So̠m ać baba do̠e kisạ̃ṛgete̠ So̠m haṭ pichạ hana niạ gateḱ jiniskoe ạguaea. Mit́ haṭ hilạḱ do̠ So̠m ać baba Ḍuluṅ gạḍiye̠ kiriń ạguadea. So̠m do̠ ona ḍuluṅ gạḍi goṭa kulhiye̠ calao baṛaya. O̠ko̠e hõ̠ bae jo̠ṭe̠t́ ocoakoa. Uniaḱ Ḍuluṅ gạḍi ńe̠lte̠ Mo̠ṅgo̠l do̠ ạḍi ãṭ cạlu sanakedete̠ ać babae metadea, “Iń hõ̠ ba So̠m lekan Ḍuluṅ gạḍi hataoạńme̠.” Nit do̠ baṅ, poesa hoele̠nge ado̠ń hataoama. Lukhibar hilạḱ haṭ din Mo̠ṅgo̠l do̠ ać baba sãote̠ kakon haṭe̠ calaoena ar dokanre̠ sajao akat́ aema lekan Ḍuluṅ gạḍiye̠ ńe̠l ńamkeda. Mit́ṭe̠ć araḱ Ḍuluṅ gạḍi ńe̠lte̠ uni do̠ ạḍiye̠ kusiyena. Iń do̠ jãhãtis onkan araḱ Ḍuluṅ gạḍigem hataoạńạ.

Aema haṭ paro̠m calaoena me̠nkhan Mo̠ṅgo̠l ać baba do̠ ać lạgit́ Ḍuluṅ gạḍige bae ạguadea. Uni do̠ mo̠n khaṭoentaea. Thoṛa poesa hoye̠n khan Mo̠ṅgo̠l ać baba do̠ gidrạ lạgit́ ona araḱ Ḍuluṅ gạḍiye̠ kiriń ạgukeda. Ona o̠kte̠ Mo̠ṅgo̠l do̠ oṛaḱre̠ bae tahẽ̠kana, barhe̠te̠ gateḱe̠ calao akan tahẽ̠na. Mo̠ṅgo̠l ać go̠go̠ do̠ gateḱ kho̠n oṛaḱte̠ye̠ o̠ho̠ ạgukedea.

Oṛaḱ he̠ćkate ackage araḱ Ḍuluṅ gạḍi ńe̠lte̠ ạḍiye̠ kusiyena. Hare̠ phare̠ uni do̠ Ḍuluṅ gạḍiye̠ saṕkeda ar kulhi se̠ć oṇḍoṅ kate̠ So̠m leka uni hõ̠ Ḍuluṅ gạḍi calao baṛaye̠ e̠ho̠ṕena.

Sedaere̠ mit́te̠n birre̠ ạḍi mo̠ńj mit́ṭe̠n baha tahẽ̠kana. Ona baha do̠ je̠ṅge̠t́ je̠ṅge̠t́ araḱ sasaṅ tahẽ̠kana. Jo̠to̠ ho̠ṛ ạḍiko sarhaoedete̠ uni do̠ ạḍi sukre̠ye̠ tahẽ̠kana. Jãhãege ona bahako ńe̠le̠t́ kan tahẽ̠n onkogeko hahaṛaḱkan tahẽ̠kana, arko me̠na haere unạḱ mo̠ńj baha.

Mit́din setaḱ kho̠n jhipir jhipir daḱe̠ e̠ho̠ṕkeda. Dinman daḱ se̠i daḱkeda, asoṛge bae asoṛ leda. Ńuhum o̠kte̠ daḱe̠ thirkeda. Do̠sar hiloḱ jạpit́ kho̠n beret́ kate̠ baha do̠e ńe̠lkeda, aćaḱ sanam ro̠ṅ do̠ daḱte̠ ạruṕ cabaentaea. Ona iạte̠ nito̠ḱ do̠ pe̠ṇḍo̠ge̠ye̠ ńe̠lo̠ḱ kana. Ạḍi dukte uni baha do̠ raraḱe̠ e̠ho̠ṕena.

