Mit́ hoṛ aćaḱ kạmire tisge bae jitạu daṛeaḱkan tahẽkana. Mit́din ganḍon ganḍonte gaḍa aṛe aṛete taṛam idikan jokhen ackage mit́ṭen sạdhu duṛuṕkane ńelkedea. Khange uni do sạdhu ṭhene senena are metadea, sạdhu jionre jit ar lahanti lạgit́ cetiń cekaea?

Sạdhu do uni hoṛ daḱre unumoḱe metadea. Daḱre unumen são sãote sạ̣dhu uni hoṛaḱ bohoḱe ota urućkeda jemon bohoḱ aloe rakaṕ daṛeaḱ. Khange sahẽt́ bondoḱ lekae ạikạuet́te bogete chaṭpaṭaḱ kana. Daḱ khon rakaboḱ lạgit́ kajakte kurumuṭueda.Thoṛa ghạṛić tayom sạdhu uni hoṛe aṛaḱkedea.

Inạkate sạdhu uni kulikedea, daḱre bohoḱiń saṕ urićlet́tam, unre cet́ cekam menleda? Adoe menkeda rakaboḱ reaḱiń kurumuṭukeda.

Sạdhu do arhõe kulikedea, un jokhen dhạrti reaḱ kathakom disạyet́ tahẽkana. Adoe roṛkeda, baṅ cet́ge bạń disạyet́ tahẽna. Mit́ṭenge cintạ tahẽkana, cekate noa daḱ khon cetanteń rakaboḱa. Unre sạdhu hoṛe menkeda, cet́leka daḱ khon rakaboḱem kurumuṭuket́, onkage jionre lahanti ar jitạuḱ lạgit́ hõ kurumuṭui hoyoḱa. Enḍekhan dhạrti reaḱ cet́ge bohoḱre disạ baṅ tahẽntama. Eken Mit́ṭenge kukmu tahẽntama cekateń jitạuḱa, enḍekhan sạrige amaḱ jionrem jitạuḱa arem lahanti daṛeaḱa.

Mit́ṭen nagrahare ạḍi mãyãyan ar mạhir monan dạrji tahẽkana. Jaoge dạrji do mit́ṭen hạti jome emaekan tahẽkana. Jomaḱ lạgit́ mit́din hạti dạrji ṭhene hećena. Un okte dạrji do eṭaḱ mit́ hoṛ sãoe ropoṛkan tahẽkana. Ado mit́ okte onkin do jhogṛaḱkin ehoṕena. Khange dạrji do ạḍi ãṭe raṅgaoena ar aćaḱ tire tahẽkan suite hạti sunḍe gutu joskedea.

Ackage gutu josente hạti do ạḍi kajak hasokedea. Ado mon ạṛiskate gaḍa aṛe seće calaoena ar onḍe khon losot́ daḱ ạgukate dạrji goṭa hoṛmoe chitạuadea.

Ona losot́ daḱte dạrji aḱ hoṛmo mạilạentaea. Ona sãote dạrji oṛaḱre tahẽkan thoṛa nawa kićrić kohõ mạilạ cabayena. Khange dạrji do aćaḱ bhule aṭkarkeda ar hạti ṭhen ikại khojkeda.

Rajshahi bajarre Joysing

Joy pane hohoyeda (2)

Ańjom hijuḱkan mońj disạm

Sona disạm

Ạdibạsi Jharkhanḍ

Haere sona disom deko tire.

Kạṭić Cẽṛẽ Ṭunṭuni

Sereń ạcurae gunguni,

Don donte calaḱkan tahẽna

Mon reaḱ sukte jomet́ tahẽna.

Hoṭhat mit́din hoe hećena

Rạput́ena uniaḱ oṛaḱ.

Nitoḱ uni okare tahẽna?

Baṅge hudis ńamet́.

Jãhãlekate paromkeda ńindạ,

Hećena nawa setaḱ

Benaokedae nawa oṛaḱ,

Tahẽn reaḱ sana

Nijeraḱ oṛaḱ nije leka,

Jione khemao sukte

Kuṛhiạ uni baṅ kana.

Rupnogorren mit́ṭen Raje tahẽkana. Uniaḱ aema raj prasad, dhon-sompod, sona-dana emanteaḱ jinisko tahẽkantaea. Enrehõ Raje cintạḱkan tahẽkana. Cintạ kate Raje ńelkeda teheńiń goćlen khan ińaḱ raj prasad, dhon-sompod, sona-dana, jumi jaega okoe rạkhi jogaotińa?Noa katha raje cintạkeda.

