Roṭe sagaṛ ṭheṛe ṭhepe,

Sadom sagaṛ cihõ.

Dadae calaḱ bạhu ạgu,

Iń hoń calaḱ sãote.

Ńeloḱ am tạruṕ leka,

Hoṛko metam pusi.

Jil hako toa ńelte,

Ạḍi aṭem kusiḱ.

Taṛamam bại bạite,

Otte oroḱtam canḍbo̠l.

Ragam mẽao mẽao,

Sanam ho̠ṛ ko ańjo̠m.

Paromena daḱ jạput́ asin kạrtik

Seṭerena hilạu hisit́ cando ãghaṛ,

Setaḱ ạyuṕ judim oḍokoḱ bahre

Bujhạuam nit ạikạuḱ thoṛa reaṛ.

Bilạn bạihạṛ ńeloḱ eken sona roṅ

Hara hạri sanamko kạmire ạujhạṛ ,

Samṭaoako arjao akat́ sanam phosol

Setaḱ tora hanko tora jhaṛ jhaṛ.

Bele hoṛo ńelte ạikạuḱ ạḍi rạskạ

Cabaḱ aneć nit do sanam reṅgeć,

Hoṛmo reaḱ joto lekan laṅga hisạ

Nit ko ńama  jom ńu  aseć taseć.

Onatege pạhil phosol samṭao tora

Kulhi duṛuṕkate goṭayako din khon,

Nenḍayako sanamko kạmi hora

Nãwã hoṛote rạskạ POROB LOBAN.

Cunur munur mạ̃i tale

Tuṛi tele bodol ledea,

Gaḍarele idikede

Gaḍa daḱ ma rilạmala,

Gaḍarele buhelkede hae dayage

Leo-Leo-Leo.

Kulhi mucạt́ dene banar sare menaḱ juri pukhri

Mit́ do ḍaṅra kaḍa gasao mańjao ar jobeako  sukri,

Ona sorre  dosaraḱ do ekal heṛan sohan kedeć

Ona re do menaḱ aneć hạriạṛ poraini sakam  pereć.

Ona sorem calaḱ khanem ńama monre nirạ sahẽt́

Oka leka tehõ eṭaḱ redo bam sendra ńamet́ tahẽt́,

Noa sakam sedae redo aema kạmi reko lagao

Ona baṅkhan bapla bihạ hoyoḱ kan tahena lajao.

Netar leka unre do baṅ tahẽkan polithin ar Ṭisu

Sanam kạmi purạuḱ kan tahena onatge ạḍi kusi,

Hạṭiạ bajar buluṅ hako jel ar emanteaḱ saoda

Hoṛ deko jotowaḱge kiriń kate noa teko reda.

Bapla bihạ bhoj eman kore jom ńu ato peṛa

Santal koaḱ hudis redo noa tege manot ḍhera,

Sakam hạriạṛ nạṛ̃i jạnum baha do nirạ rạni

Sanam lekan bahako tala noage daḱ PORAINI.

Bhul ḍaharte taṛam taṛamte

Oktei jurite kunạmi bagwan bạgikate

Ạḍi jhạliń laha hećen

Bạń oromet́ kan!

Terdeć marsal bạgikate

Iń okoreń teṅgo akan?

Noa ma ińaḱ ḍahar baṅ kan

Tobe cekate rilạmala ḍaharteń ruạṛa?

Ńu-bul pharnao hoṛmo lekań

Aṭkaret́ kan.

Ińaḱ daṛema bại-bạite cabaḱkan

Bạń baḍae jạdu-mantarte-

Nit ińma sãota teṅgo kate

Sãota juḍạsi hoe ma

Bạń bis kate Bhiṛkạu kane.

Baṅkhan iń ma sãota-gãota ren

Dulạṛiạko metạńkan tahen

Menkhan nui dare nạ̃ṛĩ sãotege

Bạń baḍaea tinạḱ jugiń

Ekal sãotaren bạiri hoe kate

Hiskạ umul latar re

Tạṅgiń tahena-

Noa joto eṛe-toṛe khon

Bańcao ḍahar do cet́

Eset́ cabaena?

Ńe̠l ńe̠ltege ho,

Beleyena goḍa hoṛo.

Geleyena ho chaṭkare̠,

Ro̠ho̠e,  araḱ bambaṛo.

Caole daka nãwã hoṛo,

Dạl utu ar cạṭni bambaṛo.

Haere sebel ho, haere sebel,

Mit́ dho̠m jo̠m lekhan ho.

Ghane ghane, jo̠jo̠m sana ho,

Jo̠jo̠-he̠ṛe̠m sebel, araḱ bambaṛo.

Ul mukul mukul joyena

Jojo mukul mukul jạliyena

Ul mukul mukul uli daḱe sarsaoa

Bạṭi hạnḍi mukul katha      

Bạṭi hạnḍi mukul kathae sarsao.

Ale gạḍiạre kõḱ alom ạtińa

Roṭe kaṭa mente

Solem sogaka kõḱ

Solem sogaga

Leo-Leo-Leo.

Serma pereć cape baṛae

Ponḍ rimilem ńela

Gulạńj baha so kedeń

Heṛem setaḱ bela.

Baha tema pereć tahẽn

Gulạńj buṭạ dare

Onako são kạṭić bạbu

Gutui baha mala

Sona hoṛo raca rema

Pereć menaḱ pala.