Jiwi mucạt́ ạyuṕ o̠kte

Iṛijoḱ jiwi bạti

Calaḱ so̠mo̠e baṅko hoyoḱ

Nut ńindạ reń gate.

Baṅ bahaḱ hạriạṛ dare

Rohoṛoḱa cur-mur

Rasa sendra baṅko hijuḱ

Ńeleko ar dumur.

Dare jo̠kho̠n goć calaḱa

Daḱ bae dula mạli

Jiwi mirue uḍạu calaḱa

Khańca tahen khạli.

Hạriạṛ cẽṛẽ uḍạu calaḱ

Tahẽn eken hoṛmo,

Aḍe pase peṛa-poṛosi,

Rag arko homo̠r.

Dis hudis marshal ḍahar

Nut baṅ tahen hor re,

Cando ńutum roṛ disại bon

Baṅkhan sanam eṛe.

Ale gạḍiạ piṇḍhạre dingie duṛuṕko̠ḱ,

Mase bhala ńe̠lepe nui loboḱ kõ̠ḱ,

Ghaney kidić ke̠de̠jo̠ḱ,

Ghaney tiạr so̠ko̠jo̠ḱ.

Ńe̠loḱrema ekal mõ̠ńjo̠ko̠ć,

Jo̠mkoae hako kaṭko̠m gạḍiạ ro̠ko̠ć,

Hilạuate gạḍiạ daḱ hõ̠co̠ so̠ko̠ć,

Jo̠m jo̠ṅaḱme kõ̠ḱ cẽ̠ṛẽ̠ mo̠ṭo̠ć-mo̠ṭo̠ć.

Ghaney dạṛ ghaney uḍạu phe̠ḍo̠ḱ,

Hako ńe̠lte hante-nho̠te̠y phe̠do̠ḱ,

Hako do̠e jo̠mkoa kikić ko̠ko̠ć ko̠ṭo̠ḱ,

Coelo ṭhoṇṭa ńe̠ltaepe thutmạ ho̠ṭo̠ḱ.

Ńindạma ho̠po̠n so̠ṅgey hạmbut́ko̠ḱ,

Dinman dinma hako lạgit́e tumbut́ko̠ḱ,

Dạṛete hako do̠e so̠gaḱ,

Gạḍiạ gaḍa ḍobhaḱ.

Kõ̠ḱmale go̠ćkede,

Sunum buluṅ bạnuḱtale,

Ce̠t́tele ro̠ṅ-cho̠ṅe̠a?

De̠n buḍigo sunum buluṅ,

To̠be̠ tho̠rle ro̠ṅ-cho̠ṅe̠a.

Hudiso̠ḱ kạnạń teheń,

Cekate bhala.!

Serma do̠ co̠ṭe̠n,

Ho̠ere rimil uḍạuḱkan,

Rimil tala huḍur bijli saḍekan,

Lạṭu kạṭić cẽ̠ṛẽ̠ ho̠ereko uḍạuḱkan,

Lạṭu mẽ̠ṛhẽ̠t́ jãhãj uḍạuḱkan,

Noa jo̠to̠ do̠ pase̠ć Iso̠raḱ lilạkan.

Hudiso̠ḱ kạnạń teheń,

Cekate bhala.!

O̠t do̠ latarren,

Kathae dhạrti hõ̠ gulạṇḍen,

Dhạrti cetan latar daḱ thamgiḍien,

Daḱre hakoko paeraḱkan,

Noa jo̠to̠ do̠ pase̠ć Iso̠raḱ lilạkan.

Hudiso̠ḱ kạnạń teheń,

Cekate bhala.!

Unạḱ usul-usul lạṭu kạṭić buru do̠,

Burure lạṭu-lạṭu dare,

Bir janwar sãote manwa hõ̠ no̠ṇḍege,

Beṛhaete e̠ke̠n hạriạṛge,

Noa jo̠to̠ do̠ pase̠ć Iso̠raḱ lilạkan.

Cedaḱ co̠…

Koṛage ńuiako hạṇḍi,

Ńameam goṭa ṭạṇḍi,

Cakhnatae do̠ Sim sạṇḍi,

Ać do̠ bole Jharkhaṇḍi.

