GIDRẠ BẠULI

Gam Gam kudum kudum

Okate pusim calaǩkan,

Gurić halaṅiń calaḱ kan

Okrtam pusi jhuṛi do,

Mĩhũ gecoe lebet́ rạput́ket́

Cedaḱ mĩhũm lebet́ rạput́ket́

Gại geco bae towayet́

Cedaḱ gại bam towayet́,

Ghãs geco baṅ ghasõḱkan

Cedaḱ ghãs bam ghãsoḱkan

Daḱ geco bae daḱet́

Cedaḱ daḱ bam daḱet́

Roṭe geco bako raḱet́

Cedaḱ roṭe bape raḱet́

Ḍuluḍuṅ biň gecoko jiomet́le

Inạge hedoḱ inạge mańjan kĩṛĩyạt́ kõṛyõṭ́.

ALE GAḌA

Ale menaḱ tale nanha gaḍa

Ḍhip rege menaḱ tale jonḍra goḍa,

Jaoge joḱ tale bhonḍa bhonḍa

Jonḍra khonma lạṭu jonḍra khanḍa.

Setoṅ din heć tora daḱma komoḱ

Jhinuk rokoć saṕ lạgit́ ạḍi jomok,

Hako hõko ńamok kana huḍiń maraṅ

Menkhan cekam pheḍoḱ ạḍige daṛaṅ

Laha tema tahẽ kana merom gupi

Ńel koam kõḱ kisni gunḍri lipi,

Gupi koṛa gại merom bạgi kate

Cẽṛẽ koko saṕ koa engot́ omaḱ ate.

Gaḍa banar ḍhip ar aṛe kore

Cas edako ạlu beṅgaṛ thore thore,

Nitma bạnuḱ gupi koaḱ tạriạ saḍe

Daḱ lo maraṛ goǩ kate liḍạ laḍe.

Cas basre sanam kobon boloyena

Gaḍa reaḱ laha rup do cabayena,

Ona tege nahaḱ dinma hoṛmo rogte

Jạbun tebon laṅgaḱ kana be aste.

TUṚI BAHA

Setaḱ́ reaḱ marsal re̱ baha phuṭạḱ ena,

Ńele dumur bhãwar ko ko cepeć repeć kana,

Nebetar ma tuṛi baha ńelam juḍạsige

Sạṅgiń khonge jeṅget́ jeṅget́ ńeloḱ ạḍi hạsge.

Tuṛi baha dinạm dinem disạ ocolea

Sanam koge parom dinle uihạr ạcur kea,

Amaḱ rupge sanam kole as joṅoḱ kana

Jiwet́ jonom joto dinge sajoḱ reaḱ sana.

Am do jemon sanam hoṛem emako kan soaṅ

Sanam koge mone jiwi re rạskạ teko ataṅ,

Amaḱ mõhõk heṛem soge laṅga mone cirgạl

Tạṅgi tãṛãḱ hante nate am ńamme reaḱ purgạl.

Dhạrti redo amaḱ din ko ekal khaṭo gea

Enhõ am do sanam hoṛem kusi oco lea,

Ale kohõ am leka hoylen khanle rusik

Dhạrti renko bạ̃s ńamte alereko kusiḱ.

RABAṄ̇ DINAḰ AṚAḰ SAKAM

Rabaṅ dinaḱ beṅgaṛ ạlu

Ar hõ kuṛcạ ṭamaṭu,

Berel mạric kopi baha

Ńamoḱ laha laha.

Hotot́ poṭol malhan mulạ

Ńamoḱ kana isi tulạ,

Tuṛi arak ar pẽãj lạl

Bạnuḱ aneć ona akal.

Bhạtuạ aṛaḱ cukạḱ khaṭa

Kuḍam rema purại jhaṭa,

Moṭor dạl são bejãe soṛom

Bele kate ma joroṅ joroṅ.

Buṭ aṛaḱ ar moṭor suṭi

Barge rema borboṭi,

Ramṛa piṭhạ dhạniạ sipi

Motor baha ma horo cupi.

