Meskoć

Meskoć

Oloḱ Paṛhaoḱ Okoye Cet́ Unige Gạḍi-Ghõṛãre Dejoḱa.

Mit́ṭen gidrạ private paṛhaoe lạgit́ mahasoe din hiloḱ oṛaḱe hijuḱa. Ado mit́din doe paṛhaoede kana-

Mahasoe: Iń sãote roṛme, oloḱ paṛhaoḱ okoye cet́ unige gạḍi-ghõṛãre dejoḱa.

Gidrạ: Mahasoe noa katha do baṅ ṭhik kana.

Mahasoe: Cedaḱ?

Gidrạ: Cedaḱje, Mahasoe am ma ạḍi aemam paṛhao akat́! Enḍekhan cedaḱ din hiloḱ taṛamtem hijuḱa?

Kaṭ Baḍohi Ar Mit́ṭen Pajhaṛ Cẽṛẽ Reaḱ Golpo

Mit́din mit́ṭen kaṭ baḍohi kaṭ mamaḱe calaḱkan tahẽkana. Horre ńelkeda, banḍhej hoṛkoaḱ phãndre mit́ṭen Pajhaṛe aṭkao akana. Kaṭ baḍohi do uni pajhaṛe bańcao kedea.

Inạkate kaṭ maḱ lạgit́ mit́ṭen burureye dećena. Kaṭ maḱ tayom tinre latare phedoḱ lạgit́ unre oka sećte latare phedoḱa ona hore hiṛińkeda. Jãhãn upại baṅ ńamkate, uni hoṛ do maraṅ utạr dhirire duṛuṕena ar goṛo ńam lạgit́e koyoḱ horkeda. Ackage uni Pajhaṛ do uni hoṛ ṭhene hećena, one okoe do buru dejoḱ lahae bańcaokede. Khange Pajhaṛ do uni hoṛaḱ ṭupṛi gerkeda are uḍạuena. Onate kaṭ baḍohi doe raṅgaoena.

Ṭupṛi ńam ruạṛ lạgit́te Pajhaṛ tayom tayomte dạṛkeda. Nonkate thoṛa ghạṛić dạṛ tayom latar pheḍoḱ reaḱ hore ńamkeda.

Noa karonte ińaḱ ṭuprim idikeda. “Am dom khojoḱ kan tahẽkana iń do am tayom tayomteń calaḱa ar latar pheḍoḱ horiń ńam ruạṛ daṛeaḱ! Adi aema sarhao, gate.” Kaṭ baḍohi noa katha Pajhaṛe metadea.

Sikhnạt: Bhage kạmi reaḱ jo do jaoge mońjge hoyoḱa.

Bapla Sogoy

Bapla din do nenḍayena

Ato koṛako umjhạuena,

Tinre hijuḱ ona ghạṛi

Sogoy sanakan ghane ghạṛi.

Tumdaḱ ṭamak jomkạo saḍe

Mạndạṛiạ ma jaṅga laḍe,

Tirio murli ar phet́ banam

Manḍwa latarre koṛa haṛam.

Tumdaḱ saḍekan tińdạṇ chop

Eneć kuṛiaḱ hilạuḱ ehoṕ,

Kaṛba ḍabaṅ ḍobe ṭamak

Kuṛiko kosae chamak chamak.

Tayom mucạt́re sogoy koṛa

Tiriạu akanko hanko tora,

Ti thayo ar ḍanḍa hilạu

Ńeloḱ kanko ekal milạu.

Santal somajre bapla sogoy

Mone jiwiye romoj rijạu,

Akhṛa ehoṕre sereń rãwãḱ

Sogoy koṛawaḱ jhãwãḱ.

Bapla sogoyre santal rạskạ

Duk bhabna sanam ikạḱ,

Bul hoṛma thayo ghaňjeṛ

Rạgạu mente hoho pajheṛ.

Baṅgla Nãwã Serma 1433

Teheń do Baṅgla serma reaḱ pạhil din kana. Nãwã serma reaḱ mane do nãwã as, nãwã kukmu ar nãwã jion reaḱ taṛam ḍahar. Calaoen serma reaḱ joto lekan laṅga haron, duk-kosṭo bạgikate Baṅgali do teheń nãwã serma nãwã dinko ataṅ daramkeda.

Baṅgla nãwã serma do Baṅgali hoṛ ko lạgit́ maraṅ din kana. Baṅgladisom ren joto hoṛ hoponko lạgit́ge miduḱ reaḱ maraṅ din kana. Darakan din reaḱ aema lekan bhageaḱ kodo noa talare jopoṛao menaḱa.

