Manotan P.O Bodding do̠ 24 serma umerre Norway diso̠m kho̠n Bharo̠tte Santalko talare kạmi lạgit́ missionary lekae kol ocolena. Uni do̠ santal jạt ạḍiye kusiaḱkoa ar onkoaḱ pạrsi, leg-acar, ạri-cạliko hõ ạḍiye kusiada. Nunạḱ hạbić je uni do̠ Santalko talare Santalkoaḱ dhara lekateye baplayena. Uni do̠ aćaḱ goṭa jion do̠ Santalko talarege khemaoe go̠ṭaleda ar Santalko talarege gujuḱ hõ sanaledea. Menkhan Iṅgrej kodo̠ mucạt́ hạbić no̠nḍe uni bako tahẽ ocoadea. Bodding saheb do Santalko talare 44 bo̠cho̠re tahẽkana. Noa o̠ktere uni do̠ Santalko lạgit́ ạḍi aemaye kạmi oṭoakada. O̠ko̠eṭaḱ missionary hõ Santalko lạgit́ nunạḱ ḍher do̠ bako kạmi akada. Onate teheń mimit́ santalko do̠ P.O. Bodding baḍaye jạruṛkan takoa, uni sarhaoe jạruṛkantakoa ar uniaḱ taṛam pańjare calaḱ jạruṛkan takoa. P.O. Bodding-ar missionary jio̠n kho̠n ar uniaḱ kạmiko kho̠n abo̠ do̠ aema cecet́aḱbon ńamet́ kana.
Pạhil cecet́aḱ do̠bo̠n ńamet́ kana rạkhi jogao lạgit́ cecet́aḱ. Mit́ṭen hoṛ lạgit́ se mit́ṭen jạt lạgit́ se mit́ṭen so̠maj lạgit́ nitaḱ jinis se gho̠ṭo̠nako do̠ darakan dinre tinạḱ damanaḱ hoe daṛeaḱ ona do̠ uniaḱ rạkhi jo̠gaoaḱ kho̠n bon baḍae daṛeaḱ kana. Bodding saheb do̠e bujhạu daṛeaḱkan tahẽkana je Santalkoaḱ ạḍi aema jinis one o̠ka do̠ nit menaḱ, ona do̠ nahaḱ baṅ tahẽna se o̠ka rupre nit menaḱ, o̠na ruṕre do̠ baṅ tahẽna. O̠nate o̠na o̠kte reaḱ Santalkoaḱ jo̠to̠aḱ do̠ tumạl ar jo̠gao do̠ho̠e reaḱ kurumuṭu keda. Uniye rạkhi jo̠gao o̠ṭo̠let́te teheń abo hõ niạ jug reaḱ jotoaḱ do̠ rạkhi jo̠gao reaḱbon kurumuṭuia, jemo̠n darakan piṛhirenko lạgit́ po̠rho̠anaḱ ho̠yo̠ḱ.
Do̠sar cecet́aḱ do̠ kana o̠no̠liạ se kho̠ndro̠nd kạmiạko lạgit́. Nahaḱren ḍhertet́ onoliạko se onoṛhiạko do̠ mit́ṭen jạt selet́ se so̠maj selet́ jãhãnḱko o̠l eṭaḱ koaḱ pańja kateko o̠let́ kana. Jo̠that o̠l do̠ unrege ho̠yo̠ḱa, tinre mit́ṭen o̠no̠liạ se kho̠ndro̠ndić do̠ onko jạt ṭhen senkate, apnarte suṭik hatao kateye o̠l. Ente Bodding saheb do̠ aćaḱ luturte ańjom kate se kho̠ndro̠ndiạko hõ judi jahãṭaḱ jemo̠n bo̠n o̠l, jemo̠n jo̠that o̠laḱko do̠ jo̠that reaḱ ho̠yo̠ḱtabona.
