Gateń ạri bandhime se Sirjon,
Calaḱ kan okte kocoṛ don.
Bacoe baḍae kan jirạuḱ okoe hõ
Ạjgut samani maraṅ jatra ho.
Sanamage Curmarko boḱdol kan saj,
Sesreko horoḱ joṅkan chanoḱ saj.
Candokin ar ipil alekhage
Saphoret́ kan carkha lekage.
Sermaren ko taṛam taṛam horte
Otren mit́ hõ baṅ, a̠sis se bhorte?
Ale racare nui loboe sạnḍi
Hanko oṛaḱ khone hećen hạni,
Dinạm setaḱe hiriet́le kan,
Onate ạḍile kusiae kan.
Ale ma celege baṅtale,
Unige racae sajaoet́tale.
Heṛan husnạḱgeye ńeloḱ kan,
Bejãe sajao hõe hara akan.
Mińjge araḱ roc roco docot́tae,
Bohoḱ do onatey sajaoet́tae.
Datrom leka bhala livet́ cupi,
Hãsge laṛaoḱ kan ripi ripi.
Citạr kabar hõ cikãṛ ilkotae,
Ạḍige sanań kan capo baṛae.
Pohrek pohrek hõe kukṛuet́ kan,
Okte pohor geye jạhiret́ kan.
Ote kuḍạm sećreye kukṛuket́,
Eṭaḱ sạnḍi bhalai ataṅ got́ket́.
Raḱ haparaoenakin ạḍi kusige,
Hạni tora nui hõ uni sećge.
Source- Mare Santali Golpo khon tumạlaḱ
Miṭiḱ kuri tahan sene
Ale ṭolare,
Oloḱ paṛho bạgi kateḱ
Bapla gene je.
Bapla kate ạni kurireḱ
Barea gidrạ tae,
Nitoḱ ạniaḱ soṅsarre
Sukge bạnuḱ taea.
Kạṭiḱ́re̠ bapla kate
Aloge bhul ape,
Baṅkhe do ạni laka
Suk do oho namape.
Sanam kạmi bạgi kate
Ape hõ paṛhoḱpe,
Paṛho kate apeaḱ jibonaḱ
Lokkho purunpe.
E juạn E bayar
Ebhenom , ape ebhenoḱ pe
Mon reaḱ botor eset́
Aṛe rạput́ kate
Andha pạtiạu khon
Onḍoṅ hijuḱpe .
Cedaḱ bon tahena jạpit́ re.
Hane ańjom pe , dare ḍạr re
Cẽṛẽ ko raga ce̠ro̠- be̠ro̠
Ebhenom se̠ sim ko kukṛuye̠t́
Ạuri se̠tagoḱre̠;
Hạni ńe̠le̠me̠ purub se̠ć
Bere rakaboḱ kan baraṅ baraṅ ,
Ńindạ ma caba he̠će̠n
Hoho kan ańjomoḱ aṛaṅ.
E bayar , E juạn —–,
Ebhenoḱpe , ape e̠bhenoḱ pe.
Tinạḱ dine̠m tohe̠l tahe̠na.
Ńui hạnḍi pạurạ re̠
Ebhenom, ape ebhenoḱ pe.
Kạlṭhu baṅ paṛhoṕ laṕ
Porikkha je soroḱ kantama
Kate kạlṭhu caḱ kanam,
Gateḱ laḱte.
Gateḱ laḱ jạttege amaḱ jibon
Nosṭo kedam je,
Baṅ cet́ledam oloḱ paṛho
Baṅ cet́ledam kạmi
Lać laḱte khaṭoḱ nitoḱ
Ạtiń kom Bhiṛi
Jhamka jhạkur baha kạnić
Bela hõ rakaṕ kane
Belawaḱ chaṭatege,
Melae mańja leloḱ kạniḱ.
Tot lakage sanaṅ seniḱ
Ạyạ tege baṅ totso lidiṅe,
Ạyạ jạkhni duruḱ kane.
Daka uti laḱ
Iṅ tạkhni dạr kạdiṅ
Baha tot laḱ.
Jạkhni ạyạ baṛe kede totkạdiṅ baha
Tạkhni ạyạte saṕkate
Makat́ tiṅe bar thapa.
E – go
Se̠rma kho̠ne̠m hećle̠n am
Ruạṛ calaḱ am – baṅ o̠ka hilo̠ḱ,
Un hilo̠ḱ e̠ke̠n do̠ho̠ o̠ṭokam,
Duk haso ińaḱ o̠nto̠r pereć.
E̠ – gạu
Kạṭić re̠naḱ o̠na kukmu sriti
Disạyạń ińaḱ mo̠nre̠.
E̠ – gạu
Suk sạntim e̠mle̠dińa,
E̠m le̠dińam hoṛmo̠ pe̠re̠ć dulạṛ.
E̠ – gạu
Am judim calao le̠nkhan
Baṅ, baṅ tahe̠n tiń cet́ hõ.
E̠ – gạu
Un hilo̠ḱ am iń ṭhe̠n
Ekal tahe̠nam mit́ to̠ho̠ṕ
Mońj so bahare̠.
Jo̠har –jo̠har –mano̠t jo̠har –gạu.
Bhul ḍaharte taṛam taṛamte
Oktei jurite kunạmi bagwan bạgikate
Ạḍi jhạliń laha heć en
Kạṛuṅ ńutre noa ḍahar ma iń
Bạń oromet́ kan!
Terdeć marsal bạgi kate
Iń okoreń teṅgo akan?
Noa ma ińaḱ ḍahar baṅ kan
Tobe cekate rilạmala ḍaharteń ruạṛa ?