Candoe rakaṕen são sãote aḍepase ṭoṭha ar disomre porob reaḱ roṅ pasnaoena. Araḱ-ponḍ roṅan kicrić horoḱ bande kate joto hoṛaḱ mẽt́ muṭhạnre baṅgla nãwã serma reaḱ rạskạ sodoroḱ kana. Hor ḍahar, park, ạri-cạli reaḱ jaegakore aema lekan mela hoyoḱ kana. Okare do ańjomoḱa ‘Eso he boisak’ sereń reaḱ rạṛ, arhõ okare do ḍhol, ḍhak reaḱ saḍe. Rajdhạni reaḱ Romna Boṭomul khon ehoṕ kate disom reaḱ goṭa ṭạnḍirege baṅgla nãwã serma reaḱ rạskạ bamberoḱ kana.

Baṅgla nãwã serma do eken mit́ṭen din do baṅ kana, noa do baṅgali koaḱ leg-acar, ạri-cạli reaḱ maraṅ cinhạ kana. Jạt, dhorom bạgikate joto hoṛ miduḱte nãwã serma reaḱ rạskạko hạṭiń joṅa. Aema jaegare aema lekate noa dinko manaoeda. Bạṛtikaete Baṅgaliko do nana hunạr mela, sobhajatra, eneć khilạḍ ar rạskạjoṅ akhṛako talate baṅgla nãwã sermako ataṅ darameda.

Gadha Ar Tạruṕ

Mit́din tạruṕ raj do toyoe metadea, “jomaḱ jogaṛ ạguạńme.” Tạruṕ raj lạgit́ jomaḱ sendra sendrate mit́ṭen gadhae ńamkedea. Ado gadha ṭhen sen sorkate metadea, “gate, teheń ńindạ raj do ame nẽota akat́mea. Onate am idiń heć akana.

Toyo aḱ kathate gadha doe pạtiạuente calaoena. Jomaḱ ńelte tạruṕ kajake kusiyena. Uniaḱ raḱ se kikiạu ańjomte gadha doe botorente dạṛkeda. Gadhae dạṛket́te tạruṕ doe raṅgaoena. Ado toyoe metadea, “nitge gadha saṕ ạguyem. Reṅgeć bạń sahao daṛeaḱ kana.

Toyo do arhõ gadha ṭhene calaoena ar uni bujhạuadete ruạṛ ạgukedea. Ar usạra tạruṕ do gadhae saṕkedete jojome dhurạuena. Ona oktere toyo do gadhawaḱ bohoḱ hataṅe kombṛo keda.

Tinre tạruṕ do mit́ leka gadhae jom cabakedea adoe ńelkeda hataṅ do bạnuḱtaea. Arhõ raṅgaote kikiạuḱ kana, okayena gadhawaḱ hataṅ do?

“Toyo doe menkeda, gadhawaḱ hataṅ do baṅ tahẽna.” Noa katha ańjomte tạruṕ do arhõe raṅgaoena. Adoe menkeda, cedaḱ ạuṛiaḱ katha dom roṛeda!?Gadhawaḱ hataṅ tahẽn khan ińaḱ kathate nonḍe am ṭhene hećkoḱa?” toyo do tạruṕe metadea.

Sạri kathagem meneda, gadhawaḱ bohoḱre hataṅ tahẽn khan thoṛagan rehõ bud akel tahẽkoḱtaea, Tạruṕ do toyo noa kathae metadea. Ma enḍekhan calaḱme.

Khange toyo do aćaḱ oṛaḱe ruạṛ senena ar oko dohoakat́ hataṅ rạskạ salaḱe jomkeda.

Lelha Raja

-Ol Toṅgeaḱ

Inạ tayom uni koṛa do raj dorbare calaoena. Raj dorbar calaokate uni koṛa do raj mit́ṭen thạri koekedea. Ṭin reaḱ thạri. Ar ṭin reaḱ thạrire mit́ṭen baber biń cet́leka pẽckoḱ onkae dohokeda. Ona doho tayom onare seṅgele jolkeda. Baber re seṅgel jol cabaena. Inạkate ona do toroć reaḱ baber hoyena. Ado rajae metadea, ‘Ne raja toroć reaḱ baber.’ Raja ona ńelte khube kusiyena.

Inạ tayom dosar kukli reaḱ roṛ ruạṛ. Ado uni koṛa do rajae metadea, amaḱ jãhãn pukhri menaḱkhan onḍe idiyińme. Uniaḱ katha leka raja do aćaḱ pukhri idikedea.Pukhri calaokate uni koṛa do ona mat́ pukhri daḱre caḍokeda. Oka seć agal kana onte do campelena ar oka seć gonḍa kana onte do unumena. Ado rajae metadea, nõḱõe raj oka seć unumena ona do gonḍa ar oka seć campelena onte do agal kana.