Mulạ aṛaḱ gajor salad

Sãote judim bhạrtạ akat́

Jomte baṅem mokoń hodoḱ

Caba lenrem bhabna godoḱ.

Gaṅga Gaḍa

Abo disạm gaṅga gaḍa

Daḱ do boeha ńelpe,

Bại bại bạite ạtuḱ kana

One onka geco manwa jion,

Bại bại bạite paromoḱkan.

Doṅ Sereń

Jạti jạti boeha santal jạti

Santal jạti lekan jạtige baṅ,

Somajbon ńela dhorom bon pańjaea

Debon benao rakaṕ santal somaj.

Him Ritić Reaṛ

Siń níindạ sanam ghuṛi

Uhu guhu oyo pichạuṛi

Ekal bạnuḱ cando setoṅ

Gidrạ haṛam urgum etoṅ.

Arhõ judi hisit́ him hoe

Utạr seć khon halae halae

Manwa jion ekal kạbu

Him reạrte jạbu thạbu.

Sanam hoṛge koyoḱ horre

Tinre ńeloḱ setoṅ coṭre

Um paera bar pe mãhã

Baṅte hoṛmo menaḱ aha.

Sirjon mạlik noa dosa

Asoḱ kanle amaḱ bhorsa

Cando setoṅ emaleme

Tahen male am oṛhẽme.

Toa Dare

Am do go toa dare

Sona sonage gom hohoạńkan,

Amren sona sona do goń

Baṅ kana toa dare,

Santal somajren sona kạnạń.

MARAṄ DIN

Maraṅ DIN baṅ maraṅa ghonṭa saḍe rãwaḱ

Baṅ kana din do maraṅ porob reaḱ hewaḱ.

Manwa rupe hatawana abon Isor Baba

Maraṅ hoyen din do noa soetan daṛe caba.

Noa din ge dhạrti tala maraṅ mạhimate

Seṭerenae jisu mạsi manwa jonom kate.

Abo khonaḱ hiskạ bạḍại hiṛiń cabae hoyoḱ

Tobe aneć sanam kore rạskạ seṅgel joloḱ.

Babon tahen sanam koge dos ar bhinạ bhini

Ente nitoḱ seṭerenae babańcaoić uni.

Sanam koaḱ mone ontor saphae abon teheń

Maraṅ DIN re rạskạ jion jemon hoyoḱ jeleń.

Ontor mundil sajao abon jisu mạsi lạgit́

Boeha dulạṛ urgum dohoe tahenabon mit́

Huḍiń maraṅ sanam koge ISOR ṭhen do soman

Pạtiạr jion khemao lekhan ńamoḱ serma dolan.

Reṅgeć kisạṛ ṭuạr amar rạnḍi ṭhunṭạ dukhi

Sohot́ kobon goṛokote sanambon tahen sukhi.

Sanam koaḱ oṛaḱ hoyoḱ nãwã Jerusalem

Dulạṛ jisu MARAṄ DIN re rạskạ seteńalem.

MARAṄ DIN RẠSKẠ

Ń́́́́ut cabayen marsal hećen

Botor bạnuḱ tabon

Duk dạndi sanam hiṛiń kate

Rạskạ hulạs abon.

Huḍiń mone maraṅabon

Maraṅ DIN lạgit́

Ńindạ tayom setaḱ hoyen

Babon tahen jạpit́.

Goṭa serma tahẽ kana

Kạima hende rimil,

Sanam koaḱ jion hoyoḱ

Sapha riṛim ipil.

Sanam koaḱ hoṛmo rege

Horoḱ bande Nawa,

Onka leka mone ontor

Jạruṛ dewa sewa.

Sapha reaṛ setaḱ hijuḱ

Kiṛit́ raskạ hulạs,

Sunum piṭhạ sãote guṛ ca

Ńuabon gilạs gilạs.

Ontor reaḱ sanam mạilạ

Ạruṕ sapha kate,

Hulạsoḱ bon rạskạ abon

Girjạ maṛaṅ kate