Uniaḱ raḱ ańjo̠mte̠ ackage mit́ṭe̠n baha puri do̠ uni ṭhe̠ne̠ he̠će̠na are kulikedea, cekaenam co̠ro̠k cikạṛ baha cedaḱe̠m raḱeda? O̠ko̠e e̠ge̠rke̠t́mea? Hola daḱe̠ he̠ćena ar ińaḱ jo̠to̠ ro̠ṅe̠ ạruṕ cabake̠t́tińa. Alo̠m raga alo̠m ho̠mo̠ra ińaḱ jạdu kạṭhite̠ amaḱ jo̠to̠ ro̠ṅiń ruạṛkatama. Me̠nkhan ińaḱ mit́te̠n katha do̠ho̠e hoyoḱa. Ma me̠nme̠ ce̠t́ katha, amaḱ jo̠to̠ kathań do̠ho̠ea. Am do̠ dayakate̠ ińaḱ ro̠ṅ ruạṛkatiń me̠! Iń kho̠jo̠ḱ kana am do̠ amaḱ je̠ṅge̠t́ je̠ṅge̠t́ ro̠ṅte̠ jo̠to̠ ho̠ṛe̠m rạskạ ocokoa. Amaḱ mo̠ńj so̠te̠ jo̠to̠kom muhit ocokoa. Baha do̠ hare̠ phare̠ye̠ re̠be̠ngo̠t́e̠na. Puri aćaḱ jạḍu kạṭhite̠ye̠ jo̠ṭe̠t́ kedea. Ar jo̠ṭe̠t́ tora baha do̠ aćaḱ pạhil ro̠ṅ ar so̠e ruạṛ ńamkeda. Baha do̠ aćaḱ ro̠ṅ ar mo̠ńj so̠ ruạṛ ńamkate̠ baha puri aema sarhaoe̠ e̠madea. Ona tayo̠m kho̠n baha do̠ aćaḱ je̠ṅge̠t́ je̠ṅge̠t́ ro̠ṅte̠ jo̠to̠ ho̠ṛe̠ rạskạ ocokoa ar mo̠ńj so̠te̠ jo̠to̠koe muhit ocokoe e̠ho̠ṕena.

Sedaere̠ mit́ṭe̠n casae tahẽ̠kana ar uniaḱ ạḍi lạṭu lạṭu bagwan tahẽ̠kantaea. Ona bagwanre̠ do̠ jo̠-baha dareko sãote̠ ạḍi maraṅ ul dare tahẽ̠kana. Uni casa ać kạṭić tahẽ̠kan jo̠khe̠ć ona darere̠ de̠ćkate̠ye̠ gate baṛaekan tahẽ̠na. Babe̠r to̠lkate̠ye̠ kukuḱkan tahẽ̠na ar ul jo̠le̠nre̠ bele-bele ul jo̠mkate̠ ạḍi ãṭe̠ rạskạḱkan tahẽ̠na. Nito̠ḱ do̠ ạḍi mareye̠nte̠ ona ul dare do̠ ar lahate̠ leka baṅ jo̠ḱ kana.