Tesar cecet́aḱ do̠ kana rạṛ sereń rạṛ jo̠gao do̠ho̠e selet́. Bodding saheb do̠ ać o̠laḱ “The Studies in Santal Medicine and Connected Folklore” puthire mit́bar mantar ar jhạrni cet́abon kana baṅma sereń rạṛ ko do̠ no̠nkate jo̠gao do̠ho̠ daṛeaḱa. Menako kathae Santal koaḱ do̠ 25 lekan sereń rạṛ menaḱtakoa, menkhan onako do cet́ko kana ar cet́ lekako rạṛa ona do̠ ạḍi ko̠m hoṛge pasećbon baḍaea. Nit hạbićte ḍhertet́ rạṛ ko do̠ hiṛiń idiyena. Nit do̠ biggan sećte ḍherbon lahawakana, rạṛ jo̠gao reaḱ do̠ nito̠ḱ aema ae-upại hoeakana. Onatebon kurumuṭuia jemo̠n ado̠ḱkan rạṛ ko do̠ tumạl jarwa katebon jo̠gao do̠ho daṛeaḱ.
Ponaḱ cecet́aḱ do̠ kana eṭaḱ pạrsite aboaḱ o̠laḱko o̠l pasnao reaḱ. Bodding saheb do̠ aćaḱ ḍherteḱ o̠no̠l do̠ iṅgrạji pạrsiteye o̠l akada, mit́bar do̠ Norwegian pạrsi tehõe o̠l akada. Ado̠m Santali o̠laḱko do̠ iṅgrạji to̠rjo̠ma selet́e o̠l akada. Noa reaḱ jo̠s do̠ mit́ṭenge tahẽkana, jemo̠n dhạrtiren ho̠ṛ do̠ Santal jạt ko baḍae daṛeako, onoaḱ leg-acar, ạri-cạli, porob-porbas seleḱ jotoaḱ do̠ goṭa dhạrtiren hoṛ ṭhen o̠po̠ro̠mge tahẽn. Nahaḱbon o̠let́kan onolko se kạhni, gạthni, oṛhẽ eman ko do̠ ạḍi cetan darja reaḱ tahẽn kanrehõ abo apnar moto ṭhenge ona do̠ baḍae tahẽn kana, dhạrtiren eṭaḱko do̠ ona reaḱ damteḱ bako baḍae daṛeaḱ kana. Onate abo hõ Bodding saheb leka aboaḱ damanaḱ o̠laḱ kodo̠ iṅgrạji pạrsite to̠rjo̠ma kate sarsadle reaḱbon kurumuṭuia, jemo̠n go̠ṭa dhạrti reaḱ do̠rbar re abo̠aḱ o̠laḱko hõ damanaḱ lekhaḱ tabo̠n.
Mõṛẽaḱ cecet́aḱ do̠ kana Santali Patrikako calao idi reaḱ. Bodding saheb do̠e bujhạu tio̠ḱleda je Santali lạgit́ nawa kathako diso̠m hoṛ baḍae ocoko lạgit́ se Santali pạrsi reaḱ darja cetan seć tul rakab lạgit́ mit́ṭen cando̠kiạ pạtrika do̠ ạḍige jạruṛa. Ona iạte uni do̠ Peṛa Hoṛ kago̠c, o̠ne o̠ka do̠ bo̠ndlen tahẽkan, onaye jiwet́ ruạṛkeda are calao idikeda. Teheńaḱ jugre hõ onkage aema technical kathako reaḱ Santali do̠ benao reaḱ jạruṛ paṛaoabon kana. O̠nako katha do̠ diso̠m hoṛ baḍae ocokoa lạgit́ se Santali pạrsi reaḱ darja cetan ocoe lạgit́ ạḍi aema Santali candokiạ se haptakiạ se din hilo̠ḱ reaḱ pạtrika ko do̠ so̠do̠r idiy jạruṛ tabo̠na.