Cedaḱ co̠…

Aṅga puṭạḱ godam suṇḍi,

Sãote tahe̠n lać kaṭa In kuṇḍi,

Calaḱ ako Bagmuṇḍi Jarmuṇḍi,

Aema ro̠ko̠m Iṅgrạji baraṇḍi,

Ge̠l mit́ pạris Hembrom,

Hansdaḱ,Baski,Besra,Soren,

Ṭuḍu,Kisku,Pauria,Cõ̠ṛẽ̠,Murmu,Maraṇḍi.

Cedaḱ co̠…

Bako bachao bạhu kuṛi,

Ńamkedeae mit́ ge̠le̠ gidrạ eṅgat ayo rạṇḍi,

Cahey menet́ chại baṅ se̠ nạṇḍi,

Oṛaḱre do̠ jo̠mạkin daka daḱ mạṇḍi,

Menaḱkore hõ̠ caole pe̠re̠ć jạrṇḍi.

Cedaḱ co̠…

E̠ke̠n menaḱtape kạu-kạu,

Metape kạnạń hendạ hạu,

Alosepe ńuia hạu,

E̠nho̠ bape bujhạu,

Ar tinạḱiń ro̠ṛa,

Iń rạput́ moca phogṛa.

Korona! Korona!! Korona!!!

am do̠ o̠ka kho̠ne̠m se̠ṭe̠r akana

iń do̠ń se̠ṭe̠r akana

cin diso̠m re̠aḱ huaṅg naṅgraha khon   

bo̠to̠r, bo̠to̠r ạḍi bo̠to̠r

go̠ṭa so̠maj re̠ ạḍi bo̠to̠r.

Eho̠ṕ ke̠dako lockdown

Mocare̠ko hurạṛ ke̠da mask

O̠ṛaḱ re̠ko do̠ho̠ ke̠t́ko home quarantine

 Niyo̠m ke̠dako o̠kte̠ nạpit re̠

haṭ bajar, bạnij be̠par

hante̠ nate̠ bạṅ daṛan

re̠ṅge̠ć nacar santal ho̠ṛbon

paṛao̠ e̠na ạḍi haro̠n re̠.

Nito̠ḱ do̠ se̠ṭe̠r akan vaccine

Hatao̠ mabon jo̠to̠ko bin bo̠to̠rte̠

rukhiạ bon ńam jo̠ṅa

Korona le̠kan maraṅ ro̠g khon.

Ińaḱ pạrsi ińaḱ go̠ro̠b

Ińaḱ pạrsi ińaḱ dho̠mo̠k

Ińaḱ pạrsi ińaḱ dho̠n

Ińaḱ pạrsi ińaḱ oporom

Ińaḱ pạrsi ińaḱ man

Ińaḱ pạrsi ińaḱ abhran

Ińaḱ pạrsi ińaḱ mẽ̠t́

Ińaḱ pạrsi ińaḱ sahẽ̠t́

Ińaḱ pạrsi ińaḱ jiwi

Ińaḱ pạrsi ińaḱ ạri cạli

Ińaḱ pạrsi ińaḱ aṛaṅ

Sebel he̠ṛe̠m saḍe raṛaṅ.

Sedae do̠….

Lajao tahẽ̠kan,

Lajao tahẽ̠kan do̠,

Sajao tahẽ̠kan.

Sedae do̠….

Man mano̠t tahẽ̠kan,

Man mano̠t tahẽ̠kan do̠,

Jo̠to̠aḱ tahẽ̠kan.

Sedae do̠…

Iṅgạń Ạpuń bo̠to̠r tahẽ̠kan,

Bo̠to̠r cabaen do̠,

Jo̠to̠aḱ cabaen.

Sedae do̠….

Ato ṭola ho̠ṛaḱ manao ganao tahẽ̠kan,

Manao ganao cabaen do̠,

Sanamaḱ cabaen.

Sedae do̠….

Lạṭu kạṭić ho̠ṛaḱ ijjạt tahẽ̠kan,

Ijjạt tahẽ̠kan do̠,

Aema tahẽ̠kan.

Sedae do̠….

Lạṭu kạṭić ho̠ṛaḱ sạgại tahẽ̠kan,

Sạgại cabaen do̠,

Ce̠t́ hõ̠ baṅ sare̠ćlen.

Sedae do̠….

Duk bipo̠tre go̠po̠ṛo̠ḱ tahẽ̠kan,

Go̠po̠ṛo̠ḱ cabaen do̠,

E̠ke̠n ro̠po̠ṛo̠ḱ bańcaoen.