Unạḱ ńam kate̠ hõ̠ nito̠ḱ uni casae mo̠ne̠keda je̠ niạ ul dare do̠ ar jạruṛ bạnuḱa. Uni do̠e goṭakeda; ona ul dareye̠ maga ar oṛaḱ reaḱ jạruṛoḱ ḍuli emanteaḱkoe benaoa. Uni do̠ kạṭić jo̠khe̠ć reaḱ rạskạ dinko do̠e hiṛińkeda. Nito̠ḱ do̠ ona ul darere̠ aema cẽ̠ṛẽ̠koko tukạwakada ar kạṭić-kạṭić cẽ̠ṛẽ̠ ho̠po̠nko menaḱkoa. Ona sãote̠ toṛ ar nana hunạr ṭunḍạṅ janwanko tahẽ̠nkana. Uni casa do̠ ṭe̠ṅgo̠ć ạgukate̠ ona dare mamaḱe e̠ho̠ṕena ar ona ńe̠lte̠ darere̠ tahẽ̠kan jo̠to̠ janwanko ńir phe̠ḍkate̠ uni ṭhe̠nko he̠ćena.Cẽ̠ṛẽ̠ do̠ko metadea, “Dayakate̠ dare alo̠m maga, ale̠aḱ tukạko alo̠m rạpuda, ho̠po̠nko gujuḱtalea.” Ar toṛ hõ̠ ko ne̠hõ̠radea, dare alo̠m maga tukạ alo̠m rạpudtalea.

Uni casa do̠ dare sãote̠ aćaḱ kạṭić o̠kte̠ reaḱ kathako do̠e hiṛińkeda ar ṭe̠ṅgo̠ćte̠ arhõ̠ murukte̠ dare mamaḱe̠ lagaoena. Onko janwarko do̠ ạḍi dukko ạikạuke̠t́te̠ ona dare bańcao lạgit́ko kurumuṭukeda. Cẽ̠ṛẽ̠ do̠ casako metadea, “Jho̠kho̠ne̠m kạmi laṅga hijuḱa, am lạgit́le̠ sereńa. Sereń sereńte̠ bale̠ laṅgaḱa. Ar sereń ańjo̠mte̠ amaḱ mo̠n mo̠ńjo̠ḱtama.” Toṛ do̠ arhõ̠ko metadea, “Amre̠n gidrạle̠ gateyea, bale̠ raḱ ocoaea.

Me̠nkhan uni casawaḱ mo̠n do̠ baṅ lạbit́le̠ntaea. Uni do̠ arhõ̠ murukte̠ dare mamaḱe̠ dhurạuena. Un jo̠khe̠ć dare kho̠n mit́ṭe̠n dumur chata ać samaṅre̠ ńure̠na. Rasa pe̠re̠ć tahẽ̠kante̠ ona halaṅ rakaṕ kate̠ye̠ caṭo̠ḱ lagakeda ar ona caṭo̠ḱ tora kạṭić bela reaḱ jo̠to̠ katha disạ he̠će̠ntaea. Dumur rasa do̠ nunạḱ he̠ṛe̠m tahẽ̠kana je arhõ̠ jo̠jo̠m sanakedea. Mo̠nre̠ ạḍi rạskạgeye̠ ạikạukeda. Landa landate̠ye̠ me̠nkeda, “sạrige dumur rasa do̠ ạḍi he̠ṛe̠mgea.” Uni kusigeko ńe̠l kedete̠ dumurko me̠nkeda, “Ale̠ do̠ tinạḱ lagaowam rasale̠ emama. Cẽ̠ṛẽ̠ko me̠nkeda, “Tinaḱ sereń ańjo̠m sanamea unạḱgele̠ sereńa.” Mucạt́re̠ uni casa do̠ bud ạcure̠ntaea ar ona ṭe̠ṅgo̠ć do̠ho̠ giḍikada.Gaṇḍjo̠ṅanae je sạrige dareyiń maḱ lekhan cẽ̠ṛẽ̠ ciprut́ ar janwarkoaḱ tukạko do̠ rạput́koḱa. Ona dare janwankoko tahẽ̠le̠n khan, ać ce̠t́leka kạṭić jo̠khe̠će gatele̠n, aćre̠n gidrạ kohõ̠ onkageko gate ńama.

Mit́ṭe̠n birre̠ mit́ṭe̠n kulạiye tahẽ̠kana. Mit́din uni kulại do̠ mit́ṭe̠n tale dare latarre̠ye̠ duṛuṕakan tahẽ̠na. Dare kho̠n mit́ṭe̠n bele tale do̠ ackage uniaḱ dea tayo̠mre̠ ńũrena, “Jhaṛgoe ḍhub.” Uni kulại do̠ ạḍiye bo̠to̠rena, mo̠ne̠kedae je sermage ńũradea ar dạdạṛe̠ lagaoena.