Turuiaḱ cecet́aḱ do̠ kana jạt-pạrsi dulạṛ reaḱ. Mit́ṭen jạt se uniaḱ pạrsi bam dulạṛ lekhan uni jạt se uniaḱ pạrsi selet́ do̠ cet́ hõ jo̠that do̠ o̠ho̠m kạmi daṛelena. Bodding saheb do̠ Santalko ar onkoaḱ pạrsi do̠ ạḍiye dulạṛet́ tahẽkana, onatege Santalko selet́ unạḱ damanaḱ kạmiko do̠e kạmi daṛeat́ tahẽkana. Teheń abo do̠ aboaḱ so̠majar aboaḱ pạrsi do̠ dulạṛ lek kantabona. Niạ okte aboren ḍher hoṛge jạt pạrsi do̠ babon dulạṛet́ kana, nunạḱ hạbić je Santali pạrsite katha hõ babon roṛet́ kana. Bodding saheb ṭhen kho̠n cecet́aḱbon hataoma arbon lajaoḱma. Ente uni do̠ Santal hoṛe baṅkan rehõ Santali pạrsiye dulạṛkeda ar pạrsi selet́ damanaḱ kạmikoe kạmi oṭoaḱ bona. Teheń do̠ abo hõ uniaḱ taṛam pańjare taṛam kate Santali pạrsi bon dulạṛma ar Santali pạrsi lạgit́bon kạmima.
Eyaeaḱ cecet́aḱ do̠ kana go pạrsi talate sanam lekan cecet́aḱ ńam reaḱ. Noa do̠ tayo̠m dinre Bharot reaḱ soṅbidhanre mit́ṭen hok lekatehõ do̠ho̠yena. Manotan P.O. Bodding do̠e kho̠j leda jemo̠n Santal ko do̠ akoaḱ go pạrsite dho̠ro̠m puthiko paṛhao daṛeaḱ, onate uni do̠ goṭa Baebel puthi do̠ Santaliteye to̠rjo̠ma keda. Arhõ uniaḱ sana do̠ tahẽkana jemo̠n Santal kodo̠ akoaḱ go̠ pạrsi tege o̠lo̠ḱ paṛhaoḱko cet́ daṛeaḱ, onate uni do̠ Santali pạhil puthi, Santali grammar ar Santalu Roṛ Pạṛiạn (Santal Dictionary) hõye benao keda. Go pạrsite o̠lo̠ḱ paṛhaoḱ ced reaḱ hoṛ ḍahar uni do̠e uduḱ oṭoaḱbona, sareć kạmiko do̠ abote laha idi jạruṛ tahẽkantabona. Menkhan bhabna reaḱ katha do̠ noage je abo do teheń hạbić go pạrsite oloḱ paṛhaoḱ ced reaḱ cet́ hõ babon kạmi laha daṛe akawada.
Nonkage ạḍi aema cecet́aḱko abo do̠ P.O. Bodding sahebaḱ jion kho̠n ar uniaḱ kạmiko kho̠nbo̠n cet́ daṛeaḱ kana. Nitoḱ aboaḱ kạmi do̠ kana Bodding sahebaḱ cecet́aḱ ko do̠ Santal so̠majre jo̠ baha o̠co̠e, uniye uduḱ oṭoat́bon lahanti reaḱ hor ḍahar pańjae ar uniaḱ baṅ purạuakan kạmiko do̠ jemo̠nbon kại purạu. Enḍeteaneć bujhạuḱa baṅma abo do̠ sạriaḱge Bodding saheb bon dulạṛedea arbon manotedea. Tobeanećge bo̠cho̠r bo̠cho̠r uniaḱ janam mãhã manao do̠ jo̠that reaḱ hoyoḱ tabona. Delabon mimit́ Santalko do̠bo̠n ekraṛoḱma jemo̠n uniaḱ jio̠n kho̠n ar kạmiko kho̠n okako cecet́aḱ bo̠n ńamet́kan onkalekabon kạmi ar Santal jạt lạgit́ Bodding sahebaḱ oka kukmu tahẽkantae ona do̠bo̠n purạutaema.