona sãota re menaḱ baṛhaoḱ.

Gharońj lạgit́ sạṅgiń kạmi

Jibon dhara thoṛae dạmi.

Mạ̃i do nitoḱe hara lạṭuyen

Asol oṛaḱ do talas hoyen.

Sirjon sajao noage ạri

Bạgi abon boeha chạṛi.

Jãwãe ṭhenge mạ̃iaḱ oṛaḱ

Nẽota porob-rei heć baṛaḱ.

Okoe dulạṛ tei haralen

Mońj biṭi abo ṭhen

Dohoyepe bạhu abon

Amaḱ-ińaḱ dulạṛ menaḱ

Orom hoṛ re janam khonaḱ

Jiwet́-jion re dulạṛ bon kajak

Chaḍao lạgit́ alobon racaḱ.

Dupulạṛ mane dhiṅgạl saṅgal

Dulạṛ mane suk suluk

Ńuṭuk heṛem soro-boro

Dupulạṛ mane himạl hisit́ hoe

So baha bagwan.

Ar jaoge roṛ-landa

Dupulạṛ mane suk jion re mẽt́ daḱ

Sạrige dulạṛ baṅ cet́?

Ona do jãhãebon baḍaea?

Kul Ar Sikṛĩć aḱ Golpo

Mit́din mit́ṭen bạdạian sikṛĩć do kule metadea, “joto hoṛ amko botoram rehõ, iń do tis hõ bạń botorama. Amaḱ ḍaṭa ar rama do ạḍi lasera enrehõ iń são do ohogem daṛeaḱa. Am khon hõ iń doń daṛeangea. Ạḍi pạtiạu salaḱ noa kathań men daṛeaḱa.”

Khange sikṛĩć acaḱ dil ar daṛe uduḱ lạgit́ kul aḱ mũre ger bit́ena. Kul doe bujhạukeda sikṛĩć do aćaḱ mũre aṕ akana onate uni sabe reaḱe kurumuṭukeda. Menkhan bae saṕ daṛeadea. Sikrĩć saṕ baṅkate aćaḱ laser ramate aćge mũre raboṛ josena. Khange kul aḱ mũ khon mãyãm joroḱ ehoṕena. Kul ać são bae daṛelente sikṛĩć do kajake rạskạyena. Rạskạte enejoḱe ehoṕena.

Eneć enećte tinre coṅ sikṛĩć do bindi ganaḱre jhạliyena, bae disạleda. Ar jhạliyen são sãote bindi do sikṛĩće jomkedea.

UMUL

Ul umul hesaḱ́ umul

Kulhi mucạt́ sińjạ umul,

Cạt bạisạkh jarat́ setoṅ

Kạmi khonaḱ laṅga mokoń.

Tala kulhi jojo umul

Baṛge latar tale umul,

Bạt bạihạṛ terel umul

Jiwi juḍạsi baṛe umul.

Hoṛmo bhạlạire nim umul

Setoṅ daṛanre chatar umul,

Gharońj benaore juri umul

Gidrạ pạṛiạre BABA umul.

Dhạrti redo gharońj umul

Raj-ạrire re neta umul,

Disạm kạmire montri umul

Jaejug jionre jisu umul.