Dạṛ-dạṛte̠ ḍaharre̠ me̠ro̠m sãote̠ ńapam ho̠yen khan me̠ro̠me metadea, “Serma ńũrakana.” Ańjo̠m tora me̠ro̠m hõ̠e bo̠to̠rena ar kulại sãote̠ dạdạṛ hoyentạkina. Kulại do̠ toyoe metadea, “Serma ńũrakana. ”Toyoe me̠nkeda, “o̠kare̠ ńũrakana, dela jo̠to̠kote̠ ńe̠ńe̠lbon calaḱa. ”Jo̠to̠ko tale dare latarko calaoena arko ńe̠lkeda serma do̠ baṅ ńũrakana, me̠nkhan mit́ṭe̠n tale bele ńũrakana.

Mit́din mit́ ho̠ṛ do̠ bajar kho̠n mit́ ṭukuć rasae kiriń ạgukeda ar aćaḱ oṛaḱ ṭibul co̠ṭre̠ye̠ do̠ho̠kada. Me̠nkhan ona ṭukuć reaḱ penda soman baṅ tahẽ̠kante̠ mit́ se̠ć dũṛũć hirićena, ar ṭukuć bhitri kho̠n gaṛdha ar laṭha-laṭha dumur rasa do̠ o̠tre̠ hirićena.

Dumur rasa reaḱ so̠ ńamte̠ aema rõ̠ do̠ bhe̠n-bhe̠n kate̠ko he̠ć jarwaena. Unạḱ he̠ṛe̠m jo̠maḱ lalo̠ć bako sambṛao daṛeada. Jo̠to̠koge dumur rasa cetanre̠ko do̠n khańjo̠ena ar ti jaṅga unum kate̠ mo̠n rạskạte̠ dumur rasa ce̠pe̠ćko e̠ho̠ṕena. Jo̠to̠koge lać pe̠re̠ć dumur rasako ce̠pe̠ćkeda. Dumur rasa ce̠pe̠ć bhagao kate̠ko aṭkar keda akoaḱ goṭa ho̠ṛmo̠re̠ dumur rasa laṭkaoente̠ ko laṭhawakana. Ona sãote̠ akoaḱ ti-jaṅga hõ̠ dumur rasare̠ ako̠ṭakantakoa. Phạ̃ḱṛạ̃ḱre̠ hõ̠ dumur rasa laṭkaoakante̠ uḍạu hõ̠ bako uḍạu daṛeaḱ kana. Kajak kuṛumuṭu kate̠ hõ̠ dumur rasa kho̠n bako rakaṕ daṛeada.

Darakan muskilaḱ aṭkar kate̠ ado̠mko do̠ raraḱko e̠ho̠ṕena. Ado̠mko do̠ chaḍaoḱ lạgit́ kurumuṭute̠ge̠ko tahẽ̠yena. Me̠nkhan hae! Dumur rasare̠ onko do̠ ạḍi ãṭko ako̠ṭakan tahẽ̠na. Tinạḱ ghuṛi paro̠mo̠ḱ kana, onko do̠ unạḱgeko laṅga idiḱ kana, laṛao baṛaeko hõ̠ thiruḱkantakoa. O̠na o̠kte̠ rõ̠ modre̠ un ghạṛić o̠ko̠eko bako raraḱkan tahẽ̠na, onko do̠ ako-akoko me̠njo̠ṅana je teheń do̠ aboaḱ jivi reaḱ mucạt́ din kana, abo do̠ ạḍi lelha lekabon kạmiakada, ona reaḱ mạn do̠ jivi hataṛkate̠ e̠mo̠ḱ hoyoḱkantabona.