Ado cintạ cintạte ackage mit́din mit́ṭen babaji hećena. Uni babaji doe metaekana, “Raj alom cintạḱa, mit́ṭen kathań metamkana. Iń ṭhen ạsirbad daḱ menaḱa. Noa ạsirbad daḱ amren bạhu ńu ocoyem. Amren bạhu noa daḱe ńu lekhan mit́ṭeć kuṛi gidrại hoyoḱtaea. Uni kuṛi gidrạ hoelen khan uniaḱ ńutumem dohoetaea Tusar Konna. Ar uni Tusar Konna amaḱ raj prasad, dhon-sompod, jumi jaega jotowaḱe rạkhi jogaotama”.

Sereń rãwãḱ Tirio sạḍe,
Sogoe koṛama liḍa laḍe.
Ṭamak ḍubu, tumdaḱ dhạtiń,
Sạntal hoṛaḱ rạskạ seteń.

Baha bạgwanre bhãwãr leka,
Santal rạskạm huṛiń ceka.
Tirio oroń rughuṛ  sạḍe,
Mon do hilạuḱ dulạṛ gate.

Disom ato sãota tala,
Sanam hoṛge rạskạ jhola.
Reṇgeć tetaṅ duk bhabna,
Rạskạ ṭhen ma hiṛińena.

Baṇ do be-jom baṅ do jomte

Enhõ rạskại orme onte,

Rạskạ tege sanam ghuṛi

Tahen kanabon juri pạri.

Alobon hiṛiń abonaḱ dosa

Menaḱ bona nit be bhorsa,

Beṇ̇gedabon nit dhạrti puri

Lahaḱ kan ko sanam hara hạri.

Oloḱ ạkil hameṭ sãote

Marsalabon santal gãota,

Rạskạ dobon rạskaḱ jãhãe

Sãota sagaṛ debon lahae.

Mit́ṭen birre boḍa bińe basoḱkan tahẽkana. Boḍa biń do ạḍi bisane tahẽkante uni pheḍ calaḱ okoege bako rebenkan tahẽkana. Onate biń do ạḍi gorobe aṭkaret́ tahẽkana. Apnarte ạḍi dil ar daṛeane hudisoḱkan tahẽkana.

Mit́din boḍa bińe tạṅkhikeda, aćaḱ bhugạḱ pheḍre mit́ dol mućko bhugạḱ akada. Ona ńelte ạḍi ãṭe edreyena. Adoe menkeda, muć aḱ nunạḱ maraṅ sạhũs, ińaḱ bhugạḱ pheḍreko bhugạḱ akada! Ado onko muć laga ocoḱko lạgit́ boḍa biń do onko upạrte dhawakeda. Mit́ okte muć do akoaḱ jiwi bańcao lạgit́te boḍa bińaḱ hoṛmoreko ger bit́ena. Khange boḍa biń do hasote kiriṛ kiriṛ kikiạue dhurạuena. Enrehõ onko muć do bako aṛaḱledea. Mucạt́ dhạbićte boḍa biń do muć khon bańcaoḱ khạtirte bir khone dạṛkeda.

Meskoć

Mit́din mit́ṭen Joj ar Asamikin galmaraoḱ kana-

Joj: Am dom baḍaea eṛe katha roṛ lekhan cet́ hoyoḱa?

Asami: Hẽ sir, iń do norok reń calaḱa.

Joj: Ạḍi bhage! Ar sạri katha roṛ lekhan cet́ hoyoḱa?

Asami: Mamlareń hirạuḱa.

Esel kuṛi sasaṅ sạṛi

Bandere ma alak jạ̃ṛi,

Ńeloḱ rema serma rạni

Jhalkaoedae sorog puri.

Juạn kuṛi bapla umer

Seṭeren taea juri duạr,

Pạhil ńapam juri sãote

Ato gãota somaj sãota.

Dạuṛa cetan juri jota

Jog mạńjhiaḱ sonot loṭa,

Ul sakamte chiṭkạu jạṛi

Bande kate sasaṅ sạṛi.

Sasaṅ gedo utui soṛom

jel utu karahire doṛom,

Sasaṅ gedo sanam okte

Nãwã aroe hoṛmo mone.

Sasaṅ roṅma sạgun cinhạ

Sasaṅ cẽṛẽ peṛa piạ,

Sunum sasaṅ ojoḱ orońj

̕Ehoṕedae nãwã gharoń.

Setaḱ́ Simraḱ Kisni cẽṛẽ

Mat́ darere cero bero,

Tahen kanko Sãota sote

Joṛa joṛage horo boro.

Gudṛi cetan busuṕ kạnḍi

Menae take araḱ sạnḍi,

Maraṅ simraḱ auri aṅgaḱ

Araḱ sạnḍimae jạpit́ laṅgaḱ.

Disạ torage kukṛicut́te

Jạpit́ hoṛe jagwar mete,

Ańjom tora aṭet́ rege

Beret́ lạgit́ onte note.

Araḱ simaḱ nunạḱ aṛaṅ

Kukṛu idiay ekal haraṅ,

Maraṅ simraḱ huḍiń simraḱ

Kukṛu tege marsal setaḱ.