Khange raja do uni koṛawaḱ bud akel ńelte ạḍiye kusiyena ar uni aćaḱ kuṛại emae lạgit́ raj dorbarre sanamkoe hoho jarwaket́koa kuṛại emaye ghosonakeda. Ado uni koṛa raje metadea, E raj ińaḱ mit́ṭen katha menaḱa.’Metadeae cet́ katha? Niạ kuṛại ńam lek iń doń baṅ kana. Enḍekhan okoe kanae?’ Raja uni koṛae kulikedea, okoe kanae?

Ado uni koṛae menkeda, ‘Noa kuṛại do iń baba ńam lek kana. Am baba? Am do nit hõ am baba bam goć akadea? Baṅ raj! Iń baba ạḍi ãṭiń dulạṛea. Noa karonte iń baba ot la kate baṅkar benaokateń dohoakadea. Do am baba ạguiem, Rajae hukumkeda. Khange uni koṛa calaokate ać babae ạgukedea.

Ado rajae menkeda, iń nonkan bạṛićiń kạmikeda je joto buḍhi haṛam goćko reaḱiń hukumkeda. Amren mit́ṭen babawaḱ judi nunạḱ bud enḍekhan arhõ unạḱ haṛam buḍhiaḱ unạḱ unạḱ bud tahẽkana. Teheń khoniń ghosonakeda, ar mit́ṭen haṛam buḍhi hõ bạń goć ocokoa. Onko lạgit́ nawa bebostha hoyoḱa noa raj bakhol khon jomaḱ idikate buḍhi haṛam hoṛ jom ocokope.Tayom daram mit́ṭen haṛam buḍhi hõ begor jomte bako tahẽna. Ar onko ṭhen bud akel hameṭ hoyoḱa enḍekhan disomre lahanti hoyoḱa.

Ado aćaḱ katha lekage aćren hoponera são uni koṛa baplakedea ar aćaḱ sompot reaḱ mit́ hạṭińe emadea. Noa ńelte raj dorbarre jarwa akan sanamko ạḍi ãṭko rạskạyena.

Meskoć

Meskoć

Mit́din mit́ṭen hoṛ kuḍite ghạḍluḱe layeda. Ona atoren mit́ hoṛ do ona aṛetege parom calaḱkan tahẽkana. Adoe kulikedea-

Pạhil hoṛ: Cet́ ho, cedaḱ ghạḍluḱem layeda?

Dosar hoṛ: Chobi rakaṕ lagaoạńa, onate ghạḍluḱiń layeda.

Pạhil hoṛ: Ado chobi rakaṕ lạgit́ ghạḍluḱ lae lagaoḱa se cet́ ?

Dosar hoṛ: Baḍaeam ińaḱ koṛamte chobi rakaṕ hoyoḱtińa. Onate noa ghạḍluḱre bolokate chobiń rakaba, jemon koṛam dhạbićge chobi rakaboḱ.

Pạhil hoṛ: Ado tinạḱgan chobi jạruṛam kana?

Dosar hoṛ: Pea chobi.

Pạhil hoṛ: Haere lelha hoṛ! Pea chobi jạruṛam khan mit́ṭen ghạḍluḱte do cet́ hoyoḱtama, arhõ barea ghạḍluḱ lae me.

Lelha Raja

Mit́ disomre mit́ṭen lelha rajae tahẽkana. Uni raja do acaḱ disomren hoṛko ạḍi ãṭe dulạṛet́ko tahẽkana. Unre uniren mit́ṭen montri do raja bude emadea je, aboaḱ disom calaote ạḍi muskil hoyoḱkana.Nit aboaḱ disomre oka phosol hoyoḱkana, abad hoyoḱkana niạkote aboren hoṛkoaḱ lać baṅ biḱtakoa, obhab onṭon hõ baṅ cabaḱa. Enḍekhan noa disomre tinạḱ buḍhi haṛam hoṛ menaḱko onko do goćko hoyoḱa, ente onko do jãhãn kạmire bako lagaoḱa. Ado rajae hudiskeda, sạrige tho ińren montri doe meneda, onate uni do sanam buḍhi haṛam goćko reaḱe ghosonakeda. Khange aema hoṛko menkeda, raja aleren gogo baba alom goćkoa. Menkhan raja do jãhãn kathage bae ańjomleda. Ado rajawaḱ hukum lekage disomren joto haṛam buḍhiko goćket́koa.