Tumạl: Children Book Center

Dulạṛ do baṅ bogea

Onḍe menaḱ kosṭo,

Dulạṛ khạtir ińaḱ jibon

Hoyen tińa nosṭo.

Bhạbit ledạń dulạṛ kate

Tahẽ nalaṅ sukre,

Jiwet́ menạń iń do nitoḱ

Duk liạ jiwire.

Bam kusiạń iń do

Lại ạdińam isposṭo,

Bujhạu kedạń nitoḱ do

Dulạṛ redo kosṭo.

Sedae do̠ nit leka abad sabadko baṅ tahẽ̠kana. Bạrsạ laha do̠ bạihạṛ-ke-bạihạṛ purtitge tahẽ̠nkan tahẽ̠na. Ona iạte̠ ạḍe̠pase̠ atore̠n gupi gidrạko do̠ bạihạṛre̠ ḍaṅgra me̠ro̠mko gupie̠t́ko tahẽ̠na. Onkage mit́ seram setoṅ din ṭạnḍire̠ jharla jhạrliye setoṅkeda. Gupi ṭạnḍire̠ baṅ tahẽ̠ daṛeat́te̠ jo̠to̠ gupi gidrạ dare umulre̠ he̠ć kate̠ gateḱko dhurạuena.

Gatete̠ko lo̠bdhao akan jo̠khe̠ćre pạchim se̠ć ạḍi maraṅ ho̠e bharḍo rakaṕ akan do̠ bako ńe̠l akat́ tahẽ̠na. Hud-hud san-san saḍe ańjo̠mte̠ ackage ko̠yo̠ḱ kate̠ko ńe̠le̠t́ kan bo̠to̠rge bharḍo ma ako se̠ćge hijuḱkan. Ado̠ am iń hante̠ note̠ dạdạṛko dhurạuena. Ado̠mko do̠ bako dạṛ daṛeat́te̠ ona dare regeko hạṛuṕ kajakena. Ar ado̠mko do̠ bharḍo talare̠ko e̠se̠t́ ocoena, arko tawaḱ ocoena.

Bharḍo paro̠m kate̠ jo̠to̠ gupi gidrạko he̠ć samṭaoena arko ńe̠lena uruṅ busuṅ bhut gidrạ leka. Ado̠ am iń ko ńe̠lo̠ḱ kana ar ńe̠l kate̠ khaḱ khaḱ ko landaeda, landage baṅ sambṛaoḱ kantakoa. Inạ tay̠o̠m kho̠n onko do̠ bharḍo ńe̠lte̠ laha kho̠nko so̠nto̠ro̠ḱa arko ńir pharago̠ḱa.

Ado̠ ona din hiloḱ do̠ uni Lelage lahare se̠nkate ona darereye de̠ć akana. Ado̠ tala ńindạyen khan uni babṛẽ̠ kuṛi hõ̠ mit́ jho̠ṭ sandesante ona dare ṭhengeye calaoena. Ado̠ be̠ṅge̠t́ baṛaket́ do̠ cele hõ̠ bae ńe̠l ńamlet́ko khan do̠e duṛuṕena; ado̠ ghạṛi ghạṛi ato se̠ngeye be̠ṅge̠t́et́ kana. Ado̠ ńe̠l ho̠rteye mo̠ko̠ńoḱ kan khaće khãs khũsiḱ kana. Ado̠e me̠ne̠t́a, Hape se̠, he̠ćlen khan do̠ nãhãḱ khub lekań e̠ge̠rea. Ado̠ onka me̠n baṛakateye thirena. Arhõ̠e me̠nket́a,Pase̠ lahate he̠ćkate oka se̠nreye oko akan; pase̠ ińgeye ńe̠l mõ̠ńjeń kan.