Dulạṛ Dulpulạṛ ma hoyen

Gel pon february

Dạṅwạrege chạḍwi ako̠

Chạḍwiako̠ tinạḱ co̠ṅ ko̠ṛa kurị.

Juạn ko̠ṛawaḱ ro̠moń rasa

Tearako̠ jio̠n gate

Ragako̠ jo̠to̠ bạckạr sado̠m,

Bạlis hạṛuṕ kate.

Dulạṛ ńutumte uku coku,

Ro̠ḍo̠ć jo̠ṅako̠ heṛem,

Ako̠aḱ monere kuṛi ho̠po̠n do̠,

Eken so̠ṛo̠m sebel reṛem.

E mại am do̠ mano̠tiạ,

Sirjo̠n ḍaharem arsala,

Nasem tho̠ṛam gayo̠ḱlenre Jiwim hale dale.

Amdo̠ pạurạ…..

Hudis ocońam,

Gunạn ocońam,

Okareń ńam?

Amdo̠ pạurạ…..

Ghane̠ń dul milạume,

Ghane̠ń hilạume,

Setaḱ ạyuṕ baco̠ń ḍhilạume.

Amdo̠ pạurạ….

Ghane̠m bhindạṛ ocoń khe̠tre,

Ghane̠m bhindạṛ ocoń le̠ḍtre,

Cetan latar co̠ṭ phe̠ḍre.

Amdo̠ pạurạ….

Ghane̠m chilkạuḱ,

Mõ̠ńjem ạikạuḱ,

Ho̠ṛmo̠ mo̠ne̠ hilạuḱ.

Amdo̠ pạurạ….

Cedaḱ co̠?

Era uru kho̠n jạstiń dulạṛme,

Dho̠n durib kho̠n ḍhergeń dulạṛme.

Amdo̠ pạurạ….

Cahe cabaḱtiń khet baṛge,

Cahe cabaḱtiń hasa jumige,

E̠nhõ̠ dulạṛmeạń bạṛtige.

Onoṛiạ do Inḍiaren kanae.

Bo̠ho̠ḱre moṭra dipil kateḱ,

Tarenre jhola go̠ḱ kateḱ,

Laha tayo̠m ko̠yo̠ḱ kateḱ,

E̠ Go̠…! Ar Tinạḱ Sạṅgiń?

Bạnuḱko ho̠ṛ so̠ṛo̠kre,

Nijhum sãć suć ho̠rre,

E̠ beṭa…alom kuliń,

E̠ Go̠…! Ar Tinạḱ Sạṅgiń?

Calaḱrege tahẽ̠nme,

Taṛamrege tahẽ̠nme,

E̠ Beṭa…ro̠ṛ ińaḱ ańjo̠mme,

E̠ Go̠…!Ar tinạḱ sạṅgiń?

Cekań lạiae beṭa tiń,

Ho̠r ạḍi sạṅgiń gea,

Lo̠lo̠ setoṅ sahao hoyoḱgea,

E̠ Go̠…! Ar Tinạḱ Sạṅgiń?

Nho̠te̠ bo̠ho̠ḱ reaḱ hamal,

Nho̠te̠ taren reaḱ hamal,

Nho̠te̠ beṭa tińaḱ kukli,

E̠ Go̠…! Ar Tinạḱ Sạṅgiń?

Bạbui me̠ne̠t́ ar balaṅ ruạṛ,

Beṭa tiń do̠ onatey ko̠yo̠ḱ ruạṛ,

Pulis hõ̠ janwar lekako khạṛ,

E̠ Go̠…! Ar Tinạḱ Sạṅgiń?

Jo̠maḱ bạnuḱ,

Paesa bạnuḱ,

Dokan bạnuḱ,

E̠ Go̠…! Ar Tinạḱ Sạṅgiń?

Moṭra jhoṭra,

Ạḍi sạṅgiń jatra,

Ho̠r birre khatra,

E̠ Go̠…! Ar tinạḱ sạṅgiń?

Bhagete daḱ tetaṅ,

Moṭra dipilte lo̠lo̠ḱ hataṅ,

Taṛam-taṛamme delaṅ,

Serma setoṅte elaṅ,

Bạnuḱ sãote ṭukuć celaṅ,

E̠ Go̠…! Ar tinạḱ sạṅgiń?

*Onoṛiạ do Inḍia ren kanae*_