Menkhan mit́ṭen koṛa do ać baba ạḍige dulạṛedekan tahẽkana ar uniaḱ hukum bataoe tahẽkana. Uni koṛa do ać baba upạr tis hõ katha bae roṛa ar bae calaḱa, onate ać baba hõ aćren koṛa ạḍi ãṭe dulạṛea. Unre uni koṛae menkeda, ińaḱ moloṅre oka menaḱ ona do hoyoḱa, enhõ iń baba do bạń gojea. Ot la kate baṅkar benaokate onḍe ać baba dohokedea. Inạkate uni do raj dorbar khone hećena. Onḍe khon jage sareć bareć jomaḱe ạguia onage ać babae jom ocoea. Nonka nonkate aema din calao idiyena enhõ disomre obhab onṭon baṅ cabalena. Haṛam buḍhi hoṛ khon jãhãn solha bako ńamet́ tahẽkana. Disom bại bạite arhõ dhaṅdhaserena.Ar lahanti baṅ hoyoḱa, obhab hõ baṅ cabaḱa.

Mit́ okte rajae ghosonakeda ińaḱ barea kukli reaḱe roṛ ruạṛ daṛeaḱa ińren hoponera sãoteń baplakaea ar mit́ hạṭiń sompotiń emaea. Noa katha goṭa disom ḍamḍaheyena. Menkhan rajawaḱ kukli reaḱ roṛ ruạṛ bako em daṛeada. Ado rajae menkeda, nun maraṅ rajosṭire ińaḱ kukli reaḱ roṛ ruạṛ emoḱ lekan mit́ hoṛ hõ bako janam akana? Ona katha ańjomte uni koṛa do oṛaḱe hećena ar ạḍi cintạre paṛaoena.Ado ać babae metadea.” Noa kukli do cet́ kana beṭa? Cedaḱ unạḱem ganḍoḱkana? Unre uni koṛae menkeda, rajae menkeda barea kukli. Pạhilaḱ do kana toroćte baber uń lagaḱa. Ar dosaraḱ do kana, mit́ṭen mat́ husit́ saphagea, menkhan baṅ bujhạuḱ kana oka seć gonḍa ar oka seć agal do.

Ona katha ańjomte ać baba doe menkeda, noa do jãhãn bepar kana se cet́? Am do teheń napaete jạpit́me. Iń gapa noa reaḱiń lạiama, ar onkage raj dorbarrem lạia. Khange ona katha lekage kạmi keda. Dosar hiloḱ ać baba do koṛatae bud akele emadea.

-Ol Toṅgeḱa

Kukṛukuḱ

Toyo donkeda sạnḍi saṕ,

Sạnḍi raḱ keda seta bhuḱ keda bhuḱ bhuḱ

Bạbu roṛ keda

E go toyo hijuḱkan.

Jạpit́ joto hoṛaḱ bhaṅgaoena.

Bạburen sạnḍi bạnuia.

Oṛaḱ sorre rel gạḍi

Poṅkate paromena.

Ạḍi setaḱre toyoaḱ raḱ

Hukạ huạ ańjomena.

Bạburen sạnḍi dare khoć raḱ kedae

Kukṛukuḱ.

Ghaṛwa Cẽṛẽ Ar Hạti

Mit́ṭen darere ghaṛwa cẽṛẽ aḱ tukạ tahẽkana. Ona tukạre ghaṛwa doe bele keda. Mit́din mit́ṭen hạti do ona dare reaḱ sakam jom lạgit́e calaoenre tukạ doe rạput́keda. Ghaṛwa bele hõ rạput́ena, onate ghaṛwa do ạḍi ãṭe mon dukena. Khan hạti sikhnạt emae lạgit́te akoren gate rõ, roṭe ar kạhũ ṭhen goṛoe khojkeda.

Gateaḱ nonkan dukre onko sanamko hećena. Ado rõ do hạtiaḱ luturre bolokate bhan bhane lagaoena. Ar onkage kạhũ do hạtiaḱ mẽt́ ṭhoṭrao ṭhoṭraote mit́ lekae kãṛã keda. Onate hạti do mẽt́re daḱe lagaoa mente mit́ṭen ghaḍluḱ seće senena. Menkhan onḍe hõ mit́ṭen roṭe raḱ got́keda. Roṭe aḱ raḱ ańjomte hạti doe hudiskeda paseć noa aḍepasege pukhri menaḱa.

Roṭe aḱ raḱ aten atente hạti doe calao idiyena. Khange hạti do ona ghạḍluḱre ńurena. Nonkate uni ghaṛwa cẽṛẽ do muskil dosa khone bańcao ruạṛena.

Sikhnạt: Bạṛić kạmi reaḱ jo do bạṛićge hoyoḱa.