Ado̠ onka hudiskate bae ho̠ho̠ go̠t́ket́a? Ado̠ sạri uni Lelage dare co̠ṭ khon bae go̠ṅ go̠t́ket́te ado̠e me̠nket́a, No̠nḍe̠ye̠ de̠ć akana, ińe ńe̠l mõ̠ńjeń kana. Ma ãṛgo ho̠doḱme.Delaṅlaṅ calao ho̠doḱa. Marsalen khan do̠ nãhãḱ ạḍi lajao. Ado̠ sạri unikin neṇḍalet́ ko̠ṛa do̠ bae he̠ć ho̠t́lena. Ado̠ nui Lelage uni ko̠ṛa me̠nkatekin mohṇḍayena. Ado̠ calaḱ calaḱte tin sạṅgińre co̠ṅ, kathae,ado̠ aṅgayen khane ńe̠l oromkede do̠e Lela kan. Ado̠e metae kana, Hape, Lela, laṅ duṛuṕlenge. Ado̠kin duṛuṕena.Ado̠ unreye metae kana, E̠ Lela, ạḍi bhabna nitoḱ do̠ń ạikạuet́a. Cedaḱ nun sạṅgiń do̠m ạgukidińa? Pạhilre bạre̠ń ńe̠l oromlen khan do̠ o̠ho̠ń he̠ćlena. Cedaḱ nonka do̠m e̠ṛekidińa? Eṭaḱ ho̠ṛ so̠ṅge̠ galmarao tahẽ̠kana; uni do̠ bae he̠ćlena. Am do̠ o̠ko̠e lạiat́metem he̠ćena? Pạhilre hutkạm nonkań baḍaele khan oṛaḱ khonge o̠ho̠ń oḍoklena.

Ado̠ Lelae me̠nket́a, Nit do̠m ńe̠l oromkidińa. Cele,ado̠m se̠noḱa se̠ baṅ? Oṛaḱ khon hõ̠ tho̠ iń do̠ bań riạu ạgu akat́mea. Apan ạpintegelaṅ he̠ć ńapam akana. Ado̠ nit hõ̠ baṅ ceka akana;e̠nte ruạṛem me̠net́ khan do̠, ma ruạṛme. Ado̠ kuṛiye me̠nket́a, onage tho̠ń bujhạu baṛayet́a, baṅ do̠ń ruạṛ baṅ do̠ baṅ. Ado̠ ato ho̠ṛ hõ̠ko baḍaeket́a nitoḱ do̠, phalna ho̠po̠n kuṛi do̠ Lela tuluće ạṅgir calaoena me̠nte. Onkate goṭa ato pasnaoena nitoḱ do̠, ạuriń ruạṛlen khan ho̠ṛko landawańa. Ado̠ Lelae me̠nket́a, Ona katha ma sạrige; sanam ho̠ṛko ro̠ṛgea nitoḱ do̠. Arem ruạṛlen khan do̠, am karo̠nte amren ạpum barem hõ̠ko biṭiolkotama. Ado̠ khange sạri onka ro̠ṛ baṛakate khange uni kuṛi do̠ bhabnate tumbut́kate ạḍi bạṛiće raḱket́a. Ado̠ raḱ mo̠ko̠ńkateye me̠nket́a, Delaṅ nitoḱ do̠, jãhãtegem idiń , o̠nte̠geń calaḱa. Ado̠ eṅga apa khon hõ̠ń bạṛićena. Am satatege nitoḱ do̠ń ja lekaḱgea, cahe̠m go̠jeń, cahe̠m do̠ho̠ń. Me̠nkhan niạkore do̠ balaṅ tahe̠na; jãhã se̠nge, me̠nkhan sạṅgiń nõ̠ḱlaṅ calaḱa.