Ňu-bul pharnao hoṛmo lekań
Aṭkaret́ kan.
Ińaḱ daṛema bại-bạite cabaḱ kan
Bạń baḍae jạdu – mantarte —
Nit ińma sãota teṅgokate
Sãota juḍạsi hoe ma
Bạń bis kate
Bhiṛkạu kane.
Baṅkhan iń ma sãota-gãota ren
Dulạṛiạko metạń kan tahen
Menkhan nui dare nạṛi sãotage
Bạń baḍaea tinạḱ jugiń
Ekal sãotaren bạiri hoe kate
Hiskạ umul latar re
Tạṅgiń tahena—
Noa joto eṛe- toṛe khon
Bańcao ḍahar do cet́
Eset́ cabaena?
Mengeạń iń ol
Ru katege ḍhol.
Oka rebań chapae
Noṅka tegeń gapae.
Oloḱ hoṛma menaḱkoge
Sadhuram murmu khon hõ bhage
Oloḱ pạilạre aema jol
Okaṭaḱ horop tebań ol.
Olciki, Roman baṅ do Baṅgla
Okaṭaḱte bań ol iń thoṅla.
Noa bhạbit te baṅ hoelen ol
Ạuri ru rege tapaṕen ḍhol.
Tiyạḱe̠na dibi
Dense sinduk cạbi.
Calaḱạń dibi ṭạnḍi
Kirińạń botol hạnḍi.
Ńuyạń ḍho̠k ḍho̠k
Roṛạń bo̠k bo̠k.
Gidrại me̠ne̠t́ kiriń boll.
Ar mit́ jo̠nae̠ kiriń ḍho̠l.
Baba jonae̠ ńui hạnḍi
Go̠go̠ bae̠ ńamle̠t́ khạnḍi.
Ńu lạgit́ hoyoḱ ṭaka
Baṅ kulạḱ jo̠m daka.
Baṅko ńame̠t́ mo̠ńj utu
Jo̠m akat́ ko se̠taḱ guhum sạtu.
Hae̠re̠ rạskạ dibi hạṭi
Baṅ hoyoḱ lạḍu mit́ bạṭi.
Rạskạ mo̠ne̠ do̠ sereń
Tumdaḱ saḍe dhạtir – tiṛiń.
Ńõ~hõ~ṛ macha tiriạ oroṅ
Go̠go̠e̠ huṛuṅ ḍhiṅki ḍhoṛoṅ.
E̠nte̠ re̠hõ hạsi – khusi
No̠a lạgit́ o̠koe̠ do̠si .
Nacar no̠a re̠ṅgeć jio̠n
Jage kulạu me̠naḱ tabon.
Nẽhõr mabon kisạṛ koṛa
Hạṭiń mabon rạskạ thoṛa.
O̠koe̠ kodo̠ kiriń kede
Bhạdại daka jom laḍe̠.
Baṅdo̠ okoe̠ maraṅ sạnḍi
Bondok kate̠ suti khạnḍi.
Rosogo̠lla jilapi
Jo̠m kedae̠ uni rapi.
Alta ,sono- pauḍar
Taka lạgịt́ e̠m cuḍar.
Baḍae̠ e̠na ṭaka bạnuḱ
Raḱ ke̠dam khunuḱ khunuḱ.
Rit pit ar bạnuḱ ạkil
Hạnḍim ńuyet́ gujuḱ dhạkhil.
Tinạḱ din bam bagiy hạnḍi
Unạḱ din baṅ kulạḱ khạnḍi.
Nana hunạr ae̠ma do̠kan
Papoṛ, boṛa hae re sokan
Dãsãe koṛa tumdaḱ ṭamak
Hanko ńel̠kom damak damak.
Teṅgun duṛuṕ hoṛaḱ bhiṛ
Calaḱ hoṛ do̠ hir hir .
Katha tahẽle̠n dibire̠ ne̠s
Sajaoḱae̠ nãhãḱ raj be̠s.
E̠nre̠hõ dibi rạskạ tege
Paro̠m calao̠e̠n ạḍi bhage.
Landa ke̠dae̠ kheṭe̠ kheṭe
Rạskạ kedae ạḍi ate.
Cekayam e̠nte̠ re̠ṅgeć hoṛ
Kạmi lạgit́ o̠koe̠hõ bako roṛ
Baṅ molin le̠n e̠nrehõ mẽt́
Onate ban rạskaya ce̠t́
Dibi ṭanḍi dãṛã o̠kte̠
Mon do̠ pase̠ć se̠rma coṭte̠.
Kạṭić gidrạwaḱ duluṅ gạḍi
Ṭhe̠pe̠ ṭhepe̠ hae̠re̠ sạḍe.
Jage kulạḱ biṛi cuṭi
Ce̠kayam bạnuḱ jel kuṭi.
Ne̠s nãhãḱ thoṛa thoṛa
Kalo̠m nãhãḱ jo̠to̠ pe̠ṛa
Jo̠mabo bhage̠ bhage̠
Sanam nãhãḱ mońj tege.
Jilạpi khạjạṛi ro̠so̠go̠lla
Aṅgro̠p jhaṅga ḍhilạ ḍhala.
Pạńci paṛhãṭ chapa sạṛi
Daṛanabon kuṭum baṛi.
Santal ho̠po̠n tayo̠me̠nako,
O̠lo̠ḱ paṛhao̠ḱre̠
Santal koko tayo̠me̠na
Kạmi kaj kore̠ge
Beret́pe jo̠to̠ santal ho̠po̠n
Mo̠n re̠aḱ jạpit́ khon
E̠ṭaḱ jạtikoko Lahaḱ kana
Abo do̠ tayo̠mge.