Ado̠ onka me̠nkate sạrikin beret́ena;ado̠kin calaḱ kana. Ado̠ calaḱ calaḱte, kathae, tin din badre co̠ṅ mit́ṭaṅ maraṅ utạr naṅgraha bajarkin tioḱket́a. Ado̠e Lelae me̠nket́a, Iń do̠ jo̠maḱ hõ̠ bań ạgulet́a, nõ̠ḱõ̠e ado̠ amaḱ jo̠m jo̠mtege nun sạṅgińlaṅ he̠ć akana. Alaṅ ṭhen jo̠maḱ menaḱre jãhãn cạkriń siṛialaṅa. Ado̠e me̠nket́a, Acha bogege, ma siṛime. Ado̠ sạri ona bajartekin bo̠lo̠yena, ado̠ mit́ṭaṅ rạput́ rạput́ oṛaḱrekin ḍerayena. Ado̠ o̠nḍe̠gekin tahẽ̠ aṅgayena. Ado̠ dosar hiloḱ setaḱ jo̠khe̠ć kacahạri se̠n kuli baṛako lạgit́e calaoena. Ado̠ khange muktiạr kạmireye bhurtiyena, ado̠ phạriạdi ho̠ṛ hõ̠ nuige ạḍiko khusiadea. Ar do̠rkhasto̠ko nuigeko o̠l ocokedea,ar o̠l  ńe̠lte e̠ṇḍe̠nić hạkim hõ̠ ạḍiko khusiadea. Ado̠e saj baṛayen khan do̠, ho̠ṛte̠t́ khub ḍho̠b koṛae ńe̠leńa; ado̠ ạkinaḱ basateye calaoen khan do̠, uni koṛa hõ̠ nui ńe̠lteye khusi go̠t́ena.

Ado̠ uni gidrạ̣ do̠ o̠nḍe̠ge duṛuṕkateye raḱet́ kana.  Ado̠ ona atoren mit́ṭaṅ babṛẽ̠ kisạ̃ṛ setaḱrege uni hõ̠ kulhi mucạt́ se̠nge ṭạnḍiteye se̠nlena. Ado̠ uni gidrạ raraḱ kan ńelte uni ṭhene calaoena. Ado̠e metae kana, Henda bạbu, cedaḱem raḱet́a? O̠ko̠e saõte no̠nḍe̠ do̠m he̠ć akana? Ado̠ uni gidrạ do cet́ hõ̠ bae me̠nlet́a. Khange ado̠ uni babṛẽ̠ do̠ o̠nte̠ no̠te̠ye be̠ṅge̠t́ baṛayet́a, ado̠ o̠ko̠e hõ̠ bae ńe̠l ńamlet́ko khan do̠e hudis baṛaket́a, baṅma, Nui gidrạ do̠ oka kho̠n co̠e atu he̠ć akana. Ado̠e dayayente uni gidrạ do̠ ać oṛaḱteye idikedea. Ado̠ ać mo̠ne̠reye me̠nket́a, Nui gidrạren oaris bako oḍokoḱ khan do̠ iń ṭhenge me̠ro̠m gupi nui gidrạ do̠ń do̠ho̠yea. Ado̠ onka bujhạukate sạri uni gidrạ do̠ uni babṛẽ̠geye idikedea. Ado̠ uni ṭhen tahe̠n tahe̠nteye hara ńõ̠ḱen khan me̠ro̠m bhiḍi gupiko dhurạukedea, ado̠ onkogeye gupia.

Ar uni babṛẽ̠ ho̠po̠n gidrạko do̠, kuṛi koṛa jo̠to̠ gidrạge, iskulte o̠lo̠ḱko calaḱa. Ar uni me̠ro̠m gupi gidrạ do̠ Lela ko ńutumkedea. Ado̠ me̠ro̠m bhiḍi ạuri aṛaḱkore onko gidrạ do̠ko metaea, Iạ ya Lela, delabo iskulte, puthiko ar sileṭko idikatalem. Ado̠ sạri onako idi uni Lela hõ̠ ạḍiye chuṭạuḱa. Ado̠ din hiloḱ onako do̠ko idi ocoyea, ar onkoren eṅgat apatkin hõ̠ onakoe idite do̠ bạṛić do̠ bakin metaea, ar onko sãotege daka hõ̠ko emaea. Ado̠ o̠nḍe̠ khon ruạṛ he̠ćkate me̠ro̠m bhiḍiye aṛaḱkoa. Ado̠ din hiloḱ onka iskulte se̠n se̠ntege uni hõ̠ mit́ bar akho̠re ńe̠l cet́ket́a; ado̠ inạko akhor̠ge me̠ro̠m gupi ṭhen dhuṛikoreye o̠l baṛaea. Ado̠ enka ńe̠l ńe̠ltege jo̠to̠ akho̠re cet́ket́a. Ado̠ ńutumkoe o̠l baṛa ocokoa.Ado̠ enkakatege ńutum o̠lo̠ḱ hõ̠e cet́ket́a.

Ado̠ko metadea onko iskul gidrạge, De̠n ya, iń hõ̠ mit́ṭaṅ puthi emańpe. Ado̠e metat́koa, Am do̠m cekaea puthi do̠? Ado̠e me̠nket́a,Iń do̠ e̠ṛe̠ e̠ṛe̠ iń paṛhao baṛaea me̠ro̠m gup ṭhen. Iń do̠ eken hoṛiń mạluṅ baṛakoa, a baṅkhan iń cekae baṅ e̠nte̠ iń do̠? Ado̠ sạri mit́ṭan mare puthi o̠ṛe̠ć oṛećaḱko emade khan ạḍ̣iye rạskạ go̠t́ena. Ado̠ ona puthi ńe̠l ńe̠ltege khube o̠l hewayena. Ar onko iskul gidrạko samaṅre, se̠ onko eṅgat apat samaṅre do̠ bae paṛhao baṛaea.Onko paṛhao jo̠khe̠n do̠ e̠ke̠ne ańjo̠m hapekaḱgea, ar ṭạnḍire khan do̠ sereńateye paṛhaoa.

Ado̠e hara idiḱ kan khać do̠ bud hõ̠ oḍok kantaea, ado̠ tahe̠n tahe̠ntegeye hara juạnena. Ado̠ onko babṛẽ̠ ho̠po̠n gidrạko hõ̠ko hara juạnena. Khange ado̠ mit́ din do̠ sileṭ puthiko idi oṭoako jokhenge kuṛi koṛ apaṅgiroḱ reaḱ ciṭhiye ńamkeda. Ado̠ ona paṛhaokate jo̠to̠ katha bujạhuket́a, baṅma, niạ din hiloḱ naha phalna dare buṭạ ṭhenlaṅ se̠n ńapamoḱa; ona katha jo̠to̠e  baḍaeket́takina.

Meskoć

Mit́ṭen huḍiń gidrạ ać babae kuliede kana-

Baba: E beṭa, okoeṭaḱ bạṛtim dulạṛlinạ, iń se am gogo?

Gidrạ: Bana hoṛge.

Baba: Enḍekhan iń do America ar am gogo do France-te senlen khan okoe sãotem senkoḱa?

Gidrạ: Baba iń do France teń senoḱa.

Baba: Bujhạuḱ kana, iń khon am gogoge bạṛtim dulạṛea.

Gidrạ: Baṅa, France do ạḍi ãṭiń dulạṛa.

Baba: Ar iń do France te ar am gogo Amerika te senlen khan, okarem senkoḱa?

Gidrạ: Amerika te.

Baba: Cedaḱ?

Gidrạ: Ente noa laha iń gogo são France teń senlena.

Baba: Ado raṅgaote mengot́keda, am gogo ar iń mit́ sãoteliń senlenlen khan, am do okarem senoḱa?

Gidrạ: Nonḍegeń tahẽna.

Baba: Cet́ karonaḱte nonḍ̣em tahẽna?

Gidrạ: Ente iń doń laṅga cabayena, cedaḱje, thoṛa laha France ar Amerika khoniń ruạṛ heć akana.